Фин-угор кылъёсты огазеяз кылбур

Ангелина Снигирева
By Ангелина Снигирева 20 ноября, 2019 12:46

22-тӥ коньывуонэ Ханты-Мансийск городысь библиотекаын ортчиз «Загляну в свою ладонь» книгалэн презентациез. Отчы пыремын одӥг гинэ кылбур — но печатламын со 16 фин-угор кылъёсын.

Ханты-Мансийскысь Алла Иштимирова-Посохова
Туспуктэм басьтэмын: Фин-угор кылъёсты огазеяз кылбур

Кылбурез ӟуч кылын гожтӥз Ханты-Мансийскысь Алла Иштимирова-Посохова кылбурчи, актриса. Со вордскемын Ханты-Мансийск автономной округысь Полноват каргуртын, ужамын обь-угор калыкъёслэн «Солнце» театразы, али 
Ханты-Мансийскысь библиотекаысь шаертодонъя отделын тырше. Кылбуръёсыз антологиосын но бичетъёсын печатласько.

— Выжыям хантыос но, мансиос но вань, но, жаляса верано, та кылъёсын уг гожъяськиськы, — вера Алла. — Но куддыр шӧдӥсько, кыӵе ке мылкыдэз возьматыны мыным ӵапак та кылъёс уг тырмо шуыса. Огпол мон малпай: нош ханты но манси кылъёсын кылбуръёсы кызьы чузъяськысалзы? «Загляну в свою ладонь» кылбурме та кылъёсы берыктӥзы калык сям-йылолъёсты ӟеч тодӥсь кышномуртъёс Евдокия Нёмысова но Светлана Динисламова — мынам визьнодасьёсы, визь-кенеш сётӥсьёсы.

Та кылбурез А. Иштимирова-Посохова 2010-тӥ арын гожтэм, нылпи вакытсэ тодаз вайыса, анай-атай музъемезлы чуръёссэ сӥзьыса. «Тани Обь бызе, нош татын — Иртыш. Нош таиз — кызьпу вай…» — шуылэм пичи Аллалы песятаез Павел Тарасович Костин, нунокезлэсь кырымпыдэссэ учкыса.

Ханты но манси кылъёсын кылбурзэ лыдӟыса, авторлэн мылкыдыз ӝутскем кылбурзэ мукет фин-угор кылъёсын лыдӟыны. Малпанэз быдэсмиз: кылбурез берыктӥзы удмурт, эрзя, пор, карел, коми-зырян, вепс, мадьяр, фин, эстон но мукет кылъёсы. Озьы ог 30 мурт книгаез дасяны юрттӥз.

— Юрттэт курыса, вазиськи тодмоосылы, эшъёсылы, — вера Алла. — Соос асьсэлэн тодмооссылэсь юалляськизы. Туала вакытэ вотэсын кусып радъяны секыт ӧвӧл. Озьы Россиысь но кунгож сьӧрысь 16 берыктӥсьёсты шедьтӥм. Ваньзы ас мылкыдзыя книгаез дасян борды итӥськизы — таизлы туж шумпотӥсько. Книгаез поттыны юрттӥзы соос, кинлы зэм но кельше гожъяськыны, кылысь кылэ берыктыны, фин-угор эшъёссылы юрттӥськыны.

Со сяна, котькуд берыктэм текст борды аспӧртэм суред пуксиз. Суредъёсты озьы ик лэсьтӥзы пӧртэм фин-угор художникъёс. Берыктӥсьёс но суредаськисьёс сярысь лыдӟыны луэ книгалэн пумаз.

Удмурт кылэ кылбурез берыктӥз Анастасия Шумилова кылбурчи, суредэз лэсьтӥз Чудья Жени художник.

Виктория Крамова

Суредаз Чудья Жени
Кикурам учко

Кикурам учко - отын
Дор палъёс, паськыт шуръёс.
Адӟисько: ӝоген шунды
Гурезьёс сьӧры ватскоз…
Адӟисько: дӧдьы ширтэ,
Лымыез пужей лёга,
Нюрэмезь (морошка) отын пиштэ,
Вашкала сылэ тайга.

Гадь вылам поно киме -
Чузъяське анай куара,
Кылӥсько пыж уямез,
Обь мыным маке вера,
Вӧсяське песятае,
Ӵын ӝутске, тылскем лэйка,
Кылӥсько: зӧк куараен
Вашкала кырӟа тайга.

Учкы тон но кикурад,
Гадь вылад шуныт кидэ пон.


(Ӟуч кылысь берыктӥз Виктория Крамова)
Ангелина Снигирева
By Ангелина Снигирева 20 ноября, 2019 12:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<