Югдон вакыт

Ангелина Снигирева
By Ангелина Снигирева Ноябрь 6, 2019 15:34

Удмурт калыклэн даур талэсь азьло кунлык басьтэмез люконтэм герӟаськемын удмуртъёслэн 1-тӥ, 2-тӥ но 3-тӥ ӧтчамъёсынызы. Ӝутэм ужпумъёсъя но кулэлыксыя соослэн ваньзылэн кужымзы огкадь. Кыӵе сюресъя вамыштоз удмурт калык, выль элькунэ огазеяськыса? Кыӵе луонлыкъёс со сётоз? Та юанъёс пумысен сюлмаськизы ӧтчамъёсы пыриськисьёс.

Доклад лыдӟе В. Ившина
Туспуктӥз М. Егоров

Выль сямен дышетон

Трос ужпумъёс пӧлысь тужгес лэчытэз вал удмурт калыкез дышетон, удмурт школаосты усьтон-радъян. Вераськон ӧз мыны одӥг школа пумысен, ӝутэмын вал калыкез дышетонъя быдэс радлык кылдытон сярысь ужпум. Трокай Борисов одӥгаз ӧтчамын пусйиз: «Дышетскемезъя удмурт калык тужгес но бере кылемъёс пӧлы шедемын». Озьы ӧтчамъёсын огкылэ вуэмын вал: та ужез матысь дыре быдэстоно.

Историез чаклано ке, совето власть нырысетӥ аръёсаз ик дышетон системаез чылкак выль сямен радъяз. Соя школаосын дышетон предметъёсты йылтыны чакламын вал, нош «Закон Божий» — куштэмын. Вань церковно-приходской, миссионерской, земской но частной школаос кунлы сётэмын. Бӧрысь паськыт вӧлмыны ӧдъяз «ликбез» нимаськись кампания. Поселениын 9 аресысен 50 аресозь ог 15 неграмотной муртъёс вань ке, отын одно ик усьтоно школа. «Ликвидация безграмотности» радъяськиз асьме дорын но. 4-5 толэзьем курсъёсын дышетон мынӥз удмурт яке ӟуч кылын.

1918-тӥ арын РСФСР-ысь Просвещениея наркомат юнматӥз «О школах национальных меньшинств» постановленизэ. Соя котькуд калыклы эрик сётэмын вал дышетонэз быдэсак вордскем кылэ выжтыны. Озьы калыкез дышетон удысын выль пумо школа кылдӥз — национальной школа. Сое усьтыны-радъяны луонлык кылдӥз сыӵе интыосын, кытын анай кылынызы вераськись нылпиос школа усьтымон люкасько.

Ад но рай

Озьыен, удмуртъёслэн 3-тӥ ӧтчамзы усьтӥськыку, Трокай Борисов но, Иосиф Наговицын но, Кузебай Герд но тодо вал ни, совето власть дышетон удысын выльдӥськон ортчытӥз шуыса. Озьы 1920-тӥ арын Сарапул, Малмыж, Елабуга но Глазов уездъёсын усьтэмын вал покчиослы 176 удмурт школаос. Нош 1929-тӥ арын 235 школаын тодон-валан люка вал ни 30 сюрс 512 удмурт пинал.

Удмуртъёслэн Сарапулын ортчем 3-тӥ ӧтчамзы бере бӧрсьысь бӧрсе ортчизы удмурт дышетӥсьёслэн 4 съездъёссы. Ваньмаз валтӥсь интые потӥзы национальной школа удысысь ужпумъёс. 2-тӥ (1921-тӥ ар) но 3-тӥ (1924-тӥ ар) ӧтчамъёсын туж ӟырдыт вераськиз Кузебай Герд: удмурт нылпиосты дышетоно вордскем кылынызы! Та бӧрсьы «Гудыри» газетын печатлало солэсь гожъямъёссэ. Одӥгез нимаське «Малы удмурт кыл кулэ?». Со гожтэ: «Инородецъёслэн пиналъёссы ӟуч школае адэ кадь ветло, нош гуртазы соос райын кадь уло. Доразы соос эшъёсынызы удмурт кылын верасько. Анаез сое эркия, веша, будэтэ, удмурт кырӟанъёс кырӟаса-вераса, удмурт сямъёсын тодматыса. Атаез пияшсэ нюлэскы, лудэ нуэ, удмурт кылын валэктыса, дышетэ ужаны. Нош пинал 7 аресаз ӟуч школае пыре чылкак мукет дуннее пырем кадь. Одӥг кыл но уг вала, «Букварез» дышетыкуз…»

Отӥяз Кузебай Герд тодаз вае Малмыжын инспектор луыса ужам вакытсэ. Классэ пырыкуз, син шораз йӧтэ вылэм удмурт пиналъёслэн берпуметӥ партаос сьӧрын пукемзы. Дышетӥсьсылэсь отчы пуктэмезлэсь мугзэ юакуз, соиз валэктэ вылэм: «А, соос номыре уг валало, класслы ужаны гинэ люкетыса пуко». Но со пиналъёслы удмурт кылын вазиськод ке, синъёссы ик ӝуатско, шумпото. Одӥг классын 2-тӥ, 3-тӥ но 4-тӥ арзэ, пе, пукиськом ни. Отӥяз пиналлы чылкак акыльтэ одӥг классын пукыны, со школазэ куштэ но тӥни. Кузебай Герд пусъемъя, 100 пинал пӧлысь 20-ез бадӟымгес классэ выже ке, со туж ӟеч ини. Соин ик Кузебай Герд кыл вылаз юн сылӥз: «Удмурт пиналъёсты нылпи садысен но покчи классъёсысен анай кылынызы дышетыны кутсконо, собере гинэ выжоно ӟуч кылын дышетонэ».

Таин валче тодады вайытэме потэ на историез. Национальной школаосын вордскем кылын дышетон соку чылкак выль ӧй вал ни. Та уж мытэмын вал ни 19-тӥ даурлэн кыкетӥ ӝыныяз — Волга но Урал котырысь калыкъёсты православие выжтон вакытэ. Христианизацилэсь шуген мынэмзэ валаса, азьмынӥсь миссионеръёс одӥг малпанэ вуо: инородецъёслэсь пиналъёссэс ас кылынызы дышетыны кутсконо. Талы сӥзем нимысьтыз программазэ дасяз тодосчи-востоковед, Казаньысь университетлэн но Казаньысь духовной академилэн профессорез Н. Ильминский. Солэн программаез кема аръёслы инъет луиз инородецъёсты дышетон удысын. Озьы христианствое пыртон улсын амалтэк азинтоно луиз удмурт кылэз но, удмурт кылын дышетонэз но. Ӵапак та вакытэ удмурт кылын потыны ӧдъяло православилы сӥзем пӧртэм изданиос, кылсярысь, Н. Блиновлэн но В. Ислентьевлэн нырысетӥ удмурт учебникъёссы. Черк сюлмаськемъя грамоталы дышыса, уноезлы удмуртъёслы луонлык усьтӥське тодон-валанзэс азинтыны: Казаньысь инородецъёслы учительской семинариын, Бирскысь учительской школаын, Карлыганысь валтӥсь учительской школаын но мукетъёсаз. Ӵапак соос, педагогической образование басьтыса, луизы нырысетӥ удмурт интеллигентъёс. Соос пӧлын ик вал удмурт просветительёс-югдытӥсьёс.

Дышетӥсьёсты дышетон

Удмурт калыкез дышетонын тужгес но секытэз вал удмурт кадръёсты дасян. Удмурт комиссариатлэн нырысетӥ кивалтӥсез И. Наговицын вералляз но, трос гожъялляз но: «Туж кулэ удмурт кадръёс библиотекаосын, школаосын, грамоталы дышетон кружокъёсын. Но соос ӧвӧл. Дасяно соосты выльысь со материаллэсь, кудӥз вань ки улын («из того материала, что имеется под руками».) Со ужасьёсты тросэн-тросэн али ик дасяны кутсконо». Туж вакчи дыр куспын косэмын вал перепись ортчытыны: шедьтоно пичи ке но грамотаез валась удмуртъёсты, утчано улосамы пӧртэм удысъёсысь грамотной удмуртъёсты. Соос, пӧртэм семинариос но училищеос пыр потыса, ужало ни, но нокытын татчыозь лыдъямын-чотамын ӧвӧл. Соин ик тодоно, кӧня кадръёс кулэ луозы асьмелы азьланезлы, пусйылӥз И. Наговицын.

1918-тӥ арын Ижын, Елабугаын но Выль Мултанын учительской семинариос усьтӥськизы. Глазовын радъямын вал педагогический городок нимо дышетскон курсъёс — отчы ватсаськиз эшшо 2 школа. Нош 1921-тӥ арын учительской семинариос интые кылдӥзы педтехникумъёс, котькудаз нимысьтыз дышетӥзы удмуртъёсты. Елабугаысь педкурсъёс интые Трокай Борисовлэн сюлмаськемезъя Можгалан усьтӥськиз педтехникум. Нырысетӥ араз ик отчы пыризы 102 удмурт егитъёс.

Озьы 1918-тӥ арысен 1927-тӥ арозь вылӥ дышетскон заведениосты йылпумъяз 102 мурт, соос пӧлысь 51-ез луизы дышетӥсьёс. Со сяна, котькуд уездын усьтэмын вал покчиосты визьнодасьёсты но дышетӥсьёсты дасянъя вакчиятэм курсъёс.

Вань та уж пӧлэстӥськыса кадь мынӥз учебникъёсты дасян ужен. Потӥзы удмурт букварьёс но лыдӟон книгаос, удмуртэ берыктэмын мукет дышетскон книгаос. Та удысын мылысь-кыдысь тыршиз Кузебай Герд. Со ик кивалтӥз удмурт литературной кылэз радъянъя «Рудья» комиссиен. Та комиссилэн тыршемез туж пайдаё вал. Огласянь, тупатэмын удмурт кылъя литературной нормаос. Кыкетӥез, шонер гожъяськон правилоос кылдытэмын. Потӥзы та нормаосъя дасям словарьёс. Озьы кылем даурлэн 20-тӥ аръёсаз дасямын но поттэмын вал удмурт кылын но удмуртэ берыктэм 50 пала учебникъёс. Огъя тиражзы вуиз 400 сюрс экземплярозь. Озьы 1920-тӥ арын грамотаез тодӥсь удмуртъёслэн лыдзы 15 процент гинэ ке вал, 1926-тӥ арын будӥз 25,5 процентозь, нош 1930-тӥ аръёсы йылӥз 34,3 процентозь.

Та лыдпусъёс яркыт возьмато егит автономилэсь нырысетӥ вормонъёссэ. Удмуртъёслэн нырысетӥ ӧтчамъёсазы шонер сюрес быръемын вал — удмурт калыкез сайкатон, асваланзэ будэтон. Удмурт калыклэн визьмо-дано пиосызлэн: М. Прокопьевлэн, Т. Борисовлэн, И. Наговицынлэн, Кузебай Гердлэн — но мукет азьветлӥсьёслэн нимъёссы туннэ но кизили кадь яркыт пишто, соос ялан азьлане ӧтё йӧно, ужась удмурт калыкез.

Валентина ИВШИНА, педагогика наукаосъя кандидат, «Удмурт Кенеш» огазеяськонлэн Ижысь Октябрь ёросысь ёзэзлэн кивалтӥсез

Ангелина Снигирева
By Ангелина Снигирева Ноябрь 6, 2019 15:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<