Ужпум пуктэмын будыны

Ангелина Снигирева
By Ангелина Снигирева Ноябрь 28, 2019 14:03

28-тӥ ноябре Кузебай Герд нимо гимназилы тырмиз 25 ар. Та дыр ӵоже со 716 выпускникез поттӥз. Соос пӧлысь 21-ез зарни, 33-ез азвесь медален дышетсконзэ йылпумъямын.

К. Герд нимо гимназия
Туспуктӥз: В. Вахрушев

1994-тӥ арын 28-тӥ ноябре Удмуртиысь Министръёслэн Советсылэн председателез А. Волков Ижысь 81 номеро нылпи садэз дышетонъя удмурт центрлы пӧрмытон сярысь постановление юнматӥз. Озьы кылдӥз школа-сад. Интыяськиз со Ижысь Сивков ульчаысь 89а номеро юртын. Сое усьтон, ужзэ радъян понна туж трос кужымзэ сётӥз Ольга Константиновна Шилова, Удмурт Элькунысь дышетон удысысь дано ужась. Сое центрлы директоре юнматӥзы.

Со аръёсты тодаз вайыса, Ольга Константиновна шуэ: туж, пе, потэ вал Ижысь удмурт нылпиос анай кылзэс дугдылытэк мед дышетозы, нылпи садысен школаозь одӥг липет улын визь мед люкалозы шуыса. Озьы кылдытӥз нылпи сад-школа. Ольга Константиновна ачиз бырйиз дышетӥсьёсты но воспитательёсты. Туннэ ке но нырысетӥ выпускникъёсызлэсь улон-вылонзэс чакла. Тросэз улонзэс удмуртлыкен герӟазы, шуэ. Озьы ик шумпотэ гимназилэн азинскемезлы.

Зэм, 25 ар ӵоже гимназилы оломар пыр но потоно луиз. Туннэ ке но дышетӥсьёс но, дышетскисьёс но тодазы ваё 2004-тӥ арез. Соку дышетӥсьёс, нылпиос, анай-атайёс митинге люкаськизы, гимназиез город шоры ик мед кельтозы шуыса. Та понна 4,5 сюрс кинюртэмъёс бичамын вал. Куд-огез сютэм улон ялӥз. Арнялэсь кема кыстӥськиз та «ожмаськон». Озьы ке но Сивков урамысь юртэз утьыны ӧз быгатэ. 2005-тӥ арын май толэзе 2 дышетон учреждениосты — Кузебай Герд нимо гимназиез Ижысь Петров ульчаысь 21 номеро школае выжтӥзы. Со аре куд-огез гимназиысь нылпиоссэ мукет азе дышетыны выжтӥз. Но уноез, аръёс ортчыса, асьсэос нылпи вайыса, пиналъёсынызы отчы выльысь берытскизы.

Та дыр ӵоже гимназилэн директоръёсыз но вошъяськизы. О. Шилова бере 2005-тӥ-2007-тӥ аръёсы соин кивалтӥз 21 номеро школалэн директорез, Удмурт Элькунысь дышетон удысысь дано ужась Г. Галкина. 2017-тӥ арозь гимназилэн директорез вал Удмурт Элькунысь дышетон удысысь дано ужась А. Михеева.

2018-тӥ арын 15-тӥ февральысен гимназиен кивалтэ филология наукаосъя кандидат Т. Волкова.

Татьяна Волкова гимназилэн али директорез
Туспуктэм басьтэмын Т. Волковалэн «ВКонтакте» бамысьтыз

Берло дыре гимназия шӧдскымон воштӥське, уногес ужа проектъёсын, отчы мыло-кыдо кыске нылпиосты. Кылсярысь, «Проектный офис удмуртских школьников» быдэсме Егитъёсын ужанъя федерал агентстволэн грантэзлы луыса. Проектъёс юртто нылпилы улонысь шуг-секытъёсты адӟыны, отысь потыны амал утчаны, шуэ гимназилэн кивалтӥсез Татьяна Волкова.

— Удмуртиысь устоосыз но кужмоосыз школаос пӧлы пыриськомы ни, — вера Татьяна Геннадьевна. — Милям дышетӥсьёсмы но дышетскисьёсмы пӧртэм вожвылъяськонъёсын вормисьёс луо. Гимназиын ортчыло мастер-классъёс, семинаръёс. Ми угось дышетонъя этнокультурной ресурсной центр луиськомы. Табере ас азямы ужпум пуктӥськомы: Россиысь устоосыз школаос пӧлы пырыны. Кылъёсты дышетыны быгатэммес мед асэстозы. 2015-тӥ арын гимназия вормиз BeBiLin.RU 2015» калыккуспо конкурсын — устоез билингвальной школа луиз. Туэ «Выставка.РФ» вожвылъяськонын 1 сюрс 430 школаос пӧлын вормись луимы. Эшшо но паймытэммы потэ. Со понна ужмес выль сямен радъяны малпаськомы. Котькуд дышетӥсьлэн луыны кулэ азинтӥськонъя программаез. Дышетӥсь будэ ке, нылпиос но со сьӧры кыстӥсько, соос но будыны тыршо.

Гимназиысь дышетӥсьёс удмурт кылэз дышетонъя пӧртэм классъёслы программаослэн, учебникъёслэн но пособиослэн авторъёссы луо. Соос пӧлын педагогика наукаосъя кандидат В. Широбокова, удмурт кылъя но литературая дышетӥсь Е. Перевозчикова, педагогика наукаосъя кандидат Г. Турова но удмурт кылъя но литературая дышетӥсь Л. Фазлеева.

К. Герд нимо гимназиысь нылпиос

Гимназяи азьланяз малпа визьноданэ анай-атайёсты тросгес кыскыны. Кылсярысь, соос тодматыны быгатозы асьсэ уженызы. Со сяна, анай-атайёс но нылпиос гимназилэн улоназ уногес мед пыриськозы, кыӵе ке ужпумъя решение кутыны мед юрттозы шуыса, нимысьтыз огазеяськон кылдытыны медо.

Елена Сараматова

Ангелина Снигирева
By Ангелина Снигирева Ноябрь 28, 2019 14:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<