Тодмо борддоръёс оскон сёто

Ангелина Снигирева
By Ангелина Снигирева Ноябрь 28, 2019 13:32

Туэ гурт школаын ужамзы понна огпол сётӥськись выплата басьтӥзы ёросъёсысь 377 пинал дышетӥсьёс. Таӵе юрттэтлы республикалэн бюджетысьтыз 22 миллион манет висъямын.

Грак школаысь выпускникъёс ужаны берытскизы ас школаязы
Туспуктӥз Е. Скворцова

Грак черкогуртысь школае вуэм егит педагогъёс но вуоно арын быгатозы таӵе коньдонлы вазиськыны. 1-тӥ арзэ ужамзы бере соослы тыриськоз 40 сюрс манет, 2-тӥ ар бере — 60 сюрс манет, 3-тӥ ар бӧрсьы — 80 сюрс манет. Вераны кулэ: туэ райцентрысь школае 4 егитъёс вуизы. Ваньзы ик — татын дышетскем но будэм муртъёс.

Гузель Фасахова, Удмурт кун университетэз йылпумъяса, математикаен дышетӥсь луиз. Школае мынон пумысен анаезлэсь ӵектонзэ санэ басьтӥз: дышетӥсьёс, пе, нуназеозь гинэ ужало кадь, уждунзы но умой. Конечно, ӝыны нунал гинэ ужаны уг кылды. Тани Гузель Борисовналы арняяз 27 час сётӥзы ни — со 1,5 ставка тыр люкаське. Но егит педагоглы нырысь ик ужез кельше.

— Мон кышкасагес лыктӥ вал. Малпай, аслам дышетӥсьёсы азьын возьытэ медам усьы. Нош коллективын милемыз туж шуныт пумитазы. Котьку юрттыны дасесь. Нылпиос но кылзӥсько. Уждун пумысен но ум бӧрдӥське, нырысь 3 арзэ ужаку, толэзьлы быдэ ставкалэсь 50 процентсэ ватсало на вылэм. Туж шумпотӥ талы, уг тодӥськы вал. Ар пумын эшшо подъёмнойлы вазиськыны луоз на , — вера Гузель Фасахова.

Анастасия Лещева нимысьтыз дышетскиз ляб нылпиосын ужаны. Со педагог-дефектолог, йылпумъяз Глазовысь педагогикая институтэз. Быръем удысэз сюлмызъя тупа шуыса, Анастасия Дмитриевна валаз, практика ортчылыкуз. Соос радъяськылӥзы Ижысь но Глазовысь коррекционной школаосын. Соин дышетсконзэ йылпумъян азьын дышетскем школаяз куриськиз. Нырысь инты ӧй вал — соин 1 арзэ возьмано луиз.

— Мыным оскизы 1-тӥ но 4-тӥ классысь пиналъёсты. Соос 8 кузя: 5-ез ветлэ школае, 3-зэ доразы дышетоно луэ. Котькудзэс нимаз адӟыны кулэ, тодон-валан басьтыны котькудзылэн пӧртэм луонлыкъёссы, — мылкыдзэ вера Анастасия Лещева.

Покчи классъёсты дышетыны озьы ик бертӥз Ольга Прохорова но. Ольга Сергеевна азинтӥз анаезлэсь сюресэ. Мумиз Надежда Юрьевна дышетон удысын 24 ар ужа ни. Ольга Сергеевна шуэ:

— Практика ортчылӥ Глазовысь но Алнашысь школаосын. Гракын инты ӧвӧлэн Вавожысь огаз школае мыныны дасяськи ни вал. Собере веразы: 1-тӥ классэ эшшо пиналъёс люкаськом. Озьы мыным луонлык шедиз аслам будэм школаям берытскыны. Тани 17 пиналъёсты сётӥзы. Соос ваньзы матысь гуртъёсысь ветло. Туж тыршо урокын но ужаны, сюлмасько дорысь ужзэс но быдэсъяны.

Нылъёсын ӵош райцентрысь школае вуиз егит физрук но — Роман Кирчанов. Со йылпумъяз Удмурт кун университетэз, пумтэм яратэ капчи атлетикаез. Таӵе мылкыдзэ пиналъёслы пыӵатыны шуыса, вордскем черкогуртаз бертӥз. Ижысь спортъя школаосын, фитнес клубъёсын ужан сярысь ӧз но малпаськылы.

— Улӥсько анай-атаеным ӵош. Школаын урокъёс ортчытэм сяна, ӧтизы на нылпи спортшколаын тренировкаос нуыны. Озьы ке но эшшо трос буш дыры кыле на — кытчы карыны ӧй на вала, — пальпотэ егит тренер.

Роман Игоревичлэн мукет сюлмаськонэз но вань: бадӟым классъёсысь куд-ог дышетскисьёс, пе, «тон» шуыны выро. Тыршоно на соослы дышетӥсез гажан мылкыд пыӵатон бордын.

Райцентрысь школаязы бертэм егитъёс огымысь кадь верало: Гракын ужаны туж ӟеч луонлыкъёс кылдытэмын. Гракын кадь тупатъям-выльдэм школа городын но ӵем уг пумиськы. Вылаз ик, дор палан улон интылы но шугъяськон уг кылды. Тодмо борддоръёс но ужаны юртто вылэм.

Елена Скворцова

Ангелина Снигирева
By Ангелина Снигирева Ноябрь 28, 2019 13:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<