Шаерлэсь данзэ дурись

Ангелина Снигирева
By Ангелина Снигирева Ноябрь 8, 2019 15:12

Шаерлэсь данзэ дурись

В. Ионов
Туспуктэм: udmurt.ru

Туэ 10-тӥ ноябре 100 арес тырмысал быдэс дуннеысь тодмо конструкторлы Михаил Калашниковлы. Соин ӵош «Ижмаш» заводын (туала «Калашников» концерн) кема аръёс ӵоже тыршиз Виктор Петрович ИОНОВ — Удмурт Республикалэн дано гражданинэз, Социалистической Ужысь Герой. Калашниковлэсь автоматсэ поттонэз ӟечомытэмез понна 2 пол пусъемын Ленин орденэн, «Серп и молот» зарни медален. Пенсие потыса, кема аръёс ӵоже кивалтӥз «Ижмаш» заводлэн музееныз.

Иж — бадӟым гурт

— Вордӥськи мон Ижын 1934-тӥ арын 26-тӥ июне. Ай соку Иж бадӟым гурт кадь вал: котькытын пу коркаос. Туала Иж шоры учкисько но воксё мукет городын улӥсько кадь потэ. Пичи дыръям анай-атаеным, дедуш-бабушеным ӵош улӥ Пролетарской урамысь (туала Пушкинской) 2 этажъем пу коркан. Учконо ке, мон чын-чын рабочийёслэн семьяысьтызы: атае но анае ласянь вань ӵыжы-выжыосы тыршемын кунысьтымы корт ӵыжатонъя пӧртэм заводъёсын.

Атае Пётр Андреевич Ионов 1929-тӥ арын ужаны интыяськем 10 номеро заводэ (туала «Ижсталь») — формовщике пуктӥллям. Кызьы заводэ пыриз, быдэс улонзэ отын ик тыршиз. Ижысь металлургической но механической заводъёсын ӟеч тыршемез понна пусъемын Горд Кизили орденэн. Мӧйымыса но тэк пуконэз ӧз тоды: заводъёсын тыршисьёслэн профсоюзэнызы кивалтӥз…

Заводэ интыяськемез бере ик атае тодматскем анаеным Анна Петровнаен, со но заводын ужа вылэм. Егит кузпалъёслы корка пуктыны музъем кесэг сётӥллям Ижысь Широкий пролкалэн кутсконаз — туала Удмуртской ульча но Карлутка шур вискын. Та интыез соку Березинские бараки нимаськомы вал. Ӵапак татчы Октябрь революцилэсь азьвыл рабочийёслы юртъёс пуктылэм чугун кисьтонъя заводлэн (туала «Редуктор») кузёез Николай Березин.

Отчы ик пичигес пу корка ӝутӥз атае но. Тодам кылиз анай-атаелэн кышкатэмзы: пеймытозь эн шуды, шпанаос ки улэ шедёд. Ма, вакытэз сыӵе вал. Бадӟымъёс уен-нуналэн заводын, нылпиос ас эрказыгес будӥзы, пӧлазы ичи ӧй вал лушкаськисьёс. Эшшо ке соку зол вӧлмемын вал трахома висён. Ярам, соин черланы ӧй шедьы. Ма, анай-атайлэн кышкатэмзы юнме вал: урам волятыны ӧй яратылы, ас поннамгес пукылӥ. Атайлэсь инструментъёссэ кутӥсько но син куспын кыӵе ке арбери пӧрмытӥсько вал. Атай бер ӝыт уж дурысьтыз вуэ но, мон солы сиськыны маза уг сётӥськы, выль лэсьтэм арбериеным ушъяськисько. Нош со мыным валэктэ: та интызэ тазьы юнматоно, та юдэссэ тазьы пуктыса ӟечгес луоз. Атаелэсь ик пыӵаз, малпасько, техника борды кыстӥськон мылкыд. Нялтас вераса, анае но быдэс улонзэ металлургилы сӥзиз — энергетик луыса тыршиз «Ижсталь» заводын.

Али кадь ик син азям пуксе покчи дырысьтым мукетыз суред но: Кызьпу арама котырын вож турын сыскись скалъёс. Маке быдӟа уллё! Соос заводлэн ваньбуреныз лыдъяськылӥзы, рабочийёсты пичи ке но йӧлэн-сӥлен сюдон понна соосты возьылӥзы. Шуисько ук, Ижын соку воксё гуртын кадь улӥмы.

Анай-атаеныз но сузэр-вынъёсыныз

Нырысетӥ классэ мон вамыштӥ Быдӟым ож кутскем бере. 4-тӥ классэз йылпумъяй Ижысь 3 номеро школаын (56 номеро гимназия), 5-тӥ классэ мынӥ 30 номеро школае (лицей). Тужгес но капчиен сётскылӥз математика. Эшъёсы задачаос бордын йырзэс тӥяло ай, нош мынам ответэ тетрадям гожтэмын ни. Гуманитарной предметъёсъя но бере ӧй кыльылы, туж яратылӥ лыдӟиськыны. Но соку кулэ луись книга шедьтыны секыт вал, соосты сурыкмытозязы киысь кие сётъяллямы. Вот ведь улон вуиз: книгаос табере ӝажыос вылын лачак, нош лыдӟись ӧвӧл.

8-тӥ класс бӧрсьы уноез эшъёсы заводъёсы ужаны кошкизы. Мынам но мылкыды вал, но анаен атай но, дышетӥсьёсы но 9-тӥ классэ мыныны косӥзы. Дышетскыса, пе, тынэсьтыд тросгес пайда потоз. Индылонъёссэс санэ басьтӥ. Озьы школаез йылпумъяй азвесь медален 1952-тӥ арын.

Лушкем дышетскон

— Аттестатэ киям, кытчы табере шонтоно? Трос пол кылэме вал Москваысь Н. Бауман нимо техникая университет сярысь. Вот, малпасько, кытын мынам дышетскеме потэ! Но Ижлэсь палэнэ кошкыны ӧз кылды: ӵап со аре асьме дорын усьтӥськиз та университетлэн филиалэз — Ижысь механикая институт. Студентъёсты дышетыны вуизы Москваысь нимо-дано дышетӥсьёс.

Пӧртэм изделиосты бичаны-сэрттыны пичиысен яратылӥ бере, ӵектӥзы «Е» факультетэ пырыны. Тодӥсько вал, со секретной шуыса. Дышетскон ар кутскем бере ик документ улэ гожтӥськыны косӥзы — кун тайнаез уг шарая шуыса. Лекциосын гожъямъёсмес, учебникъёсты сьӧрамы кутылыны ӧз лэзьялэ. Семинаръёслы, экзаменъёслы дасяськылӥмы институтын гинэ. Озьы милемыз лушкем дышетӥзы пыӵал тӥрлык поттыны.

Производственной практикаме ортчылӥ Ижысь машиностроительной (бӧрысь «Ижмаш» нимамын), озьы ик механикая заводъёсысь пыӵал гумыос лэсьтонъя цехъёсын. Лэсьтэм арбериосмес уж вылын эскерон понна ветлӥмы Челябинск улосысь Чебаркульысь, озьы ик Подмосковьеысь Щуровский полигонъёсы. Ӵапак отын тодматски Михаил Калашниковен. Лапеггес гинэ мугоро, рос-прос. Юан сётӥськод — лад-лад валэктэ, кыӵе ке ӵектонэд вань — сак кылзэ. Диплом уже мынам сӥземын вал ӵапак солэн АК-47 автоматэзлы. Дышетсконме ӟеч йылпумъяй 1957-тӥ арын.

Всё, малпасько, пыӵал тӥрлык поттыны дышетски, диплом басьтӥ, табере дыр вуиз пичи дырысьтым мукет малпанме быдэстыны — самолёт лэсьтыны. Ульяновскысь авиационной заводэ мыныны ӝуткаськи ни вал. Но китӥм кырмизы, шуизы: «Петрович, эн кошкы, кыль Иже». Ижысь машиностроительной заводысь 78 номеро цехе мастере ӧтизы. Отын лэсьтылӥзы АК-47 автоматлы затворъёс. Шуизы: «оружейник» кылэз самой матысь эшедлы гинэ но эн потта, кытын ужамдэ юазы ке, мотикъёс лэсьтӥськом, шу. Кун тайнаез шараяд шуыса чагиськизы ке, пытсэт сьӧры шедёд!

Ӵош ужась эшъёсыныз

Цехысь арлыдо мастеръёсын мон огкыл ӝог шедьтӥ. Шорам еж шуыса ӧз учкылэ ке но, учыр тупаку, тодон-валанъёсме эскерыны выризы ик. Огпол калибр лэсьтӥсьёс дортӥ ортчисько. Одӥгез вазе: «Петрович, чугун арбериме кыӵе буёлэн меда шобыртоно?» Валатскисько: исам каро, уг тодӥськы, кожало. Шуисько: вӧйдэ потты но таш-таш зыра.

Пыӵал тӥрлык поттонын, мукет производствоын сямен, ӵукнаысен ӝытозь гинэ ужано ӧз луылы. Ӵем дыръя заводэ уйлы но кыльылӥмы. Огпол вужмем станокъёс интые выльёссэ вайизы. Косӥзы: соосты пуктылоно, производствоез уретытэк. Вошъямы соосты уйин: мастеръёс ӵукна вуэмзы бере ик уж борды ӝегатскытэк кутскыны мед быгатозы. Но тазьы уен-нуналэн ужаме пумысен огпол но ӝожтӥськеме ӧвӧл — пыӵал тӥрлык поттонын мукет сямен луыны но уг быгаты кадь. Таиз пыӵаз, малпасько, арлыдо мастеръёслэсь. Соос угось Быдӟым ож вакытэ, заводысь арняосын-толэзьёсын потатэк, тыршемын, фронтлы тӥрлык поттэмын. Огпол но улон вылэ ӝожтӥськемзэс кылэме ӧвӧл.

Ӝоген монэ валтӥсь мастерозь ӝутӥзы. Атае та пумысен шуылоз вал: «Витя, начальникозь ӝутскид ке, рабочийёсты ноку эн ултӥя, котьку юрттыны тыршы. Производствоын секыт югдур кылдыку, ӵапак рабочий ик тыныд нырысь ик юрттоз». Та кылъёссэ котьку тодам вози.

Шекъёс дуно усё

— Валтӥсь мастерын кӧня ке ужаме бере мыным оскизы бадӟым удысэз — 1965-тӥ арозь кивалтӥ 78 номеро цехлэн технологияя бюроеныз. Нунал куспын сюосын изделиос поттоно луылӥз. Ваньзэ киын, туала вакытэ сямен, визьмо станокъёс ӧй вал на угось. Тужгес но секытэн мынӥз пыӵаллы затвор лэсьтон: котькудӥзлы нимаз рама бичано, сборка дыръя соос медаз сураське шуыса, корт вылэ киын ик номер пуктылӥмы. Та муген ӝеган кылдылӥз. Кыӵе амалъёс юрттозы ӝоггес ужаны — уен-нуналэн йырме тӥяй. Производстволэн шекъёсыз пумысен ивортӥ бадӟым кенешонын: огазе люкаськизы вал кунысьтымы военпредъёс, пыӵал тӥрлык поттӥсь конструкторъёс. Затворлы котькуд рама тупаны кулэ, технологиез воштоно, шуисько. Ватсай на: затворез лэсьтӥськом анданлэн тужгес секыт маркаезлэсь, сое воштоно капчигес кортэн. Ӵектонме санэ басьтӥзы. Ӝоген технология выльдӥськиз. Затворлы котькуд рама тупаны кутскиз, секыт анданэз воштӥмы хромен-бромен суралтэм анданэн. Ужазинлыкмы кӧня ке поллы ӝутскиз.

Бӧрысь монэ пуктӥзы 76 номеро цехлэн кивалтӥсезлы воштӥсе. Та цехлы оскемын вал пыӵаллэсь тужгес секыт люкетсэ — гумызэ — лэсьтон. Солэн кузьдалаез 70 сантиметр, пушказ 7 миллиметр диаметрен пасьёсыз луыны кулэ. Нош станокъёс сьӧрын нылкышноос ужало. Гумы портонзы я тӥяське, я кырыж кошке. Татын но шекъёсты палэнтон борды басьтӥськи. Тодам лыктӥз Австриын кутӥськись технология. Нялтас вераса, та кунлэн пыӵал тӥрлык поттонъя школаез одӥгез вашкалаез но азьмынӥсез. Соослэсь амалзэс кутӥмы: вакчи корт болванкалэн пушказ 12 миллиметръем пась портыны кутскиськомы, со вие ик сое пачкатӥськомы но котыртӥз молотъёсын шуккылӥськомы. Озьы гумыосты кыскылӥмы кӧня кулэ. Кӧня ке ар ортчыса, заводамы вуттӥзы Австриысь ӵапак таӵе станокъёсты. Производствоез радъяны кунгожсьӧр специалистъёсты ӧз лэзе — предприятие секретной угось. Шуизы: асьмелэнъёс ваньзэ асьсэос валалозы. Соослэсь технологизэс кемалась кутӥськомы вал ни бере, станокъёсынызы ужан капчиен сётскиз. Та амалэз пыӵатэме понна ик монэ пусйизы Ленин орденэн — та вал нырысетӥез. Монэ вите на вылэм кыкетӥез но таӵе орден…

«Ижмашлэн» музеяз ужакуз

Гумы поттонъя цехын ужакум ик, ӵектӥ гумыосты электроток улсын хромен шобыртыны. Озьы гумы ӟечгес луиз, бракованнойёсызлэн лыдзы кулэсмиз. Та амалэз дуннеын нокытын уг куто на вал. Шуизы: ож тӥрлык поттонын, пе, зэмос революция ортчытӥд.

Со вакытэ нуналлы быдэ сямен кенешылӥ Михаил Тимофеевич Калашниковен. Огпол солы шуисько:

— Пыӵаллэсь тани та люкетсэ йылсо лэсьтӥськомы, нош кӧня ке дыр ортчыса, сэргыз зыраськыса быре, котырес луэ — пыӵал кырыж ыбылӥськыны кутске. Умой луысал та люкетсэ станок сьӧрын ик котырес лэсьтыны, со понна технологиез пичи гинэ воштоно луоз.

Со монэ сак кылзӥз но шуэ:

— Шонер вераськод. Лэсьты, кызьы кулэ.

Михаил Тимофеевич угось кыл кутӥз автомат кылдытон-малпан понна, нош мон — сое бичан но уж вылын эскерон понна.

Кӧня ке ар ортчыса, монэ 102 номеро цехлы кивалтӥсе пуктӥзы, бӧрысьгес кыл кутӥ заводысь механосборочной производство понна. 1982-тӥ арын юнматӥзы заводлэн кивалтӥсезлы воштӥсе — продукцилэн ӟечлыкез понна кыл кутӥ. Со вакытэ мар но ӧз поттэ заводын: «Москвич» машинаос но, мотоциклъёс но, пыӵал тӥрлык но. Тырши рабочийёслэсь ужзэс капчиятыны но со вие ик продукцимылэсь ӟечлыксэ йылтыны. Угось производствоын пумиськись брак — со нырысь ик кунлы ыштон, выльзэ изделиез лэсьтон дуногес усе. Соин ик та ласянь чурытэсь куронъёс пуктылӥзы. Выль амалъёсты пыӵатэменым, кунлэн уксёез-ваньбурез шыръяськиз.

900 пар колготки

— 1975-тӥ-1976-тӥ аръёсы йылпумъямын вал 7,62 калибръем АК-47 автоматъёсты поттон. Со интые бичаны кутскимы 5,6 миллиметръемзэ. Пыӵал тӥрлык поттонэз ӟечомытонын тыршеме понна 1982-тӥ арын кыкетӥ ползэ пусйизы Ленин орденэн.

Тунсыко: АК-47 автоматлы ныд (приклад) поттӥзы Арсеналлэн юртаз — али отчы интыяськемын Национальной музей. Ныдъёсты пулэсь дасяку, трос тузон пурӟылӥз. Нош кыдёкын ик ӧвӧл Правительстволэн юртэз — КПСС-лэн Удмурт обкомезлэн нырысетӥ секретарезлэн Валерий Марисовлэн кабинетэз. Производствоысь тузон вуэмен, со йӧназ ужаны быгатымтэ. Монэ дораз ӧтиз но косӥз: производствоез заводлэн липет улаз выжтоно. Соглаш кариськи. Эшшо ке верай на полиамид сярысь: пыӵаллэсь ныдзэ та материаллэсь лэсьтыны луоно. Солы ӵектонэ туж кельшиз, ӝоген басьтӥськимы сое пыӵатон борды. Нош полиамидлэсь нылкышно колготкиосты лэсьтылӥзы. Одӥг ныд лэсьтон понна кулэ вал 900 пар колготкилы тырмымон материал. Нош со бадӟым дефицитын вал. Эшшо ке ми, пыӵал тӥрлык поттӥсьёс, та материалэз быдтылӥмы…

Выльдӥськон вакыт кутскем бере заводъёсын югдур секыт луиз. Ӵапак со вакытэ монэ ог 3 арлы Ливие келязы. Отын АК-47 автоматъёсты поттӥсь предприятизы 1980-тӥ аръёсы усьтэмын вал ни. Но рос-прос кивалтӥсь сюрымтэен, производствозы гуньдэм. Отчы вуимы быдэс группаен, соин кивалтыны оскемын вал мыным. Нырысь вуимы Триполи городэ, собере нуизы Сахара пустыня шоры — ӵапак отын интыяськемын вал заводзы. Матысь городозь — Бени-Валид карозь — 10 иськем. Кытчы гинэ эн учкы, котькытын мӧзмылэс суред — пеймыт-ӵуж луо, вистэм-вожтэм поръясь тӧл.

Семьяез

Но мӧзмыны дыр ӧз шедьылы. Кутски дисциплина бордысен. Заводзы, малпасько, татчыозь тыро-пыдо ӧз ужа бере, специалистъёссы но азьтэмскемын. Соос азе чурыт курон пуктӥ: кин нормаез уз быдэсты, уждун уз басьты. Бызьылыны ӧдъязы, кӧня ке дыр ортчыса, завод рос-прос ужаны кутскиз.

Тунсыко потӥз: производстволы кулэ луись чертёжъёсты ми бумага вылэ суредаськом, нош Ливиысь специалистъёс соосты выжто пластмасса лист вылэ. Малы, юаськомы, озьы курадӟиськоды. Соос вазё: тӥ, пе, кошкоды, бумага сурыкмоз, кытысь тодомы-валаломы на, кызьы ужано.

Пустыняе уг кельты!

— Егитысен, заводысь потатэк, тырши бере, кытысь-о кузпал пумиталод? Конешно, производствоысь! Заводын кӧня ке нунал гинэ ужасько вал ай, учкисько но, ӝӧк сьӧрын суредам кадь чебер-сьӧд синкашо нылаш пуке. Тодматскимы: нимыз Татьяна, технолог. Ӝоген уж дурысь ӵошеннамы бертылыны кутскимы. 1960-тӥ арын сюан ортчытӥмы, вуоно араз вордскиз Андрей пимы, 4 ар ортчыса — Ирина нылмы. Татьяна Васильевна, эсьмаса, мон сьӧры Ливие но мынӥз, огнадэ, пе, уг кельты пустыня шоры.

Иже берытскеммы бере Россиын выль улон вал ни. Кызьы ужалозы обороная предприятиос — валантэм. Мыным ӵектӥзы «Ижмаш» заводлэн музееныз кивалтыны. Заводлэсь улонзэ, пе, тон кадь ӟеч тодӥсь ӧвӧл. Соглаш кариськи. Ма, пенсие потон арлыды вуэмын вал ни, но малпай, дорын тэк пукыны уг чида.

Басьтӥськи музеез экспонатъёсын узырмытон борды. Заводэн кивалтэм муртъёслэн тыро-пыдо туспуктэмъёссы гинэ но ӧй вал. Мар веранэз ни заводын поттэм арбериос сярысь.

Одӥг гуртысь воргоронэз шедьтӥ — песятаезлэн атаезлэсь, пе, кылемын заводын поттэм вашкала пыӵалэз. Вуза, шуисько, сое музейлы. Уксё кулэ ӧвӧл, йӧло-вӧё скаллы, пе, воштысал. Мар карод: аслам уксёеным скал басьтӥ, сое гуртаз вуттӥ. Озьы музеймы вашкала экспонатэн узырмиз. Та ласянь туж юрттӥз заводлэн со вакытэ кивалтӥсез В. Гродецкий. Уксёен но, арбериосын но, шуэм сямен. Музее мотоциклъёсты но вуттӥмы. Но кивалтӥсь соосты утялтыны косӥз: малпан, пе, кылдэ, заводын мотоциклъёсты гинэ бичазы шуыса. Мон ӧй кылзӥськы. Озьы В. Гродецкий вуэмлэсь азьвыл соосты пеймыт висъетэ пуктӥсько вал, кошкемез бере выльысь коридоре поттӥсько. Огполаз со шуак вуиз — Великобританиысь принцен. Мотикъёсты ватыса ӧм вуттэ. Принц синмаськыса быриз 1929-тӥ арын бичам «Иж-1» мотоцикллы. Вузалэ, пе, мыным. В. Гродецкий шуиз: кызьы ке мукет дыръя…

Туэ 85 аресме тырмытӥ ни, заводэлэсь люкиськыны уг ӵыдӥськы — пыриськисько ветеранъёсызлэн кенешазы.

Елена Никитина

Ангелина Снигирева
By Ангелина Снигирева Ноябрь 8, 2019 15:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<