Трактор дыбыртэ — гур вордӥське

Ангелина Снигирева
By Ангелина Снигирева Ноябрь 21, 2019 14:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кез ёросысь Стеньгуртын улӥсь Сергей Ефремовлэсь вань улонзэ берыктӥз «Элькуновидение». 20 ар ӵоже фермер луыса ужам воргорон гурт удыссэ воштӥз — культура юртэн кивалтыны кутскиз.

С. Ефремов
Фото: Е. Скворцова

Ог 30 ар талэсь азьло Сергей Ефремовлы верасалзы ке, сое радио пыр быдэс республика кылоз, телеэкран пыр быдэс шаер адӟоз шуыса — со шунды кадь пальпотысал но киыныз гинэ шонтысал, дыр. Соку уго малпанъёсыз мукетэсь вал — инженер-механик луоно (гурт удысъя академиын дышетскиз соку), ужаны кутсконо.

Но 2 курс дышетскыса, егит муртлэн аналскон мылкыдыз вормиз. Соин таӵе «шонаськисьлы» одӥг сюрес вал — армия. Служба бере Сергей гуртаз бертӥз, кышно вайиз, колхозын тракторен ужаны кутскиз, бригадир но вал. Но гуртысь хозяйство пумен лябӟыны ӧдъяз. С. Ефремов, ӟечгес улон утчаса, городэ но кошкылӥз. Зэм, татын кема ик ӧз чида — гурт улон берен кыскиз. Озьы 1998-тӥ арын егит воргорон Стеньгуртын аслэсьтыз фермер хозяйствозэ усьтӥз. Малпаз: гуртын уд узырмы, озьы ке но ужась мурт куанер уз улы.

Озьы ик огсыр радъяськиз улонэз. Ӝоген семьяез но йылӥз: ??? кышноеныз ӵош 3 пинал вордӥзы. Нош уж гуртын — быронтэм. Ефремовъёс трос пудо вордӥзы, трактор руль сьӧрын — ачиз ик Сергей. Фермерлэн ужез шутэтскыны маза уг сёты. Гырон-кузён, бусы утялтон сяна, тодоно выльдӥськись законъёсты, ортчоно лачак эскеронъёсты, кусып тупатоно кивалтӥсьёсын. Эшшо куазь ужаны люкетэ на… Вань та могӟетъёсты Сергейлы вормыны юрттылӥз кырӟан.

— Трактор руль сьӧрын дыгыр-дыгыр тэтчаса ветлӥськод. Мар карод лумбыт кабинаын — мон весь кырӟаса ветлӥсько вал, — вера Сергей Ефремов.

Нош Стеньгуртын улон мӧзмыт кырӟанын кадь луыса кошкиз. Куашказ колхоз, быриз ферма, ӧз ни кизиське лудъёс. Уж ӧвӧлэн гуртысь кошкыны ӝуткаськизы егитъёс. Нырысь ворсаськиз нылпи сад, собере — школа. Кин ке Кезэ ужаны ветлӥз, мукетъёсыз но озьы ик палэнысь уж утчазы. Сергей Ефремов сяна, гуртысь эшшо 2 воргорон — атаен пиен — фермер луыса ужазы.

2017-тӥ арын Стеньгуртысь фермер «Элькуновидение» конкурсэ вуиз «Сяська ныл» кырӟанэн. Соку сцена вылэ потамме валаса но ӧй вуы, шуэ Сергей. Озьы ке но соку со финалэ шедиз, 10 устоосыз кырӟасьёс пӧлы пыриз.

Таӵе бурдъяськем мылкыдын Ефремов куриськиз 2018-тӥ арын ортчем «Элькуновидение» но.

— «Вуюись вылын» кырӟанэ кылдэмын ог 10 ар талэсь азьло. Мынам ваньмыз кема кисьма, — нош ик пальпотыса вера кырӟась. — Малпасько вал бырем деревня сярысь гожтыны. Со интыын кылемын на топольёс но льӧмпуос гинэ. Таӵе мӧзмон бордысь кыӵе ке гур нёжъяны кутски. Собере та гуръя кылдэм кылъёсты ог 10 пол вошъяй, дыр. Кылем арын сцена вылын лирика мылкыдын, дыртытэк кырӟай. Собере тодмо крезьгурчилы, аранжировка лэсьтӥсьлы Анатолий Эркишевлы возьматӥ. Со шорам паймыса вазиз: «Ну, малы тон таӵе шулдыр кырӟанэз тазьы быдтӥськод? Динамикаез уг тырмы, ляб». Ӧйтӧд, пӧй. «Кылзы, тазьы умойгес луоз», — шудыса сётӥз А. Эркишев. Мон кылзӥ, нунал-кык гуньдыса кадь ветлӥ. Собере аслым но тазьы золгес яраз. Эшшо огпол кылъёссэ вошъяй на. Табере «Вуюись вылын» кырӟанэ ӵемысь чузъяське «Мынам Удмуртие» радиоын.

«Элькуновидение» бере Сергейлэн улонэз мукет пала берытскиз. Сое гуртысьтызы культурая юртэн кивалтыны ӧтизы. Татын ужасез пенсиын вал ни, шутэтскемез потӥз. Собере гуртысь клубын ужаны вожмаськисьёс ӧвӧл. Озьы С. Ефремов фермер луиз культураез ӝутӥсь. Ужаны кутскыса, валаз: тодон-валанэз уг окмы. Озьы 47 аресаз дышетскыны пыриз Ижысь культурая колледжысь режиссёръёсты дасясь отделение.

— Табере мон 3-тӥ курсысь студент. Дышетскон туж яра. Милемлы валэкто, кызьы сценарий гожтоно, малы Интернетысь гинэ лушкаськыса улоно ӧвӧл. Басьтӥ синтезатор, дышетскисько али, гуртын кырӟанъёсме шудӥсько. Туж потэ вуоно кырӟанъёсме нотаосын гожтэме, — шуэ Сергей Ефремов.

Алёна Ионина

Ангелина Снигирева
By Ангелина Снигирева Ноябрь 21, 2019 14:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<