Чебер вамышъялом!

Ангелина Снигирева
By Ангелина Снигирева Ноябрь 13, 2019 10:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Данакез мӧйыос ӝожтӥсько, суй-пыдъёссы, сюрлы котырзы вӧсь луэ шуыса. Ӵемысь со герӟаськемын луэ артритэн. Мар со сыӵе? Ку кылдэ? Кызьы солэсь утиськоно?

Пыдын вамышъян котькинлы иназ мынэ
Туспуктӥз М. Егоров

Малы?

Артрит — ёзвиосын (сустав) воспаление, со лябӟытэ куажымъёсты но, сӧнъёсты но, ёзвиос бордысь лыосты но… Висён огдыре кӧнялы ке буйгалля кадь, собере нош ик берытске. Лек вакытэз 1 арняысен кӧня ке арняозь кыстӥське.

Малы со кылдэ? Мугъёсыз туж трос. Шӧдӥськыны быгато кема кыстӥськись висёнъёс, кылсярысь, остеопороз, подагра но мукетъёсыз. Суставъёсты быдто ныр, ньылон, кызян ёзъёс (орган) пыр алясь, сюлын возиськись инфекциос, инкуазьысь мугоре шедись висёнъёс — шырвисён, лемтэйвисён. Уката но — адямилэн висёнъёсын нюръяськон кужымез (иммунитетэз) ляб ке.

Нимысьтыз группае пыртыны луэ пӧртэм шуккиськонъёс бере кылдэм артритъёсты. Шергес пумиське мугорын веществоослэн вош­тӥськеменызы сэрен кылдэм артрит. Но таиз уката секытэн ортче.

Кызьы верам, артритлэн мугъёсыз пӧртэмесь, ортче но со пӧртэм сямен.

Спондилоартроз дыръя, кылсярысь, лябӟемын луо сюрлы бордысь ёзвиос. Туж паськыт вӧлмем висён! Эскеронъёс возьмато: спондилоартрозэз ӵемысь — ог 80 процент учыръёсы — сурало остеохондрозэн. Соин ӵемгес курадӟо воргоронъёс. Та висён дыръя тыбыре массаж лэсьтыны, секыт ӝутканы уг яра.

Остеопороз лыосты лябӟы­тэ, ӧжытак шуккиськыку но, соос чигыны быгато. Лыос но суставъёс сокем висё, буйгатыны уг вормо эмъюмъёс но. Остеопороз вазьгес кырмиське но секытэнгес ортче, адями тамак кыске, кофе, газэн вуос трос юэ, шунды шоры ӧжыт возьматъяське но кальциен узыр сиён тырмыт уг сиы ке.

Подагрической артрит кылдэ, ёзвиосы мочевой кислоталэн сылалъёсыз люкаськыны кутско ке. Таӵе учыръёсы суй-пыдъёс туж вӧсь луо, уката но вамышъяку. Висёнэз кортнаны луэ, кӧй сиёнлэсь, курытсэ юонлэсь куштӥськыса гинэ.

Ревматоидной артрит кӧня ке арня куспын аля, суставъёсты туж ӝог сузмытэ. Адями инвалид кыльыны быгатэ. Но висёнэз кортнаськод ке, со каньылгес ортче, адями уже но ветлыны быгатэ.

Реактивной артрит кылдэ палэнысь микроорганизмъёс, инфекциос шедё, нош мугорлэн соосын нюръяськыны кужымез уг тырмы ке. Таиз висён золгес вӧлмемын егитъёс пӧлын, бӧрысь со туж ӵем выже артрозэ но спондилоартрозэ. Берло дыре реактивной артрит уката аля нылкышноослэн но воргоронъёслэн матысь кусыпъёссы пыр вӧлмись инфекциосын сэрен.

Кинлы вазиськоно?

Ас коже йӧнатӥськыны уг яра — одно вазиськоно специалистлы. Угось со гинэ валалоз, кыӵе муген суставъёсын воспаление кутскемын. Нош валатэк эмъяськыны турттыку, артрит кема кыстӥськись висёнэ выже: ватӥськыса улоз, собере выльысь но выльысь ачиз сярысь вераллялоз. Соин ик суставъёсты 2-3 толэзь ӵоже висё ни ке, одно эскериськоно, ревматологлэсь, неврологлэсь, травматологлэсь дэмланъёссэс быдэсъяно.

Висёнды шоры киыныды шонтӥды ке, артрит борды кырмиськыны быгато артроз яке остеоартроз. Артроз уката ӵем шуге-леке вуттэ шоро-куспо арлыдо но мӧйы нылкышноосты. Но берло дыре со кырмиське ни егитъёс борды но. Озьы суставъёс дырызлэсь вазь пересьмыны кутско, адями пумен секытэнгес но секытэнгес вамышъяны ӧдъя. Эскеронъёс возьмато: артроз адямилэсь улонзэ шорлыдын 9-10 арлы вакчиёмытыны быгатэ.

Мар юрттоз?

1) Ёзвиосты лябӟемын ке, пыдын трос ветлоно ӧвӧл, секыт арбериосты ӝутканы уг яра.

2) Эмъясь дэмла ке, одно бодыен, костылен ветлоно, лавкаосын нимысьтыз стелькаос, бандажъёс вузасько — соос пайдаё луозы.

3) Специалистъёсын кенешытэк, пыр-поч эскериськытэк, эмъюм юыны уг яра.

4) Ёзвиос висьыку, эмъюмъёс юэмен ӵош туж чаклано диетаез.

5) Улондэс капчигес карозы мазьёс, пластырьёс, аппликациос.

6) Артрит но артроз дыръя туж юртто физиотерапия, массаж, иглотерапия (но лек висён вакытэ уг яра!)

7) Висён муре пыӵамын ни ке, операция лэсьтытэк уз луы.

8) Висёнлэн лек вакытэз ортчем бере, туж пайдаё луоз эмъян гимнастика.

9) Санаторийын-курортын тазалыкез юнматыны луоз, артритлэн лек вакытыз бере 4-6 толэзь ортчыса гинэ.

10) Эмъян учреждениосын ужало ёзвиосынызы, сюрлыэнызы курадӟисьёслы школаос. Кылсярысь, сыӵе школа 15 ар пала толэзьлы быдэ радъяськылэ ни Диагностикая элькун центрын. Отысь занятиос онлайн-амалэн возьматӥсько ёрос больницаосын но. 

Светлана ШАБАРДИНА, Диагностикая элькун центрысь профилактикая ёзэн кивалтӥсь, вылӥ категориен ревматолог

Ангелина Снигирева
By Ангелина Снигирева Ноябрь 13, 2019 10:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<