Уйпал ӝутске, лымшор — усе?

Ангелина Снигирева
By Ангелина Снигирева Ноябрь 26, 2019 09:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вань удмуртъёслэн 14-тӥ ӧтчамзы дорозь ар гинэ кылиз на. Нош быдэсъяське-а азьвылаз ӧтчамын кутэм резолюция? «Удмурт Кенеш» огазеяськонлэн Пичи кенешез туж ӟырдыт ортчиз.

Туала вакытэ удмурт учебникъёс тырмыт
Туспуктӥз М. Егоров

Вамышен-вамышен

Дышетонъя но наукая министр Светлана Болотникова тодматӥз анай кылэз дышетонын кылдэм югдурен.

— Удмуртъёслэн 13-тӥ съездзылэн резолюцияз шуэмын вал, школаосын, нылпи садъёсын удмурт кылэз дышетонлы мониторинг ортчытоно. Сыӵе эскерон министерство арлы быдэ сентябре-октябре лэсьтэ. 2018-тӥ арын августэ дышетон сярысь федерал законэ воштонъёс пыртэмын вал. Табере анай-атайёс асьсэос быръё, кыӵе кылэз анай кыл чотын дышетозы нылпиоссы. Анай-атайёс 1-тӥ, 5-тӥ классэ мынон азьын та сярысь заявление гожтоно луо. Та законэз кутэм бере республикаын удмурт кылэз дышетӥсь нылпиослэн лыдзы 960-лы кулэсмиз. Паймоно кадь, тужгес зол «усизы» лымшор но шор ёросъёс — Шаркан (393-лы), Пичи Пурга (148-лы), Можга (95-лы), Алнаш (65-лы) ёросъёс, со сяна — Глазкар (107-лы), Эгра ёрос (75-лы). Со дыре ик удмурт кылэз урокъёсын дышетӥсь пиналъёслэн лыдзы йылӥз Балезино (56-лы), Якшур-Бӧдья (39-лы), Кияса (38-лы), Глазов (26-лы), Юкаменск (15-лы) ёросъёсынно Ижкарын (54-лы).

Алнаш ёросын удмурт кылэз дышетӥсь нылпиослэсь лыдзэс возён понна пӧртэм амалъёс кутӥсько, удмурт классъёслы пӧртэм экскурсиосы но дунтэк ветлыны луонлык сётӥське, озьы ке но удмурт кылэз дышетӥсьёслэн лыдзы кулэсмиз.

Республикаысьтымы 104 школаын удмурт кылэз факультатив яке кружок чотын дышето на. Отчы 5 сюрс 340 пинал ветлэ. Кылем дышетскон арен ӵошатыса, та лыдпус озьы ик кулэсмиз, 979-лы ӧжытгес луиз. Али республикаысь 261 нылпи садын удмурт кылэз дышето, оглом со 9 сюрс пала пинал. Удмурт кылъя яке шаертодонъя занятиос мыно колледжъёсын, техникумъёсын, куд-ог вузъёсын но. Арлы быдэ Можга педколледжез йылпумъя удмурт дышетӥсьёслэн 1 группазы.

Ог-огдэ кылон

Удмурт кылъя учебникъёслы экспертиза ортчытон понна республика 8 миллион манет висъяз. Озьы туннэ нуналлы вань учебникъёс федерал стандартъя тупатэмын, туэ 10-тӥ-11-тӥ классъёслы учебникъёс бордын уж йылпумъямын луоз ни. Котькуд учебниклэн электрон версиез но вань. Туннэ нуналлы 1-тӥ — 4-тӥ классъёслы учебникъёс федерал перечне пыртэмын ни, нош мукетъёсызъя уж азьланьтӥське.

— Милям школамы удмурт электрон учебникъёсын ужанъя инновационной площадка луэ, — шуэ Дэри ёросысь Изгурт школалэн директорез Галина Мамонтова, — но удмурт кылъя кабинетъёслэн базазы электрон учебникъёсын ужаны уг тупа. Анай-атайёс чотын сое уд лэсьты, кулэ, дыр, бюджетысь нимысьтыз солы коньдон висъяны.

— 2022-тӥ арозь республикаысь 157 школаосын сыӵе туала оборудование инъямын луоз. Валамон ини, быдэс республикаын соку ик со уз лэсьтӥськы, — валэктӥз Светлана Болотникова но «Удмурт Кенешлэн» кивалтӥсезлы Татьяна Ишматовалы вазиськиз. — Ойдолэ, чаклалом, кытын со «ӝутскон интыос» луыны кулэ.

— Туж пайдаё луысалыз, школаосын инты нимъёс, ялонъёс удмурт кылын но луысалзы ке, — дэмлаз «Айкай» театрлэн кивалтӥсез Пётр Данилов, — озьы пиналъёс пичиысен дышысалзы ас котырысьтызы удмурт кылэз адӟыны. Министерство сыӵе дэмлан мед сётоз вылэм шаерысьтымы дышетон учреждениослы.

Та малпанэз но Светлана Михайловна умоен лыдъяз. Сое улонэ пыӵатон понна нокыӵе коньдон кулэ ӧвӧл.

Нош кызьы удмурт кылэз дышето Удмуртилэн палэназ? Башкортостанысь Татышлы ёросысь Улын Балтач гуртысь удмурт гимназилэн директорез Людвиг Зидымаков кӧтӝожзэ шараяз:

— Та нуналъёсы дорамы удмурт литература вуиз, дунтэк. Туж умой, но со удмурт кылэз тодӥсьтэм нылпиослы «Ӟеч-а, бур-а, удмурт кыл» учебникъёс вылӥллям. Удмуртиын удмурт пиналъёсты соя дышето, лэся, но Башкириын пиналъёсмы удмурт кылын умой верасько, милемлы кулэ удмурт пиналъёслы чаклам учебникъёс!

Светлана Михайловна оскытӥз, Башкортостанысь дышетонъя министрен та ужпумъя кенешозы.

— Лыдпусъёсты учконо ке, милям ёросамы удмурт кылэз дышетӥсь нылпиослэн лыдзы будэм. Но со туж пичи лыдпус, — ӧпкеле «Удмурт Кенеш» огазеяськонлэн ёросысь ёзэныз кивалтӥсь, 4 пиналлэн анаез Вера Вахрушева. — Якшур-Бӧдьяысь нылпи садъёсамы ужало егит удмурт воспитательёс. Но соос ӟуч сямен верасько. Ӧй луысал-а садъёсын кивалтӥсьёслы министерствоысь дэмлан келяны: ужазы удмурт кылэз но мед кутозы. Занятиосын гинэ ӧвӧл, воспитательёс 3-4 аресъем пиналъёсын шудыкузы, сиськыкузы но удмурт сямен мед вераськозы. Ӟуч кыл вискы удмуртсэ мед пыртозы. Воспитательёслэн анай кылын ужаны мылкыдзы мед ӝутскоз.

— Луысал, дыр, огазеяськонлэсь ужан ӟечлыксэ чаклан критерийёс пӧлы удмурт кылэз кутэмзэс но пыртыны, — малпанзэ шараяз Светлана Болотникова.

Тазэ дэмланэз ваньзы кичабонъёсын пумитазы. Озьы ке но юанъёс ӧжытгес ӧз луэ.

Ӟуч семья быръе удмуртсэ

— Докладъя адӟиськом, удмурт кылэз дышетон республикаын умой пуктэмын, соку малы удмурт кылэз дышетӥсь пиналъёслэн лыдзы кулэсме? — сюлмаське Ижысь Первомай ёросысь «кенешчиосты» валтӥсь Ольга Шилова.

— Со дышетонъя министерстволэн гинэ сюлмаськонэз ӧвӧл ук. Семьяосын но удмурт кылэз утён сярысь малпаськоно, — пусйиз Светлана Болотникова.

— Семьяын мед дышетозы шуыса, кулэ кызьы ке бурдъяны. Тани Ижын удмурт гимназия культурая центрлы пӧрмиз ини. Отчы шедён понна пиналзэс удмурт кыллы дышетыны тыршо. Шоркарлы эшшо сыӵе гимназия кулэ, — итӥське культурая объектъёсты кун ласянь утёнъя агентстволэн кивалтӥсез Юрий Перевозчиков.

— Туж тросэз потэ кивалтӥсь бордысь, — сюлмыз пӧсь Михаил Атаманов тодосчилэн. — Киров улосын удмурт кыл милям син азямы ик быриз. Сыӵе ик югдур Пермь областьын.

— Ӵапак та нуналъёсы ми Перме потаны чакласьком, оло, отысь дышетонъя министрен пумиськыны луоз. Дасялэ дэмланъёстэс, учком, мар отын лэсьтыны луоз, — «кенешчиослы» вазиськиз С. Болотникова.

Нялтас вераса, туэ 20-тӥ декабре шаерамы удмурт диаспораосты люкась бадӟым форум ортчоз. Отын озьы ик ӝутэмын луозы Удмуртилэн палэназ удмурт кылэз дышетонъя ужпумъёс.

Пичи Пургалась гимназилэн директорез Наталья Михайлова мадиз, кызьы соос ужало школаын удмурт кылэз утён бордын. Угось гимназия озьы ик удмурт электрон учебникъёсъя инновационной площадка луэ. Пурга гимназиын удмурт кылъя дышетӥсьёссы быдэс республикалы адӟем карымонэсь. Но сюлмаськонъёссы татын но тырмыт. Кылем арын дышетонъя законэ воштонъёс пырем бере гимназиын удмурт кылэз дышетӥсьёслэн лыдзы 15 процентлы кулэсмиз. Туннэ нуналлы гимназиысь 996 пинал пӧлысь 517-ез — удмурт семьяосысь. Но анай кылзэ со пӧлысь 46 процентэз гинэ дышетэ.

Ижысь Устинов ёросысь «Удмурт Кенешен» кивалтӥсь Елена Ленцова дэмла:

— Оло, Пурга гимназиын ваньзылы удмурт кылэз дышетоно но тӥни. Со учрежденилэн статусэз сярысь вера ук, тани К. Герд гимназиын кызьы ке быгато…

К. Герд гимназиын берло дыре та уж борды, зэм но, рос-прос кутскизы.

— Анай-атайёсын ужано, — шуэ солэн директорез Татьяна Волкова. — Мон ачим котькуд классэ, котькуд собрание вуылӥ, анай-атайёсын вераськи. Соос удмурт кыллы пумит ӧвӧл, но юанъёссы трос. Ӵапак со юанъёслы валэктон сётоно. Озьы милям 733 пинал пӧлысь удмурт кылэз али 723-ез дышетэ. Луэ озьы но: ӟуч семья юа, нош быгатӥськом-а ми анай кыл интые удмурт кылэз быр­йыны?

Озьыен, калыкен пумиськылоно, вераськоно. Сюло уз юртты. Анай-атайёсын но вераськоно, валэктыны быгатоно.

Елена Миннигараева

Ангелина Снигирева
By Ангелина Снигирева Ноябрь 26, 2019 09:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<