Чупчи дур чеберске

Ангелина Снигирева
By Ангелина Снигирева Ноябрь 8, 2019 15:26

Ар талэсь азьвыл гинэ Глазовысь Чупчи шур кузя пуксем Горсад нимаськись инты шоры учкон йӧныз ӧй вал. Табере глазовъёс понна со огез яратымон инты луиз.

Кивалтӥсьёс Горсадэн тодматско
Фото: udmurt.ru

— Город шоры интыяськем сад пыртӥ ортчись сюрес вылэ уд поты вал: пеймыт, юзырес, кырсь. Табере татысь сюлэм ик уг ӵыды. Ваньмыз со егит пияшлы Валентин Наговицынлы луыса. Со калыкез бугыртыны, садлы выль улон сётыны быгатӥз, — огымысь кадь верало садэтӥ поръясьёс. Нош Валентинэз тодмась арлыдоос егит пиосмуртлы тау каро, ӟыгыръяло.

Валентин Наговицын эшъёсыныз ӵош садэз утялтон борды 2014-тӥ арын ик кутскиз ни вал. Но субботникен гинэ югдурез уд тупаты шуыса, «Моногорода.РФ» сайтын куара сётон радъязы, вормизы. Проектсэс улонэ пыӵатон борды мылысь-кыдысь басьтӥськизы. Таин валче кылем арын сад воксё чеберскиз. Чупчи шур дурын кылдӥз амфитеатрен смотровой площадка. Со городлэн шорсюлмыз выллем луиз. Татын табере радъяло концертъёс, ужрадъёс, праздникъёс, татын, библиотекаын сямен, адямиос лыдӟиськыса пуко.

Туэ садэз выльдон азинтӥськиз. Пыдын ветлон сюрес вылэ лэсьтӥзы ӟечыранъёс, беседкаос, кылдӥз нылпиослы шудон комплекс.

— Таин гинэ буйганы ум малпаське. Акациен алям куакъёс интые ноябрь пумозь мерттыны малпаськомы пужым, тыпы, беризь но мукет писпуос. Садэз паськытатыны кулэ. Буш, аналтэм интыос трос на. Али Глазов город администрациен проект лэсьтӥськомы, — вера Валентин Наговицын.

Горсадэтӥ поръясьёс уно
Фото: udmurt.ru

Али верасько вуз каронъя центръёсын, инвесторъёсын, сад котыре павильонъёс но кафеос усьтоно шуыса. Соку сад эшшо но бордаз кыскись луоз, толалтэ шунскыны пырон интыос кылдозы.

Садэн тодматскыкуз, Валентин Наговицынлэсь таӵе сюлмаськонъёссэ умоен пусйиз Удмуртилэн Тӧроез Александр Бречалов.

— Калык шутэтскон интыосты выльдон, калыклы ярамон карон — валтӥсь интыын. Калыклэсь мылкыдъёссэ азьланяз но санэ басьтомы, семьяен шутэтскыны интыос кылдытон сярысь сюлмаськомы. «Инициативное бюджетирование» проектэ калык но мыло-кыдо пыриське, дэмен ужанлэсь кулэлыксэ вала, соин но троссэ ужпумъёсты интыысьтызы валче вырӟытыны луэ, — шуэ Александр Бречалов.

Нош Валентин Наговицын городысь Киров нимо ульчазэс выльдонъя проект борды басьтӥськиз ни. Али калык пӧлын кенешон мынэ, кыӵеен адӟемзы потэ та ульчаез. 

Елена Сараматова

Ангелина Снигирева
By Ангелина Снигирева Ноябрь 8, 2019 15:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<