Удмурт кылын вӧсяськылӥз

Ангелина Снигирева
By Ангелина Снигирева 18 ноября, 2019 14:41

Михаил Елабужский протоиерейлэн вордӥськемез дырысен 150 ар тырмиз. Сое югдытӥсь, миссионер, этнограф-удмуртовед шуо.

Михаил Елабужский протоиерей

Михаил Елабужский вордӥськемын 1869-тӥ арын 27-тӥ октябре туала Сьӧлта ёросысь Халды черкогуртысь священниклэн семьяяз. Озьы со пичиысен ик черк улонэн тодматскыса будэ. Дышетске нырысь туала Киров областьысь Нолинскысь духовной училищеын, собере — Вяткаысь (Киров) духовной семинариын. Сое йылпумъяса, дышетэ Якшур-Бӧдья ёросысь Тылоысь (Старые Зятцы) земской училищеын, собере ужа Алнашысь, Ува ёросысь Удугучинысь, Киров областьысь Вагиноысь черкъёсын. 1912-тӥ арын сое ысто Вавожысь Свято-Никольской черке. Татын со 1937-тӥ арозь — улонысь кошкытозяз — тырше.

Вавож черкын со удмурт кылын служба но нуылӥз, проповедьёс но лыдӟылӥз. Вавож вераськетъя (диалект) кыллюкам лэсьтӥз, отчы 2 сюрс 95 кыл пыртӥз. Калыкмылэн улэм-вылэменыз, сям-йылолъёсыныз но вашкала осконъёсыныз со, пӧртэм интыосын ужакуз, тунсыкъяськылӥз, эскериз. Со сярысь статьяос гожъяз. Кылсярысь, Елабуга уездысь черке пыртымтэ удмуртъёслэн кулэмъёсты ватонэн но кисьтон каронэн герӟаськем сям-йылолъёссы, инмаръёссы, вӧсяськонъёссы сярысь…

Михаил Елабужский яратӥз калыкез. Соин ик со Инмарлы оскисьёсын капчиен огкыл шедьтылӥз. Вавожын нырысетӥзэ вӧсяськон ортчытыкуз ик, выль вуэм баӵко доры исповеде 260 адями лыктэм. Нош Пучыарня азьын тупась Святой Лазарьлэн субботаяз 720 адями причастие басьтыны мылкыд карем ни. Туала вакытэн ӵошатӥськод ке — со туж трос! Со сярысь Михаил Елабужский дневниказ гожтыса кельтэм. Пусйыны кулэ, Михаил Стефанович Вавоже вуэмез бере нырысетӥ нуналысеныз ик кылэм-адӟемъёссэ гожтыса кельтыны кутске. Берпуметӥ малпанзэ гожтэ 1937-тӥ арын, кулэмезлэсь 4 толэзьлы азьвыл, отын со вера, тазалыкез нуналысь нуналэ лябӟе ни шуыса.

— Михаил Елабужскийлэн гожъям дневникъёсыз Вавожлэн аспӧртэмлыко летописез выллем луо, — шуэ та ёросысь Гурезь-Пудга гуртын вордӥськем тодосчи-фольклорист Галина Шушакова. — Соя уго син азе пуктыны луэ со вакытэ черклэсь ужамзэ, калыклэсь улэм-вылэмзэ, баӵколэсь сюлмаськонъёссэ. Гожъямъёсаз туж яркыт адӟиське священниклэн аслаз лулпуш дуннеез бордын ужамез но: туннэ, пе, маке но лекъяськысагес вераськи (нош со бадӟым сьӧлык луэ), азьланяз, пе, чакласьконо луоз. Озьы ик отын со эскере, мар вералоз вӧсяськисьёслы проповедьын, пусйылэ кытчы ветлэмъёссэ, возьматэ черкысь но гурт улонысь югдурез.

Октябрь революциез Михаил Елабужский уродэн ӧз пумита. Калыклэн огъя малпанъёсаз уго шӧдӥське ни вал, мар ке но воштӥськыны кулэ шуыса. Со сярысь вералляз но. Выль власть но черкез соку ик тус-тас карыны ӧз кутскы. Бӧрысьгес ини калыкез вӧсяськонлэсь палэнтыны ӧдъяз, баӵкоосты ултӥяны кутскиз, собере черкъёсты но куашкатъяз. Гожъямъёсызъя адӟиськом, Михаил Елабужскиез но, тазалыкез но арлыдыз шоры учкытэк, шуныт коркасьтыз кезьыт интые поттӥзы, нюлэс коранэ келяллязы, вытъёсын ӝокатӥзы. Но Инмар утиз сое: протоиерей аслаз кулонэныз улонысь кошкиз.

Михаил Елабужскиез Вавожын сӥлы каро. Туж гажаса но сюлмаськыса, осконлэн нюжаез медаз чигы шуыса, утиллям солэсь дневникъёссэ но. Шумпотымон, али соос нимысьтыз книгаен поттэмын. Удмуртиысь но Ижкарысь Викторин митрополитлэн бакель каремезъя сое печате поттыны дасяз Вавожысь Свято-Никольской черкысь иерей Александр Бердников. 

Анастасия Гребина

Ангелина Снигирева
By Ангелина Снигирева 18 ноября, 2019 14:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<