Удмурт калык. Дауръёс пыр

Ангелина Снигирева
By Ангелина Снигирева 22 ноября, 2019 15:42
Л. Кривошеев

* * *

…Богодан, вазь ӵукна гидысь валзэ поттыса, вылаз энер понӥз но азбарысь поттӥз. Со туннэ чаклано кариськиз Арчакарез котыртӥсь борддорез; тулыс музъем шунамъяз небӟе, соин сэрен коръёс, юбоос кырыжмозы я воксё усёзы но борддорын вис луоз, оло, бадӟым пась но кылдоз. Сыӵе интыос кылдӥллям ке, кӧня ке ожгарчиосты лэсьтӥськон-тупатъян ужъёсы ӧтёно луоз.

Вал вылаз пуксьыса, чакланзэ кутсконо кариськиз Кузонэ нуись сюреслэн бадӟым капкаез дорысен. Татын, пичигес корка нергеын, куинь кузя воргоронъёс асьсэ куспын вераськыса пуко вал. Буш вал вылын лыктӥсь адямиез адӟыса, куиньназы ик кыре потӥзы. Богодан соосын ӟечбуръяськиз но юалляськыны кутскиз:

— Кыӵе ини ужъёс, туганъёсы? Ваньмыз-а умой яке шугъяськытӥсез вань-а? Тани тулысэд вуиз, ӝоген писпуос вожектозы. Уж вылэ уж ватсаськоз ини, лымы усьытозь.

— Ӟечез узгес луы, дыр, Богодан, — кутскиз вераны ӝужыт мугоро, пурысьтаны кутскем, вакчи тушо мӧйы пиосмурт, лэчытэсь сьӧдалэс синъёссэ лыктэм мурт пала мертчытыса. — Толон ӝыт бигер уромъёс кыкназы татчы вуылӥзы — кыр тылобурдоосты, пе, кутылыны ветлэммы вал. Тӥни соосын вераськыку, таӵе кылпум поттӥзы: выль эксэй-ханзы, Мамуксы, аслэсьтыз ожгарчиоссэ дасяськыны косэм. Арчакарез тарканы мыном, шуэм, пе.

— Калыкез, Богодан, али ик ӝутоно, дасяськоно ӧтьымтэ куноосты пумитаны. Кин тодэ, ку соос вуозы: оло туннэ ик, оло берлогес. Асьмелы изёно ӧвӧл ни, — дэмлаз кыкетӥез возьмаськись воргорон.

— Ар но ӧвӧл али Кузонэ вуэмез, нош татысь бигеръёсты шымыртыны кутскем, лэся, ини, аслаз ожгарчиосызлы гинэ, пе, эрказъяськыны эрик сётэ. Асьме пала вуиз ке, юн пезьдэт сётоно солы, бигеръёсын огкылысь кариськыса, воксё Кузонысь но улляно. Мед кошкоз кытысь лыктэм отчы ик, — дэмлаз куинетӥез воргорон.

— Ярам, малпаськом. Кыӵе ке но амалъёс шедьтомы ик, дыр, утялскыны, — шуиз Богодан. — Тау ивордылы. Нош али мон нырысь ик кармес котыртӥсь борддоръёсты, юбоосты чакласа ортчо. Оло, кытӥ но отӥ тупатъяны, юнматъяны кулэ луоз.

Валэз вылэ пуксьыса, Богодан азьлань гонӟыртӥз, тыпы коръёслэсь лэсьтэм борддор кузя. Ньыль палзэ ик учкыса котырскем бераз пыроно кариськиз карысь тодмо туно-пеллё доры. «Лымшор сиськон дыр вуэмын бере, пересь Бекчур гуртаз луыны кулэ кадь», — озьы малпаса, васькиз вал вылысьтыз, созэ думиз капка бордысь кульчое сермет ӟезеныз, ачиз капкаетӥ пыриз азбаре но, корказь пала вамыштыса, кузёлы черетскиз. Коркасьтыз потӥз кузёез, пересь Бекчур, кизэ сётыса ик, Арчакарлэн йырыныз, Богоданэн, ӟечъяськиз.

Дунне вылын кема гинэ улэм пересь котьма но тодэменыз, быгатэменыз калыкез бордаз кыске, кышкатэ но кадь. Мӧйыос со доры ветло маке сярысь кенешыны я пелляськыны; егитъёс но пиналъёс солэсь кышкало — ведӥн кожало, котьку ик вужмем изьыен но кышъям выл дӥсен ветлэменыз-а, мар-а. Ма, ымныр но пересьлэн пурысь луэмын, вылаз ик, бамъёссэ кечат-вамат кисыриос гожмаллям, синъёсыз но пыдло выйиллям ини. Мугорыз карнан кадь губырскем, соин ик лапег, пичи адске. Нош тушсэ, мыйыксэ туж ик будыны уг сёты, ӵышкыса, утялтыса возе.

Визь-кенеш сётод-а шуыса, пыри вал, Бекчур агай. Вождэ эн вайы ини, ужъёстэ ӝегатэмысьтым, — ӟечбуръяськыса пырем мугзэ вераз Богодан. — Кузон кузёос асьме вылэ ожалскыны малпасько, лэся…

Эк-эй-эй! — лулӟиз пересь. — Ожмаськытэк чик улэмзы уг луы-а, мар-а ини та туала калыкъёслэн. Я поръёс, я ӟучъёс, бигеръёс но — мар уг тырмы ни адямилы?

Ужатэк, муртлэн дасеныз улыны дышемын кудӥз-огез; ожмаськыса, таласькыса капчиен ваньбур люканы кема ик дыр но кулэ ӧвӧл ук.

Озьы но, дыр. Тани мар мон верасал, — кутскиз пересь Бекчур. — Тон пинал дыръяд ожмаськыны быгатэмдэ возьматӥд ини, ӟучъёс Кылно1 палась вуыку. Кӧня ар ортчиз ни ай со дырысен, ог дас витьёс вань, дыр, ини. Кыӵе ведь зол жугиськон вал: пӧрмиз ик соку асьмелэн, атаманзэс но кырмим. Озьы ик али но Кузон вылэ ӝутсконо, возьманы уг яра соослэсь асьме пала вуэмзэс. Ведь тапала вуытозязы, кӧня гуртъёсты пазялозы, сутозы, таркалозы — калыклы кӧня изъян ваёзы, кӧня адямиез быдтозы, виылозы; урмем муртъёс кадь вырозы ук. Азьпалтоно соосты, Богодан, азьпалтоно. Ожгарчиосты люкаса, со сярысь вераське ай, — йырзэ ик выллань карыса, учкиз пересь, Богоданлэсь верамзэ возьмаса кадь. Соиз, ӧжытак малпаськыса, ас малпанъёссэ Бекчур азьын кисьтыны кутскиз:

Кылно палась лыктэмъёсты соку, умой-умой дасяськытэк но, вормимы вал, кужыммы тырмиз. Быремъёсмы но сизьым кузя гинэ вал, нош ӟучъёслэсь кызь тямыссэ быдтӥмы, сӧсырмемъёссэ ӧм лыдъялэ — соосты кылемъёсыз сьӧразы нуизы. Со дырысен улон воштӥськиз ини. Озьы ке но огъя, каньылэн улон понна, эрикмы понна кызьы ке но юнгес кариськоно луоз. Ма, огшоры бигер калык но уг гажа кадь палэнысь лыктэм ханзэс, со ведь кивалтыны пуктэмын Крымысь вуэм бигеръёслэн юрттэменызы, косэменызы гинэ. Нырысь ветло ай Кузонэ ачим — кудое, эмеспие, нылы доры куное шуыса. Тодо, кыӵе отын югдур. Собере ини калыкен кенешоно луоз. Я, сау булыгыз2, Бекчур агай, ӝегати кадь мон тонэ, — пересьлы кизэ сётыса, Богодан кошкыны дасяськиз. — Вераськеммы сярысь калык азьло ик медаз тоды вал. Кузонысь бертӥ ке, адӟиськомы, вераськомы на. Вождэ эн вай.

Богодан та нуналэ сюлэмшугъяськонэн улӥз. Со эшшо одӥг пол пумиськиз на капка дорысь караулчиосын, рос-прос юалляськиз бигер пӧйшурасьёсын вераськемзы сярысь. Ӝыт пал гуртаз бертыса, шунды пуксьытозь, азбараз мар но со ужамъяськиз: геры амезьзэ волятӥз но сое тэкитэн зыраз, усыян тӥрлыксэ — пулэсь лэсьтэм усызэ — котыр ласянь эскериз… Чыры-пыры ужъёс ноку но уг быро кадь, ваньмызлэн ик озьы, дыр, ини, уката ик тулыс бусы ужъёс кутскон азьын. Ӝомыт луыны кутскем бере гинэ, кӧтыз сюмамен, воргорон корказ пыриз.

Кылно1 — Хлынов (али Киров кар).

Сау булыгыз2 — ӟеч лу.

***

Тани нош со пуке ӝӧк дурысь ӟус вылын, семьяеныз, асьсэ понна гинэ. Ваньзы татын, Огрейзы гинэ ӧвӧл пӧлазы, валлян арын бигер пилы, Девликамлы, кузпаллы сётӥзы. Богоданэн артэ пуке Жагизы, бызьыны вуэм нылыз (сётыны но сое дэмлало ини сюйырлы Токтаметколы), Жагиен артэ интыяськем Байбичка. Нылъёс кыкназы ик чебер но веськрес будэмын, сьӧд йырсиё, ымныръёссы учкымон — нырысь учкыку, огшорыесь гинэ кадь адӟисько, нош кӧня ке пол учкыса, валано ини, кыӵеесь соос. Туж йӧноесь нылъёссэ будэтэм ук Богодан кышно, Марӟана. Кузёлэн мукет палаз пиосыз: воштӥсез Айтко, дас арес ини пияшлы, куинь аресъем Кибичко но Тукташ — таиз али анаезлэсь гадьзэ сюпсе. Одӥгез пизы, Османкозы, ӧвӧл ни — куать аресаз потэмез бере вылысь Инмар сое ас дораз басьтӥз.

Марӟана берлозэ нуны ваем бераз чеберзэ ыштӥз, куасьмыны кутскиз, висёнэз весь уг ортчы на, синъёсыз но уг ни чиляло, пиньёсыз усьылыны кутскизы. Богодан шугъяськыса учке кышноез шоры: кыӵе со ӝог, чупрес тырше нылпиосыз котырын, чылкыт мед сиськозы шуыса. Со куспын Богоданлэн йыраз шуак гинэ малпан кылдэ — шудо-а бен Марӟана, эльйыр вӧзын улыса? Тӥни ук, кыӵе куректыса ымдуръёссэ но куртчылэ, ӝӧк вылэз октон-калтон куспетӥз картэз шоры но дырын-дырын син ултӥз гинэ кырыжак учкылэ. Богодан шып пукиз-пукиз но пиезлы вуоно шулдыръяськон сярысь мадьыны кутскиз. Тупен-тупен вера, кин кытын кулэ сылыны, мар кароно эльйырлы, мар ужано быдӟым вӧсясьлы. Айтко атаезлэсь верамзэ кылзӥське но ваньзэ йыраз тэрытэ.

Атай, со шулдыръяськонэз вӧсяськыса-а кутсконо?

Бен, пие! Одно ик вӧсяськыны кулэ Инмармылы, воршудъёсмылы вазиськоно, куриськоно: сотэк калыкмылэн азьланезлы осконэз быроз, вормон басьтонлы мылкыдыз лябӟоз но шугадӟонъёслы сётскоз. Тон буд, пие. Бадӟым, кужмо но визьмо лу! Тани мон, тынад атаед, ожгарчиос куремъя Арчакарамы кузё ке но, ноку но урод кылъёсын калыкмы азьын ӧй вераськы, пичи дырысеным эшъёсыным ӧй но жугиськы. Ведь кесяськыса но жугиськыса нокыӵе пайда уд басьты ук. Аслыд гинэ урод лэсьтод.

Богодан котьку ик ас юртаз но тыршиз семья кусыпсэ ӟеч утьыны, котькыӵе ужъёссэ, Инмарезлы, ас воршудэзлы вӧсяськыса-куриськыса, кутскылӥз, нылпиосызлы но сыӵе сям пыӵатыны выриз. Тани ӝытсэ сиськыны но вӧсяськыса ӝӧк котыре пуксизы, кӧтсы тырыса, ӝӧк сьӧрысь, нош Инмарлы тау карыса но куриськыса, султӥзы.

Нылпиос нюштыр гинэ изьыны интыяськизы. Марӟана асьсэлэсь валес котырзэс тупатъяз, йыр керттэтъёссэ куштыса, йырсизэ сыназ но, выльысь кык ваё пуныса, йыр котыраз бинялтӥз. Богодан сиськем бераз киоссэ миськиз но, пыдкутчанъёссэ куштыса, кышноез пала изьыны вамыштӥз. Сюсьтыллэн ӝомалэс югдэмез улсын Марӟаналэн чыртыяз кисыриосыз тужгес ик адскымон луизы, гадь вылыз но ошиськемгес, ымдуръёсыз ым пушказ кыстӥськыны кутскиллям. Та берло кык аръёсы кышномурт шӧдскымон пересьмонлы сётскыны кутскиз ини. Богоданэз эльйыре быръемзы Марӟанаез шумпотонэ ӧз вутты уго.

Ӝуась сюсьтылэз кысыса, со но выдӥз ини, ӧжытак мугорыныз валессэ небӟытӥз, юромо картэз борды йӧтскылытэк. Нош соиз мынектӥз гинэ. Берло дыре Марӟана ӵемгес ик озьы вырылӥз, висемезлэсь но мугорыз пересьмонлы сётскемезлэсь возьдаськыса (азьвылгес Богоданэзлы но со сярысь куаретӥз вал ини). Гажано муртэз, яратоно кышноез уг вала, кыӵе со кулэ Богоданлы али но, сыӵеен, кыӵеен вань та дыре: кенеш сётонэн, огшоры кылын, мусояськонэн, ма, озьы гинэ ке но, пиосмурт дышиз ини кышноеныз валче улыны, соин ик уг адӟы, уг шӧды солэсь лябӟыны, пересьмыны кутскемзэ. Буйгатыны малпаса, кизэ ӝутӥз, ӟыгыртӥз, ас палаз карыса, но валаз: кышноез шыпытэн бӧрдэ.

Марӟана, мусое мынам, мар луиз?

— Тон… тон… уд яратӥськы, уд яратӥськы… — Богодан дыртэ вал, матаз карыса, ӟырдыт вераны: «Яратӥсько!» — ӧз вуы вераса, кышноез, куараен ик бӧрдыса ини, веранзэ азьланьтӥз: — Уд яратӥськы Огреймес! Малы солэсь улонзэ герӟад бигер вузчиен, малы люкид яратоно пиезлэсь, Бегишлэсь? Бигер вузчилэн баезлы синмаськид, нош нылыд сярысь ӧд малпаськы. Табере Огреймы ляльчи интыын улэ, вань секыт уж со вылэ усе, дыр. Атайзы пизэ, Давликам эмеспимес, весь сьӧраз нуллэ: я кытчы ке кыдёке вуз утчаны кошко, я ваемзэ олокытӥ но вузаса ветло; ар вылтӥ толэзь но доразы уг уло ук. Озьы Огреймы нылпитэк но кылёз ведь. Э-э, Инмаре!..

Богодан ӧз но малпа, вераськонзы сыӵе ӧре берытскоз шуыса. Ӧжыт шып улэм беразы Марӟанаез ас палаз матэгес кариз но юн ӟыгыртӥз, бур кизэ кышноезлэн йыр ултӥз лэзьыса, собере, буйгатыны вырыса кадь, вераз:

Я, сокем эн шугъяськыты астэ. Тани мон та нуналъёсы ветло ай нылмы доры, тодо улэм-вылэмзэс, азьланезлы кыӵе малпанъёссы, Огрееным но верасько. Нош али тон юнме гинэ астэ ӟырдатӥськод, керӟегъяськиськод; умоез сярысь, дыр, кулэ малпаськыны.

Озьы кулэ вал, дыр, но, анай сюлэм уг тоды сое, — викышъямысь дугдыса ни, вераз Марӟана.

***

Одӥг нуналзэ Богодан быдтӥз на борддорлэсь пасьёссэ тупатъянзэ, ужась утчаса, эшшо кыр палтӥз ву кырыса, бадӟым канава кариз, сое но, сюй вайылыса, ӵошкатоно. Куать воргоронъёслы со ужъёсын ӝегатскытэк вырыны косӥз. Собере вӧсясьёсын пумиськиз. Вераськизы, ку но кызьы радъяно тулыс шулдыръяськонэз. Котькуд аре, бусы ужъёс кутскон азьын, ортчытъяло Быдӟым вӧсяськон, со вӧсяськон котьку ик йылпумъяське шулдыръяськонэн но нерге юонэн. Туэ со нерге ветлон кыстӥськоз, дыр, ог-кык нунал. Музъем шупамтэ на, отын но татын, улыг интыосын, лымы но бырымтэ али.

Вӧсясьёс малпазы вуоно арнянуналэ Акашка юонэз ортчытыны. Котыр гуртъёсысь но калыкез ӧтёмы, пе, вӧсяськонэ, Быдӟым куала доры. Со понна кӧснуналэ ӝыт пал но арнянуналэ ӵукна егитъёсыз косомы, шуизы, тангыраен шудыны. Куинь кузя вӧсясьёс, огкылэ вуыса, Богоданлы веразы:

— Эн сюлмаськы, ваньзэ радызъя лэсьтомы. Татчыозь котькуд аре ӟечен ортчытъямы Акашкаез. Туэ но куре ум кыле, дыр. Инмар шулдыр нуналзэ гинэ мед сётоз ини.

Озьы бере, ӵуказе мон, нылы доры ветлыса, берто ай. Отын уй кӧло но мукет нуналэ доре вуо. Я, иське, ӟеч луэ! — шуиз Богодан но гуртаз вамыштӥз. Дораз вуыса, со уробозэ (тарантассэ) сюрес вылэ потыны дасяз. Корказ пырыса, Марӟанаеныз кенешизы, мар кулэ луоз сьӧраз басьтыны. Вераськемзэс кылыса, Айткозы атаез доры лыктӥз:

Атай, басьты монэ но сьӧрад. Апайме адӟеме потэ, мӧзми ни мон солэсь. Басьтод-а?

Богодан кышноез шоры учкиз. Соиз пумит ӧз луы пиезлэн куриськемезлы:

Уз люкеты, дыр, ук. Ветлэ ӵошен ик, шулдыргес луоз кыкнадылы сюрес вылын.

Ярам, ӵошен ке ӵошен — шуиз Богодан, — только ӵукна вазь султоно луоз, пие.

Мон ӝыт вазь ик изьыны выдо, ӵукна иземе уз поты ни, — оскытӥз Айтко.

Ӝытозь семья сюрес вылэ мар но со сиён дасяны выриз, саламъёс но пичияк кузьымъёс бичазы на нылэн эмеспилы, кудоен туклячилы — буш киын куное уг ветло ук. Ваньзэ лач-лач тыризы но сиськыса изьыны интыяськизы. Марӟана та уе ӧз ни ӝожомылы, нош Богодан кема гинэ умме усьыны ӧз быгаты. Со уго кышноезлы ӧз куареты, малы сокем ӝог ӝутӥськиз Кузонэ мыныны. Ваньзэ верад ке — нош кайгуэн улоз, уката но висёз. Собере, азьвыл ик ваньмыз тодӥзы ке, Арчаын вань улон радлык огыр-бугыр луоз. Ведь урод иворъёс чаляк гинэ вӧлмозы быдэс шаере. Соин ик Богодан тодыны но тыршиз Акашкалэсь ортчытон дырзэ. Соку люкаськем калыклы вераны луоз Кузонысь ваем иворъёсты но.

* * *

Сюрес вылын дэри интыос отын но татын гинэ сюрыло. Куазь шундыё улэмен, чурыт, лёгиськем музъем соку ик кӧса. Ӵукна шунды ӝужаку, Богодан Айтко пиеныз, Арчакарысь потыса, кыр бусы сюрестӥ вортто ини. Ужпи уллямез уг ик возьма, ачиз шаплы гинэ ворттэ. Богодан тэльбугозэ ляб гинэ кутыса возе. Айтко атаез вӧзын туж йӧно кариськыса пуке.

Иземед потэ-а, пие? — серемпыр юа атаез.

У-уг, мон ведь изьыны вазь выдӥ. Ӵукна анай гур котырын маин ке шалтыртӥз но, мон сайкай, собере ӧй ни изьы. Монэ кельтыса кошкод, сьӧрад уд басьты шуыса, кышкай. Тон соку валъёсмес сюдӥськод вал, дыр, ини. О-о ведь?

Тӥни кылзы… Тюрагай изисьёсты сайкатыны малпам, вылэ тубыса, чирдэ гинэ.

Нош кытын со ачиз, мон сое уг адӟиськы, — чаклаське Айтко, йырзэ выллань карыса. — Ой, тӥни, тӥни, адӟи! Нош кызьы со, бурдъёссэ выретыса, одӥг интыяз кылле, уг лобы?

Бурдъёсыз выремъя ик кылле, дыр, ини. Омыр вылэ пыкъяськыса, — валэктӥз атаез.

Арчакарез котыртыса кошкись шур вамен потӥзы но, Чукырча гурт пыр потыса, нюлэс доры вуизы. Нюлэс бадӟым ик вылымтэ, нош тылобурдоос отын кыӵе но куара уг потто! Нюлэс пыр кошкись сюрес уродгес ик вылэм, уробо питранъёс гыбедо сюе мур пыро, соин ик вал вамышъяса, ворттытэк мынэ. Нюлэсэз ортчемзы бере со нош ворттэ. Ӧжыт мыныса, кыӵе ке гуртэ вуизы.

Атай, та кыӵе гурт? — пияшлэн тодэмез потэ, та палъёсы со нырысьсэ вуиз уго.

Берамы кылемез Чукырча вал, нош таиз Чурайгурт шуиське, татын удмуртъёс но бигеръёс уло, — валэктӥз Богодан. — Азьпаламы пичи шур луоз, сое выжимы ке, ӧжыт мыныса, вуомы Ямашуре. Отын кӧнялы ке шутэтскыны дугдомы, валмес ял карытомы, асьмеос но пичияк куртчомы.

Нош Ямашур бере Кузон луоз-а ни?

Со сюресмылэн ӝыныез гинэ луоз али. Эшшо ортчыломы на Шапши, Биектау гуртъёсты, собере апаедлэн гуртаз, Ядыгаре, вуомы, со Кузонлы кык иськемын гинэ интыяськемын.

Ямашуре вуыкузы, лымшор ӧй вал на, Богодан валзэ одӥг корка доры дугдытӥз но, тэльбугозэ пиезлы сётыса, коркалэн укнояз йыгаськиз. Йыгаськем куараез кылыса, капкаетӥ ог витьтон аресъем воргорон потӥз: йыраз гын шляпа понэмын, пельпум вылаз огшоры гинэ дӥсьсэ ошем, бирдыятэк. Суд йырсиё чылкыт ымныро адями, сюресчиосты адӟыса, киоссэ вӧлъяса, Богодан пала кариськиз но ӟыгырскиз.

Кинэ мон адӟисько?! — капчи мылкыдын Богоданлы кизэ мычиз. — Ӟечбур, гажано эше! Кызьы вуиды, мар муген? Ойдолэ пыре, пыре корка. — Юанъёсызлы верамез но возьматэк, бадӟым капказэ усьтӥз но валэз валтыса ик азбаре пыртӥз.

Кема ик ӧм адӟиське ни, Богодан, ог вить-куать аръёс ортчизы, луоз, ини берло пумиськеммы дырысен. Кыӵе улӥськоды-вылӥськоды та дыре, семьяяд уг висьыло-а? — юан вылэ юан кисьтэ корка кузё, пумен ачиз ик ӝӧк вылэ мар но со сиён бичаны кутскиз, самоварзэ но, ву поныса, аратӥз.

Тулай, тон эн бызьылы али, оломар но эн утчаськы. Ми ведь, валмес ӧжытак сюдыны шуыса гинэ, дугдӥмы, — вазиськиз Богодан. — Нош семьяед кытын: кузпалыд, нылыд?

Мон ведь, Богодан, кык ар пала ини пӧрасьтэк улӥсько. Ыжъёсызлы турын куштыны шуыса сарае тубем, олокызьы, отысь васькыкуз, пагӟаез вольтчыса, йыр вылаз усем. Ӝыны ар мында валес вылысь султылытэк улыса, кулӥз. Табере тани куиньнамы асьме понна улӥськомы. Нылы туннэ ӵужаезлы корказэ миськыны кошкиз, соиз но пересь, висьысагес улэ ини, огназ кылемын. Пие ӵукна ик дӥсяськиз но кошкиз: пижныосме, нальыкъёсме, пе, эскеро: оло, Акашкалы лудӵӧжъёс но ваё. Учкы али, нош пиед малы корка уг пыры? — шугъяськыса ик юаз Тулай.

Ма, вал котырын берга, луоз, -шуиз Богодан.

Кузё, ӝогак потыса, Айткоез, азбарысь ӧтьыса, корка пыртӥз.

Я, ойдолэ ни ӝӧк сьӧры, сюрес вылын татчыозь зуркаса, кӧтты но сиён куре, дыр, ини. Чай но тани быректӥз, мар вань, сие-юэ, эн кепыралэ. Курытсэ но шедьто, дыр, али, — эшезлы капчи кариськыса, Тулай берга на ӝӧк котыраз.

Э-э… Курытъёсын, Тулай, тон эн ик вырылы. Милемлы ведь азьлань мыноно, нылы доры, Ядыгаре, югытэнгес мед вуомы шуисько вал.

Сиськыса ӝӧк сьӧрысь потӥзы, кузёлы тау каризы. Со куспын Айтко чортӥськыны кутскиз:

Ойдо ини, атай, кошкомы. Апай доры ведь югытэн ум вуэ. Мон валэз сезьыен сюдӥ ини.

Озьы-а, пие, иське, каллен вырӟомы, — озьы шуыса, Богодан но Тулай ӧжытак вераськыса пукизы на но, кизэс сёткаса, ӟеч кылъёс вераса, люкиськизы.

Бертыкуды нош ик пыралэ, мон витё. Али ке сюресты капчи мед луоз, — шуыса, Тулай кунооссэ келяз.

Вал нош ик капчиен азьлань ворттэ. Гуртэз ортчемзы бере Айтко атаезлэсь юалляськыны кутскиз:

Со Тулай агаез кызьы тон тодӥськод? Эшшо ке куноятӥз но. Монэ но, «ойдо корка пыр ни» шуыса, дораз ӧтиз.

Милям соин тодматскеммы дырысен уно аръёс ортчизы ини. Ӟучъёсын жугиськон дыръя вал со. Ожмаськон но лябӟе вал ини, ӟучъёс чигнаса пегӟыны ӧдъязы. Одӥгез ӟуч воргорон, валэныз ворттыса кошкыкуз, Тулаез адӟиз но валзэ со пала берыктӥз. Тулайлэн валэз азь пыдзэ чигем, кызьпу выжыос вискы гуштыса. Мон но валме Тулай пала берыктӥ, адӟи уго ӟучлэсь со пала матэктэмзэ. Ӟуч ожгарчи, саблязэ кутыса, кизэ выллань ӝутӥз. Мон соку ик палашеным солэн ӝутэм кияз сали. Тулай валэныз выронъяз мазэ-созэ но валаса ӧз вуы. Ӟучлэн киыз чутрак лэзиськиз, ӧз вуы Тулай вылэ ожалскыны. Вожез потэмен-а, киыз вӧсь луэмен-а, чирак черетскиз но, валзэ мукетлань берыктыса, пегӟись эшъёсыз пала кошкиз. Мон сьӧраз ӧй ни уйиськы, Тулайлы юрттӥськи. Тӥни со дырысен ми туж матысь эшъёс луимы. Кытӥ-отӥ мон со доры вуылӥсько, со но асьме доры пыралля.

Яркыт шунды музъемез шунтэ. Омыр но, шундылэн шунтэменыз, музъем вылысь, вӧё тулкымен шудыса сямен, вылӥе ӝутске. Айтко паймыса ик котыр шаерез чакла. Солы туж тунсыко потэ — кытчы ышизы нюлэсъёс, кызьпуо арамаос. Сюреслэн бур палаз но, палляназ но такыр бусыос гинэ адско. Ямашурысь кошкемзы дырысен, эшшо одӥг гурт пыр потыса, табере я уллане вортто, я вырйылэ тубо. Мышказы ӵошкыт бусыос кылизы. Ӝужыт вырйылэ тубыса, нош ик кыӵе ке гуртэ вуизы.

— Атай, нош таиз кыӵе гурт, гурезь йылын кадь интыяськемын, — тунсыкъяське Айтко. — Бадӟым но ӧвӧл кадь, кӧня ке гинэ коркаос адско.

— Бигер гурт со, Биектау шуо. Асьме сямен Ӝужыт гурезь, — валэктӥз пиезлы Богодан. — Ӝоген Ядыгаре вуомы ини, апаеныд адӟиськод, ог ньыль иськем гинэ на кылиз отчыозь. Отын но бигеръёс уло.

— Нош Кузонэ мыномы-а асьмеос? — юа Айтко.

— Адӟом али. Ядыгарысен тодмо луоз, — шонерак ӧз вера пиезлы Богодан.

* * *

Ядыгар гурт бадӟым ик вылымтэ, кык урамъёсыз, кечат пумиськыса, кирос кылдыто кадь. Кечато урамъёслэн шоразы коркаосыз но ӧвӧл, кыр инты. Айтко воксё паймиз солы, юатэк ӧз ни чида:

— Атай, нош малы со быдӟа кыр инты кельтэмын, малы отчы коркаос пуктӥллямтэ?

— Со базарлы инты. Вирнуналэ татын бадӟым базар луылэ. Вуз карисьёс но, басьяськисьёс но лачак гинэ люкасько, калык гуж! гинэ каре. Котыр гуртъёсысь вуо: удмуртъёс, бигеръёс, поръёс — валэн но, пыдын но вуо, — валэктӥз пиезлы атай.

Кыр интыез ортчыса, одӥгаз урамысь бадӟым корка доры валзэс берыктыса, Богодан, пиез пала берыктӥськыса, капчиен шуиз:

— Я, тани вуим ини апаедлэн улон интыяз.

— Со та коркан улэ-а, мар-а? — паймиз Айтко. — Арчаын сыӵе юртъер чик ӧвӧл ук, ваньмыз коръёслэсь гинэ лэсьтэмын. Нош татын корказылэн улӥыз вӧлымтэ изъёслэсь тыремын, вить борддорен бадӟым корка, ньыль укноеныз ураме учке, липетэз горд сюйлэсь черепицаен липемын. Бадӟым капкалэн огпалаз быдэсак излэсь ӝутэмын кенос, урам палан ӧсэз кортлэсь лэсьтэмын.

Сюресчиос уробоысьтызы васькыса но ӧз вуттэ кадь, пичи капкаетӥ шок но пуль бызьыса Огрей потӥз:

— Ой, атай, кыӵе мон мӧзми ини тӥлесьтыд! — юн-юн ӟыгырскиз Богодан борды. Богодан но ӟыгыртӥз нылзэ, кымысаз чупаз. Со куспын доразы Давликам вуиз. Богодан, нылыз бордысь лэзиськыса, эмеспиез доры матэктӥз.

— О-о, кияу-балакай, син ойдэмы? Сезне куруебезге шат! — шумпотыса Богодан кизэ сётӥз эмеспиезлы.

— Исенмесез! Исенмесез! Сэзнен белен куптэн куреткенебез юк, атай! — пумиськемлы шумпотэмзэ возьматӥз эмеспи но.

Коркасьтыз бызьыса кадь потӥз на мӧйы кышномурт. Со но капчи мылкыдын, возьдаськыса кадьгес:

— Баракаллах! Нинди котелмеген очрашу! Сезне куруембе бик шат! — сыӵе кылъёсын пумитаз лыктэмъёсты туклячизы.

Огрей со куспын Айткоез ӟыгыръя, чупаса веша ини:

— Кыӵе бадӟым будэмед, воргорон луэмед ни ведь. Я, ойдо пыром корка. Атай, ойдолэ ни пыроме, кӧня сыломы на татын дэймыса кадь. Давликам валдэс утялтоз. Ойдолэ ини, ойдолэ, — кужмысь ӧтиз Огрей.

— Лыктэм бере, пыром ини, — ӧз пумитъяськы Богодан, — саламъёсмес басьтоно уробоысь. Анаед мар но со пыжиськемъёссэ тыриз, лэся.

Валзэс Давликам, азбаре пыртыса, юскиз но, липет улэ интыяса, сиён сётӥз. Кылемъёсыз ваньзы пыризы корка, выл дӥсьёссэс куштыса, Богоданэн Айтко пуксизы борддор кузя интыям но дэра шобретэн шобыртэм ӟус вылэ. Огреен мӧйы кышномурт, Давликамлэн анаез Назия, коркалэн мукет ӝыныяз кутскизы, куспазы бигер кылын вераськыса, мар но со дасяны ӝӧк вылэ. Валэз интыяса, Давликам но корка пыриз. Эмеспиезлэсь Богодан юано кариськиз:

— Нош кытын атаед, Ильяс кудое? Кытчы ке кошкемын-а, мар-а?

— Со, матысь тэле ветло шуыса, лымшор азьын гинэ кошкиз — умортоосмес, пе, учкыны. Ӝоген вуоз, дыр, ини.

Айтко бигер кылэз уггес тоды на, соин ик вераськонэ ӧз пыриськылы, йырзэ бералъяса, котыр корка пушез эскерыса пукиз. Номыр ик паймымонэз ӧз адӟиськы солы. Озьы ке но татын асьсэлэн кадь ӧвӧл, маиз ке но мукетгес, только со ӧз тоды на, маиныз мукет. Пӧртэмлыкез нош гур бордын вылэм: бадӟым гурлэн одӥг палыз гинэ таяз висъетэ потэмын, со вӧзы лякемын на пичи гур — подтопка, солэн аслаз эстон пасез но вань, нош ӵын потонэз бадӟым гур борды ик лэземын.

Давликамен Богодан куспазы кӧня ке вераськыса пукизы на, кьшномуртъёс соосты ӝӧк сьӧры ӧтизы. Пуксьыса ӧз вуэ — корка пырись луиз. Со корка кузё вылэм, Ильяс. Куноосты адӟыса, воргорон Богодан доры матэктӥз, сое ӟыгыртыса, шумпотэмзэ возьматӥз. Ӟечбуръяськыса кудоос ваче бур кизэс кутӥзы. Собере юалляськон-вераськон ӧръяськиз ини удмурт кылын, Ильяс удмурт кылэз ӟеч тодэ, уго вуз каронэн вырыса удмурт гуртъёстӥгес ветлоно луэ. Озьы ке но Богодан кытӥ-отӥ бигер кылъёсын вераз лыктэмзылэсь мугзэ, Айтко медаз тоды, кыӵе шугъяськон вуттӥз туннэ соосты Ядыгаре. Богодан бигер кылын ик юаз кудоезлэсь:

— Шунды вылын на, уз луы-а кыкнамылы али ик Кузонэ вуыны? Мыным, кинъёсын ке пумиськыса, вераськыса, тодыны кулэ вал отысь югдурез. Кылӥськиз: Мамукты, ми пала мыныса, таласькыны малпа, лэся.

— Озьы бере, тӥ али сиське. Мон валме кытко но, кытчы кулэ, ӝог гинэ вуомы. Асьмеос пие доры пыраломы. Дамир югдурез умой тодэ, луоз, солэн отын олокинэн но кусыпъёсыз тупатэмын ини, — шуиз Ильяс.

Назия лыктэмъёсты сиськыны мукет висъетэ ӧтиз. Ӝӧк вылэ вуттӥллям ини балиш, чак-чак, акмай1, токмач, мукет сиёнъёс, ческыт зыно пӧсь чай. Сиськыса ӝӧк сьӧрысь потӥзы но, Богодан кышноослы вераз:

— Ваньмыз туж ческыт вал, рахмат, рахмат2!

Собере пизэ индылӥз:

— Тон али апаеныд татын кылльы, ми Ильяс кудоен одӥг интые ветломы, ӝытлы кӧлон дыре татчы берен вуомы. Эн мӧзмы. Кырсиеныд но вераськы, со удмурт кылэз ӧжыт-ӧжыт тодэ ини, огдэс огды валалоды, — буйгатӥз пияшез Богодан. Кышноослы кошкемзы сярысь вераса, Давликамен ӵош потӥзы азбаре. Отын Ильяс возьма вылэм ини.

***

Богоданэн Ильяс капчи уробое вӧлдэм ын вылэ пуксизы. Давликам, бадӟым капказэс усьтыса, «Сезге хаерле юч телим!» ӟеч сюрес сӥзьыса, келяз атаеныз каенатайзэ но капказэ ворсаз. Кузёлэн гидын кема сылэм валэз, эрике потэменыз, юн гинэ ворттэ. Ильяс сое уг но лапкаты — мед ойдо ӧжытак пыдъёссэ небӟытоз. Озьы воргоронъёс ӝог гинэ пыризы одӥгаз Кузон ураме но улыно-вылыно корка доры дугдӥзы. Лыктэмъёсты пумитась луымтэен, Ильяс ачиз ик, капказэ усьтыса, валзэ азбаре пыртӥз но лапас юбо борды думиз. Со куспын пичи капкаетӥ кык кузя пырисьёс луизы. Дамир кышноеныз. Ӟечъяськемзы бере Дамир атаезлы шуиз:

— Без кибетча бар иде3.

Лыктэмъёс, ӧтемзэс возьматэк ик, кузёосын ӵош корка пыризы, улӥысь люкетаз. Кышномурт соку ик гур котыраз берганы кутскиз, нош пиосмуртъёс, асьсэ понна кыльыса, соку ик кенешыны кутскизы лыктэм мугзы пумысен. Богодан кылпум поттӥз:

— Дамир, тон татын котьку ик калык пӧлын бергаськод. Кыӵе вераськонъёс кылӥсько ини Кузонын выль улуг-ханды кузёяськыны кутскем дырысен? Мар адями со, Мамук-бекты?

— Э-э, кудое! Мамук сярысь огшоры калык ноку но ӟеч кылъёс ӧз вера на. Ар но уг пукы али, кузё кариськыса, соин ӵош лыктэм ожгарчиос но ар мында асьсэдыз кузёен лыдъяло ини. Эрказъяськыса, калыклэсь ваньбурзэ таласа, ворттыло котыр гуртъёстӥ, нылъёсты сантэмало. Татын, Кузонын но, асьсэлэсь радлыксэс тупатӥзы ини: нырысь ик соослы сюрес сётоно, йыбыртъяно, тюбетейдэ куштыса, лавкае ке пыризы — мар кельшиз, сое басьтыса кошкозы дунтэк. Бийёс но муллаос юрттӥзы Мамуклы Кузонын хан луыны, табере асьсэос ӧпкелё ини сыӵе юмоке сюремзылы.

— Кылӥськиз, Мамук ожгарчиосыныз Арча вылэ ожалскыны медэ шуыса. Зэм-а со? — юаз Богодан, Дамир шоры ӝот-ӝот учкыса.

Акмай1 — вӧй.

Рахмат2 — тау.

Без кибетча бар иде3 — Ми лавкаямы вал али.

— Сыӵе вераськонъёс вал ог-кык арня талэсь азьвыл. Али ке Мамук сюрслэсь уно ожгарчиоссэ келяз Идель шурлэн бур пал ярдуръёстӥз калан4 бичаны. Малпасько, соосыз толэзьлэсь кемагес ветлозы, дыр, таласькыса но поръёсты, чувашъёсты сантэмаса, коркаоссэс сутылыса. Котьку ик озьы выро, сямзы сыӵе, лэся. Тӥни сыӵе ужпумъёс али татын, дуно кудомы. Калык пӧлын вераськонъёс ветло: кызьы ке но люкаськыса сэрпалтоно ни со кырымъёсын пуктэм гыжкалъёсты. Калык кема уз чида ведь сыӵе югдурез.

Дамир ӧжытак чалмытскиз. Богодан шугъяськонзэ ӧз буйгаты на, соин ик ӵектоно кариськиз:

— Вае тазьы лэсьтоме: тӥ со лыктэмъёслэсь ми пала мыныны дасяськемзэс шӧдӥды ке, одно ик, соосыз азьпалтыса, кызьы ке милемлы ивор сётэ. Ямашурын мынам тодмо эше вань, Тулай нимо — гуртазы сое ваньмыз тодо, ма, гуртсы но бадӟым ӧвӧл. Тӥни со Тулайлы ик ивордэс вералоды, со пизэ соку ик ми доры келялоз. Берен сюрес вылысен мон со доры пырало на, верасько ай соин.

— Со Тулайлэн кышноез ведь кулӥз, лэся. Нылпиосыныз гинэ али улэ. Озьы-а? — юаз Ильяс.

— Озьы, озьы. Кыкетӥ арзэ ини кузпалтэк, — шуиз Богодан.

— Тодӥсько мон сое, дораз но пыраме вань. Йӧно адями, шӧдӥське, оскымон, — вераськонэз йылпумъяса кадь, вераз Ильяс.

— Сыӵе тӥни шугъяськонэн вуи дорад, Дамир, вождэ эн вай. Кызьы ке но куронме быдэстэ, одно ик. Ато ми шуге-леке сюромы, — куриз Богодан.

— Эн сюлмаське Арчаяды, мар ке тодӥмы ке, соку ик тӥледлы ивортомы, — оскытӥз Дамир. — Быгатоды, дыр, пумитаны но куноятыны со юлбасаръёсты5.

Алсу ӝӧк вылэ мар но со пуктылӥз, пӧсь чай но вуттӥз. Удмурт сямен со уг тоды вераськыны, воргоронъёсты бигер кылын ӝӧк сьӧры ӧтиз:

— Биата, Богодан кунак, Дамир сэз утыр индэ.

Воргоронъёс ӧжытак куртчизы но, Ильясэн Богодан ӝӧк сьӧрысь потӥзы, кузёослы тау карыса, выльысь сюрес вылэ дасяськизы. Дамир соосты келяны потӥз. Богоданэз со оскытӥз на:

— Эн сюлмаськы, кызьы кулэ, озьы ик лэсьтомы, ыбылӥськон тӥрлыкен но ӧжытак быгатомы юрттыны. Озьы ведь, ата? — атаез пала кариськыса, шуиз Дамир.

— Юрттомы, кызьы сотэк, — будэтӥз Ильяс.

— Озьыен, сау булыгыз, Дамир, — кизэ сётыса, люкиськиз Богодан.

— Тиздэн курешкенчеге хетле6, — келяз лыктэмъёсты Дамир.

Калан4 — выт, тыриськон.

Юлбасар5 — разбойник.

Тизден курешкенчеге хетле6 — ӝоген пумиськытозь.

* * *

Шунды пуксьымтэ на вал. Вал капчиен нуэ уробое пуксемъёсты: вуз карись Ильясэз но Арчакарлэсь йырзэ — Богоданэз. Соос али, куспазы вераськытэк, ас малпанъёсазы усьыса мыно. Вал дор палаз уллямез кулэ уг кары — ворттэ но ворттэ.

…Ильяс – вуз карись. Вузъёс со вайылэ олокытысь но, базаръёсы ветлыса. Вуылэ ӟуч каръёсы, чувашъёс, башкиръёс доры, Астарканысь бигеръёс доры но вуылэ. Огназ кузь сюрес вылэ уг пота, ачиз кадь ик вуз карисьёсын люкаськыса ветло. Котькуд аре, кытчы ке но мыныса, гуртаз уно гинэ кулэ мар кеос вуттэ, ӵемгес сыӵеоссэ, кудъёссэ тапалась шедьтыны уг луы: сылал, буртчин басмаос, кышноослы чеберъяськонъёс, эсьмаса, берло аръёсы вайылэ ини пищаль — пыӵалъёс но санапалъёс, дары но вайылэ. Вайылэм вуззэ Кузонын Дамир пиез кышноеныз, Алсуэн, вузало. Ачиз но котыр гуртъёстӥ вузаса но куосын вошъяса ветлэ. Солы юрттӥське Давликам пиез но. Кузонын но гуртазы вань асьсэлэн вуз карон интызы — кебитсы. Со сяна, гуртазы вань на ку посон интызы, отын кык кузя гуртысьтызы воргоронъёс тыршо, соос ик собере вурыло изьыос но шубаос. Озьы Ильясэн Дамир вузаськыны быгато асьсэ дорын вурылэм дӥськутэнызы но.

Назия апа но Огрей корка пушкын но пудо котырынгес бергало, вань на пичияк бакчазы. Пудоос пӧлын вань кык валзы, одӥг скал вордо, курегъёссы но кӧня ке ӟазегзы вань. Бусызы но вань, бадӟым ик ӧвӧл. Отын уногес кизьыло сезьы, валъёслы шуыса, кӧня ке вазь но тари будэто. Озьы семья, шугъёсы вуытэк, быгатэ улыны котькыӵе аръёсы. Огрей секытэн луэмен, Давликам али атаез сьӧры уг ни ветлы, юртъер котырысь ужъёсын выре. Дамирзылэн, куать ар кузпалэн улыса но, нылпиосыз ӧвӧл. Соин ик Огреез секыт ужъёсты быдэсъямысь алыло ини, жаляло. Ильясэн Назия туж возьмало ук, нунокъёссы мед луозы шуыса.

Богодан Арча элькун кивалтэтын укмысэтӥ арзэ пуке ини. Сыӵе ужез быдэсъяны юзбашиослэн — сотникъёслэн — кенешазы бырйизы, шуг-секытъёсысь потыны быгатэмзэ чакласа. Богодан со ужлэсь танӥськыны выриз ке но, люкаськемъёс чурыт сылӥзы асьсэ кылзы вылын. Улэ вал Богодан Арчакар дорысь ог тямыс иськемын пичигес Казанйыл гуртын, соку со вал сотник. Чакласа возиз дас кык гуртъёсты. Со гуртъёсын уло куинь воршудысь калыкъёс: поска, чабъя но порга удмуртъёс. Атаез кулэм бере Богоданлы кылиз кизёно музъемез но валэз. Со музъемлы кузё кариськыса, Богодан котькуд аръёсы отын ю-нянь будэтэ: ӟег, сезьы, вазь но мукетсэ. Вань ял карись бусыез но. Эльйыре пуктэмзы бере семьяеныз улыны кариськиз Арчакарын, кузётэм кылем юртъерез басьтыса. Татын ик кӧня ке пудо но вордэ: вал, скал но тылобурдоос. Али дыре Богоданлэн сюлмаськонэз — ӝоггес ортчытоно тулыс бусы ужъёсты. Ю-нянь будэтонэн, пудо сиён дасянэн котьку ик, одӥг семьяен сямен, валче ужало Казанйылысь сузэрезлэн семьяеныз — бусыоссы люкемын ӧвӧл ук. Татын соос уно гинэ пудо-живот но вордо…

Нош вал вуттӥз ини уробоын пукисьёсты Ядыгаре. Ильяс валзэ юскыса гидэ пыртӥз. Богодан но аслэсьтыз валзэ учкемъяськиз. Валэз кузёзэ гырдалляса ик пумитаз — эн сюлмаськы, сиёнэ вань, вуэн но куноятӥзы ини, шуиз кадь. Воргоронъёс кыкназы ик ӵош корка пыризы. Айтко, атаез доры матэктыса, соку ик юалляськыны кутскиз:

— Атай, тӥ кытын вал? Кузонэ-а ветлӥды? Малы монэ но ӧд басьты? Мынам но бадӟым карез адӟеме потэ вал.

— Тонэн йырин чик ӧй вал отын, пие. Ми кулэ ласянь гинэ ветлӥмы, кема но ӧм улэ кадь. Оло нош, монтэк татын мӧзмыса улӥд-а?

— Ӧ-ӧй, апай монэ лавкаязы но нуллӥз. Марзы но отын ӧвӧл, ява!

— Ӧд ке мӧзмы, ярам, иське. Ӵуказе мон тонэ нош ик вазьгес сайкато. Асьмелы югытэн дорамы вуыны кулэ, анаед ато сюлмаськоз, так но уйзэ изьытэк потоз ини.

***

Ӵукна, шунды ӝужаны кутскыку, Богодан валзэ сюдӥз, люктаз но, корка пырыса, пизэ сайкатӥз. Та дырлы корка кузёос пыд вылазы вал ини. Огрей но анайзы Назия мар ке но пӧраны, пӧзьтыны выро гур котыразы. Нош Ильяс, Богоданэн ӵош ик потыса, пудоосыз котырын бергаз. Ӵукназэ сиськыса, Ильяс Богоданэз кеносаз пырыны ӧтиз, отын со ваем вузъёссэ возе. Кеносын тол дыръя кадь кезьыт возиське на, излэсь тырем борддоръёс чаляк уг шунало.

— Лык ай татчыгес, — кеностӥз ветлонъяз вазиськиз Ильяс ӧс дорын сылӥсь кудоезлы. — Учкы, мар вань тани татын.

Богодан Ильяс пала пичигес висъет сьӧры матэктӥз но кык ӝажыос вискы пуктылэм ньыль-вить пыӵалъёсты синйылтӥз. Татын ик борддоре юнматэм ӵогъёсы палашъёс но сабляос ошылэмын.

— Быгатод-а кӧнязэ ке вузаны ожгарчиосыдлы? — юаз Ильяс. — Дунзэ тырыны быгатоды лымы усем бере но сёр яке низь куосын, луоз азвесен но, зарниен но. Кӧняен ачим вайи, озьы ик тӥледлы но дуныз мед луоз, мултэс будэтыса уг басьты. Ведь одно ик Мамукен пумиськоно луоды, милемлы но со акыльтӥз ини. Кулэ ке, дары но вань на одӥг пуд мында.

Богодан ож тӥрлыкъёсты кияз кутылыса ик утчаз но, ма карыны паймеменыз, вераз:

— О, мон сое ваньзэ али ик нуысал но, сюрес вылын таланы быгатозы ук, эшшо ке тарантасын ваньмыз адӟиськоз, — шумпотыса но шугъяськыса куаретӥз.

— Вай тазьы вераськомы: мон бертыса кинэн но соин верасько, одно ик басьтомы со тӥрлыкъёстэ. Нош али тон соосты нокинлы эн ӵектылы. Таяз арняе ик мынам адямиосы тон доры вуозы бадӟым уробоен но кык кузя буш вал вылын — куиньназы луозы. Тон соосты дорысьтыд ӝыт пеймыт луэм бере гинэ келя, уй куспын Арчае мед вуозы.

— Тон понна ваньзэ ӟечкын лэсьто, эн сюлмаськы, — кыл сётӥз Ильяс.

— Иське, мон тыныд оскисько, кудое. Ведь со Мамукеныды милемлы ожмаськоно луоз ик, дыр. Озьыен, дасяськоно луоз ини, — тазьы вераськыса, воргоронъёс корка пыризы.

Пырыса Богодан мае ке утчаны кутскиз. Огрей, чакласькемзэ адӟыса, юаз:

— Атай, маид ке ышиз-а?

— Анаед сьӧрамы мар но со келяз вал, мон толон дыртэменым сётыны вунэтӥськем.

— Мон со пуйыдэ тани татчы понӥ, — ӟус улысь поттыса, Огрей атаезлы сётӥз.

Богодан, пуйыез пертчыса, кышет поттӥз но сое Назия туклячиезлы сётӥз.

— Ой, алла, алла, малы сыӵе кузьым мыным? Чик но кулэ ӧй вал ведь, — керпотыса кадь шаль кышетэз басьтӥз кышномурт.

— Нош таиз тыныд, — атаез Огрейлы пужыятыса вурем айшет сётӥз. — Нош таиз воргоронъёслы ини, — ӝӧк дорысь ӟус вылэ Богодан кык куз пыдвыл понӥз.

— Ма, тӥ кузьымъёсын лыктӥллямды бере, ми но мар но со кузьмаломы ини. Кен, ойдо али, кеносэ потыса, бугыръяськомы, мар ке но шедьтомы, дыр, — Ильяс Огреен потӥзы но ӧжыт улыса пыризы. Ильяс Богоданлы бинет сётӥз:

— Таиз Марӟана туклячилы но нылъёсыдлы пичи гинэ кузьым, нош пиосыдлы берлогес луоз. Таизлы пиедлы, Айтколы, кен ачиз дасям ини.

Огрей, Айтко доры лыктыса, кузьымзэ али ик мертаны косӥз, яралоз-а, уз-а, пе.

— Айтко, ойдо мерталом, дӥсяса утча ай, — озьы вераса, вынызлы чагыр-лыз буртчин дэрем сётӥз.

Айтко воксё паймиз, шумпотыса соку ик аслэсьтыззэ куштӥз но кузьымзэ вылаз дӥсяз. Дэрем ӵапак со вылэ вуремын кадь вылэм.

— Акашка дыръя ик дӥся но нуллы ини, ява, — будэтӥз Огрей.

* * *

Тйни озьы кузьымъёсын, кузёослы тау кылъёс вераса, Богодан пиеныз сюрес вылэ потӥзы. Дор пала вал, чик уллятэк но, ворттэ ини, мӧзмем, шӧдске, ас гидэзлэсь. Ямашуре вуыса, корказ пырытэк ик, Богодан Тулаен вераськизы но, сюресчиос мынонзэс азьланьтӥзы. Ӝыт пал, шунды пуксьыку, Айткоен Богодан гуртазы вал ини.

Корка пырыса вуиз оло ӧз, Айтко выль дэременыз ушъяськыны кутскиз ини.

— Анай, учкы ай, апае мыным кыӵе дэрем сётӥз. Нош солэн Тукташмы кадь пичи нуныез луоз ини. Мыным со ачиз вераз, лавкаязы ветлыкумы. Эшшо ке оломаин но сюдӥзы, чак-чаксы туж ческыт вал. Кузонэз адӟеме потэ вал, но атай монэ ӧз нуы. Асьсэос ке ветлӥзы, нош кема отын ӧз улэ, — дугдыны быгатытэк, огкутскемен кисьтӥз Айтко. Со куспын, валзэ интыяса, Богодан но корка пыриз.

Байбичкоен Кибичко соку ик бызьыса атайзы доры вуизы.

— Атай, май вайид, кытын тон вай? — шенгыль-пешкыль карыса, юа Кибичко, Байбичко ке ӟыгырскиз атаез борды но, номыр вератэк, шораз учке. Богодан нылзэ но пизэ ваче карыса зыгыртӥз но, пуйызэ пертчылыса, кузьымъёссэ но саламъёссэ поттаны кутскиз. Пыжиськем саламъёссэ пичиослы сётӥз, собере чебер пужыё басма поттӥз но Жагиезлы мычиз.

— Таиз тӥледлы анаеныд кыкнадылы.

Марӟана нылыныз ӵошен бинетэз сэрттыса вӧлак каризы но, кышномурт паймыса ик шуиз:

— Ма, татын кык дэремлы потымон ук. Ма, мар со быдӟа кузьым лэзёд ини. Нош кыӵе асьтэос ветлӥды, сюрес урод, дыр, али?

— Сюрес сокем шуг ӧй вал; нюлэсъёстӥ но шуръёс дуртӥ гинэ аламагес. Огреймылэн ӝоген пичиез луоно кадь, адске ини. Аслэсьтыз юаны ӟеч ӧз поты. Давликам но юрт котыразгес берга, атаез сьӧры али уг ни ветлы кадь. Огрей ваньдылы салам вераз, — озьы вераськыса, ваньзы сиськыны пуксизы.

Ӝыт утялскыса, нылпиосты изьыны келямзы бере, ӵошен гинэ кыльыса, Марӟана картэзлы вазиськиз:

— Я, вера ини, мар шугъяськытэ тонэ? Малы таӵе шуг сюресэн кулэ луиз Кузонэ ветлыны?

Богодан, ӧжыт малпаськыса, яратоно кузпалэзлы кисьтыны кутскиз урод иворъёс сярысь:

— Тодӥськод ук, Кузонын али улуг-ханзы7 кильмешек8 Мамук, бийёс но муллаос сое пуктӥзы сыӵе бадӟым йыр интые. Со Мамуксы асьме вылэ ожалскыны малпам аслаз ожгарчиосыныз. Ку со вуоз тапала — али тодмо ӧвӧл. Соин ик ӝоггес бусы ужъёсты быдэстоно но ожгарчиосты люкано, дасяськоно со албастыосты пумитаны. Огшоры калыкез но мултэссэ карысь поттоно, огдырлы кытчы ке мед интыяськозы. Татчы медаз кыле, юнме бырыны шедёзы. Тӥ но гужемез Казанйылын ортчытэ ини.

— Ой, Инмаре, Инмаре! Мар адӟон та, мар адӟон! — лулскылыса Марӟана изён палазы валессэ тупатъяны вырӟиз. Уез кыкназы ик ӟеч вӧтъёс адӟыса изьыны ӧз быгатэ ни.

Богодан валес вылаз бергаса уез потӥз, шугъяськеменыз, кызьы ожгарчиосты люкано но ожмаськыны дасяно шуыса. Марӟана лулӟылӥз, кӧня калык юнме быроз ини шуыса.

Ӵукна султыса, эльйыр нырысь ик пумиськиз Арчакарлэн капкаосыз дорын возьмаськисьёсын. Вераськизы: куиняз ик капкаос доры будэтыса эшшо быдэн куинь возьмаськисьёсты пуктыны но уен-нуналэн сакгес кариськыса возьмаськыны. Возьмаськыны ветлоно ожмаськон тӥрлыкъёсын, кинлэн маиз дасез вань: палашен, сабляен, шибодыен, пукыӵен, пыӵал ке вань, со но мултэс уз луы. Вал вылын ньыль-вить лыктӥсьёсты адӟыса, одно ик жугоно капка дорысь ошем корт борды, карын улӥсьёслы ивортоно.

Возьмаськисьёсын вераськыса, Богодан утчаз Ядыгаре мыныны мылкыд карисьёсты, ож тӥрлык вайыны. Сыӵе уже кужмысь косыны уг луы, сюрес вылын оломар но луыны быгатоз. Мынӥсьёсын умой-умой вераськоно, индылоно. Шедьтоно сыӵе муртъёсты, кудъёсыз бусы ужъёсын уг выро. Кык дурисьёслэн, вузчилэн, вуриськисьлэн семьяосазы вань сыӵе воргоронъёссы, кудъёсыз ӟечен быдэстозы кадь косэм ужез. Соглаш луэмзэс веразы одӥг дурисьлэн юрттӥськись пиез Шудэг, вуриськисьлэн бадӟымез пиез Ӟечан но вузчилэн алигес кышнояськем пиез Туктамыш. Куиньназылэн ик вань асьсэлэн валъёссы. Богодан соосты огазе люказ но валэктӥз, кызьы шедьтоно Ядыгарысь Ильясэз, марзэ солэсь басьтоно но кызьы сётэмзэ Арчае вуттоно.

Улуг-хан7 — быдӟым кивалтӥсь, эксэй.

Кильмешек8 — палэнысь лыктэм мурт.

— Мыныкуды огазьын эн мынэ, сюрес вылын тӥледыз адӟисьёс медаз шӧдӥське. Огды буш валэн, кыдёке азьпала потыса, мынэ, огды, кыдёкегес бере кыльыса, мынэ; висказы кыткем валэн кӧня ке турынэн луоды. Нош бертыны бер ӝыт гинэ потэ мынон нуналады ик, уй ӵоже сюрес вылын луоды. Ӵукналы тырше доре вуыны. Бертыкуды огазьынгес, чакласькыса бертэ. Сюрес вылэ ӵуказе ик потоно, соку татын тӥледыз пумиталомы ӵукна удмуртарня нуналэ. Мар кулэ сюрес вылэ басьтыны, туннэ ик дасялэ.

— Эн сюлмаськы, Богодан агай, ваньзэ ӟечкын вуттомы, оскиськы милемлы, — шуизы егит воргоронъёс.

Та нуналэ ик эльйыр вӧсясьёсын пумиськиз, вераськизы, кызьы радъяны Акашка шулдыръяськонэз. Огкылэ вуизы: ортчытоно лыктӥсь арнянуналэ ик, шулдыръяськон кемалы медаз кыстӥськы — быдтоно одӥг нуналын, гырон-кизён дыр вуэмын ини, ӝегатсконо ӧвӧл. Собере калыкез дасяно мукет секыт адӟонлы.

Кӧснуналэ ӵукна Ядыгаре ветлӥсьёс Арчае берытскизы. Богодан соосты карлэн капка дораз пумитаз. Нырысь ик, уробоысь турынэз палэнтыса, учкиз, мар отын вань. Шумпотэмзэ ватытэк, юалляськыны кутскиз:

— Кызьы ветлӥды, умойтэм учыръёс ӧй вал-а сюрес вылын, ӧд-а курадӟе? Ильяс мар ке вераз-а, кызьы со тӥледыз пумитаз но келяз?

— О-о, сомында юан сётӥд, соку ик вераны радзэ но уд шедьты, — вазиськиз Ӟечан.

— Ветлӥмы умой, бертыкумы гинэ одӥг интыын юмоке сюримы. Нюлэстӥ потыкумы, пеймытын мукет сюресэ кошкиськеммы. Ярам, со сюрес кыдёке ӧз вутты, писпу погыръям интые гинэ. Со инты сюресмылэсь ог ӝыны иськемын гинэ вылэм. Берытским но азьланьтӥм шонер сюрестӥ, — мадиз Шудэг. Вераськонэ пыриськиз Туктамыш но.

— Ильяс агайлэсь корказэ верамедъя соку ик шедьтӥмы. Ваньзы доразы вылӥллям. Огрей юалляськиз тӥ сярысь. Тодэмез потэм, кызьы тӥ бертӥллямды соос дорысь. Вуэм берамы ик куно каризы: сюдӥзы, чаен сектазы. Ильяс агай, капказэ усьтыса, валъёсмес азбаре пыртыны косӥз. Кеносаз пырыса, ачиз ик поттаз вить пыӵал но куинь палашен кык сабля, эшшо сурон кулэсь вурем пуйыен дары. Милемыз умой шобыртыны косӥз, уробо пыдсы тырыса, думылытӥз. Озьы радъяса ваньзэ турынэн согимы. Вырытозямы ӝомыт луиз ини. Ильяс агай вань семьядылы салам вераз. Ачиз ик капказэ усьтӥз но «Инмарды мед утёз» шуыса келяз, — таин Ӟечан веранзэ быдтӥз.

— Туж бадӟым тау тӥледлы кылзӥськемды но уждэс умой быдэстэмды понна. Нош ваем тӥрлыктэс али мон доры ик кельтомы, инты сюроз. Собере шутэтскоды ини.

* * *

Кӧснуналэ лымшор бере Быдӟым куала дорысь тангыра котыр улосвылэ шулдыр крезьгур кисьтыны кутскиз. Тангыраен шудӥзы, жугизы бодыосын вамен кор вылэ ошылэм пушко кислэсъёс борды. Со пушко кислэсъёслэн кузьдалазы но, зӧкталазы но огкадесь ӧвӧл, соин ик турлы куара сёто. Радзэ валаса жугид ке, шулдыр гинэ крезьгур поттыны луоно. Тӥни озьы, вӧсясьёслэн косэмзыя, куинь егит пиос, тангыраен шудыса, Акашкаез ортчытон сярысь ивор вӧлмытӥзы быдэс шаере. Арнянуналэ ӵукнаяз тангыраен эшшо шудӥзы на.

Шунды шуныт тылсиоссэ пазьгыса гинэ вуттӥз, котыр гуртъёсысь калык — пичиез но, мӧйыез но, пересез но — Арча сьӧрысь возь вылэ, Быдӟым куала доры, кыстӥськыны кутскиз. Кыткем но, буш но валъёсын, пыдын но. Лыкто песьтэръёсын, сумкаосын, котомкаосын — сиён-юонэн. Куала пушкын вӧсясьёс тӧдьы пинал ош вандӥллям но пӧзьтыны сӥль дасяло. Куинь бадӟымесь пуртыосын ву быректыса пӧзе, ву пӧлы одӥгез вӧсясь сӥль юдэсъёсты лэзья, мукетыз кеньыр кисьтэ, куинетӥез пу дася но тылскемъёсы писъёс тырылэ. Куала пушкын вӧсясьёс туннэ вить кузя тыршо, ваньзылы уж тырме: матысь пичи ошмесысь ву нуллоно, пудо вандэм бервылэз утялтоно, куала пушез чылкытатоно…

Лымшор азьын ӝук но, шыд но пӧзизы. Та дырлы калык уно гинэ люкаськиз, быдэс Арча улосвылысь удмуртъёс вуэмын туннэ: чебер, чылкыт дӥсяськем калык гуж! гинэ каре, тодмоосынызы пумисько, ӵыжы-выжыоссэс пумитало, эшъёсынызы адӟисько. Кин но, мар но уг верало — туннэ ваньмызлэн ик мылкыд ӝутскемын. Азьланьын секыт ужъёс ке но возьмало, шутэтскон дыръя ужъёс сярысь туж ик уг верасько ни, одӥг нуналзэ шулдыръяськоно.

Егит пиос, артэ сылӥсь кызъёсы вамен кор юнматыса, ӟечыран юнматӥллям, нош ӵошкыт интыын турлы буям курегпузъёсты питыръяло, бадӟым тупез музъем вылтӥ лэзьяса. Ӟечырасьёс дорын но курегпуз питыръясьёс дорын уно гинэ калык учкыса сылэ. Мукет интыын нылъёс круген шудыны кутскиллям, кырӟаса сыло.

Вӧсясьёс люкаськем калыкез куала доры матэгес кариськыны куризы — вӧсяськон дыр вуиз. Тӧдьы капчи выл дӥсьёсын, кусъёссы горд путоосын думемын, пыдазы ку сапегъёсын, йыръёссы изьыостэк, вӧсясьёс витьназы ик, киязы тэркыосын шыд но ӝук кутыса, кыласа-бураса, куриськыса куалаез котыртӥзы, собере калыклы вазиськизы:

— Ойдолэ табере та шулдыр нуналэ ваньмы ӵош вӧсяськоме-куриськоме.

Вӧсясьлэсь ӧтемзэ кылыса, пиосмуртъёс паллян пала интыяськизы, кышномуртъёс бур пала огазе кариськизы. Шудонъёс огдырлы чалмизы. Одӥгез пересь вӧсясь, куалаысь потыса, люкаськемъёслэн азьпалазы султӥз но куриськонлэсь кылъёссэ вераны кутскиз:

— Остэ, Инмармы, Кылдысинмы, воршудъёсмы! Лыктӥмы вӧсяськыны. Улонмес ӟеч каре, Инмаре! Гырон-кизён ужъёсмы ӟеч мед мынозы, тазалык сётэ, Инмаре! Кизем тысьёсмы бусыосамы сыръяса мед будозы, ю-нянен мед берытскозы, ӟеч куазьдэс сётэ, Инмаре, Кылдысинэ, воршудмы! Пудо-животмы но таза йыро-пыдо мед луоз. Улон азьмес каньыл каре, валче, тупаса улон сётэ, Инмаре, Кылдысинэ, воршудэ! — та кылъёсты вӧсясь сьӧры люкаськем калык пыдесъяськыса огымысь кадь вераз. Вӧсясь куриськонзэ вераса быдтӥз но калыклы вазиськиз:

— Табере ойдолэ вӧсям ӝукмес, шыдмес но сӥльмес сиёме. Асьтэлэсь но ваем сиён-юондэс поттэлэ, огдэс огды утялтэлэ, шулдыръяське, кабыл мед луоз!

Калык вож турыногес интые кыстӥськиз но, люкен-люкен кариськыса, сиськыса-юыса пукиз. Выльысь шудонъёс кутскизы, кырӟан чузъяськиз. Куара тэльын шуккиськыса кыдёке вӧлме. Калык шулдыръяськон ӝыт палозьлы кыстӥськиз. Адямиос, гуртазы бертыса, нерге ветлозы ини. Нерге ветлонзы ӵуказе гинэ быроз, дыр.

Калык шулдыръяськыку, Богодан куала сьӧры палэнэгес юзбашъёсты-сотникъёсты люказ. Арчаысь дас кык но интыосысь дас сизьым кузя лыктӥллям соос. Секыт ивор вӧлмемен, со люкаськемъёслы аслэсьтыз малпанъёссэ вераз:

— Мон тӥледыз, шугмытӥсь ивор вуэмен, люкай. Кузонын али йыр кариськыса пуке Мамук. Солэн ожгарчиосыз асьсэдыз йыр вандылӥсьёс кадь, пе, возё: таласькыса, эрказъяськыса ветло; нылъёсты, кышноосты сантэмало; юртъеръёсты суто. Малпасько, лэся, асьме пала но вуыны, Арчакарез пазяны. Ку со ӝутскоз асьме вылэ — тодмо ӧвӧл на. Асьмелы изьыса улыны уг яра, дась луоно изьверъёсты пумитаны котькыӵе дыре. Таяз арняе мон Кузонэ югдурез тодон вылысь ветлӥ. Мамуклэсь дасяськемзэ огшоры бигер калык но тодэ ини, соос но адӟонтэм каро со Мамукез. Мар ке умойтэмзэ шӧдӥзы ке, асьмелы ивор сётозы, дыр, шуыса малпасько. Со сярысь мон вераськи бигеръёсын. Вылаз ик, толон асьмелы вузаны шуыса соос дорысь вуттӥзы вить пыӵал, куинь палаш но кык сабля. Кин мылкыд кароз басьтыны — басьтэ. Дунзэ тырыны луоз сёр но низь куосын яке азвесен, зарниен — кин маин быгатоз. Озьы вераз кузёез. Дунзэ басьтыны со лыктоз толсур толэзе, лымы сюрес усьтӥськем бере. Асьмелы али тазьы лэсьтыны кулэ: ог-кык арня куспын тырше йылпумъяны бусы ужъёстэс но, турнан дыр вуытозь, кутсконо ожгарчиосты ожмаськыны дышетыны, тужгес но пиналъёссэ. Гуртъёсысь сотникъёс, асьтэос гуртъёсады дышетэ, нош карын, огазе кариськыса, дышетоно луоз. Ваньды умой эскере — котькуд ожгарчие пыртэм муртлэн мед луоз кыӵе ке но ож тӥрлыкез: мечез, пукыӵез, палашез яке мукет маиз ке. Умой луысал, быгатысалзы ке ожгарчиос утялскон дӥськут но лэсьтыны яке басьтыны. Я, ваньзэ верай кадь. Кин эшшо мар ке вералоз на, оло, юанъёсты но вань?

— Мынам таӵе ӵектонэ вань, — вазиськиз Арчаысь Аймамат нимо сотник. — Али ваем ож тӥрлыкез ваньзэ карысь ожгарчиослы вузано, ведь ожмаськоно луоз татын, калык чаляк ӝутскоз, люкаськыса ожмаськыны дась луоз. Нош гуртъёсысь калык кыдёкынгес улэ бере, люкаськыны но кема вырозы.

Аймаматлы пумит луэмзэ Мычон гуртысь юзбаш вераз:

— Кин тодэ, кытӥ тушмон ожмаськыны кутскоз, оло, со нырысь гуртъёсты таркалоз, собере гинэ ожалскоз кар вылэ. Учке ай, Кузонысен Арчаозь кӧня гуртъёс сюрес вылын но, палэназ но. Кузонысь лыктоно ке луизы со йӧнтэмъёс, мышказы гуртъёсты пазятэк уз кельтэ ук.

— Озьы ке но нимаз гурт урмемъёсты уз вормы, дыр, — аслэсьтыз малпамзэ вераз Араслан, Арчаысь юзбаш, — одно ик карысь ожгарчиос мынозы юрттӥськыны. Тӥни соин мон соглаш луисько Аймаматэн.

— Ярам, иське, — вераськонэз йылпумъяса, вераз Богодан. — Арчаысь юзбашъёс, тодэлэ, кинлэн ӧвӧл ож тӥрлыкез, кинлэн луонлыкез вань выльзэ басьтыны, арня вылтӥ келялэ мон доры. Эшшо таӵе дэмланэ вань: Арчаысь нылпиосты, пересьёсты, кышноосты умой луысал, келясалды ке ӵыжы-выжыосты, тодмоосты доры палэнысь гуртъёсы. Ожмаськон кутскиз ке, соос татын юнме бырыны шедёзы. Мон аслэсьтым семьяме келяло таяз арняе ик Казанйылэ, мед отын улозы, тол вуытозь. Ваньмон дыръёсы эскерыны ветло, сюлмаськыса медаз улэ.

Таин сотникъёсын (юзбашъёсын) кенешон йылпумъяськиз. Арчаын но матысь гуртъёсын арнянуналэ шулдыръяськизы, вордӥськонэ нерге ветлӥзы но Акашкаез соин йылпумъязы.

* * *

Шунды вылӥе тубонъяз музъемлы шунытсэ жалятэк кисьтэ. Лымыё интыосты табере адӟыны луэ на туж мур нюк пыдсысь гинэ. Гуртъёсысь но, Арчакарысь но адямиос, валъёссэс уробое кыткыса но тыриськыса, семьяосынызы гыроно-кизёно бусыосазы шулдыр нуналэ вутскыны дырто. Гуртъёсын улӥсьёслэн бусыоссы гурт котыразы ик, кыдёке ветлоно ӧвӧл, нош арчакаръёслэн — кудӥзлэн кар вӧзын ик, нош куд-огезлы вить-куать иськемез ортчоно луэ бусыяз сюрон понна. Котькудӥз музъем кузё аслэсьтыз бусызэ туж чакласа, утялтыса возе, арлы быдэ кыеда но. Соин ик тыршись кузёлы музъем пунэмзэ ӟеч ю-нянен берыктэ. Арча котырысь калык туж ик начар уг улы, сокем майбыр но уд шуы, дыр. Огшоры гинэ, огсыр уло — няньзы тырме выт тырыны но, асьсэлы но сиыны, пудозылы но.

Туннэ Богодан, ӵукна ик валъёссэ сюдыса, корка пыриз но семьяеныз ӵукназэ сиськиз.

— Ваньмы туннэ Казанйылэ мыноме, дасяське, — шуиз со семьяезлы. Марӟана толон ик тодӥз ини сюрес вылэ потонзэ, соин ик кема бергано ӧз луы. Айтко, атаеныз азбаре потыса, Пиёк нимо яратоно валзэ гидысь поттыса, уробое кыткиз, атаез но Юлтошсэс мукет уробое кыткиз. Одӥгаз уробое понӥзы геры, усы но вить пуйыосын ӟег, сезьы но вазь, мукетаз уробое Марӟана Айткоез тырыны косӥз коркась поттэм сиён-юонъёсын бинетъёсты, ачиз Кибичкоез но Тукташез сюрес вылэ дасяны пыриз.

Жагиен Байбичка, соос бере Кибичко, анаез борды кутӥськыса, азбаре потӥзы. Марӟаналэн кияз Тукташсы, ваньмызлэсь мусоез кадь семьяын. Жаги, Байбичка, Кибичко интыяськизы Айтколэн кыткем уробояз, нуныен Марӟана но Богодан мукет валэн мыноно кариськизы. Валъёсты азбарысь поттыса, Богодан капкаез калаз но валзэ азьпала сюрес вылэ поттӥз, ачиз уробое тэтчыса пуксиз. Азьысь вал сьӧры Айтко но Пиёксэ валтӥз. Сюрес котькытӥ ик кӧсамын, валъёс, ныпъетсэс шӧдытэк кадь, ӝог гинэ нуо тыро уробоосты, семьяез чаляк вуттӥзы Казанйылэ. Валъёсты азбаре пыртыса, Богодан, Айтко но Жаги уробоосысь тӥрлыкъёсты ӝоктӥзы. Со куспын коркась потӥз Бичай но нылъёсты но пиосты ӟыгыръяны, чупаны кутскиз, со шумпотыса пумитаз вуэмъёсты.

— Сыткул коркан-а? — юаз Богодан сузэрезлэсь.

— Со ӵукна ик бусые Илчееныз кошкиз ини, соиз но атаез сьӧрысь чик уг кыльы, быж кадь ветлэ. Монэ тӥледыз возьманы кельтӥз. Я, ойдолэ сиськыны пыре ини.

— Ма, ми али сиськыса потӥмы ук. Мыномы ини ми но бусые. Кенакед пичиосын кылёз татчы, мед интыяськозы улыны пыдлось корка, отын гужемзэ улыны ярано, дыр, ай. Мон ведь соосыз ваньзэс тӥ доры улыны вайи, ачим Арчаын уло.

— Мед улозы, отын чылкыт, утялтэмын. Гурзэ но кылем арняе эстылэм вал, коркаосты миськыкум. Нош малы ачид огнад улыны дыртӥськод?

— Ӧд кылэ-а, мар-а али секыт иворез? Кузонысь Мамуксы ожгарчиосыныз асьме пала таласькыны лыктыны малпаське, лэся. Туж юн жугиськон луоз ведь. Соин мултэссэ калыкез карысь келяно палэнэ, мултэс вир медаз кисьтӥськы шуыса, — валэктӥз Богодан.

— Осто, Инмаре! Со бигеръёслэн таласькытэк улэмзы но уг луы-а, мар-а ини. Нош ведь кӧня изъян ваёзы калыклы, оло, бырисьёсыз но луозы. Нош ку, пе, лыктыны малпасько со укылтэмъёс тапала?

— Соиз тодмо ӧвӧл али, нош милемлы одно ик дась луоно эрказмемъёсты пумитаны. Ӝоггес тулыс бусы ужъёсты йылпумъяно но ожгарчиосты дасяны кутсконо. Я, али ми вырӟомы ини бусые, Сыткул возьмалоз ведь. Марӟана пичиосын татчы кылёз, мед интыяськозы.

— Ӧжыт гинэ вите ай, — озьы шуыса, Бичай корка пыриз но киосаз бадӟым бинетэн но лянэсэн, чыртыяз песьтэрен потӥз.

Поттэм тӥрлыксэ уробое интыяса, ачиз но Айткоен артэ пуксиз. Жаги капкаез усьтӥз, валъёс потэм бере ворсаз, собере Айтколэн уробояз мукет палтӥз Байбичкоен артэ пуксиз. Богодан мукет валэн огназ мынӥз, уробояз тыремын геры, усы, кизёно кидыс тысь. Мынонэз но одӥг иськем сяна уз луы, соин сюрес вылтӥ кема зуркано ӧз луы, чаляк вуизы бусыязы.

Сыткул та дырлы бусызэ котыръяса кӧня ке гырыса вуттэм ини. Илчей со сьӧрын вал улляса ветлэ. Лыктэмъёсты адӟыса, Сыткул валзэ ана пуме дугдытӥз, Илчей гырымтэ интые, музъем вылэ, пуксиз.

— Тани, пие, асьмелы юрттӥсьёс вуизы, ужмы ӝог гинэ мыноз табере, — пиезлы вераз Сыткул.

Богоданэн Айтко, Сыткул пала вуыса, валъёссэс дугдытӥзы.

— О-о, тон уйин ик лыктыса гырид-а, мар-а ини? — паймыса юаз Богодан. — Огнад сомында ужамед, малы милемыз ӧд возьма? — ӟечбуръяськыса кизэ сётӥз Сыткуллы.

— Каллен, ас каньыллям вырисько, бускельёслэсь бере медам кыле шуыса.

Зэмзэ но, кык палтӥз ик бускельёссы бусыосазы вылӥллям ини, соос но аназэс гырыса кӧня ке ортчиллям. Бугыртэм музъем шунды улын сьӧд-сьӧд адӟиське. Гырем музъем вылтӥ борозда кузя шыпытак, туж йӧно кариськыса кадь, сьӧдкуакаос но ӵанаос вамышъяло, соослэсь бере уг кылё шырчикъёс но. Дырын-дырын тылобурдоос, огзэс огзы кокчалтыса, кесько, ӧжытак лобыса, ӝутско но мукет интые пуксё. Шырчикъёс кӧня ке бичасько но гурт пала лобо, пиоссэс сюдыны, дыр. Куазь шуныт, шулдыр возиське: инмын пилемъёс но уг адско, матысь тэльын писпуос пучыоссэс лэзьяло, вожектыны кутскиллям.

— Табере кызьы ужмес радъяломы? Нырысь та гыремдэ усыялом но кизьыса утёмы-а, мар-а? Собере, ӧжытак вӧсяськыса, сиськыса, ужмес азьланьтомы, дыр, — Сыткуллы дэмлаз Богодан.

— Озьы ке, озьы ик мед луоз. Калык кадь, радызъя, ваньзэ лэсьтомы, бере ум кыле, — соглаш луиз Сыткул, собере будэтӥз: — Мон кизён куды но вайи, кык пуйы ӟег но.

Ярам, иське. Айтко, тон али уробоысь валдэ юскы но усыяны дася, вайыж уробоын. Гырем интыез усыяно, собере мон кизьыны кутско. Нырысь мае кизёмы: ӟегез-а, сезьыез-а? — Сыткуллэсь юаз Богодан.

— Вай туннэ ӟегез кизьыса утёмы, солэсь нянь кариськомы ведь — мускыт музъемын чаляк мед ӝутскоз. Сезьылы музъем дасяломы нунал кельтыса. Бер ӧвӧл али солы, музъемын мускытэз тырмыт, — кенешыса кадь вераз Сыткул, ачиз, валзэ бороздае пыртыса, выльысь гырыны кутскиз.

Богодан, уробоысь ӟеген пуйыез пертчыса, кудыез тысен тырмытӥз, пельпумаз кудыез ошыса, гырем ана пала вамыштэ вал но, Бичай сое, лушкемгес вазьыса, дугдытӥз, мар ке сипыртӥз. Богодан но Бичайлы серемпыр мар ке шыпытэн вераз, собере «ярам, иське, вай» шуиз. Жаги, Айтколэсь валзэ басьтыса, шуиз: «Нырысь мон усыяло, тон шутэтскы али». Айтко ваменскыны малпа вал но, Жаги, сое азьпалтыса, дэмлаз: «Тыныд но тырмоз уж. Туннэ, ваньмы татын дыръя, Илчеен ӧжыт шудэ, тӥни тэль но кыдёкын ӧвӧл, отчы но вуттӥське. Байбичкаез сьӧрады басьтэ».

Кенешыса лыктэмъёс но — Богоданэн Жаги — уж борды кутскизы. Сыткул гырыса азьлань кошкиз, валэз огдышем сяменыз борозда кузя валтытэк но мынэ ини. Жаги Сыткул бӧрсьы ик усыяса мынӥз. Богодан, чыртыяз ошем кудызэ азьпалаз карыса, отысь кырымен-кырымен тысь басьтылыса, вамышезлы быдэ пазьге я бур палаз, я паллян палаз, музъем вылэ буш инты кельтылытэк. Кӧня ке пол озьы пазьгемез бере пичиос адӟизы: тысен огазе пазьгисько но питыраса кошко ӵуж, вож, горд курегпузъёс, пӧлазы тӧдьыосыз но вань. Илчей, Айтко но Байбичка вожмаськыса кадь курегпуз бичаны дыртӥзы — кин уногес бичалоз. Соослэсь выремзэс адӟыса, артэ бусыосысь семьяослэн нылпиоссы бызьыса вуизы. Богодан кизьыса азьлань мынэ, пумен кудыысьтыз тысен валче курегпузъёсты но куштылэ. Тырмыт ик пӧзьтыса ваем Бичай курегпуззэ, чик но жалямтэ, нош пиналъёслы кӧня шумпотон!

Сыткул но Жаги, бусыез котыртыса, выльысь уробоос пала вуизы, ана пуме. Бичай соосыз ӧжытлы дугдыны косӥз, татчы ик, бушам кудызэ тысен тырмытыны шуыса, Богодан но лыктӥз.

— Табере ӧжытак куриськыса-вӧсяськыса сиське ини, ӵук нянь сиён дыр но вуэмын кадь, — ӧтиз Бичай ваньзэс сиськыны. Илчей, Айтко но Байбичка татчы ик бызьыса вуизы, киосысьтызы, алысьтызы курегпузъёсынызы ушъясько:

— Мон асьмелэсь куиньзэ кутӥ, тӥни со бускельёс дорысь но кыксэ басьтӥ, — возьматъя бичам курегпузъёссэ Байбичка.

— Нош мон асьмелэсь витьсэ бичай, бускельёслэсь одӥгзэ гинэ басьтыса вуи. Со понна мынам ваньмыз вожесь, одӥгез гинэ тӧдьы, — данъяське Илчей.

— Айтко, нош тынад кӧня люкаськиз? — юаз Жаги.

— Мынам-а? Мон асьмелэсь гинэ бичай, бускельёс доры ӧй ни ветлы. Тани сизьымзэ вуи басьтыса. Бускельёслэн нылпиоссы туж шаплыесь вылӥллям, куакаослэн нумыр понна вожмаськемзы кадь выро, ява. Тужгес но шаплы кариськыса бичаз горд йырсиё пизы, Кайсы шуизы кадь сое. Мугорын ачиз лапег гинэ, — паймыса ик мадиз Айтко, но со куспын ик возьматэмез потӥз кадь бадӟымгес луэмзэ Илчей но Байбичка азьын.

Бичай, музъем вылэ ӝӧккышет вӧлдыса, пыжиськемъёс тыриз, ӝог гинэ киренен сюкась лэсьтӥз, пӧлаз курегпуз но пыжем сӥль юдӥз. Эшшо мар но со понӥз на ӝӧккышет вылэ. Нимаз лянэсэн сюкась вал, мукетаз — варсь, песьтэрысьтыз поттӥз на буракен кумышка. Вӧлдэм вылэ вуизы тэркыос но пуньыос. Жаги но Бичайлы юрттӥськем кариз. Ваньмыз дась луэм бере мӧйыос но нылпиос котыр пуксизы.

— Агай, тон татын ваньмызлэсь арлыдоез, анай-атайёсмы улонысь кошкизы бере, тон ик лу ини атай интыын. Кутскыса вера куриськон-вӧсяськон кылъёсты.

— Ярам, иське, — шунды пала кариськыса, Богодан куриськон кылъёсты вераны кутскиз: — Осто, Инмаре, Мукылдысинэ, Куазе, ужаны кужым сётэ. Музъеме куштэм тысьлэн выжыез таза мед луоз, одӥг тысьлэсь сизьымдон сизьым шепез мед будоз, куроез шашы кадь мед будоз, котькуд шепаз сизьымдон сизьым тысез мед луоз. Сётэ, Инмаре, Мукылдысинэ, Куазе, курегпуз кадь таза тысьтэс, сётэ дыраз зоръёс но шуныт нуналъёс. Мар музъеме пазьгимы — ваньмыз ик ӟеч мед будоз, ужам ужмы азинлыко мед луоз, Инмаре, Мукылдысинэ, Куазе. — Пукисьёс пала кариськыса, шуиз: — Я, табере сиське, юэ.

Семья шыпытак гинэ, вераськытэк сиськыны кутскиз. Бичай ваем юонъёссэ Богоданлы, Сыткуллы но Жагилы пичи кружкаен сётказ. Кружкаысь сюкасез но варсез ваньзы быдтыса юылӥзы, нош кумышкаен кружка одӥгез ик ньыльназылы тырмиз, ӧз юэ, веръязы гинэ. Артэ бусыосын но калык та дыре семьяен-семьяен сиськыны пуксьылӥз. Калык туннэ берозь уз ужа, адямиос лыктэмын, чылкыт, чебер дӥсяськыса, бусы дурын вӧсяськон понна гинэ. Котькуд аре тулыс, гырон-кизён кутскыку, нырысь нуналзэ ваньмыз ик озьы ортчыто.

Ана дуразы сиськыса султэм беразы Богодан межа дуре пичияк гоп лэсьтӥз но отчы, пичиен тӥяса, котькудзэ сиёнэз тырылӥз, пичияк варсь, сюкась но кумышка кисьтӥз. Кыласа-бураса гопез ӵоксаз, кырыменыз сюй басьтылыса. Ӧжыт шутэтскыса, Сыткул, Богодан пала кариськыса, шуиз:

— Я, сиим, юим. Табере кӧня ке гыромы, кизёмы на. Нырысь нуналаз кема ум выре. Калык кызьы кариз — асьмеос но озьы ик лэсьтомы, — валэз доры вырӟиз Сыткул. Жаги но вал борды кариськиз, тэльбугозэ кутыса, валзэ усыяны улляз. Кизем вылтӥ туж уно куакаос тысез кокаса ветло. Куакаослэсь озьы дармантэмзэс адӟыса, Богодан Айткоез но кизем бервылэз усыяны косӥз. Соиз шумпотыса вал кыткиз но атаез бере усыяса ӟег тысьёсты музъеме согиз. Туннэ, гуртазы бертыса, семья ӝытсэ сиськыны куалае пыралоз, воршудзылы вазиськоз на, бусы ужъёс кутскемен.

Бусызылэн пасьталаез ог 600 вамыш, кузьдалаез, Казанка шур дурысь возь борды пыкиськыса, мукет палысьтыз нюлэс доры вуэ, озьы ог 1000-1200 вамыш луоз. Со бусы кузьдалаезъя шори люкемын. Али Сыткулэн Богодан гырон-кизёнэн выро шур палась ӝыныяз, уго татын вырйыл но кыр инты, музъем мускытсэ ӝоггес ыштыны быгатоз. Бусызылэсь мукет люкетсэ кык палтӥз нюлэс котыртыса возе, татын тӧл но уг тӧлаты, интыез но улыггес.

Ӝытнянь сиён вакытэ калык бусыосысь семьяен-семьяен гурт пала кыстӥськыны кутскиз. Богоданэн Сыткул но Айтко, валъёссэс геры но усы бордысь юскыса, уробоосы кыткизы. Котыр тӥрлыкъёссэс бичаса, утялтыса, гурт пала ворттӥзы ни. Жаги, Бичай но Байбичка бусыысь азьвылгес гуртэ кошкемын вал. Ужасьёс азбаре пырыса ӧз вуэ на, Илчей, пумитазы потыса, Айтколы вазиськиз:

— Ойдо Казанка дуре чорыганы васькомы, отын шур дуртӥ кылем вуосын уно гинэ чорыг адӟиське, вуэз но чылкыт, шуныт. Мон, бусыысь бертыкумы, юри шур дуртӥ мынӥ, чакланы шуыса.

— Нош маин чорыгаломы?

— Милям пичигес калтонмы вань, сакмы но, кудзэ ке басьтомы. Мыномы-а? — тэбине Илчей.

— Нырысь валъёсты юскыса липет улэ интыяно, сиён сётоно, собере мыномы. Ӧжыт возьма, — соглаш луиз Айтко.

Сыткулэн Богодан азбарын мар но со утялтӥзы, ӵогаськизы, вӧлӥськизы но, соосты Марӟана куалае ӧтиз. Татын ошем пуртыын кышноос шыд но ӝук пӧзьтыса вуттӥллям, коркась нянь но пыжиськемъёс, курегпузъёс но юонъёс поттыса, ӝӧк выл тыр пуктӥськиллям. Пуртыысь сӥльын шыдлэн ческыт зыныз быдэсак куалае вӧлмемын. Пурты улын тылскем кысыса вуымтэ на, горд тылын эгыръёс шыдлы сӥяны уг сёто. Куалаын салкым, шунды пушсэ уг адӟы. Пушказ ке бур пал борддор кузя огшоры гинэ ӟус интыямын, солэн азяз вуж бадӟым ӝӧк. Ӝӧклэн кыкпал пумаз ик пуконъёс. Шундыӝужан палан сэрегын пичи ӝажы ӵогамын, отчы пичи гинэ короб пуктэмын. Со коробез воршуд короб шуо, пиналъёс со борды кутӥськыны гинэ но кышкало, бадӟымъёс алыса оломар но верало ук.

Илчеен Айтко чорыг кутылыны кошкизы, кылемъёсыз ваньмыз куалае пыризы но ӝӧк доры ӟус вылэ пуксизы. Жаги азяз пичи Тукташез возе, Бичай вӧш вылын сӥль юдыса тэркые тыре, Богоданэн Сыткул воршуд сэрег доры султӥзы. Сыткуллэн кияз тэркыен ӝук но сӥль, Богоданлэн кияз пучыё бадьпу вай. Марӟанаен Бичай картъёссы бӧрсьы султӥзы, киосазы пыжиськемъёс, нянь но сюмыкен юон. Богодан воршудлы вазиськыса куриськыны кутскиз:

— Осто, Инмаре! Юмъя воршудмы! Ӟеч каре, вӧсям вӧсьмес кабыл каре, Инмаре, Юмъя воршудмы! Кизем бусыосмес удалтытэ, шуныт зор сётэ, пудомес таза каре, Юмъя воршудмы, Инмаре. Асьме семьялы тазалык сётэ, ужъёсмес азинлыко каре, Инмаре, воршудмы! — куриськонэз быдтыса, киысьтыз бадьпу вайзэ воршуд ӝажы борды юнматӥз. Мукетъёсыз, тылскем доры кариськыса, пичи юдэсъёсын тыл вылэ киысьтызы сиёнъёссэс куязы, юонзэс но пичияк кисьтӥзы. Ваньзы: «Юмъя воршудмы, ваньмылы шудбуро улон сёт, улонмес капчи кар. Кабыл мед луоз!» — сыӵе кылъёсты вераса, ӝӧк сьӧры пуксизы, Богоданэн Сыткул пуконъёсы интыяськизы. Сиськыса султэмзы бере ӝӧк вылысь лыосты но нянь пырыосты Бичай утялтӥз но ваньзэ пурты улэ пӧсь ӝуась эгыр вылэ куштӥз. Жаги, нуныез анаезлы сётыса, тэркы-пуньыосты миськыны кыре потӥз.

— Тон котыръёстэ интыяд-а ни, кӧлан интыды ярано-а? — юаз кышноезлэсь Богодан. — Али ми Жагиен Арчае кошкомы, тӥ улэ ни бертатэк ик. Скалэз но курег-ӟазегъёсты Жаги утялтылоз. Мон ӵукна вазьгес лыктыло огнам ик, тулыс бусы ужъёсты йылпумъятозь. Одӥгзэ валмес, Пиёкез, татчы кельтомы, Айтко мед утялтоз.

— Ми интыяськимы ини, эн сюлмаськы. Тон лыктыкуд, мар кулэ луиз, вайылод. Али ке та арнялы тырмыт сиён-пӧраммы вань.

— Сыткул, нош кидысмы татын ваньмыз тырмоно кадь-а?

Оло, Арчаысь ваёно луоз на?

— Кизьыса адӟом ини. Так-то ваньмыз тырмоно кадь, кӧжымы гинэ оло тырмоз, оло уз, — шуиз Сыткул.

— Али ми Жагиен кошкомы, мон сое уг ни нуллы татчы, сотэк но луоз, дыр, ужаммы, кызьы ке но бергалом.

— Ма, мар сое юнме нуллод. Пиосмы юрттӥськозы, валэн кивалтыны быгато ук ини.

— Ярам, иське, ми вырӟим, — Богодан Жагиез ӧтиз но, уробое пуксьыса, соос Арчае ворттӥзы. Шунды пуксемлэсь азьло ик доразы вуизы.

Югытэн, изьыны выдэмезлэсь азьло, Богодан нош Бекчурен вераськыны малпаз. Пересьлэн коркаез бакча берысь урамын гинэ, кык коркаос куспытӥ пыдын ветлон сюрестӥ мыныса, паллян пала кык корка кельтыса, Богоданлэн бакча беразгес ик, шуыны луоз. Пересь туно-пеллё корка укно улысь пукон вылын пуке вылэм.

— Ӟечбур, Бекчур агай! — ӟечъяськиз Богодан. — Нош малы огнад гинэ пукиськод?

— Ӟеч, ӟеч, Богодан, — кизэ сётыса, пумитаз пересь. — Али гинэ тани бускельёсыным вераськыса пукимы, артэ коркаосысь кыкназы вал. Нош тынад кыӵе мыно ни ужъёсыд, Кузонэ ветло шуиськод вал, ветлӥд-а?

— Ужъёс, ма, огсыр мыно кадь. Туннэ бусыямы гырыны потӥмы, ӝоггес тулыс бусы ужъёсты йылпумъяны мед луоз вал. Собере ожгарчиосты дасяны, дышетыны кутсконо. Кузонэ ветлӥ, отысь тодмоосы эшшо веразы на, Мамук-ханзы малпаське ик, пе, асьме вылэ ожалскыны. Ку со ӝутскоз — соиз тодмо ӧвӧл али. Тодмоосы шӧдӥзы ке дасяськемзэ, соку ик асьмелы ивор сётозы, озьы вераськимы. Мынам одӥг куронэ вань, Бекчур агай: юртты вал пересьёсты Арчаысь поттыны. Соос ведь ваменъяськозы, кельтэмзы уз поты коркаоссэс, чипы-курегъёссэс. Олокыӵе но муг шедьтозы кошконтэм понна. Нош ожмаськон кутскиз ке, нырысь ик пересьёс бырозы. Пиналъёсыз бызьыса но кошкыны быгатозы, жугиськонэ но пыриськозы. Тол вуытозьлы мӧйыос, пересьёс гуртъёсы мед интыяськысалзы. Вераськы вал тон соосын. Ачид но Арчалэн палэназ, ӵыжы-выжыосыд доры интыяськы. Татчы ожгарчиосыз гинэ люканы тыршомы, гуртъёсысь но ӧтчано луоз, дыр. Созэ берлогес учкомы ини. Тӥни соин лыктӥ вал дорад, — быдтӥз веранзэ Богодан.

— Верасько, верасько одно ик. Валэкто губырскемъёслы, кыӵе секыт адӟон вите калыкмес. Тау оскемедлы, курондэ быдэстыны тыршо, — оскытӥз пересь Бекчур.

* * *

Тулыс бусы ужъёс уноезлэн укмыс нуналскын йылпумъяськизы. Та дыр куспын Жаги, бакчазэс корткуен гудыса, анаезлэн валэктэмезъя мар но со кизиз, мерттӥз: сугон, ӵуж- но гордкушман, кык кузесь убоосы яснык но тыриз, лемиськӧжылы но инты сюриз. Туннэ со атаеныз Казанйылэ мыныны дасяськиз. Азьвыл нуналаз нӧкы вӧй шуккиз но сое басьтӥз, кӧня ке пыжем сӥль понӥз, кеньыръёс но эшшо мар но со тыриськыса, азбаре потӥз. Вал уробое кыткемын ини, Богодан нылзэ возьмаса сылэ. Сюрес вылэ потыкузы, шунды ингож сьӧрысь мычиське гинэ вал али. Азьвыл нуналаз куазь зорыса улэмен, сюрес дэриё, соин ик каллен мыноно луиз. Ойдо ӵок ини, туннэ гыроно-кизёно уз луы ведь. Юртъер котырын мар но со ужалозы, куалае пырыса, тулыс бусы ужъёсты йылпумъямлы сӥзьыса, вӧсяськозы, пичияк курытсэ ӟузёзы. Озьы малпаз Богодан, ӧжыт вӧл-вӧл шутэтсконо шуыса. Нош Сыткуллэн кыӵе туннэ мылкыдыз, мар лэсьтоно ужъёсыз вань меда? Сыӵе мылкыдын уробояз пукиз Богодан, валзэ но ас каньылъяз лэзиз, сокем ӧз улля.

Жагилэн нош аслаз малпанъёсыз, сюлмаз но йыраз тымиськемын, лэся. Уж ужен, нош егит мылкыд мукетсэ но кулэ каре на. Нуналлы чаклам ужъёссэ йылпумъяса, ныл, чебер дӥсяськыса, ӝытъёсы шудон пӧлы поталляз. Арчаысь егитъёс шудыны кык интыын люкасько. Отын крезьчиос, шулан гумыосын шудӥсьёс, бубень жугисьёс шулдырто люкаськем егитъёсты. Эктон, кырӟан, олокыӵе но шудонъёс ӵукна палозь кыстӥсько. Татын Жаги та тулыс ӝытъёсы шугъяськыса витьылӥз яратоно муртсэ, гажанзэ — Токтаметкоез. Нош соиз бусы ужъёсын сэрен шудон пӧлы беромыса, уйшор азьын гинэ, вуылӥз. Бусызы Арчалы кыдёкын ӧвӧл ке но, берозь ужазы кизёнзэс ӝоггес быдтон вылысь. Жагиен Токтаметко кусыпсэс юнматыны кутскизы тулыспал толэзе гинэ, тулысэз пумитан шулдыръяськонысен. Со дырысен егитъёслэн сюлэмъёссы матэ но матэ луо кадь ини. Озьы, ас малпанъёсаз усьыса, Жаги Казанйылэ вуэмзэ ӧз но шӧды, сюреслэсь уродмемзэ но ӧз синйылты ни.

Азбаре пырыса, Богодан валзэ ӧз ни юскы, сермет ӟезьыеныз мукет уробо борды думиз но отчы ик сезьы кисьтӥз. Сыткулэн ӵош, корказь азе пуксьыса, кенешизы, кызьы радъяно бусы ужъёсты та нуналэ. Нырысь ик кутскозы вал но скал гидъёсысь кыедэз поттыса ял карись бусые нуллыны, куинь валэн уж кемалы уз кыстӥськы — лымшорозь быдэстозы. Ыж гидын кыед сокем люкаськемын ӧвӧл, гид бере бакчае гинэ поттоно луоз. Воргоронъёс доры, синъёссэ зыраса, Айтко вуиз, изьыса алигес султэм, шӧдске.

— Мар-о, пие, кема изид. Ӝыт бер выдӥд, луоз, шудонды кылёз, кожад, дыр, — пыкылӥз пизэ атаез.

— Зориз ук, кызьы кема шудод. Илчеен мадиськыса пуким но ӵошен ик бадӟым ӟус вылын изим. Со али но валес вылэ ик назьылляськыса кылиз.

— Мын мисьтӥськы, собере сиськом но ужаны кутском. Бусые туннэ кыед ворттомы, — нуналлы уж сётэм кадь, вераз Богодан пиезлы.

Ӵукназэ сиськыса, кышноос но, пиос но нырысь ик вал гид бордысь тол вылтӥ люкаськем кыедэз бугыръяса уробоосы тырыны кутскизы. Сыткул сьӧры Айтко, бӧрсязы Богодан бусые кыед нуыса кошкизы. Кышноос но Илчей вал гидэз сузязы, кыедэз поттӥзы. Валэнъёс кема ик ӧз ветлэ, нош ик ваньзы уробоосты тырмытъяны кутскизы. Пӧлазы Байбичка гинэ ӧвӧл, со Тукташез уте, Кибичко но солы оскемын. Ужасьёс ваньзэ ик кыедзэс поттыса быдтӥзы но азбарез ӵужизы. Азбар ӵужем жагез Айтко бакча берысь мур вукыреме кисьтӥз но, лопатаен сюй пазяса, ӵоксаз — озьы косӥзы мӧйыос. Таин туннэ секыт ужзы быриз, семья ял кароз ини. Мисьтӥськыса но мар ваньзы куалае пыризы. Татын сиён пӧзьтыны ваньмыз вань: сӥль, кеньыр, сугон, сылал ӝӧк вылын пӧрасез возьмало. Сыткул ошем пурты улэ эстӥськыны кутскиз, писъёс тырыса, висказы кӧс шелепъёс туйназ но тылскон изъёс вылысь сеньки1 но пичигес изкӧльы басьтӥз. Кӧльы борды кортэн — чакмаен2 — тышкаса, тылгизьы поттылӥз. Со тылгизьы кӧс сеньки вылэ усьыса, ӵын потыны кутскиз. Сыткул ӵын потон интые пелляз но, сеньки умойгес ӝуаны кутскиз. Ӝуась сенькиен аратӥз шелепъёсты. Пурты улын писъёс гоманы кутскизы. Марӟанаен Бичай пуртые ву понӥзы, отчы сӥль, кеньыр, сылал ватсазы — кема возьмано уз луы, шыд дась луоз. Семья нош Юмъя воршудэзлы вӧсяськоз но сиыса-юыса, кӧня ке кенешыса пукоз на.

Туннэ Жагиен Богодан Арчае вазьгес бертӥзы ни. Доразы вуыса, Жаги тылобурдоосты утялтӥз но ӧжытлы коть пичи котыртэме, гуждор вылэ, поттӥз. Пичи тютюос но курегъёс вож гуждорез кокчало гинэ. Жаги со вискын скал гидэз утялтӥз, кыедэз гид бере бакчае поттӥз. Богодан валзэ юскыса гидэ пыртӥз но, дӥськутсэ воштыса, Арчаысь сю ожгарчиослэн валтӥсьёсынызы — юзбашъёсын — пумиськыны пыдын кошкиз. Али ваньмыныз пумиськыны уз но луы, дыр, бусы ужъёссэс кудъёсыз йылпумъяллямтэ на уго. Ӝегатэ урод сюрес. Кӧня ке юзбашъёслэн бусыоссы нюлэс сьӧрын ог дасо иськемын, сюрес но отчы нюлэс пыр гинэ — со ик котькуд аре ӝеганлэн мугез луэ. Арчаын дас кык сюрс ожгарчиослэн кивалтӥсьёссы уло. Богодан соосын ӵем гинэ пумиськылэ, доразы мыныса но, вераськылэ. Тани туннэ но со пыраса, вераськыса вуиз ньыль сотникъёсын: Токтаметкоен, Арасланэн, Килмячен но Илчеен. Араслан пыӵалъёсты ваньзэ ик ожгарчиосызлы басьтыны мылкыдзэ вераз — али ик, пе, дунзэ тырыны дась. Богодан соин соглаш кариськиз, ведь ӟечез ож тӥрлык огазьынгес луиз ке, сыӵе огазеяськонэн кивалтыны но ожмаськыны умойгес луоз. Юзбашъёсын пумиськыса, огкылэ вуизы: кык-куинь нунал ортчыса ожгарчиосты дышетонэз радъяны.

Сеньки1 — трут губилэн небытэз.

Чакма2 — андан чалеп.

* * *

Кык нунал зорыса улӥз но куазь тупатскиз, инбамын пилемъёс уг ни уяло, отын шунды гинэ кузёяське. Котыр дунне вож шобретэн шобырскемын. Со шобрет вылын отын но татын тӧдьы пужыосыз но вань — льӧмпу сяськаяськемын уго. Ка­занка шур дурысь возь вылъёстӥ уллёен-уллёен ветло скалъёс, ыжъёс, соос пӧлын ик кӧня ке валъёс но адӟисько. Со пудоос али пиналъёслы оскемын — шудозы но, чорыгалозы но, чорыг лым но пӧзьтыса сиёзы, пудоез но чаклалозы.

Куала дорысь ӵошкыт интые Богодан нош юзбашъёсты люказ. Таяз люкаськеме соос сю иськем мында шаерысь лыктэмын. Кыдёкысьёсыз ваньмыз ик вал вылын вуэмын. Вераськон мынӥз ожгарчиосты дышетонэз радъян сярысь. Эльйырлы юрттӥсьёсты юнматӥзы: Ямгурчи луиз ожгарчиослы но валъёслы сиён дасян понна кылкутӥсь, Баганай — ожтӥрлык понна кылкутӥсь, Тотыш — огъя радлык но кӧлан инты понна кылкутӥсь. Котькудӥз юзбаш аслаз ожгарчиосыныз лыктыны кулэ, туннэысен куинь нунал кельтыса. Ожгарчиослэн лыдзы сю витьтонлэсь ӧжыт луыны кулэ ӧвӧл. Котькуд ожгарчилэн сьӧраз луыны кулэ ожтирлыкез, утиськон диськутэз, куинь нуналлы тырмымон сиёнэз, валэз. Юзбашъёс асьсэос мед учкозы, коня соослы кулэ луозы уробое кыткем валъёс ожгарчиоссылэсь котырзэс нуллыны, валъёссылы но сиён нуллыны. Сыче куронъёс кутэмын вал гуртъёсысь сю ожгарчиосын кивалтӥсьёслы. Арчаысь юзбашъёс вань быгатонлыксэс поны ны кулэ ожтӥрлык люканэ, калыкез сюдон, кӧлан инты дасян, мултэс калыкез карысь поттон но мукет кулэ луись ужъёсты быдэсъян понна. Таин кенешон йылпумъяськиз. Юзбашъёс гуртъёсысь но Арчаысь ожгарчиоссэс люканы кошкизы. Куинь нунал ортчыса, соос нош татын луыны кулэ, таяз радэ ожгарчиосынызы.

Ямгурчи, Баганай, Тотыш но Богодан асьсэ понна кыльыса вераськизы на та нуналъёсы лэсьтоно ужпумъёс сярысь. Бого­дан Баганаез косӥз ӵуказе ик карысь дурисьёсын пумиськыны. Соос, номыр шоры учкытэк, ожтӥрлык дурыны мед кутскозы. Кулэ луозы пукыӵ ньӧлъёс, шибодыослы (мечъёслы) туж лэчытэсь, юнэсь корт йылъёс, палашъёс, сабляос, пуртъёс — ӝегатскытэк соосты дуроно. Та ньыль муртъёс кенешизы, кинъёслы осконо сюрс ожгарчиосын кивалтыны. Огкылэ вуи­зы куинь кивалтӥсь пуктыны: Тучешез, Казмачез, Исенбеез — ваньзы карын улӥсьёс, арлыдзы вуэмен, сю ожгарчиосын кивалтонлэсь мозмытэмын кык ар талэсь азьвыл. Куиньназылы ик оскем муртъёслы ивортоно со сярысь туннэ ик, ӵуказеысен ожгар ужпумъёсты быдэсъяны мед кутскозы. Ямгурчи вералоз- валэктоз Исенбайлы али бертыкуз; Богодан ивортоз Казмачлы, нош Ямгурчи пумиськоз Тучешен. Озьы бертон сюрессылы нялтас выль уже пуктэмзы сярысь иворез туннэ ик тодытозы выль кивалтӥсьёслы.

Баганай карысь кебитъёсты учкылыса ветлйз, отысь ду­рисьёсын вераськиз, кылдэм югдурен тодматӥз. Шугадӟонъёс луоно бере, дурисьёс пумитъяськытэк, мукет ужъёссэс куштыса, кӧня кортсы вань, солэсь палашъёс лэсьтыны кыл сётӥзы.

Кӧня ке дурисьёс, дасям кортсы ӧжыт шуыса, ӝожтӥськизы. Баганай корт утчаны кыл сётйз.

Тотышен Богодан кар котыртӥ, вал вылэ пуксьыса, ожгарчиосты дышетон интыос утчаса, чакласа ветлӥзы. Вал вылын жугиськонооссэ нимаз, кыр интыын, дышетоно, пукыӵъёсынъёссэ шонер ыбылӥськытоно, шибодыосыныз азьпал радын жугиськыны кышкасьтэм мед луозы. Ваньмызлы ик дышетскон интыос сюроно кадь Арча котырын ик нюлэс дуръёстӥ, кыр интыосын.

Ямгурчи та нуналэ ветлӥз сиён-юон тӥрлыкъёс утчаса. Пуртыос, дурыос, мукетыз пӧзьтӥськон, сиськон тӥрлык уно гинэ кулэ луозы, люкаськозы ведь куинь-ньыль сюрс ожгарчиос — ваньзэсты пӧсь сиёнэн нуналаз кык пол ке но сюдоно луоз. Ӝыт пал ини тодмо луиз: вань шугъяськытӥсь ужпумъёс сэрттэмын-пертчемын, ожгарчиосты люканэн, дышетонэн тырмымтэос луыны кулэ ӧвӧл кадь.

* * *

Ӵукнаысен калык нырысь дасоосынАрчаысь, собере 150-170 муртьёсын гуртьёсысь но люкаськыны кутскиз Быдӟым куала котырысь ӵошкыт возь вылэ. Лымшор пала лыктӥсьёс ӧй ни вал, ӧтем ожгарчиос ваньмыз ик люкаськемын. Дышетсконэ ӧтемын ӧй вал Кузон пал гуртьёсысь ожгарчиос гинэ. Ужрадлэн ортчемез сярысь Мамуклэн ожгарчиосызлы тодмо медаз луы шуыса. Тучеш, Казмач, Исенбей — куиньназы менбашъёс, Богодан доры лыктыса, ӟечбуръяськизы но юалляськыны кутскизы, кин мар ужалоз.

— Вае тазьы каромы: тон, Исенбей, вал вылын ожмаськыны дасяськисьёсын кивалты, Тучеш пыдын ветлӥсь ожгарчиосын кивалтоз. Казмач но пыдын ветлӥсьёсын кивалтоз, только пӧлазы луозы шибодыосын но пыӵалъёсын лыктэм ожгарчиос. Пыӵалъёсын лыктэмъёсты али нимазы дышетоно луоз ыбылйськыны, соосын кивалтоз юзбаш Араслан, — сыӵе ужпумъёс пуктӥз Богодан выль менбашъёс — кивалтӥсьёс — азе. Эшшо косӥз на:

— Туннэ люкалэ, лыдъялэ ожгарчиостэс, тодэ, кинлэн ожтӥрлыкез ӧвӧл, мар уг тырмы, кыӵе шугьяськонъёс шараяськозы. Собере ини сюосын, дасоосын люкиськылыса, котькуд дас ожгарчилы кивалтӥсь — унбаш — юнматоно, юзбашъёсын по тодматскоды. Соос пӧлын егитъёсыз но вань, жугиськонэз адӟымтэосыз. Ваньзэс выльысь дышетоно кьшдэм югдурысь улэп но вормонэн потыны.

Люкиськылыны косэм бере, люкаськем калык пӧлын кӧнялы ке огыр-бугыр луиз. Валэнъёсты люказ Исенбай, валъёстэк вуэмъёссэ люкыса басьтӥзы Тучеш но Казмач. Ӝыт пал ини тодмо луиз: лыктэмын 3127 ожгарчи, юзбашъёсты лыдэ басьгытэк, соос 32 мурт татын, гуртьёсысь но Арчаысь вуэмын. Вал вылын вуэмын 948 мурт, эшшо 262 муртлэн валъёссы уробоосы кыткемын, 1917 мурт вуэмын пыдын, соос Арчаысь но матысь гуртьёсысь. Ямгурчи Богоданэн пумиськыса вераськизы — уйёсы палэнысь лыкгэмъёсты кӧлыны интыяно Арчаын улӥсьёс доры валъёсынызы ик, нош матысь гуртьёсысь лыктэмъёс ӝытъёсы гуртазы мед бертылозы но ӵукна татын мед луозы ини. Луысал, дыр, кӧланы инбам улын но — лузьёс, кузькукъёс, чырккейёс адямилы изьыны уз сётэ, валъёслы но эрик улыны уз лэзе. Таӵе дэмланэн-косонэн Ямгурчи тодматӥз Тучешез, Козмачез но Исенбаез, нош таосыз ини сыӵе косонэн тодматӥзы юзбашъёсты. Озьы дышетсконлэн нырысь нуналэз оргчиз, Арчаысь ожгарчиос гуртазы бертйзы куноосын, нокин но инбам улэ кӧлыны ӧз кыльы.

Кыкетӥ нуналаз валэнъёссэ ожгарчиосты дышетӥзы люкаськыса валъёс вылын артэ ветлыны — валъёс мед дышозы огазьын каньылля ветлыны но, ворттылыса но. Медаз кышкалэ мурт куараослэсь, корт жугем куараослэсь, мед дышозы кузёзылэсь косэмзэ быдэсъяны.

Шур дурын, меӵ яр улын, пыӵалэн ожгарчиос ыбылӥськыны дышетскизы. Соос татын укмыс кузя люкаськемын: витез Арчаысь пиосъёс Ядыгарысь ваем пыӵалъёсын, ньыльзэ Ильнурлэн но Токбулатлэн ожгарчиоссы вайиллям. Соиз умой — гуртысь вуэмъёсыз ыбылӥськыны быгато вылэм ини. Пыӵалэн ожгарчиосты дышетыны косӥзы Токбулатэз, солэн аслаз пыӵалэз вань.

Пыдын лыктэмъёслы но шутэтскыса улыны маза ӧз луы. Дышоно вал пукыӵен шонер ыбылӥськыны, тодыны, кӧня вамыш вис кылемын тушмон дорозь, сузёз-а, уз-а лэзем ньӧлыд тушмонэд дорозь; чакласькыса ыбылӥськоно, ведь тушмон но тон куспысь вис ожмаськыку туж ӝог воштӥське.

98 мурт дышетскизы ож бусыысь сӧсырмемъёсты поттаны но вир кошконэз дугдытыны, вӧсь луэм интыез биньыны. Сыӵе ужъёсын вырыны люкамын мӧйы воргоронъёс, кудъёсыз быгатогес эмъяны-пелляны, уг кышкало ож бусые жугиськон мыныку но пыраны. Соос пӧлын пересь Бекчур агай но. Со аслэсьтыз тодон-валанзэ вераз, возьматъяз, дышетӥз, кызьы вир кошкемез дугдытоно, кызьы суй-пыд бералскемез, вырӟемез бурмытоно, кыӵе турын-куарен, горд но вож сюен, кыр но бакча емышъёсын висёнъёсты бурмытыны луоно.

Тунсыко выризы мечъёсын жугиськыны дасяськемъёс но. Татын но аслаз амалъёсыз луыны кулэ ук. Нырысь огзылы огзы люкетылӥзы, бодыоссы, ваче шедьылыса, кугӟаллязы, куд-огезлэн шибодыез музъеме бышкалске, мукетызлэн вылӥе ӝутске. Озьы ке но пумен шибодыосты ожгарчиос быгатӥзы вормыны, кылзӥськись карыны.

Дышетскон нунал шуген ке но ортчиз, ожгарчиос тодӥзы, кызьы уно муртъёсын ожмаськон дыръя ожтӥрлыкъёсын выроно. Пинал ожгарчиослэн ӧвӧл на жугиськон амалъёссы, дышемзы, соос уг но тодо, кызьы ожмаськыку умойгес уже кутоно киысь ожтӥрлыкез.

Берло нуналъёсы огыр-бугыр ӧз ни луылы, ваньмыз ик лыктэмъёс радлыкез валаны кутскизы но чаляк гинэ асьсэ интыоссэс шедьтылӥзы. Дышетскон интыос одӥг возь вылын ӧй вал, дышетскон нуналъёс ортчизы турлы интыосын: нюлэс дурын, шур дурын, кыр интыын, нюлэс пушкын но.

Тани Ильнур валэнъёслы уж сётэ:

— Ворттыса мыныкуды, сылйсь сульдэрлэн йыр вылысьтыз ӵогыса уськытоно юнматэм вож куакез, ӝоглыктэс кулэстоно ӧвӧл.

Шуг но ӧвӧл кадь сыӵе ужез быдэстыны, нош ваньмызлэн уг пӧрмы: я сабляенызы вазьгес шоналско но, вал соосты азьлань нуэ, куак интыяз ик кыле; я шоналскыны ӧжытлы беромо но куак озьы ик интыяз кыле. Соин ик ужпумез йылаз-пумаз вуттон понна нош но нош сульдэр вӧзтӥ ворттылоно луэ. Татын гужгес керӟегъяськыса выро егит ожгарчиос, соин ик ӵемгес янгышало.

Шур дурын но шыпыт ӧвӧл. Татын Токбулат ожгарчиосты пыӵалэн ыбылӥськыны дышетэ:

— Нырысь пыӵалдылэн гумы пасьтӥз кисьтоды кӧня ке дары, собере отй ик лэзёды узвесь пырыосты. Узвесь пырыос одно ик кӧжы кадь питырес луыны кулэ. Али пономы быдэн кыксэ гинэ. Узвесь пырыосты нош ик дарыен шобыртомы. Табере гумые понэ пичияк небыт куж но сое, шомполдэс басьтыса, юн-юн туйылэ, дарыды пыӵал гумыысьтыды медаз кисьтӥськы. Пыӵалдэс ки вылады кутыса, пельпум бордады юнгес пыкъялэ. Пыӵал гумыдылэн асьтэ пал пумаз вань пичи гинэ пасез. Отӥ дары пырыос кӧня ке потыны быгатозы. Пась дорын ик юнматэмын пичи гинэ из кӧльы, со вӧзын ик сеньки понон кульчо. Сенькиды одно ик кӧс луыны кулэ. Сенькидэс интыямды бере, корт чакмаеныды кӧльы борды шуккыса тыл поттоды. Тылгизьылэсь сеньки аралоз но, дары пуштоз. Бур киыныды пыӵалдэс весь пельпум бордады пыкъяса возе. Озьы ӧд ке каре, пыӵал пельпумады туж юн шуккоз но пуньылыдэс вольтчытыны, интыысьтыз поттыны быгатоз яке эшлыдэс тӥялоз. Валалоды-а ваньды, кызьы дасяно пыӵалэз но кызьы ыбоно соин?

— Ма, валамы кадь но, кышкытгес ик адӟытэк,- шуиз Арчаысь вуэм воргорон.

— Котькыӵе уж, нырысьсэ со борды кутскыку, кышкыт потэ, собере дышемъя номыр кадь ик ӧвӧл ни. Пыӵалэн ыбылӥськонын но озьы ик, шугез, кышкытэз отын чик но ӧвӧл,- индылӥз гуртысь пыӵалэн вуэм пиосмурт.

— Я, табере вае радызъя пыӵалъёсмес дасяломе, — косӥз Токбулат но ваньзылы пичиен гинэ дары сётӥз. Собере быдэн кык узвесь пыры но нош ик кӧня ке дары. Небыт куж но донгизы пыӵал гумыязы, шомполъёссэс кутыса, юн-юн сое туйылӥзы.

— Али черодэн ыбылоды. Нырысь мон ыбо, тӥ учке, кызьы мон выро. Собере мон косэмъя тӥ ыбылыны кутскоды,- озьы вераса, Токбулат луоё азе, шур дуре, боды бышкалтйз но йылаз бадӟым люты куар дэмӟытйз. Ачиз, боды бордысь от куамын вамыш кошкыса, ожгарчиоссэ котыраз ӧтиз. Пыӵалэныз боды пала кариськыса, созэ пельпум бордаз пыкъяз но паллян киыныз кӧльы борды чакмаен шуккиз, тылгизьы потыса сенькиез аратӥз. Бух! юн гинэ куара потӥз но омыре вӧлскиз. Боды бор­дысь куарлэсь усемзэ нокин ик синйылтыса ӧз вутты, ваньзы уго Токбулатлэсь выремзэ учкыса улӥзы.

— Учке ай, куар интыяз ӧвӧл ни, Токбулат сое уськытэм! — паймиз одӥгез ожгарчи.

— Ойдолэ али сое учкоме, пасяськем-а, ӧвӧл-а? — ӵектӥз мукетыз. Ваньзы бызьыса боды доры вуизы, одӥгез куарез ӝутӥз но адӟизы: куар одӥгетӥ пасяськем.

— Вот зол! — шумпотыса вазиз пинал воргорон, — соин пӧйшураны но умой луоз ук.

— Пӧйшуранлэсь азьвыл ыбылӥськыны дышоно ай, — пумитаз вазись луиз.

— Я, табере асьтэос утчалэ ыбыса. Пыӵалдэс мон кадь ик боды пала каре. Пыӵал гумыды кузя учкыса, боды йылэз адӟе, собере пыӵалдэс выретытэк ыбе. Боды бордады нош люгыкуар юнматэ, со шоры мертаськыны умойгес луоз,- ялан озьы дышетыны выриз Токбулат.

Дышетскон нуналъёс огзы бӧрсьы огзы ортчо. Дыр ортчемъя ожгарчиослэн луонлыксы но быгатонлыксы воля, соос умойгес быгато ини ожтйрлыкъёсын вырыны, дыраз сое уже кутыны. Берпум нуналъёсы бере ӧз кыле ни егит ожгарчиос но, сабляосын, палашъёсын кораськыны дышизы, мечъёсын бышканы, пыӵалэн но ыбылӥськыны. Сюрес ожгарчиосын кивалтӥсьёс, менбашъёс, ожгарчиоссылы ивортӥзы, ӵуказе дышетсконлэн берпум нуналыз луоз шуыса. Люкаськем калык ӝутскем мылкыдын кӧлыны кошкиз.

Тани лыктэм ожгарчиос нош ик кыр интые, Бадӟым куала доры, люкаськизы. Табере соос радэн-радэн султэмын. Бур палан сыло валэнъёс. Шоразы, азьпалангес, — Исенбай. Паллян пала пукыӵъёсын ыбылӥськисьёс интыяськиллям, соослэн азязы — Пучеш, шоразгес — мечъёсын ожгарчиос, соослэн азязы — Казмач. Таосыз но валэнъёс вискы одӥг радэн асьсэлэн кивалтӥсенызы Токбулатэн пыӵалъёсын ожгарчиос султэмын. Палэнысен учкыса, та люкаськем калыкез адӟоно ини — кыӵе бадӟым кужым татын!

Люкаськем ожгарчиос азе потыса, Богодан вераськыны кутскиз:

— Мон туж шумпотӥсько но тау карисько люкаськемды понна. Оскисько, та ортчем нуналъёсты юнме ӧз быре, дыр, шуыса. Котькудды тодады вайиды, луоз, ожмаськон амалъёсты, егитъёс но малы ке дышизы, луоз. Огшоры гинэ ӧм люкалэ тӥледыз: асьмелы дась луоно котькуд нуналэ тазьы ик люкаськыны, ведь одно ик ожмаськоно луоз со юлбасаръёсын. Мамук-бексы асьме вылэ вуттоз соосты. Мон малпамъя, соос асьме пала вуозы, дыр, сӥзьыл, бусыысь ю-нянез октэм-калтэм бере. Соослы ведь нянь, сӥль кулэ луоз, мукет ваньбур- мес но таламзы потоз. Табере нош, оло, кинлэн ке юанъёсыз вань, юалэ.

— Нош кызьы ми тодомы ожмаськонлэсь кутскемзэ, ку люкаськыны, сыӵе иворез кызьы тодомы? — юаз кыдёкысь гуртысь юзбаш Аймамат.

— Вае тазьы вераськоме, — шуиз Богодан, — Мамуклэсь Арчае лыктыны потэмзэ ивортозы битер эшъёсмы, со сярысь вераськемын ини. Соку ик тани татысь тангырае ӵем-ӵем жугомы. Котыр гуртъёсын но сое кылыса асьсэлэн тангыраосынызы чем жугыса куара мед сётозы. Озьы котькуд гуртэ вуыны кулэ секыт ивор. Со иворез кылыса, туж ини курисько, тазьы ик ӝог лыктыны тырше асьтэ валъёсыныды, ожтӥрлыкеныды, вань ке утялскыны корт дӥсьёсты — эн вунэтэ дӥсяны. Тазьы ик тани, ӝог гинэ, кулэ соку люкаськыны. Эшшо юанъёсты вань на-а? Ӧвӧл ни ке, ойдолэ туннэ люкиськоме, дорады витё, дыр, ини. Ӟеч луэ! — веранзэ быдтӥз Богодан.

Возь вылын нош огыр-бугыр луиз: кин валзэ уробое кыткыны кошкиз, кудъёсыз валъёссы вылын ворттӥзы гуртъёсазы, матысьёсыз пыдын кошкизы. Ожтӥрлыкъёссэс ваньзы сьӧразы басьтӥзы.

Нунал бӧрсьы нунал ортче. Куд-ог нуналъёсы зорылэ, тӧласькыса, пельтылыса но улылэ. Гужем ук! Инкуазь вань мылкыдзэ возьматыны, сётыны дыртэ кадь дунне вылын улӥсь адямиослы. Гурезь бамалъёсын, нюлэс кушъёсын коня узы-боры кисьмамын, бича но бича вылэм! Нош калыклэн али одӥг сюлмаськонэз — та тупатскем шундыё нуналъёсы ӝоггес, шунды ӝужамлэсь азьвыл ик, возь вылэ вутсконо. Ӝужам вож норед турынэз турнано но шунды бамалын куасьтоно. Мӧйыос но пиналъёс, ваньмыз, кинлэн кусо, саник, мажес кутэмез луэ, асьсэ возь вылъёсазы турнало, куасьмемзэ мажсало, чумолёосы люкаса валэн кабан сюрон доры нулло. Валэн пичи пиос ворттыло, куасьмем турынэз мажсало нылъёс но пиос. Кабан сюронын тыршо воргоронъёс. Турнало воргоронъёс но кышномуртъёс. Возьёс вылын уж мынэ, калык тырше тол вылтӥ пудолы сюдыны тырмыт турын дасяны.

Турын дасян секыт ке но, котькудӥз ик ӝутскем мылкыдын ужа. Та ужен сокем кема но выроно ӧвӧл ук, чебер куазен со йылпумъяськоз от дасо нунал куспын. Озьыен, котькуд семья дыр шедьтоз бичаськыны но. Тэль корам, сайкем бервылъёсын туж уно кисьма ини эмезь, нюргес интыосын, шуръёс дуртӥ сьӧд но гордсутэр ӟускиос кисьтӥськоно кадь ошиськемын. Ваньзэ толлы бичаса дасяно. Узы-боры бичаны покчиос но быгато, кышканэз ӧвӧл — мед ветлозы гурезь бамалъёстӥ. Нош сутэр но эмезь бичаны мӧйы но пересь кышноос мынозы ини, соос сьӧры чортӥськозы покчиос но. Покчиосты нюлэскытӥ но нюр интыостӥ бичаськыны асьсэ понна лэзьыны кышкыт: я йыромозы, я гондыр шоры ӝимозы, кый но куртчыны быгатоз…

Туннэ Сыткулэн Богодан турын кабанъёссэс пуӵъёсын кенераны вераськизы. Возьзы гуртлы матын бере, гурт пудоос сопалтӥ ветлыкузы изъянтозы. Бичай но Жаги эмезяны мыноно кариськизы. Илчеен Айтко но соос сьӧры мыныны ӝутскизы. Юрт котыре Марӟана но Байбичка пичи пиосын кылё. Юрт котырын со но та ужамъяськыса, Марӟана Тукташсэ пиши уробо кӧкые интыяз, ачиз пал кияз куды басьтыса, Кибичкозэ китӥз валтӥз. Соос но туннэ бичаськозы, гурезь бамын борыез вырӟылытэк ик бичамон.

Озьыен, семья туннэ узырмиз, шуыны луоз, эмезен, сутэрен по борыен. Ваньзэ, мар бичазы, шунды шорын куасьтозы, тол вылтӥ эмъяськыны, чай юыны но кутэмнянь пыжыны яралоз. Воргоронъёс но буш киын бертӥллямтэ, соос веник тӥяса но керттылыса ог кызь пар мында вайиллям но липет улэ, шунды адӟонтэм азе, ошылӥллям.

Котькуд нуналэ кыӵе ке но уж сюре. Нош эльйырлэн, юртъер котырын сяна, эшшо калык сярысь но сюлмаськонэз лачак. Али но тани тодмо луиз: Мамуклэн ожгарчиосыз урмем кадь, пе, берытскиллям Кузонэ. Чувашъёс, поръёс, мукет калыкъёс дорын соослы удалтымтэ, ӟуч ожгарчиосын огазе кариськыса, со калыкъёс ӧтьымтэ куноосты асьсэ палысьтызы туздыриллям. Вылаз ик, сю куатьтон сизьымзэ вииллям, сюлэсь унозэ сӧсыртӥллям. Удалтымтэ эрказмемъёслы таяз радэ. Озьы бере, малпаськы, Богодан! Со шакшыос вожомем сяменызы Арча пала но ӝоген лыктыны дасяськозы ведь.

Витьымтэ шорысь одӥг нуналэ ӝыт пал Арчае вал вылын Давликам вуиз. Богодан, палэнысен ик сое тодмаса, шугьяськыны кутскиз.

«Мар ке но умойтэмен вуиз, дыр», — малпаз со.

— Умой-а, атай, — мынясагес ӟечъяськиз эмеспи, кизэ сётыса.

— Туж умой, туж умой, — шуиз Богодан, нош ымныр вылаз пумиськемлы шумпотонэз уг адӟиськы — Ойдо валдэ азбаре пырты. Корка пырыса, вераськомы ини.

— Нош мар тон сыӵе кышкатскемын кадь, мар ке луиз-а, мар-а? — шӧдӥськыса юаз Давликам.

— Номыр ик ӧвӧл но, тон кыӵе ке урод ивор вайыса вуид, оло? Мон озьы малпай.

— Кышкатскыны мугез ӧвӧл кадь али, мон шумпотэмме вераны, тӥледыз дорамы ӧтьыны лыктӥ. Пимы ведь вордскиз! — ӝутскем мылкыдын вераз Давликам.

— О-о, озьы бере, сое одно ик кызьы ке но пусъёно! Иське, мон но бабай луи ини. Вот таиз зол! Огрейлэн но нунылэн тазалыксы нош кыӵе, номыр ӧвӧл кадь-а?

— Пимы таза вордскиз, арня тырмиз ини солы. Огрей но ветлэ, корка пушкын мар но со ужаны выре ни. Ваньмыз умой, шугъяськонэз ӧвӧл. Огрей пимылы атайлэсь нимзэ сётомы, шуэ, Ильяс, пе, мед луоз. Мон соин соглаш луисько. Нош тон кызьы учкод?

Мон мар шуом, асьтэос тододы, дыр, кызьы ниманы. Мон сое котькыӵе нимын аслам каро ведь. Нош али ик вал кытко но асьмеос Казанйылэ ворттомы, семьяе уго гужемлы отчы келямын, татын Жагиеным гинэ улӥськомы. Туннэ со но ӵукна ик отчы кошкиз. Ӝыт мон сое вайыны дасяськисько вал али. Табере ӵошен мыномы сое вайыны, — озьы вераса, Богодан валзэ кыткыны кошкиз. Давликамлэсь валзэ гидэ пыртыса сиён сётӥзы но уробое пуксьыса, сюрес вылэ потӥзы.

Мынонъязы Богодан лулпушсэ бичатӥсь юанзэ эмеспиезлы сётӥз:

— Кыӵе иворъёс вуо Кузонысь? Мар кылӥське Мамуклэн ужъёсыз, малпанъёсыз сярысь?

— Валлян нуналэ Дамир вуылӥз дорамы, — кутскиз мадьыны Давликам — Атаен кенешыса, огдырлы Кузонысь лавкаез ворсано кариськизы. Мамуклэн ожгарчиосыз нуналлы быдэ пырыса мае адӟо — басьтыса кошко, лэся. Дунзэ тырыны тодазы но ӧвӧл. Ӧд ке сёты, виёнэн но кышкато, пе. Итиль сьӧрысь бертэмъёсызлы Мамук шуэм: «Сопалан ӧз ке удалты, мукет пала, Арчае, мыно­мы. Ваньды мыноды, ачим нуо, кивалто тӥледын. Монтэк номыр но лэсьтэмды уг луы. Али дасяське, ог-кык арня шутэтске но сюрес вылэ потомы». Озьы тӥни индылэм ашкынэм муртъёссэ Мамук. Атай но та дыре сюрес вылэ потонлэсь кышкаса улэ ини.

— Калыкез гинэ люканы мед быгатомы, возьматомы ми солы пӧсьсэ но, кезьытсэ но. Нош кыӵе мылкыдын улэ меда бигер калык, кыӵе малпанъёссы Кузонын улӥсьёслэн?

— Ваньмыз ик одӥг мылкыдын уло кадь, тужгес но казанъёс — Мамук ожгарчиосыныз карысь кошкиз ке, берен вуыкуз Казане пырыны уз ни лэзе. Кызьы со малпанзы уж вылын быдэсмоз — созэ шугъяськоно али вераны. Однако калык бугыръяськыны, дасяськыны кутскемын ини.

— Иське, бигер калык но ми пала кариськоз. Соку, оло, милемлы капчигес луоз со эрказмемъёсын жугиськыны. Пазьгомы, одно пазьгомы со бек нергезэс! Кузонысь потэмзэ гинэ тодыны мед луоз вал,- вожзэ поттыса вераз Богодан.

Кызьы ке но тыршомы потон нуналзэ тодыны, Мамуклэн котырысьтыз адямиос ик вералозы, соку ик тӥледлы но ивортомы. Нош калыктэс кызьы люкалоды, Арчаысь гинэ ожгарчиосын уд ведь быгатэ вормыны со бабасыръёсты? — Давликам паймыса ик юан сётӥз.

— Соиз сярысь милям вераськемын ини, кык нунал куспын тырмыт калык люкаськыны кулэ.

Вуизы Казанйылэ. Вераськонъязы ӧз но шӧдэ дырлэсь ортчемзэ. Юлтош нимо валзэс азбаре ӧз ни пыртэ, капка юбоысь кульчое гинэ думизы. Лыктэм муртъёсты адӟыса, Сыткулэн Би­чай мар шуыны ик паймизы, лэся, ӧз малпалэ уго, Давликам та дыре соос доры вуоз шуыса.

— Кытысь тон потӥд, кызьы ми доры но сюрес шедьтӥд? — огымысь кадь юазы кузпалъёс, Давликамез ӟыгыръяса, ӟечбуръяськыса. Со куспын татчы вуизы ини Марӟанаен Жаги, соос бӧрсьы — Айтко, Давликам Марӟанаез ӟыгыртӥз, тыбыраз вешаса ик чупаз бамъёссэ, Жагилы но кизэ сётыса йырзэ маялтӥз. Сыӵе ӟырдыт пумиськыса, воргоронъёс куиньназы корка пыризы, кышноос, куалае пырыса, сиён-юон дасяны кутскизы. Айтко, Юлтошез вешаса, азяз кудыен сезьы пуктӥз. Вал шумпотыса кадь ӧжытак гырдалтӥз но сиыны кутскиз. Кӧня ке сием бераз пияш валлы ву но сётӥз на.

Корка пырыса, воргоронъёс кӧня ке вераськыса пукизы. Давликам Сыткуллы вазиськиз:

— Мон тӥледыз куное ӧтьыны лыктӥ, милям ведь пимы вордскиз.

— Озьы-а, ма? — паймемзэ ӧз ваты Сыткул. — Нош сыӵе иворез кышноослы но верано ук.

Айтко корка пырыса гинэ вуэм вал но, Богодан сое кышноосты ӧтьыны косӥз. Соиз бызьыса ик куалае кошкиз. Марӟана, Бичай но Жаги корка пыризы гинэ но, Бичай кышкатскыса ик юаз:

— Мар ке луиз, оло? Малы ӧтиды?

— Давликам тани куное ӧтьыны лыктэм, — вазиськиз Бого­дан. — Соослэн пизы вордскем.

— Осто, быри! Нош Огрейлы номыр ӧвӧл-а? Пиды но таза вордскиз-а? — кушетскыса юалляськыны кутскиз Марӟана. Татчыозь ку нуны ваёнзэ но мон ведь умой-умой ӧй тоды на вал. Ойдо ярам, ваньмыз ӟечкын ортчиз ке.

— Сюлмаськонэз ӧвӧл кадь, ваньмыз умой, — буйгатӥз кышноосты Давликам. — Мон тӥледыз ӧтисько сьӧрам ик. Ваньмы ӵош мыномы Ядыгаре.

— Ваньмылэн ик татысь кошкеммы уз луы, дыр. Пичиосмес кытчы, кинлы кельтомы? — куаретӥз Марӟана. — Тӥни Сыткулэн Бичай мед али мынозы, Жагиез сьӧразы басьтозы. Мылкыдыз вань ке, Богодан но мед мыноз. Мон татчы кылё пиосын но пичиосын, пудо котырын выро, бакчаез но учко. Ужало каллен.

— Мыным али Арчаысь нокызьы но кошкыны уг луы, — чутрак вераз Богодан, — секыт нуналъёс вуоно, лэся. Ожгарчиосты люка- но луоз. Жаги тӥни мыноз ке, мед мыноз. Карысь пудо нергеез мон утялто, одӥг-кык нуналлы скал кыскись отын сюроз.

— Нош сиёнмы но пӧзиз, дыр, ук ини, — вазиськиз Бичай.

— Ойдолэ потыса куалаын ик сиськоме. Собере ваньды татын кӧлоды-а, уд-а? Валдэс но уд пыртӥське но, соин юасько.

— Арчае ик кӧлыны мыномы, дыр, — аслэсьтыз малпанзэ ве­раз Давликам. — Ӵукна ведь сюрес вылэ потоно, Ядыгаре вазьгес ик мед вуомы вал.

— Озьы бере, ӝегатсконо ӧвӧл — дасяськоно,- Сыткул Бичайлы вазиськиз. — Нош али ойдолэ сиськоме.

Эмеспизы мукет осконэн улэ бере, куалае пырыса, таяз радэ семья вӧсяськытэк ик ӝӧк сьӧры пуксиз, умой ӧз поты, лэся, бигер пиез сереме кельтозы кадь потӥз. Сиськыны кутскизы вал но, Марӟана капчияк вазиськиз:

— Сиськемлэсь азьло ойдолэ пичияк курытсэ оскалтоме мимы вордскем понна, тазалыко мед будоз, анай-атайзэ медаз курадӟыты висёнъёсын.

Пичи бекчеысь аракызэ сюмыкъёсы лэзьыса, пичияк ачиз веръяз но Богоданлы сётйз. Соиз пуконысьтыз султыса вераз:

— Я, иське, пимы понна юом-а, мар-а ини. Мед таза будоз -сюмыксэ бушатыса, Марӟаналы сётӥз. Марӟана нош сюмыксэ тырмытӥз но Давликамлы сётӥз:

— Пиед вордскем понна тон но ю али, ведь атай луид ини табере.

Давликам юиз но сюмыксэ сётыкуз шуиз:

— Кужмо ик вылэм, берло но тазьы ик аракыед мед удалтылоз.

Сыткул но, Давликамез пиез вордскемен ӟечкыласа, одӥг сюмыкез бушатӥз. Кышноос но пичиен курытсэ оскалтӥзы но сиськыны кутскизы. Сиськем беразы но куалаысь вӧсяськытэк ик потӥзы.

Сыткул кельыт валзэ капчи уробое кыткыны вырӟиз. Богодан пыдлось корка пиоссэ учкыны, вешаны пыриз. Бичай но Жаги корка пырыса кузьымъёс бичаны кутскизы. Марзана, куалаысь ӝӧк вылэз утялтыса, пичиосыз доры вамыштӥз. Марӟана Казанйылэ вуэмзы дырысен толэзь мында Тукташсэ нонтэмысь дугдытыны выриз; йӧлын ӝук, кисаль сиыны выре ини пичизы. Байбичкаен Кибичко пыд вылаз но султытыса нуллыны выро, пичизы соку гы-ы! карыса серектэ, шумпотэ, лэся. Богодан Тукташсэ кияз басьтыса топ-топ вешаз. Со куспетӥ Кибичко но ал вылаз вуиз, созэ но вешатэк ӧйлась. Пиоссэ капчияк палэнтыса, Богодан Марӟаналы шугьяськемзэ верано кариськиз:

— Аранмы но туэ куспетӥ уз луы меда? Со лыктэм бигер йыртэмасьёс таки асьме пала лыктыны медо, лэся. Атаманзы ачиз кивалтыны малпам укылтэмъёсыныз. Кузонын озьы вераськемъёссэ Мамуклэсь тодо ини. Ожгарчиосызлы одӥг-кык арня шутэтске но дасяське, пе, шуэ Арча вылэ ожалскыны. Соин ик та арняе мынам татчы ветлыны дыры уз луы. Тон татын сюлмаськыса эн улы, астэ утялтыса возь. Висёнъёслы эн сётске.

Сыткул валзэ кыткиз. Жагиен Бичай но киязы бинетъёсын коркась потӥзы ини. Давликам Богоданэз ӧтьыны мынӥз. Татын со, Марӟаналы тазалык сӥзьыса, ӟеч кылъёс вераса но пичиосты вешаса, кылемъёсын люкиськиз.

Богоданэн Давликам ӵошен, одӥгаз уробоын, сюрес вылэ потӥзы. Сьӧразы аслэсьтыз валзэ валтӥз Сыткул, соос куиньназы одӥг валэн мыно. Валъёс вортто сюрес вылтӥ; уробоосын пукисьёслэн котькудзылэн ик аслаз гинэ малпанъёссы йыръёсазы бергало. Давликам шугьяське, кызьы со уйзэ ортчытоз яратоно кузпалызлэсь но али горд бамо пиезлэсь палэнын, шонерзэ вераса — мурт дорын. Богоданлэн али туж секыт мылкыдыз, пичи оныкезлэн югыт дуннее потэмез но нокыӵе ик ӧвӧл кадь; вуоно ожмаськон йырысьтыз уг кошкы — секытэз нош калык вылын шӧдӥськоз ведь. Сыткулэн Бичайлэн гинэ малпанъ­ёссы огкадесь: кызьы вуозы Ядыгаре, кызьы отын пумиталозы, мурт уз каре-а?

Жаги гинэ дораз ӝутскем мылкыдын бертэ. Ӝыт пал, дорысьтыз ужъёссэ йылаз-пумаз вуттыса, одно ик потоз егитьёслэн шудоназы, пумиськоз туж но туж яратоно муртэныз, Токтаметкоен. Эшъёссылэсь палэнскыса, ваче ӟыгырскозы но, нокинэ адӟытэк кадь, кема гинэ вераськыса пукозы матысь льӧмпуос улын. Йыр вадьсазы уӵы нош аслэсьтыз гурзэ кисьтоз яратӥсь муртъёслэсь мылкыдзэс ӝутыса, гоматыса. Сыӵе малпанъёсы выйыса, Жаги шӧдыса но ӧз вуы валзылэсь капка доры вуыса дугдэмзэ. Уробоысь шуак гинэ тэтчиз но бадӟым капказэс усьтӥз. Валъёс уробоын пукисьёсты азбаре пыртӥзы.

* * *

Сыткул ӵукна ик валзэ кыткиз но куное мынӥсьёс сюрес вылэ потӥзы. Соосты келяса кадь, буш вал вылын сьӧразы гонӟыртӥз Давликам. Ӵук салкымен валъёс капчиен ворттыса нуо мынӥсьёсты. Ӝыны сюресэз ортчыса, кыӵе ке пичи шур дуре дугдӥзы, валъёслы ӧжытак шутэтскыны дыр сётйзы. Асв сэос но сьӧразы басьтэм сиёнзэс куртчизы.

— Ойдолэ вуэ пыроме, — ӵектӥз Давликам. — Таӵе пӧсь куазен туж умой ведь пылатскыны.

— Татын вуэз но пыдес дорозь гинэ ук, кытыназ уялод? — паймыса юаз Сыткул.

— Мон чакласа шур дуртӥ ортчо ай, вань, дыр, кытын ке мургес интыез но, — Давликам шур кузя вамыштӥз. Кыдёке ик ӧз вуы, Сыткулэз ӧтиз.

— Лык татчы, татын пичияк мур интыез вань. Асьмелы тырмоз. Бичаен Жаги но мед лыктозы.

— Ми тӥ бере пылатскомы, — вазиськиз Бичай. Давликамен Сыткул кӧня ке вуын жомбылляськизы но выльысь дӥсяськыса валъёссы доры вуизы. Жагиен Бичай кылиськытэк гинэ мисьтӥськизы.

— Вырӟомы ни-а табере? — Сыткул вал кыткетъёссэ тупатъян куспетӥз юаз.

— Ойдолэ вырӟоме, мынонмы байтак али, — шуиз Давликам. Ӟеч сюрес вылтӥ валъёс нош нуо куное мынӥсьёсты.

Богодан ӵукнаысен ик вераськыны, кенешыны малпаз Ямгурчиен, Баганаен но Тотышен. Кенешонэ ӧтемын менбашъёс Тучеш, Казмач но Месенбай. Кивалтӥсьёсын кенешонъёс котьку ик нимаз юртын ортчыло. Со юрт Арчакарлэн шораз ик сылэ. Юртлэн азьпалаз пичияк кыр интыез но вань. Со кыр интые кыӵе ке туж кулэ бадӟым ужпумез эскерыку калыкез но люканы луэ. Лыктӥзы ваньмыз ӧтемъёс, соосты ӧтчаса ветлӥз юромо ӧтчаськыны но юртэз утялтыса возьыны пуктэм мурт.

— Мон туннэ тӥледыз люкай урод ивор вуэмен, — кутскиз веранзэ Богодан. — Мамук аслаз гыжкалъёсызлы кык арня мында дыр сётэм дасяськыны Арчакармы вылэ ожалскыны. Со дырлэн куать нуналэз ортчиз ини. Асьмелэн, озьыен, тямыс нуналмы вань на ӧтьымтэ куноосты пумитаны. Соин ик мон туж курисько тӥледыз: оскем ужъёстэс быдэсъяны туннэ нуналысен туж чырмыт басьтӥське. Трос малпаськыса, гызмыльтыса улыны дырмы ӧвӧл ни. Ожгарчиосты люкаломы Кузонысь ивор вуэм бере, отысь оскем муртъёсмы одно ик вералозы асьмелы Мамуклэсь Кузонысь ку потэмзэ. Нош али мар кулэ лэсьтыны туннэысен ик кутскыса: Тотыш, тыныд чаклано, кулэ ке, тупатъяно сӧсырмемъёсты интыян юртэз. Отын чылкыт мед луоз, выдтон интыос уногес мед луозы. Али ик люкано эмъясьёс- ты — мед кутскозы ужаны. Асьсэлы ужан инты мед дасялозы.

Баганай, тон вань дурисьёсты ортчы но кӧня соос ож тӥрлык дуриллям — ваньзэ бичаса татчы кеносэ вуттоно, возьмаськись пуктоно. Дурисьёслы вералод, ужамзы понна выт тыронзэс ку- лэстомы, огшоры гинэ адямиез уд ужаты ук. Ямгурчи, тыныд но ӝегатскытэк бызьылоно ни. Кеньыр, сӥль, мукет сиён-юон — ваньмыз тырмыт луыны кулэ, озьы ик пӧзьтӥськон, сиськон тӥрлыкъёс но. Бича калыклэсь выт тырем чотын. Нош тӥ, менбашъёс, дась луэ ожгарчиосты пумитаны. Кызьы вераськимы, соос лыктыны кулэ тангыра жугемлэн куараезъя. Юзбашъёсыныды умой вераське — ожмаськон дыръя мед учкозы, мед косъяськозы, мед син азязы возёзы жугиськонлэсь огъя мынэмзэ по кулэ дыръяз лябгес интыосы юрттэт сётыны мед быгатозы.

Ожгарчиосты кызьы но кытчы интыяломы — соиз сярысь нимаз вераськомы ни, Мамуклэсь кудпалтӥ лыктыны потэмзэ тодэммы бере. Я, мон вань малпанъёсме верай кадь. Кинлэн, кыӵе юанъёсыз вань?

— Мар юалляськыса улод на, ваньмыз валамон. Ӝоггес дасяськоно, дырмы трос ик ӧвӧл ни, — шуиз Баганай но таин кенешонзэс быдтӥзы. Люкаськемъёс татысен ик ваньзы кошкизы лэсьтоно ужпумъёсты быдэсъяны.

Та нуналэ эльйыр пумиськиз на туно-пеллёен, пересь Бекчурон. Тодэмез потэм, вераськем-а со мӧйы калыкен, тужгес ик кышноосын но пересьёсын.

Байтак — трос, уно.

Кыӵе ни ужпумъёс, Бекчур агай? Кыӵе шугьяськонъёс уйёсы изьыны уг сёто та дыре? — пересьлэсь кизэ кутыса юаз Богодан.

— Ужъёс шумпотымон ӧвӧл, Богодан.

— Малы озьы?

— Ма, косэм уждэ быдэстэме уг луы. Калык пумит луэ Арча- ысь кошкыны. Кӧня ке пересьёс гинэ соглаш луизы. Кышноос ке воксё но пумит луо. Шуо: «Ми но юрттомы картъёсмылы ожмаськыны, соос ке быризы, милемыз но, пе, мед виылозы». Тйни озьы, Богодан. Кызьы калыкен вераськоно на — уг ни ва- ласькы,- веранзэ быдтйз Бекчур.

— Ярам, иське, мар ке но малпано луоз та сярысь. Нош али таӵе куронэ вань. Юрттӥсьме, Тотышез, тодӥськод-а?

— Тодӥсько, кызьы уд тоды, мон соин вераськылӥсько но. Сабырлы, визьмо адями, шӧдйське, — шуиз пересь, ачиз сак кариськыса учкиз Богодан шоры.

— Озьы бере, туж умой. Тон ӵуказе вуттӥськы вал отын сӧсырмемъёсты интыян юртэ. Отын адӟиськоды Тотышен. Юртты солы кызьы ке но, дэмланъёсын ке но, мар ӟечсэ лэсьтыны луоно со юртын. Ожмаськыку уно луозы, дыр, сӧсырмемъёс. Соосты отчы интыяса, юрттыны, эмъяны тыршоно луоз. Мед пыд вылазы султэмзы луоз. Виылэмъёсызлы юрттэт кулэ уз луы ини, нош соосты но ожлудысь поттыса, ӟечен музъемлы сётыны мед быгатысалмы. Тӥни сыӵе куронэ мынам, визьмо Пересе.

— Оскемедлы, дунъямедлы тау, Богодан. Тотышлы быгатэмея одно ик юрттыны тыршо.

— Оскисько тыныд, Бекчур агай. Иське, али ӟеч лу, висёнлы эн сётӥськы, — кизэ кутыса люкиськиз пересен Богодан.

* *

Чебер, сайкыт нуналэ ӝыт пал Давликам кунооссэ пыртӥз ини дораз. Куноосты ӝутскем мьшкыдын пумитазы, лыктэмъёслы тужгес но Огрей шумпотӥз. Татьш ини вераськон бигер кылынгес мынӥз. Ильясэн Огрей удмурт кылзэс но поттылйзы. Давли­кам но кӧня ке выриз удмурт кылын, кытӥяз янгышалляз ке но.

Давликам азбаре валъёсты утялтыны потйз, валъёс котырын берганъяз капкаетй пырисьёсты адӟиз — Алсуэн Дамир вуиллям.

— Кыӵе умой, тодыса кадь вуиды, — вазиськиз Давликам.

— Ма, ми тодыса ик лыктӥмы, толон атай ми дорын вал, со ик вераз, — валэктӥз Дамир.

— Валдэс азбаре пыртэ ук.

— Ми валтэк, пыдын гинэ лыктӥмы, лёгаськем амал, — вераз Алсу.

— Озьы ке, ойдолэ корка пыре ини, — ӧтиз Давликам но, куиньназы ик корка пыризы.

Дамир Сыткулэн кизэ сётыса ӟечбуръяськиз, Жагиен Бичайлы йырзэ гинэ мыкыртыса «Исенмесез! Килен житуен белен» шуыса ӟечъяськиз. Алсу но лыктэм куноосын ӟечбуръяськиз.

Назия но Огрей, ӝӧк вылэ пуктӥськыса, воргоронъёсты ӝӧк сьӧры ӧтизы, Ильяслы Назия индылӥз:

— Тон татын кузёяськы, сюд но секта куноосты, асьтэос но туннэ пичияк юэ нунымы понна. Ми но сопалан кунояськомы. Ойдолэ ни, гажано куноосы, асьмеос но одйг ӝӧк сьӧры пуксёме, — ӧтиз кышноосты ас сьӧраз мукет висъетэ. Пиосъёс ӝӧк сьӧры пуксизы, Сыткул интыысьтыз султыса:

— Пичияк коньдон понӥсько нуныдылэн вордскемез понна. Таза мед будоз, висёнъёсын анай-атайзэ шуге-леке медаз вуттылы, — озьы шуыса, ӝӧк вылэ пуктэм вӧй борды пичи зарни уксё понӥз.

Сыӵе кылъёс вераса, Дамир но вӧй борды зарни уксё бышкалтӥз. Ильяс ваньзылы сюмыкен аракы сётйз но ӧтиз: Ойдолэ пимы понна, кема возьмам нунокмы понна, пу- миськеммы понна но пичияк юоме.

Ваньзы сюмыкъёссэс бушатӥзы, Ильяс эшшо тырмытьяз. Мар сярысь но ӧз вераське ни пуконъязы: куазь, турын дасян, мушъёсын вырон, валэс юослэн ӝужамзы, нылпиослэн тазалыксы — ваньзэ вераса быдтод шат, уката ик юэм бере кыл ке пертчиськемын. Озьы вераськыса но сиыса-юыса пуконъязы, Дамирен Сыткул Давликамез, пиез вордскемен ӟечкыласа, сереме уськытыны выризы. Пинал атай ӧз йыркуръяськы, ачиз но кыкназэс ик меӵкытъяса серекъятӥз.

Мукет ӝӧк сьӧрын, коркалэн пичи люкетаз, кышноос кунояськизы: сиськизы, чай юыса пукизы, юалляськизы-вераськизы. Бичай Огрейлы вазиськиз:

— Табере возьматэ ни зарни комоктэс, адӟеммы ведь потэ.

— Изе кадь али, сайкатом-а, мар-а, — озьы шуыса, сэрегысь ка­танчи сьӧры пыриз но кияз бинетэн шобыртэм нуныен потӥз. — Уг ни изьы вылэм, шып гинэ учкыса кылле.

Бичай, нуныен гур доры мыныса, муръёысь чиньыеныз шум басьтӥз но нунылэн кымысаз пус пуктӥз: син медаз усьы. Собере, ӝӧк сьӧрын пукисьёслы возьматыса, шуиз:

— Тани ми бадӟым будйськомы ини.

— Уть, кыӵе со, али ик пыдъёссэ выретэ ини. Я, бадӟым буд, таза лу, эн бӧрдылы, — кияз кӧня ке возиз но, ме, тон но дышетскы ини нуны кутыны, — шуыса, Жагилы сётӥз.

Жаги кышкаса кадь озьы ик вьль басма юдэсэн кутӥз.

— Ой, кыӵе пичи-и, — нёжтӥз со, — ку меда со адями луоз, ку бызьылыны кутскоз?

— Будомы али, будомы, — вазиз Назия апа, — тазалыкез гинэ мед луоз.

Нуны Алсу кие но вуиз. Собере Огрей выльысь сое катанчи сьӧры пыртӥз, отын, гадьзэ сётыса, нонтӥз но выдтӥз. Пичиез соку ик изиз но, Огрей выльысь куноосыз доры потӥз.

Бичай, бинетсэ сэрттылыса, кузьымъёссэ поттаз но кӧнязэ ке Жагилы вераса сётйз:

— Таоссэ ачид ик сётылы, тынадъёсыз со, — султыса кузё кышноослы быдэн айшет но кышет сётӥз, Алсулы но кышет кузьмаз. Жаги но аслэсьтыз кузьымъёссэ кузьмано кариськиз.

— Тазэ анай сётыны косӥз — шуыса, Назиялы но Огрейлы дэремлы шуыса басма юдэс сётӥз, Алсулы айшет кузьмаз.

— Малы тӥ сомында кузьымъёсын лыктӥды, ку ми пунэмзэ берыктомы? — паймыса вазиськиз Огрей.

— Чик но кузьымъёс кулэ ӧй вал, асьтэос лыктӥды — соизлы тау, ми шумпотӥмы лыктэмдылы, — вазиськиз Назия апа.

Воргоронъёс эшшо коня ке вераськыса пукем беразы Дамир кышнозэ, Алсуэз, ӧтьыса кошкыны дасяськизы. Сыткуллы нимаз ик вераз:

— Кузонын али огыр-бугыр. Калык Мамукез Кузонысь улляны малпа, но со сярысь лушкемен гинэ верасько на. Мамук, аслэсьтыз ожгарчиоссэ котыраз люкаса, Кремльын возе, соосыз, шаертӥ калгыса ветлэменызы, ваньзы ик люкаськемын ӧвӧл, лэся. Соин сэрен кузёзы керӟегьяськыса, пазяськыса, пе, ветлэ. Кузонысь но палэнысь ожгарчиос солэн адямиосыныз огазеяськыны пумит луо. Сыӵе югдур Кузонын та дыре. Озьы вера Богодан кудолы. Воштӥськонъёс урод пала берытскизы ке, соку ик ивор сётомы арчаослы.

— Богодан али арча калыкез Мамукез пумитаны дасян понна бызьылэ. Та верамед солы одно ик лэсьтоно ужъёсты ӝоггес быдэсъяны юрттоз. Мон ваньзэ верало солы. Тау иворедлы,- кизэс кутыса, Дамирен Сыткул люкиськизы.

Нунал туннэ шулдыр, шундыё луыны кулэ кадь. Тӧл но ӧвӧл, инбамын пилемъёс но уг адско. Ӵукнаысен ик юртъер котырысь писпуосын ӟольгыриос, шырчикъёс ӟильырто, кырӟало. Эсьма, дыдыкъёс но укно наличникъёс сьӧрын, вылӥяз, гурккетыса уло. Ядыгарын скалъёссэс, ыжъёссэс кузёоссы гурт шорысь кыр интые (базар ортчытъян интые) улляса вайизы. Татысь пудоез кык возьмасьёс улляса возь вылэ нуизы. Гуртлэн урамъёсаз калык кин кытчы мынэ: кышноос — пулы, пиосъёс уж дуре дырто кадь. Пиналъёс гинэ уг адско на урамъёсын. Ӵукна кузёос лыктэмъёсты куноятӥзы но пичияк кузьмаськизы на.

Сыткул, валзэ кыткыса, выльысь корка пыриз. Лыктэмъёс кузёослы ӟеч кылъёс вераса, нунызылы но кузёослы тазалык сӥзьыса, тау карыса но ми доры но одно ик мынэ шуыса, доразы бертыны потӥзы. Шапши гуртэз ортчемзы бере, сюрес уродмиз, азьвыл нуналаз зор ортчем вылэм, оло, нош, уйин гинэ зорем, соин ик сюрес дэри луэм, отын но татын зор ву пуке на. Али ке шунды пыже ини, сюрес ӝоген куасьмыны кулэ. Бертӥсьёс валзэс бжыт ял карытон вылысь дугдытӥзы, асьсэос но, пукыса чутырмем пыдъёссэс небӟытон вылысь, уробоысь васькыса лёгаськыны выризы. Сюрес дурысь возь вылын горд-горд кисьмам борыез сиизы но айшетъёсазы бичазы на. Арчае ӝыт пал гинэ вуизы ини. Сыткул валзэ азбаре но ӧз пырты, капка юбо борды гинэ тэльбугоеныз дэмӟытӥз. Бертэмъёсты пумитаны Богодан азбаре потӥз.

— Кыӵе ветлӥды, — Сыткуллы кизэ сётыса, юалляськыны кутскиз. — Сюрес вылын ӧд курадӟе-а, ведь толон ӝыт юн гудыръяса, чилекъяса зориз.

— Ветлӥмы умой, умой пумитазы, куно но каризы туж зол. Сюрес ке Шапшиысен уродгес луиз но отын ӧжыт шутэтским, сюрес мед шупалоз, умойтӥськоз шуыса. Ядыгаръёс тӥледлы бадӟым салам веразы, нош лыктэмдэс, пе, возьмаломы, шуизы.

— Валдэ нош малы уд пыртӥськы? — тунсыкъяськиз Богодан.

— Ми гуртэ ик вутскомы, отын ужъёс лачак люкаськемын, дыр. Кенаклы нылпиосын берытскыны ик маза ӧвӧл, луоз, — шуиз Бичай. — Югытэн вуомы али дорамы.

Жаги, уробоысь бинетъёссэ басьтыса, кошкисьёслы «ӟеч бертэ, уд но пыриське бере» шуыса корка пыриз. Сыткул Дамирен вераськемзы сярысь Богоданлы мадиз на.

— Ох-хо-хо! — лулӟиз Богодан — Калыкез ӝутоно луоз ини. Собере корка пыратэк ик кошкоды-а ини?

— Бертомы ни югытэн. Я, ӟеч лу, ӟеч изе уйдэс, — уробоязы кыкназы ик интыяськыса, гуртазы бертыны вырӟизы.

Нош юрттӥсьёсыныз но сюрс ожгарчиослэн кивалтӥсьёсынызы — менбашъёсын кенешоно кариськиз Богодан. Лымшор азьын кенеше люкаськизы тодмо юртэ. Лыктэмъёслы Богодан вераз Дамирлэсь Сыткул пыр ивортэмзэ. Вераськыса, кенешыса пуконъязы юртэ пырон доры вал вылын егиг пи дугдӥз. Со ӝог гинэ вал вылысьтыз тэтчиз но бызьыса кадь корка пыриз. Кенешчиосты котырак учкиз но, лулзэ лэзьыны быгатытэк кадь, эльйырлы вазиськиз:

— Богодан агай, мынам тыныд ивортонэ вань, уз-а луы кыре потыса вераськеммы?

Лыктэм мурт Богоданлы тодмо ни вал азьвылгес ик, со Тулай эшезлэн пиез, Юска, ог дас вить аресъем пияш.

— Ма, татын ик вера ини. Та пукись адямиос — мынам юрттӥсьёсы, мед соос но кылозы, — шуиз Богодан.

— Марым, тӥнь со… — веранзэ кызьы кутскыны тодытэк, Юска гордэктыса ӧжыт сылӥз но огкутскемен кисьтӥз: — Туннэ ӵукна ик ми доры Ядыгарысь вузчи Ильяс агай пыриз. Со тыныд вераны косӥз: Кузонысь Мамук ожгарчиосыныз Арчае по­тоз ӵуказе улыса ӵукна ик. Ильяс агай атаен вераськиз, атай монэ соку ик татчы келяз ини.

— Тау ивор вуттэмедлы. Тон туннэ гуртад эн ни берты. Ӝыт пеймытэ кылёд. Али валдэ ми доры пырты, Жаги сое мед сюдоз, утялтоз. Ачид но сиськод, шутэтскод. Ми али ӧжыт вераськомы на, собере мон но гуртэ вуо, — озьы вераса, Богодан пияшез келяз.

Кенешизы, кызьы но мар лэсьтоно туннэ но ӵуказе. Одӥг кылэ вуизы — ӵукна тангырае жугоно, калыкез люкано. Ӵукнаысен ик Арчаысь но матысь гуртъёсысь ожгарчиосты люкаса вераськоно: учконо, тодоно, кинлэн маиз уг тырмы, маин юрттыны луоно. Кыдёкысь гуртъёсысь адямиос ӵуказе ик лыктыса уз вуэ, дыр. Соин ик соосты нимаз люкаса вераськоно луоз, соку тодомы ини кытчы интыяны.

— Ямгурчи, тыныд мар кулэ? Ваньмыз-а дась ини сюдыны ожгарчиосты? Кӧня нунал кыстйськоз жугиськонмы — соиз тодмо ӧвӧл ведь.

— Кык нуналзэ куинь сюрс муртэ сюдыны быгатомы, солэсь унозэ дасяны интыосмы ӧвӧл, куазь шуныт улэмен дасямез но сӧриськыны быгатоз. Ожмаськон кемагес кыстӥськиз ке, мыным кыткем валъёсын ог 15-20 мурт кулэ луоз гуртъёсысь сӥль, йӧл, вӧй вайылыны. Нянь пыжыны вераськемын матысь гуртъёсысь нылкышноосын.

— Тотыш, тынад кыӵе ужпумед? Луоз-а интыямед сӧсыръёсты, коня муртэ интыяны быгатод?

— Марзэ луоно — лэсьтӥмы кадь. Интыос 150 муртлы луоз. Уногес ке луизы, нимаз коркаосы интыяломы, кызь сизьым кузёен со сярысь вераськемын ини. Эмъюртын ужалозы 34 мурт эмъясьёс но 16 мурт утялскисьёс. Соос ваньзы дась али ик уж борды кутскыны.

Табере тонэ, Багай, кылзомы.

Арчаын 17 кузёос дуриськон ужен выро, соос пӧлысь одӥгез али висеменыз ужатэк дораз кылле, вал вылысьтыз усьыса, пыдзэ тӥям. Кылемъёсыз косэм уж борды соку ик басьтӥськизы. Табере дасям ожтӥрлыкъёссэс ӵуказе валэн ортчыса, лыдъяса бичаны вераськемын. Бичам бере тодо ини кӧня но мар лэсьтэмын.

Озьыен, туннэ но ӵуказе эшшо учкылэ, чаклалэ на, мар лэсьтыны, дасяны луоно та кылем дыре. Али мынэ интыосады, -келяз Богодан юрттӥсьёссэ.

Нош али ойдолэ тйледын вераськоме: кызьы но мар лэсьтомы асьмеос, — ӧтиз со менбашъёсты кенешыны.

Мынам тани мае вераме потэ,- кутскиз Исенбей, — Казан­ка вылысь Чукырчае потан выжез туннэ ик кесяса октоно. Со шайтанъёс паллян пал ярдуртӥ лыктоно луизы ке, выж вылтӥ каньылэн Арчае пырозы. Выж ке ӧз луы, ву вамен валъёсын но потыны уз дӥсьтэ, тапал ярдур меӵ но ӝужыт.

— Тэкитмы, кужмы тырмыт вань-а асьмелэн? — шугъяськыса юаз Тучеш. — Кар борддор дорозь вуизы ке, соос ведь капкаез усьтыны вырозы, борддоре но тубыны быгатозы. Соку соос вылэ ӝуась тэкит пазяны луысал, быректэм ву но мултэс уз луы сыӵе дыръя.

— Карысь ожгарчиос ог кык сюрс мында люкаськозы, сомындаен гинэ вормыны ум быгатэ ведь, нош гуртъёсысь ку али люкаськыса вуозы. Мамуклэн нош кӧня меда ожгарчиосыз люкасько — сое тодысалмы ке, туж айбат ведь луысал. Ойдо­лэ гуртъёсыз туннэ ик ӝутоме. Одӥг нуналзэ татын мар но со лэсьтыны, дасяськыны быгатысалзы, — веранзэ быдтӥз Казмач.

Кенешонзэс йылпумъяса, Богодан шуиз:

— Казанка вамен выжез тарканы кема ӧвӧл. Оло, нош, со выж асьмелы ик кулэ луоз али. Возьмаломы Мамуклэсь Кузонысь потэмзэ. Тэкитмы но кужмы вань, со тырмыны кулэ. Ву бы- рекъян пуртыосмы но дасямын. Гуртъёсысь ожгарчиосты люканы ӵуказе ӵукна ик ивор сётомы, тангыраосы жугыса. Монэ одӥгез шугъяськытэ: аран, ю-нянез утялтон бырымтэ на, соин сэрен шуге медам вуэ вылэм. Мынам малпамея, Мамуклэн ож­гарчиосыз куинь сюрслэсь ятыр уз луэ, дыр.

Та кенешон Арчакарысь кивалтӥсьёсын ортчиз гудырикошконлэн берпум нуналъёсаз. Та нуналысен Арчаын улон огыр-бугыр луыса кошкиз ини.

* * *

Мамук, Мамук… Нош кин со? Кыӵе адями? Ӧжыт ке но ой­долэ соин тодматскоме. Вордскемын но быдэ вуыэмын Сибыр ханствоын Шейбаниослэн ӵыжы-выжыязы. Томск улосвылтй пудоосынызы но эриктэм карем муртъёсынызы кечылыса ветлыкузы, котыраз люканы быгатэм вить-куать сюрс бигер ожгарчиосты, алдаса но кузьымъёсын либатыса аслыз матаз карем. Соосты таласькыны, жугиськыны, вал вылын ворттылыны дышетэм. Шаплыесь, кышкасьтэмесь ожгарчиосыныз Урал гурезьёсты выжыса вуэ Волга шур доры. Сыӵе эрказмыса ветлэмзэс тодыса, Крымысь ханзы Мамуклы ӵектэ Кузонысь ханлэсь интызэ басьтыны, юрттыны но мылкыдзэ вера. Крымысь хан, Кузонысь бигеръёслэн азьветлӥсьёсынызы, бай муртъёсынызы но вузчиосынызы вераськыса, Мухаммед Эмин ханзэс интыысьтыз улля. Ӟуч кунэн кусып тупатэмез понна. Со интые 1496-тӥ арын тулыспал толэзе Мамукез пукто. Мамук, Кузонын хан луэм бераз, аслаз ожгарчиосызлы эрик сётэ би­гер улосвылын кузёяськыны. Куартолэзе ини ожгарчиоссэ ыстэ ясак бичаны Волга шур сьӧры. Отысь со эрказмем ожгарчиосты интыысь калыкъёс улляса лэзё, кӧнязэ ке виыло но. Али Мамук ожгарчиоссэ узатэ ини арча калык вылэ. Улыса-вылыса тодмо луоз ай, быгатоз-а Мамук арча калыкез пазьгыны.

Вуиз ини куарусён толэзь. Мамуклэн Арча вылэ ожалскыны малпанэз, Кузонысь Богоданлэн кудоосыз ивортэмъя, со дыре ӧз быдэсмы. Крымысь ханлэн Кузонысь оскем муртъёсыз Ма­мукез лэзиллямтэ гужем толэзьёсы Арча улосвылэ ожмаськыны, сӥзьыл уногес ваньбур кайпалтыны быгатод шуыса. Соин ик Мамуклэн азьвыл дасяськемез юнме луэм. Нош солэн сыче ӝегатскемез удмурт калыклы ӟечен гинэ берытскиз.

Ярам соку, гуртъёсысь калыкез люканы шуыса, тангыраен ивортыны ӧз вуттэ. Арчаысь мӧйы адямиос Богоданэз алӥзы гурт калыкез ӝутонлэсь; Мамук Кузонысь потэмын ӧвӧл на, озьыен, калыкез бусы ужъёсын ӝегатыны мугез ӧвӧл али шуы­са, Арчаын улӥсьёс выльысь асьсэ ужъёсынызы кыштырак гинэ вырыны кутскизы, огыр-бугыр улон ӧжытлы ке но басылӥз. Бусыосын суслонъёс но отын-татын гинэ адско на, культоос кабанъёсы интыямын. Куазь та аре аран дыръя умой улэмен, ю-нянь октонэн ӝегатсконъёс ӧз луылэ.

Коньывуон толэзьлэн берпуметӥ нуналъёсаз нош ик Кузо­нысь ивор вуттӥзы: Мамук ожгарчиоссэ люканы быгатэм но вазь ӵукна ик Кузонысь валъёсын, пе, потозы котыр гуртъёсысь ясак бичаны. Ясак бичаса котыр гуртъёстӥ ветлоно ке, малы сомында ожгарчиос кулэ луэм; Мамуклы но, аслыз, кулэ ӧй луысал, дыр, ясак бичаса ветлыны. Озьы малпаськыса, Богодан шӧдскиз но, иворез кылэм бераз, тангырае жугыны Казмачез ыстӥз. Со нуналэ ик ӝыт тангыра куара быдэс шаере вӧлмиз. Арчаын но капкаос дорын возьмаськисьёслы косэмын вал ошем кортъёс борды жугыны.

Ӵукна Арча шорысь кыр интые калык вазь ик люкаськыны кутскиз. Татчы ик вуизы Богоданлэн юрттӥсьёсыз но менбашъёс. Эльйыр соослы уж сётйз но калык доры кыре потӥз. Люкаськемъёслы со ивортӥз Мамуклэн Арча вылэ ожмаськыны потонэз сярысь, калыкез огазе кариськыны, сак луыны ӧтиз. Эшшо вераз на, кинлэн уг луы ожмаськонэ пыриськемез, ӧвӧл луонлыкез юрттӥськыны но, сыӵе адямиос мед ог-дырлы асьсэлы инты шедьтозы Арчалэн палэназ, коть пыдло нюлэс шоры ке но мед пегӟозы. Матысь гуртъёсысь вуыны кутскизы ини ожгарчиос: валъёсын но, пыдын но. Ваньзы ик вуо ожтӥрлыкъёсын; кудъёсыз корт дӥсьёсын, корт изьыосын лыктыло. Менбашъёсыз Богодан косӥз асьсэлэсь ожгарчиоссэс люканы но радызъя султылытыны; тодоно, кӧня люкасько, дасесь-а ваньмыз ожмаськыны, кинлэн ке, оло, кулэяськонэз но вань.

Ӝыт пал тодмо луиз: 2317 мурт вал вылын ожмаськозы, соослэн бышкан бодыоссы — мечъёссы — вань, уногес сабляосыныз. Пыдын жугиськыны лыктэмъёс 978 люкаськемын, соос пукыӵъёсын, палашъёсын но мечъёсын вуэмын, пӧлазы вань кузь ныдо кык ваё саникъёсын но. Татын ик укмыс ожгарчи пыӵалъёсын. Ожгарчиослэн огъя лыдзы 3305 луиз, нош кыдёкысь гуртъёсысь калык вуэ но вуэ.

Богодан менбашъёсын вераськиз но дас ожгарчиосты вал вылын, Мамуклэсь кыӵе сюресэн лыктэмзэ тодон вылысь, Кузонпала ыстоно кариськиз. Соосын кивалтоз унбаш Ильдар, Арчаын улӥсь 32 аресъем бигер воргорон. Косэм муртъёс ӝыт ик Арчаысь потӥзы. Кошкисьёсты индылӥзы — Мамуклэн адямиосынызы пумиськизы ке, жугиськонэ пырыны уг яра, пегӟыны тыршоно но Арчае берытсконо. Кылемъёсыз ожгарчиос изьыны уг ик малпало: сабляоссэс, палашъёссэс шерыло, лэчыт каро; вал котырзэс, энеръёссэс тупатъяло; утялскон тӥрлыкъёссэс, корт дӥсьсэс, корт изьыоссэс кышъяны, выльдыны выро. Котькудйзлэи мар ке но ужез вань.

Уйшор бере Кузон пала кошкемъёс Арчае берытскизы. Соос тодӥллям Биектау гуртын улӥсьёслэсь: Мамуклэн ожгарчиосыз гуртсы дорысь кыр интые люкаськемын. Кӧня соос отын — гурт адямиос вераны шугъясько, шуизы 2000 мында вань, дыр, пе. Мамуксы соос пӧлын-а, ӧвӧл-а — созэ уг тодо, матазы кариськыны ик уг лэзё.

Сыӵе иворез кылыса, Богодан менбашъёслы вераз: «Жутэ ожгарчиостэс но, радэн-радэн султытыса, мынэ Кузон пала. Мамукез Арчае лэзёно ӧвӧл, кытын ке но нюлэс дурын, кыр интыын, пумитано». Кенешыса огкылэ вуизы — Чурайгурт сьӧры ӝоггес вутскыны тыршоно. Чурай но Ямашур гуртъёс вискытӥ сюрес ог вить иськемзэ нюлэс дуртӥ кыр интыетӥ ортче, отын ик тушмонъёсты пумитано.

Пыдын лыктэм ожгарчиосты 230 валэн уробоосы пуктылӥзы но вырӟизы Кузонэ нуись сюрес вьштӥ оло бырыны, оло вормыны. Тушмон гинэ медаз азьпалты вал чаклам интыез бась- тыны. Вал вылын мынйсьёс ӝог гинэ азьлань ворттӥзы, уробоосын калленгес мыно ини, валъёслы секытгес уго. Валэнъёслэн азьпалазы мыно Богодан, Исенбей но Тучеш; Казмач уробоосын мынӥсьёс пӧлын. Юзбашъёс бере кылемъёсты дыртыто, бере эн кыле, шуо, куддыр кесясько но «кызырак, кызырак!» — ӝоггес, ӝоггес, пе.

Ӵукна пал, шунды ӝужамлэсь азьвыл, ожгарчиос вуизы Чу­райгурт сьӧрын ог куать иськемын сылӥсь нюлэс доры. Уробо­осы пуксемъёсты но кема возьмано ӧйлась. Богодан валъёссэс юскыны косӥз, нюлэс бордысен ик кутскыса, уробоосты кык радэн сюрес вамен пуктылытӥз. Ожгарчиосты ваньзэс куиньлы люкизы. Тужгес шаплыоссэ, жугиськыны быгатӥсьёссэ уробоослы матэ, сюрес вылэгес интыязы. Соосын кивалтоз Ту­чеш. Нюлэс пушкы Ямашур палагес ватскизы Исенбайлэн ож­гарчиосыз. Татын вал вылын жугиськыны дасяськемъёс гинэ. Чурайгурт палагес, уробоос сьӧры, нюлэс дуре интыяськизы кылемъёсыз ожгарчиос, татын ик пыӵалэнъёс но. Кивалтоз со­осын Казмач. Интыяськыны вырытозязы, дыр лымшор пала вуиз, нош тушмонлэн ожгарчиосыз уг адско на. Куазь кема зорытэк улэмен, сюрес вылын котькытын ик тузон. Тушмонлэн матэктэмез нырысь ик ӝутскем тузонэн шараяськысал.

Богодан но, мукетъёсыз но шугьяськыны кутскизы: ӧз-а кошке тушмон ожгарчиос мукет сюрестӥ Арча пала, Казанка шурлэн бурпал ярдуръёстӥз. Соку вуозы-а берен Арчае тушмонлэсь азьвылгес, быгатозы-а азьпалтыны? Озьы-а, тазьы-а но, сьӧразы басьтэм сиёнэнызы лымшораськизы, ӧжыт шутэтскизы. Тӥни соку сюрес вылын чакласькисьёс, соос азьпала Ямашур пала ыстэмын вал, туж юн ворттыса, куиньназы ик уробоос доры вуизы.

— Ямашур палан пилем кадь тузон вылэ ӝутске, со тапала матэктэ, — вераз Богоданлы одӥгез чакласькись. Богодан соку ик вань ожгарчиослы дась луыны косӥз тушмонэз пумитаны, ваньмыз чаклам интыосазы луыны кулэ.

Котыр шыпыт луиз, эсьма, валъёс но шыпчизы, нюлэс дурын тылобурдоослэн одӥг-ог ӟильыртэмзы гинэ кылӥське. Куазь кӧс улэмен, сюрес вылысь ӝутскем тузон татысен но адскыны кутскиз; озьыен, тушмон матэктэ. Ӧжыт улыса, тушмонлэн азьпал ожгарчиосыз но адско ини. Удмурт ожгарчиос сак кариськизы, тушмонэз пумитаны дасяськизы.

Тани соос, тушмон бигер ожгарчиос, лыкто оло кырӟаса, оло огшоры кесяськыса — шуг валаны. Уробоосты но соос сьӧрысь адямиосты адӟыса, паймыса кадь дугдӥзы. Ваньзы ик валъёс вылын, азьпалазыгес сьӧд чилясь вал вылын пуке тузӥ горд дӥськутэн, дуно кулэсь вурем капчи изьыен кыӵе ке но бадӟым кивалтӥсьсы. Солэн бур пал урдсаз кырыж, сюрлолы укшась сабляез ошемын. Пуке но со чилясь, шундыя пиштӥсь энер вылын, вал тыбыраз понэм пужыё шобретэз ворттэмъяз лопыръяське. Тыпак валзэ дугдытӥз но вӧзаз мынӥсьёсызлы зол куараен мар ке но вераз. Соку ик ог кызь мында вал вылын пукись бигер ожгарчиос музъем вылэ тэтчыса уробоос доры бызё ини, валъёссэс эшъёссы кутыса возё. Бызьыса лыктӥсьёсты пукыӵ ньӧлъёс пумитазы. Кӧняез ке тушмон ожгарчиос усизы, кудъёсыз чутыса, я кизэс кутыса валъёссы пала бызё ини. Соос интые мукетъёсыз, вал вылысьтызы васькытэк ик, уробоос пала вортто. Уробоос доры вуыса, валъёссы тыпак дугдо, уробоос вамен тэтчыны уг быгато. Таоссэ но пукыӵ ньӧлъёс пумитало. Уробоос доры ньыль вал усемын ини, пыдъёссэс ӵыжаса, тыбыр вылазы кыллё, соосын артэ бигеръёс но усьыло, яке сӧсырмыса берлань кошко, черекъяло, кесясько.

Сюрес вылтӥ азьлань мыныны уробоос но удмурт ожгарчи­ос люкетэмен, тузӥ дӥсен дӥсяськемзы саблязэ вылэ ӝутыса паллян пала бусые кеськыса возьматӥз. Тушмон ожгарчиос, уробоосты палэнтӥ ортчыса, мышказы удмуртъёсты кельтыны малпазы, лэся. Бигеръёс ваньзы вал вылын ожмаськыны малпаллям, пыдынъёсыз чик ӧвӧл. Уробоосты палэнтӥ котыртыса, выльысь сюрес вылэ пото. Тӥни соку нюлэс дурысь аслэсьтыз ожгарчиоссэ бигеръёслэн азьпалазы поттӥз Казмач. Табере би­геръёс Казмачлэн но Тучешлэн ожгарчиоссы виекы сюризы. Таӵезэ бигеръёс ӧз возьмалэ вал. Жугиськон пуромыны кутскиз. Валъёс, адямиос, бигеръёс, удмуртъёс, огзы вылэ огзы пыро, сабляосын, палашъёсын шонаськыло, кинэ ке вӧсь карон вылысь. Ожмаськон туж зол гомаз. Адямиос, валъёс сураськизы — палэнысен уд но вала ини, кытын удмурт ожгарчиос, кы- тын тушмон бигеръёс. Погырало валъёс, вӧсь луэмлы чидатэк, уго соосты но бышкало мечъёсын, саникъёсын; пукыӵ ньӧлъёс но адямиосты гинэ уг бышко, валъёслы но йӧтыло. Усьыло вал вылысь адямиос. Бигеръёслы шӧдонтэм луиз, куке Токбулат юзбашлэн адямиосыз бигеръёслэн люкаськемазы нырысьсэ ӵош пыӵалъёсынызы ыбизы. Соку ог куать тушмонъёс чутырак вал вылысьтызы усизы, эшшо кӧняез ке валзы пограз но усьыкузы адямиоссэс улазы пачкатӥзы.

— Ӝоген ышыггес интые кариськыса, пыӵалъёстэс нош ик ыбыны дасялэ, — кеськиз Токбулат.

Сӧсырмемъёслэн кесяськемзы,унбашъёслэн но юзбашъёслэн косъяськемзы, индылэмзы — ваньмыз огазе сураськемын, онграмон куара гинэ котыр шаере вӧлске. Со куараос пӧлысь куддыр валаны луэ:

— Сурманчей, кытчы туйнаськиськод? Учкы котырдэ, виёзы.

— Тукташ, пот ожмаськонысь, — кылӥське Арасланлэн куараез. — Биня кидэ, вирдэ вияны эн лэзьы.

— Одӥгзэ ке но бышкалто на, — пумитаз вазе Тукташ.

— Габдулла, кит, кит!* — бигеръёс эшсылы вазисько.

Карагыз, шул урынга!** — киыныз кинлы ке возьматыса, кесяське вал вылын пукись бигер.

Кинлэсь ке лулзэ утчаса кадь, шуласа лобо пукыӵ ньӧлъёс; жинграк куара сёто ваче вуэм сабляос, палашъёс; урод кылъёсын кесясько жугиськисьёс. Усем валъёс берпуметӥзэ соргетыса кыско омырез но, эшшо огпол пыдынызы ӵыжиськыса, зоньтйсько. Адямиос но уноез вирен наштаськемын. Озьы но соос ваче вуыло на огзэс огзы быдтон вылысь.

Удмурт ожгарчиос лыдзыя али тушмонъёслэсь ӧжытгес вал, соин ик бигеръёс вормыны турттыса туж кужмо выризы. Куинь-ньыль пол пыӵалъёсын ыбылэм но соосыз ӧз басылаты. Тини соку нюлэс дурысь вуизы выль кужымен Исенбайлэн ожгарчиосыз. Арча пал гуртъёсысь ожгарчиос жугиськон интые часоосын весь вуыло на, соосты Богодан нюлэс дурын, уробоос палан, огазея, 150-лэсь уно выль лыктэмъёс люкаськизы ини. Соос али ик жугиськонэ пыриськыны дасесь, нош Богодан соосты кутыса возе.

* кит — кошкы.

** Карагыз, шул урынга — учке сопала.

— Тӥ али люкетоды гинэ отын, валъёсты но ӧжытак мед шутэтскозы, — шуиз со лыктэмъёслы.

Исенбей кивалтэм улсын удмурт ожгарчиос басыланы кутскем жугиськонэз выльысь пуромытӥзы. Бигеръёслэн радлыксы быриз, кивалтйсьёссылэсь но кылэм-адӟем уг каро ини. Валъёссы быремен, уноез бигеръёс пыд вылазы жугиськоно луо, нош сабляосын гинэ бере, соосты палэнысен я мечен, я саникен бышкало удмурт воргоронъёс, пукыӵъёсын но сӧсыртыло.

Дыр ӝыт пала кыстӥське ини, нош жугиськон я ӧжытак басылэ, лябӟе, я выльысь гомаса кадь пуроме. Сӧсырмемъёс, ветлыны быгатӥсьёсыз, асьсэос потыло шут интыысь, куд-огзэ эшъёссы кутыса поттыло. Нюлэс дурын, саюлын, кӧня ке мурт соос котырын бергало, вӧсь луэм интыоссэс басмаен биньыло, утялто, ву сёто.

Шунды инвис сьӧры ватскем бере, бигеръёслэн кильтро дӥсяськем адямизы, паллян пал кӧтурдэссэ кутыса, кесяськыны кутскиз:

— Китэсэз, китэсэз! Кызурак, китэсэз!

Кызьы берлогес тодмо луиз: со вылэм Мамуксы, нош кӧтурдэссэ кутыса возе вылэм, вӧсь луэмезлы чидатэк, пыӵалэн ыбылӥсьёслэн узвесь пырызы пыдло ик мугораз пырем, шӧдске. Бигеръёс жугиськонысь туж ӝог потылыса кытӥ лыктӥзы, отӥ ик кошкыны кутскизы, кулэмъёссэс но, сӧсырмемъёссэс но ӧз учкылэ ини. Ог вить сю мында удмурт ожгарчиос пегӟись бигеръёсты Ямашурозь уйиськыса келязы на, собере берытскизы.

Ож бервылын удмуртъёслы уж ӵуказеяз эшшо лымшорозьлы тырмиз на. Утялтоно луиз виылэм адямиосты, юн сӧсырмемъёслы юрттэт сётоно, пограм валъёсты вандылоно — сӥльлы яралоз ук. Лыдъям-чотам бере, тодмо луиз ини ожмаськемлэн урод палыз но ӟечез. Ӟечез — со вормон, лек тушмонэз вормон! Уродэз нош таӵе: удмуртъёс та жугиськонын 17 эшсэс ыштӥзы, сӧсырмемъёслэн лыдзы уногес — 38 мурт шуге вуэмын. Соос пӧлысь куатез юн сӧсырмемын. Бигеръёс палась 92 виемез, 41 юн сӧсырмемъёс ож бервылын ӝуштыса погыллясько на. Бигер сӧсырмемъёсты, валъёссы вылэ интыяса, Кузон пала уллязы. Нюлэс дуре бадӟым гу гудыса, кулэм бигеръ­ёсты ватӥзы, кулэм валъёсты озьы ик сюе согизы.

Табере ини вормисьёс, удмурт ожгарчиос, лулзэс каньылгес карыса, капчияк шокчыса, ӧжыт шутэтскыны малпазы. Матысь гуртъёсысь — Чурайысь, Ямашурысь, Чепчугаысь, котыр пичи гуртъёсысь кышномуртъёс, мӧйы воргоронъёс вормисьёсты ӟечкыласа куноятыны малпаллям. Ож бусые соос лыкто но лыкто: пыдын, вал вылын, уробое кыткем валъёсын тыриськыса. Сиён-юон, лянэсъёсын, бекчеосын аракы — номырзэс жаляллямтэ. Жалялод, пе, сыӵе шугадӟонлэсь мозмытӥзы ук Арча улосвылысь удмурт калыкез, оло, тапал бигеръёсты но.

Богодан Тучешлы, Казмачлы но Исенбейлы ожгарчиоссэс радэн султытыны косӥз. Менбашъёс косэмзэ соку ик ӝегатскытэк быдэстӥзы. Вормисьёс сюрес кузя султылӥзы но соос азе потыса Богодан вакчияк вераськиз.

— Гажано удмуртъёсы, туннэ асьмеос туж кышкыт тушмонэз пазьгимы. Мамук аслаз гыжкалъёсыныз малпа вылэм удмурт калыкез эриктэмаса возьыны, улосэтӥмы таласькыса, кышноосты, нылъёсты мыскыл карыса ветлыны. Табере со малпанъёссылэсь, оло, куштӥськозы ни. Туннэ тӥ возьматӥды калыкмылэсь кужымзэ, огазеяськыны быгатэмзэ. Сюлмысьтым ик тӥледыз ӟечкыласько вормонэныды но туж бадӟым тау карисько асьтэдыз жалятэк жугиськемды понна. Азьланяз но котьку ик тазьы огкылысь кариськыса нюръяськыны мед быгатомы улонмес, эрикмес утён понна. Тау тӥледлы. Нош али ойдолэ ӧжытак шутэтскоме но дорамы вырӟоме. Улонзэс вормонлы сётэм эшъёсмес сьӧрамы басьтомы но сӥлы карыса ватоме.

Вормисьёс, удмурт ожгарчиос, шунды вылӥын дыръя берытсконо каризы Арчае, отысен ини палэнысьёсыз кошкозы гуртъёсазы. Шундыӝужан пал гуртъёсысь ожаргчиосты ож бервылысен ик доразы лэзизы. Арчае кылем калык ваньмыз кадь вормисьёсты пумитаны Кузон сюрес палась капка доры люкаськиллям, уго соослы тодмо луэм ини асьсэлэнъёслэн вор- мемзы сярысь, соин ик ӝомал луэм бере но коркаосазы кошкыны уг дырто. Пӧлазы Жаги но чидатэк возьма ожгарчиослэсь вуэмзэс. Со туж шугъяськыса сылэ калык пӧлын Токтаметко понна: улэп-а со, оло нош, сӧсырмыны сюрем? Атаез сярысь но йыраз кытӥ ке юанъёс кылдо: «Ой, сюлмы-лулы, — понназ гинэ лулӟылэ, — кыкназы ик ӟечкын мед вуозы вал».

Вуизы, вуизы возьмам удмурт воргоронъёс Арчае. Нырысь ик каре капкаетӥ пыризы валъёс вылын бертӥсьёс, кӧня ке улыса, капка дорысь лэзем выж вылтӥ дыбыртыса шонерак Арча шорысь кыр интые кошкизы уробоосын бертӥсьёс. Соос сьӧры пумитасьёс но отчы ик мынӥзы. Вал вылын бертӥсьёс, валъёссэс доразы кельтыса, татчы ик люкаськизы. Пумитасьёс бертэмъёсты ӟыгыръяло, чупало, ӟечкылало вормеменызы.

Жаги но, синъёсыныз гинэ котыр учкылыса, адӟыны тырше Токтаметкоез но атайзэ. Огзэс но ӧз синйылты на. Шӧдонтэм шорысь пельпумаз йӧтскись луиз, берытскиз но — атаез. Богодан шумпотэмзэ ватытэк юаз:

— Тон но татын-а?

Жаги ачиз но валаса ӧз вутты, атаезлэн юамезлы номыр вератэк, кушпельтӥськыса юаз:

— Нош Токтаметко кытын? — куалектыса ик учкиз нылаш атаез шоры.

— Сокем эн кышкатскы, улэп Токтаметкоед, ма, тӥни со, тонэ утча, луоз. Мын ини ойдо, пумита шаплы ожгарчидэ, — мыньпотыса вераз Богодан. Жаги соку ик, калык пӧлтӥ бызьыса кадь, дыртӥз ини Токтаметко доры. Яратӥсь сюлэмъёс огазе луизы.

Чик кепыратэк, калык пӧлын ик, ӟыгырскизы но ышыг интые вамыштӥзы.

Виылэмъёс дас одӥгез Арчаысь вылэм, куатез гуртъёсысь, соосты соку ик семьяосазы келязы. Сӧсыртэмъёссэ пыртӥзы дасям эмъюртэ но Тотышлы, солэн юрттӥсьёсызлы, эмъясьёслы утялтыны, эмъяны, сюдыны оскизы йӧнатозязы. Менбашъёс но Богодан калык азьын веразы ожгарчиослэсь тушмонэн жугиськемзэс, мактазы, дунъязы, тау каризы кышкасьтэм луэмзы понна. Вераськонзэс йылпумъяса, Богодан люкаськем калыкез ӧтиз ини:

— Гажано удмурт калыке, та дыре кадь вае котьку ик валче уломе. Огазеяськыса гинэ асьмеос вормыны быгатомы улонамы кылдылэм вань шуг-секытъёсты, тушмонъёсты.

Палэнысь вуылэм ожгарчиос гуртъёсазы Арчаысь ӵукна гинэ кошкизы ини. Вормон нунал бере кык нунал ортчыса, улосвылэ соку ик вӧлдӥськиз эшшо одӥг ӟеч ивор: Мамукез кылем ожгарчиосыныз бигер калык Кузонэ пырыны ик лэзьымтэ ини, шуэм: мынэ, пе, отчы, кытысь лыктӥды. Толэзь ортчыса, кылӥськиз: Мамук кошконо луэм Идель шур кузя, собере башкиръёслэн музъем вылтӥзы. Удмуртъёсын жугиськыку сӧсырмем ожгарчиосыз, ачиз но Мамук сюрес вылын кулылӥллям. Кылемъёсыз, дор палазы мынонъязы, сиён-юон понна таласькыса ветлоно луиллям но соку уноез нош бырыны шедиллям интыосысь калыкъёсын жугиськыса. Ӵыжы-выжыоссы доры вуиллям на кӧня ке сюэз гинэ. Тӥни озьы туж шумприч вырись албасаръёс асьсэлэсь данзэс пазязы, быдтйзы мурт калыкъёслэн улосвылазы чик малпаськытэк выременызы.

Ож бервылысь бертон нуналазы Богодан Сыткулэз Казан йылаз кошкыны ӧз лэзьы, солэн ӧжытак лулзэ, сюлмаськыса улонзэ эрике лэземез потӥз. Сыткуллэн гуртаз ик ӝоггес вуэ- мез потэ вал но, кылзӥськытэк ӧйлась. Валъёссэс гидэ пыртыса, сюдыса, люктаса асьсэос корка пыризы. Жаги бертымтэ на, соин ик Богодан ачиз ик ӝӧк вылэ мар но со куртчон вуттӥз, муржолысьтыз курытсэ поттӥз но киоссэс миськыса, воргоронъёс ӝӧк сьӧры пуксизы. Богодан сюй кружкаосы аракы лэзьяз:

— Я, табере вай пичияк юомы, ӧжыт капчиятӥськомы. Ведь быдэс гужемез но, тани сӥзьыл но, весь вень йылын кадь улоно луиськиз со Мамукен сэрен.

Кружкаоссэс бушатыса, пичияк куртчизы, сиизы но нош юизы на. Кылзы воляз, лэся, кутскизы мылкыдзэс кисьтыны:

— Кышкыт вал-а ожмаськон дыръя, тон ведь нырысьсэ али сюрид сыӵе жугиськонэ?

— Ма, мон валаса но ӧй вуы, Исенбей косэмъя, нюлэскысь потыса кутскимы гинэ жугиськыны, бигеръёс берзэс но учкытэк пегӟыны кутскизы. Кышкатон вылысь сьӧразы кӧня ке ворттӥмы на. Тӥни соку палашеным одӥгезлы пельпумаз шукки ик, ведь мон вылэ ожалскон вылысь валзэ берыктэм вал ини.

— Таяз аслым но ожмаськыны ӧз кылды, возьмаськись гинэ луи кадь. Уго бере кылемъёс вить-дас ӵошен лыкто но лыкто, кыдёкысь гуртъёсын улӥсьёс озьы бер вуылӥзы. Соосты соку ик, лыктэменызы валче, ожмаськонэ уд пырты ук. Ярам ини, вормим. Инмарлы тау, ӧз кушты шуод-а, мар-а ини.

Кема вераськыса пукизы на воргоронъёс. Азьпалась быдэстоно ужъёс сярысь, улосвыл улон сярысь но, семья кусып, кутсаськон, пӧйшуран, нюлэс коран — ваньмыз со вераськонлэн мугез вал. Изьыны выдӥзы ӟардон азьын гинэ, Жагилэсь корка пыремзэ ӧз ни шӧдэ.

Пумаз вуэ ини 1496-тӥ ар. Арчаын но улосвылын улон нош аслаз радаз пырыны кутскиз кадь. Вормон понна улонзэс сётэмъёсты сӥлы карыса, Музъемлы, Инмарлы сётӥзы, одӥг нуналэ быризы бере, ӵош одӥг бадӟым гуэ ватӥзы. Ӟеч мед улозы ини сопал дуннеын.

Сӧсырмемъёс но оген-оген семьяосазы кошкыло. Та дыре эмъюртын ньылез гинэ на йӧнатске, соос но ӝоген кошкозы та акыльтэм юртысь.

Богодан Казанйылысь семьязэ Арчае вайиз. Кӧня шумпотон со Илчейлы, ведь кӧня ӧз адскылы ни со татысь эшъёсыныз, кӧня шудонъёс шудэмын сотэк. Марӟана гужем вылтӥ эшшо но воштӥськиз: бамъёсыз кӧсэктӥзы, кисыриосьш шобырскизы, йыраз уно гинэ люкасысиллям ини тӧдьы йырсиосыз, синъёсыз но мурегес пыриллям. Шораз учкыса ик шӧдске солэн лябӟемез, кыӵе ке но висёнэзлы сётскемез. Богодан но шӧдӥз ини кузпалызлэсь улон шоры мылкыдтэк учкемзэ. Ачиз Марӟана висьыса улэмез сярысь кылпум ӧз ке но поттылы, картэз сое адӟытэк ӧз улы. Одйг нуналэ кузпалызлэн лябӟемез сярысь Богодан вераськоно кариськиз Бекчурен. Пересь туно-пеллё, оло, маин ке юрттыны быгатоз-а, малпаз со. Бекчур Марӟанаез нимаз висъет сьӧры пыртыса кема гинэ соин вераськиз, вылтырзэ эскериз но кошкыкуз Богоданлы вераз:

— Кышнодэ бурмытыны луоно на, но кема солы йӧнатйськыны выроно луоз. Берло нуны вайыкуз, со кынтыны шедьтэм-а, яке кырсь марке сюрем-а нуны возён интыяз — нуныкараз. Сое бурмытон понна, коӵышборы* турынлэн выжыеныз, тыпы сулэн но эбеккук** турынэн толэзь мында чай мед юылоз нуналаз ог ньыль-вить пол. Со сяна, коӵышборы турын сяськаез парсь кӧен но скипидарен сурет лэсьтыса гогыезлэн улӥязгес понылыса возёно луоз чидатозяз, нуна­лаз кык пол — ӵукна но ӝыт изьыны выдон азяз. Нош валче иземлэсь возиське бурмытозяз.

— Нош турынъёсмы милям ӧвӧл, кытысь та дыре соосты бичалод на, уката ик сяськаоссэс? — шугьяськыса юаз Богодан.

— Эн кышка, тӥ понны мынам тырмоз дасям турынэ но, сяськаез но. Нош скипидар, парсь кӧй но тыпы сул асьтэос шедьтоды.

— Туж бадӟым тау, Бекчур агай, маин тонэ ӟеч карыны быгатомы меда ини?

*Коӵышборы — алтей лекарственный.

** Эбеккук — манжетка.

Эн сюлмаське, мыным номыр но кулэ ӧвӧл. Марӟанаед юнмаз ке, со ик луоз ӟеч каремды. Нош али ойдо мон доры, турынъёсме сёто. Туннэ ик кутске йӧнатскыны, сотэк но кема ӝегаллямды ини.

Марӟана, пересь Бекчурлэн дэмламезъя, йӧнатскыны кутскиз но кӧня ке дыр ортчыса, умойгес луэмзэ шӧдӥз. Бамъёсаз ӵыжыт пырыны кутскиз, капчиен корка пуштӥ но ветлэ ни, мылкыдыз но капчияз. Секыт ужъёслэсь сое Жагиен Богодан палэнтыны тыршыло. Тукташез но Марӟанаез нуналмысь паймытья, со уго бызьылэ, кӧня ке кылъёс но вераны выре. Мар верамзэ али нокин уг вала, анаез гинэ сюлмыныз шӧдэ пиезлэсь мар вераны выремзэ. Тӥни озьы Богоданлэн семьяен улонэз нош ик радъяське кадь.

Толсурлэн берпум нуналъёсаз ӝыт Богоданъёс доры вуизы Токтаметколэн анаез Ишсулка, атаез Кильдияр но матысь ӵыжы-выжыысьтыызы кышномурт Бакчейка. Пырыса ӟечъяськизы, Марӟана пыремъёсты пуксьыны ӧтиз.

— Ӧйтӧд, пуксьыса уломы-а, потыса кошкомы-а, — вераськонэз мытӥз Бакчейка, — ми ветыл басьтыны малпамы вал, тӥляд вань шуизы но пыроно кариським, вождэс эн вае ини пыремысьтымы.

Та кышномурт кыллы кисяыз уз пыра, котьку шедьтоз мар вераны но, меӵкытыны но.

— Ма, милям нокыӵе вузэтмы ӧвӧл кадь, кин тӥледды ми доры ыстӥз меда ини? — паймыса кадь юаз Марӟана.

— Оло, зарниен-азвесен ке но вузаны шедьтоды али. Ми дуныз понна ум сылэ ведь, кӧня куриды, сомында ик сётомы. Ченгешыса ум улэ соиз понна.

— Ӧйтӧд, ӧйтӧд. Кызьы но мар шуыны ик уг тодӥськы. Кузёеным вераськыса утчалэ ай. Со мар шуоз. Валэзлы турын сёто шуыса потӥз но пыроз, дыр, ини.

— Куноос вуиллям, — шуиз Богодан, корка пырыса. Лыктэмъёсын ӟечъяськиз но юаз: — Мар муген вуиды меда ини таӵе бер ӝытэ?

— Тӥледын родняяськыны малпаса вуимы вал, мар шуоды, кыӵе кыл вералоды меда? — шонерак кылпум поттӥз ини Ток­таметколэн атаез, Кильдияр.

— Кызьы нош родняяськомы ай, кудпал пумтӥз кутскыса? — выжыятэ Богодан, пукон вылэ пуксьыса.

— Ма, тӥляд нылды, милям пимы ог-огзэс шедьтӥллям кадь ини, со ласянь ик уз луы меда валче улэммы, — итӥськиз вераськонэ Ишсулка, егит пилэн анаез.

— Созэ нылмы ачиз мед тодоз, кызьы мар шуоз ачиз — ми соя кариськомы, дыр, — нуйтӥз вераськонзэ Богодан. Со кылъёс бере Марӟана нылзэ кышнопалась гур сьӧрысь ӧтьыса юаз:

— Нылы, лык ай тапала. Тани тонэ юаны лыктӥллям. Кыӵе кылдэ вералод, бызёд-а, уд-а Токтаметколы?

— Кызьы атаен-анай шуозы, озьы ик луоз, вылды, — каллен гинэ вераз Жаги, йырзэ но ӝутытэк, возьдаськеменыз, собере выльысь висъет сьӧры ышиз.

— Озьыен, ӟеч кылдэс вералэ ни, нылды ведь уг пумитъяськы кадь, — кыске аслэсьтыз Бакчейка.

— Вазьгес кадь али солы бызьыны. Юрт котырын но кин со­бере бергалоз. Марӟана али гинэ умой-умой пыд вылаз султыны выре. Аслам ке — весь бызьылоно луэ кузонъёслы выт тыронэн-бичанэн, — пумитъяськыны выре Богодан.

— Ойдо, али юрт котырын сокем ужъёс уно ӧвӧл; пудо интыямын, вандоноез вандэмын, мар со сярысь шугъяськод на, — итӥське нош ик Кильдияр. — Собере ог-огмылы кыдёкын ведь ум улӥське, ми но кулэ дыръяз юрттӥськыны вуомы.

— Марӟана, тон мар вералод? — кышноезлэсь юаз Богодан.

— Мар вералод на — нылэз гозыен думыса дорын уд возьы. Асьме бордысь гинэ потымтэ со сям-йылол. Кельшо ке огзы-огзылы, мед-а, мар-а ини.

Тау ӟеч кылдэс верамдылы, со кылъёстэс мед кыломы шуыса ик лыктэммы вал. Я, табере, Кильдияр, поттылы ай песьтэрысьтыд маиз отын вань, пукты ӝӧк вылэ, — косъяське ниБакчейка. Пыжиськемъёс, сукыриен нянь но аракы песьтэрысь ӝӧк вылэ вуизы. Кузёос но бере ӧз кыле: вӧй, нянь, сӥль, сылалтэм губи, нюрмульы, мукет сиён-юон люкаськиз ӝӧк вылэ. Кузёос лыктэмъёсты ӝӧк сьӧры ӧтизы, кылзы тупамен, пичияк юоно кариськизы. Сюмыкъёссэс кутэмзылэсь азьвыл Кильдияр вӧй вылэ азвесь коньдон понӥз, кылзы тунам понна, пе. Соку Марӟана сюмыкысьтыз веръям кариз но, шуак кариськыса, лыктэмъёслы вераз:

— Ужпум тазьы берытскем бере, асьме понна гинэ пуконо ӧвӧл, дыр. Тӧро но кулэ луоз ук, мон али ик вуо, тӥ эн дыртэ ойдо, — дӥсяськыса ӝогак кошкиз. Кема ик ӧз улы, вуттӥз кузпалъёсты, кудъёсыныз Богоданлэн семьяез Арчае лыктэмзы дырысен ик ӟеч кусып тупатӥзы, котьку ик секыт ужъёсты но валче быдэсъяло. Соос тани, Зайнул но солэн кышноез Бисулка, тӧроос луизы бызёно ныл палась. Ӝӧк сьӧры пуксизы миндэръёс вылэ.

Эшшо кӧня ке пукыса, пи палась лыктэмъёс кылпум поттйзы сюан ортчытон нуналъёс сярысь, кӧня калык ӧтемын луоз сюанэ, кӧня йырдун сётоно луоз. Ваньмыз сярысь тупен-тупен вераськыса, уйшорлэсь азьвыл доразы вутсконо шуыса, кошкыны ӝутскизы. Марӟана кошкисьёслы кышетъёс но ӵушкон кузьмаса выль туклячиоссэ, кудозэ капка сьӧрозь ик келяса потӥз.

Толэзьлэсь кема дырзы ортчиз, сюанлы дасяськыса. Жаги пукиз вуриськыса, пужъятскыса, Богоданэн Марӟана потазы Арчаысь вузкарисьёслэн лавкаосазы, ветлӥзы Казанйылэ сюа­нэ ӧтчаны. Собере Богодан огназ ик ветлӥз Ядыгаре кудоос- сэ, эмеспизэ Огреен, Дамирез Алсуэныз ӧтиз сюанэ. Соку ик Ильяслы пыӵалъёс, палашъёс но сабляос понна азвесен но зарниен дунъёссэ берыктӥз. Дамир сюанэ уг мыны шуиз, ужъёсы, пе, уно. Кылемъёсыз соглаш луизы сюанын шулдыръяськыны. Бертыкуз Богодан пыраз на Ямашуре, ӧтиз сюанэ эшсэ, Тулаез. Соиз но мыноно кариськиз.

Кызьы вераськемын вал — сюан ортчиз тулыспалэ, нырысетӥ нуналъёсаз. Шулдыръяськон куинь нунал кыстӥськиз. Нырысь сиизы-юизы Богоданлэн ӵыжы-выжыосыз, ӧтемъёсыз дорын; кыкетӥ нуналаз ӝыт пал Богодан доры люкаськемъёс мынӥзы ини кунояськыны Кильдияр кудозы доры. Татын но шулдыръ­яськон кемалы кыстӥськиз. Ӵукна но гуртэ поттазы на. Коркась корка пыраса, кырӟаса-вераса, маскаръяськыса ветлӥзы.

* *

Мар шуод ини — улон мынэ азьлань, нунал бӧрсьы мукет нунал вуэ, вае выль ужъёс, сюлмаськонъёс, кинэн ке но пумиськонъёс. Богоданлэн но каньылак кариськыса улэмез нокызьы уг луы. Бигер кунлы удмуртъёслэн тэрытӥськыса улэмзы — эльйырлэн нуналмысь сюлмаськонэз, малпаськонэз, йырвисёнэз. Мозмытскы вал бигеръёслы тэрытскемысь — кужым уг тырмы, калыкмы ӧжыт, собере жугиськыны, чурыт кыл вылын сылыны дышемын но ӧвӧл.

Аръёс ортчо, кошко, улон но интыяз уг сылы. Тани Кузонын но Мамукез уллямзы дырысен эксэйёссы одӥгез вонштэ мукетсэ. 1497-1502-тӥ аръёсы ханзы вал Абдуллатиф, сое 1502-тӥ арын воштӥз Магомет Амин. Таиз ханзы удмуртъёсты туж ик сӥлы ӧз карылы, тыршиз Удмурт калыклэсь уногес выт басьтыны, ляльчи интыын возьыны. Бигер калыкен ӵошатыса, удмуртъёс котьку ик уногес тыриськылӥзы. Арчаысь вузкарисьёс но бигеръёслы тэрытсконо луизы. Арча улосысь калык люкаськылыса одӥг пол гинэ ӧз ветлы Кузонэ, нош отын ожгарчиоссы котьку ик уногес луо, соин ик удмурт ожгарчиослы пайда басьтытэк чигнано луылэ.

Одӥгаз гужеме, турын дасян вакытэ, Богодан туж юн висьыны кутскиз. Пӧсям вылаз кезьыт сюкась юэм но кабан сюрыны тӧл йылэ тубем. Табере корка пушкын но мырдэм гинэ лёгаське, йырыз пилиськоно кадь висе, мугорыз ӟырдамын, сиён но уг мыны, ву вылын вить ну нал кылле ини. Марӟана мар карыны уг тоды. Турынэн чай, эмезен сутэрен — пайдаез ӧвӧл. Бекчур ке луысал, быгатысал, дыр, йӧнатыны, нош со валлян аре улонысь кошкиз. Кин доры мыноно, кинлы вазиськоно? Воргорон нош нуналмысь лябӟе но лябӟе, куддыр уйбыртылыса улэ, йырсазьыз но сураськылэ ини. Арчаысь туно-пеллёос киоссэс гинэ вайяло, ум, пе, тодӥське мар карыны.

Оз, ӧз ни быгаты Марзана картэзлы юрттыны. Куатьтон сизьым аресаз мыныку, Богодан улонэн люиськиз. Соку Айтколы, бадӟым пизылы, 25 арес тырмемын вал, Кибичколы — 19. нош Тукташлы — 17. Байбичка, пичиез нылзы, кык ар талэсь азьло бызиз Чукырча пилы, ныл нунызы вань ини. Огрейзылэн кык пиосыз но кык нылъёсыз вань, ваньзы ик бадӟымесь. Озьы Арчаысь калык 1513-тӥ арын люкиськиз удмурт батыреныз, Богоданэн. Арча улосвылысь удмурт калык буре вайылыса, мадьылӥз нылпиоссылы Богоданлэн ӟеч ужъёсыз, тушмонъёсын кышкатэк жугиськемез сярысь.

Дыр ортчемъя, Арчаын но эльйыръёс, соослэн юрттӥсьёссы, юнбашъёс, юзбашъёс вошъяськылӥзы, нош соос азьын калыклэн куронъёсыз вошъяськытэк ик уло кадь. Со — бигеръёсэн зӥбет улысьтызы потон, эрико улон лэсьтон но выт тыронъёслэсь мозмытскон. Удмурт вузчиослэн гинэ но ас малпамзыя вузаськемзы, ваньбуренызы вошъяськемзы уг луы. Соослы сюрес пытсамын Идель шур сьӧры потаны, котькуд вамышсэс эскерыса кадь возё бигер вузчиос, мурзаос, ожгарчиоссы. Вылаз ик, туж уно бигер, бай муртъёс вуыло удмурт гуртъёсы о пӧйшурасьёслэсь туж устоесь, дуноесь пӧйшур куоссэс алдаса но, кышкатъяса но дунтэм дунын басьяло. Озьы ик бигеръёс пыр гинэ, быдэс Арча улосвылысь дунтэм дунын кошке чечы, ю-тысь, етӥн но пыш мертчан, дурисьёслэн лэсьтэм тӥрлыкъёссы но мукет вузъёс.

Сыӵе секыт югдурысь потон понна, удмуртъёс бигеръёсын родняськыны, бигер сямен вӧсяськыны кутскылӥзы. Аръёс ортчемъя, сыӵе удмуртъёс асьсэды «бигере пырим, бигер луим» шуылӥзы ини. Валась, визьмо адямиос туж сюлмаськыса улӥзы, ма но со лэсьтыны но выризы, удмурт калык мукет калыкъёс пӧлы сылмыса медаз быры шуыса. Уно гинэ вераськонъёс ортчылизы гурт кенешъёсын, юзбашъёс-сотникъёс но бигеръёс пала ӧз дурбасьтылэ. Озьы ке но со ужрадъёс тырмыт ӧй вал удмуртьёсты юн огазеян понна. Угось Арча улосвылын ӧз кылдэ огъя кивалтэт ёзъёс; кенешчиос асьсэ гуртсы понна гинэ сюлмаськылӥзы, сотникъёс ожмаськон потылыку гинэ кыл кутылӥзы, эльйыр но солэн юрттӥсьёсыз палэнысь гуртъёсы ӧз ик вуылэ. Соин ик котькуд гурт ас катъёсызъя улӥз но ассэ ачиз утьыны тыршылӥз.

Ангелина Снигирева
By Ангелина Снигирева 22 ноября, 2019 15:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<