Удмуртилэн кунлыкезлы 100 ар тырмон арез усьтон ортчиз Глазовын

Ангелина Снигирева
By Ангелина Снигирева Ноябрь 5, 2019 17:17

Шаермылэн уйпал шоркараз — Глазовын — Удмуртилэн кунлык басьтэмез дырысен 100 ар тырмонэзлы сӥзем ар усьтэмын вал. Та бадӟым лыдпусэз асьмеос вуоно арын пусъём. Сиё-дано арлы кутскон сётыса, Глазовын яркыт тылъёсын, номеръёсын, эктонъёсын, кырӟанъёсын «Удмуртия огазея» шоу ортчиз.

Ужрадэз усьтон
Туспуктэм: udmurt.ru

Глазкар ужрадэз ортчытонлы юнме шорысь быръемын ӧй вал. Ӵапак та город Удмуртилэн нырысетӥ шоркарез нимамын вал, татын кутскизы шаермылэн выль историысьтыз нырысетӥ вамышъёс.

Фойеын ужазы горд сюйлэсь лэсьтӥськонъя мастер-класс, киужъёсын вуз карон, калык азе нырысьсэ поттэмын вал Удмуртилэн 100 аресъем историезлы сӥзем документъёсын но туспуктэмъёсын адӟытон. Сое дасязы Удмуртиысь архивъёсъя служба. Адӟытон ар ӵоже шаерысьтымы вань ёросъёсы вуылоз.

Йӧ дворецын одӥг буш инты но ӧй вал — вань ёросъёс асьсэлэсь делегациоссэс ваизы. 100 ар, быдэс дуннелэсь историзэ лыдэ басьтыса, со одӥг шапык гинэ, но со вакыт куспын кыӵе воштӥськиз улон, кыӵе азинскиз кунмы, шаермы. Та сярысь ик возьматӥзы ужрадын но, веразы калыкмы бордын узырлыкмы шуыса. Автономиез кылдытон понна кӧня кужымзэс сётӥзы Иосиф Наговицын, Трокай Борисов, Кузебай Герд югдытӥсьёсмы. Ӵапак соосты данъяса ужрадэз усьтӥз Удмуртилэн Тӧроез Александр Бречалов но. Со пусъемъя, 99 ар ӵоже Удмурт элькун трос пӧртэм удысъёсъя — наукаын, культураын, спортын, промышленностьын, гурт удысын — вормонъёс басьтӥз. Та ваньмыз ӧй луысал тыршись адямиостэк. Удмурт шаерын уло, ужало данъяськымон калык — дуннеысь кужмоез куасчи Галина Кулакова, «Пихтовка» чорыг вордонъя хозяйстволэн кивалтӥсез Георгий Крылов, Кун Кенешлэн азьвыл кивалтӥсез Валентин Тубылов, генерал-полковник Сергей Маев кадь адямиос. Ӵапак шаерысьтымы данъяськымон адямиос сярысь Богдан Анфиногенов егит кылбурчи, кырӟась «Мон данъяськисько!» кырӟанзэ быдэстӥз.

Возьматэмын вал яркыт тылъёсын шоу
Туспуктэм: udmurt.ru

Удмуртия Россилэн оглюкетэз, но соос ог-огзытэк ӧй азинскысалзы. Кунмес кужмо карон понна кӧня кужымзэс сётӥзы асьме адямиос: Воткинскысь заводъёс Наполеонэн ожмаськонлы тӥрлык поттӥзы, Ижысь радиозавод инсьӧрез эскеронэз азинтӥз, Быдӟым ожмаськонэ кӧня ожгар тӥрлык вуттэмын, кӧня калыклы кулэ луись продукция али потто асьме военной заводъёс. Но со вакытэ ик уг яра вунэтыны, кӧня азьпалан лэсьтоноез на! Угось та яркыт праздник уз вошты адямилэсь туннэ нуналлы кулэяськонъёссэ — ӟеч медицинаез, ӟеч сюресъёсты, умой уждунэз. Элькунмес ӟеч пала воштон но азинтон калыклэн но кивалтӥсьёслэн огкылысь тыршемзы бордысь потэ, шуиз Тӧро. Кыӵе сюрестӥ мыноз шаермы, кызьы воштӥськоз матысь дыре, та юанъёслы валэктон утчаса, 10 арлы — 2030-тӥ арозь — план лэсьтэмын луоз. Соин кивалтӥсьёс калыкез тодматозы вуоно арын — 4-тӥ ноябре Удмуртилэн кунлыкезлы 100 ар тырмон аре.

УД

Ангелина Снигирева
By Ангелина Снигирева Ноябрь 5, 2019 17:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<