Сюлэмез небӟытэ яратон

Ангелина Снигирева
By Ангелина Снигирева Ноябрь 22, 2019 14:36

Анайлэн нуналэз но Удмурт кыллэн нуналэз азьын тодматӥськомы синмаськымон удмурт нылкышноен Наталия РОМАНОВАЕН. Со удмурт кылын блогъёсты нуэ, туэ вормисе потӥз социальной сетьёс пыр ортчем «Инстачеберай» марафонын. Роман кузпалэныз будэто 3 нылъёссэс. Соослы чылк-чылк удмурт нимъёс сётӥзы — Италмас, Айно но Инву. Романовъёс удмурт кылын верасько, мылысь-кыдысь пырисько удмурт ужрадъёсы. Кыӵе малпанъёсын, сюлмаськонъёсын улэ-вылэ туала удмурт анай? Кыӵе учконъёсыз удмурт кылмес азинтон-утён шоры?

Романовъёс
Туспуктӥз М. Егоров

Анай сюлэм

— Нырысетӥ нылмес Италмас нимаммы бере ваньзы кушетскизы: малы сокем йӧспӧртэм ним сётӥды? Нылдылы, пе, секыт луоз калыклэсь пӧртэм нимызлы дышыны! Нош мыным номыр сыӵе-таӵеез ӧвӧл кадь. Ачим но, кузпалы но удмурт бере, кыӵе-о ним сётод на солы? Ӟуч, фин, англи шат?

Но, зэмзэ верано ке, удмурт ним сётыны малпанэз нырысь ик кылдӥз Ромалэн. Ныл возьмаськомы шуыса тодэмез бере мылкыдыз кӧня ке куашказ кадь. Пи возьма вал. Но ӝытазеозь буйгам, лэся. Уж дурысьтыз вуиз но шуэ: нылъёс, пе, атайзэс золгес ярато, Италмас но монэ вань сюлмыныз яратоз. Мон пайми, кытысь-марысь, кыӵе Италмас? Озьы, пе, нималом нылмес. Паймемме адӟыса, пус чӧлтыны ӵектӥз. Бумага вылэ пӧртэм нимъёс гожъямы, соосты сурамы, синъёсме кыньыса, одӥгзэ кыски. Учкисько но — Италмас!

Табере Италмасмылы 8 арес тырмиз ни. Ижысь одӥгаз школае мыныса, ӟуч сяменгес вераськыны кутскиз вал ни. Но берло дыре шӧдӥсько: удмурт кылын, удмурт выжыосыныз тунсыкъяськонэз выльысь улӟиз. Нимы удмурт ук, кызьы сое тодытэк, пе. Шуэ, кыӵе умой, мынам кадь нимыз нокинлэн но ӧвӧл ни! Алигес солы шуисько: «Удмурт дунне» газетын ужасьёс вуоно арлы календарьзэс дасяло, отчы семьямылэсь туспуктэмзэ пуктыны ӵекто. Пумитам удмурт сямен ик шуэ: «Мама, ойдо ветлом. Мон сыӵе данъяськисько!»

Кыкетӥ нылмы вордскон азьын тодӥськомы вал ни — таизлы огшоры ӟуч ним уз тупа ни. Бадӟымез Италмас бере, кыкетӥзэ Оля яке Люба уд нима ни ук. Таизлы Айно ним сётӥмы.

Нимзылы сяна, ваньзы паймо вордӥськем нуналзылы но: Италмас но Айно вискын кӧня ке ар, нош вордскемын соос кыкназы но 1-тӥ мартэ…

— Куинетӥ нылдылэн нимыз эшшо но аспӧртэмлыко — Инву. Тазэ кин бырйиз?

— Сое ваён азям удмурт мифологилы сӥзем книга лыдӟи. Син улам шедиз «инву» кыл. Ромалы шуисько: кылзы ай, кыӵе чебер чузъяське: инву — инмысь васькись ву. Солы но туж кельшиз. Ойдо, пе, куинетӥезлы таӵе ним сётом. Бӧрысь тодӥмы ни: вашкала удмуртъёслэн мифологиязы, пе, Инву — бусьтыр емыш сётӥсь инмар. Инмысь ву ваське музъем вылэ, ваньзэ коттэ-сюдэ, уд ӝужа, емыш кисьма…

Айно но Италмас нылъёсынызы

Инвулы тани-тани тырмоз одӥг но ӝыны арес. Капчиен ӧз сётскы со милемлы. Шокасьтэм вордскиз. Эмъясьёс нылы котырын омыр сётӥсь маскаосын-аппаратъёсын бызьылыны кутскизы. Собере, мыным адӟытытэк ик, кытчы ке нуыса кошкизы. Сьӧразы бызьыса мын вылэм, нош султыны ӟигары ӧвӧл. Эмъясь сузэръёсты ёртӥсько: улэп-а нылы? Врач, пе, ачиз вералоз. 6 час ӵоже нылы сярысь номыр тодытэк улӥ. Со часъёс мон понна уно аръёс мында кыстӥськизы. Пурысьтай соку. Собере гинэ веразы: нылдэс, пе, адӟыны быгатӥськоды реанимациысь. Только тӥледыз отчы уз лэзе: укно пыр гинэ учкоды. Нош мынам сое гадь бордам ӝиптэме, кикыоссэ-чимыоссэ кутылэме, чупаме потэ. Нош со, пичи-мусо комок, кылле кювез пушкын, вырӟылытэк, ымаз трубкаосын. Инмар ӧз кушты: кыкнамы но доре бертӥмы. Мае но уг чида анай сюлэм! Улонлэсь номыр уг куриськы, пиналъёсы гинэ таза, шудо мед луозы. Соослэн ваньмыз умой ке, мон но шудо!

Асьмеос тодмоесь?

— Рома кузпалыд Ижысь техникая кун университетын дышетскемын, нош тон — Удмурт кун университетын. Дышетскон интыосты но, удысъёсты но пӧртэмесь — кытын, ку тодматскиды?

— Тодматӥз милемыз удмуртлык, тазьы шуыны луоз. Рома вордскемын Алнаш ёросын Казакгуртын. Ижысь техникая университетын дышетскыкуз, котыраз ӟуч студентъёс гинэ вылӥллям. Нош солы уг тырмы вылэм удмурт кылын вераськон, туж мӧзмем удмурт эшъёсызлэсь. Нош ми дорын, Удмурт кун университетын, удмурт студентъёс лачак. Озьы со одӥг нуналэ университетысьтымы эшъёсыныз адскыны шуыса вуэм. Мон соку журналистикая факультетын нырысетӥ курсын дышетскисько вал. Ромаез 2-тӥ корпуслэн азбарысьтыз пумитай: палэнысен шораз учкыса сылӥ. Малпай, кыӵе ассэ йӧно возе, кыӵе чебер но визьмо вераське удмурт кылын. Мон солы отын ик синмаськи. Ӵош дышетскись нылъёслэсь юасько: кин-о со пияш? Уд тодӥськы, пе, шат? Со Роман Казаковский (кузпалылэн со вакытысь псевдонимез) — удмурт блогер. Лыдӟыса пот ай, пе, «Азинлык» блогзэ — трос тунсыкозэ тодод. Отысь мон кылбуръёссэ лыдӟи, улон шоры учконъёссэ тодӥ. Со мыным эшшо но золгес кельшыны кутскиз. Нош соку вӧлмемын вал «аська» (Интернет пыр ог-огедлы вакчи иворъёс келян амал). Эшъёсы кутӥллям но Ромалы мынам нимыным гожтӥллям: «Чырткем!» Со гожтэм: «Ӟечбур! Асьмеос тодмоесь?» Та перепискаез адӟыса, гордэктӥ, возьдаськи. Кутӥ но контактъёсы пӧлысь сое куштӥ.

Кӧня ке дыр ортчыса, паськыт вӧлмиз «ВКонтакте» сеть. Отын усьтэмын вал «Удмуртлык» группа — со огазеяз пӧртэм интыосын улӥсь, дышетскись удмурт егитъёсты. Ай школаын дышетскыкум, удмуртлыклы сӥзем кылбур гожтӥ вал. Кутӥ но сое та группае лэзи:

…Данъя вал, адями,

Вордскем удмурт кылдэ!

Гажа калыкмылэсь

Люкам узырлыксэ!

Ӧй но синйылты, «Удмуртлык» группаез Рома нуэ вылэм. Кылбурме ушъяз, озьы кыштыр кутскимы ог-огмылы гожтэтъёс ысъяны. Быдэс ар ӵоже тазьы Интернет пыр гожъяськимы. Нош ваче син адскимы Ижын «Авиатор» клубын — соку отын удмурт ӝытъёс ортчыло вал. Соку пумиськимы но ӧм люкиськылэ ни. Соку ик валай: та мынам адямие, соин мыным гань-гань но тунсыко. Кӧня ке толэзь ӵоже ӵошеннамы улӥмы, квартира снимать карыса. Собере монэ куразы. Италмасмес возьмаськомы вал ни соку, сюанамы кӧты адӟиське вал ни.

Сюанзы ортчиз Алнашын

Семья кылдытӥмы, нылмы вордскиз, Удмурт кун университетысь журналистикая факультетын дышетсконме азинтыны ӧй пӧрмыты ни, академической отпуске потоно луиз. Озьы 2008-тӥ арын университетэ пырыса, диплом басьтӥ 2015-тӥ арын гинэ. Нош Ромалэн удысэз чылкак туала, Интернет технологиосын герӟаськемын. Со оскымон кузпал но ӟеч атай. Нош мон ку басьтӥсько ай дышетскем удысэ борды — тодмо ӧвӧл. Та вакытэ Инвуэн декретын пукисько, нылпи садэ сётыны жаль потэ ай.

Пиналъёсмылэн тазалыксы сярысь сюлмаськыса, кӧня ке толэзьлы улыны выжылӥмы Сочие. Ромалэн угось удысэз сыӵе — ужзэ котькытын быдэсъяны быгатэ, компьютер но Интернет гинэ мед луозы. Отын мон инкуазьлы синмаськи: зарезь, чылкыт омыр, пуштыр-пуштыр будосъёс, гурезьёс. Но вордскем палъёсмылэсь мӧзмытэк ӧм улэ. Пиналъёсмылэсь тазалыксэс юнматыса, выльысь Иже берытскимы.

— Озьыен, тон одӥг нунал но журналистика удысын ужаса ӧд вутты на. Азьланяз астэ кытын адӟиськод?

— Мон вань мылкыдме-кужымме али сӥзисько семьяелы, нылпиосылы. Анаймурт луыны мыным туж кельше. Аслам пичи дыры курадӟыса ортчиз бере, коть пиналъёсылэн покчи вакытсы шудо мед луоз. Нош, шуом, ӵуказе ужаны потоно луысал ке, бырйысал нылпиосын герӟаськем удысэз. Бӧрысь, оло, кисьмасал журналистикаозь но.

Вож «Москвич»

— Но творчестволэсь тон уд палэнскиськы — «Инстаграм» сетьын Натӥ Бурдо нимын аслэсьтыд блогдэ нуиськод. Туж тунсыко отысь лыдӟыны нылкышнолэн улонэз, анайлэн шудэз сярысь гожъямъёстэ. Лыдӟисьёслэсь сюлэмзэс тужгес но зол бугыртӥз одӥг нылашлэн пичи дырыз сярысь гожъямъёсыд. Аслад покчи вакытэд курадӟыса ортчиз шуиськод бере, оло, веросэдлэн героиняез — тон?

Анаеныз (бур паласез)

— Озьы, ачим сярысь гожтӥ вал. Куддыр пичи дыры сярысь воксё но вунэтэме потэ…

Вордӥськи мон Башкортостанысь Татышлы ёросысь удмурт гуртын — Калмиярын. Мамае но папае бускель гуртъёсын вордскемын-будэмын. Мамае, школазэ йылпумъяса, дышетскыны пырем вылэм Башкортостанысь кун университетлэн Бирскысь филиалаз. Нош папае — Уфаысь медициная институтэ, но отын солы ярамтэ. Иже шонтэм но гурт удысъя институтэ агрономе дышетскыны пырем. Солы мамае туж зол синмаськемын вылэм. Бирскысь дышетсконзэ куштыса, сьӧраз Иже лыктэм, зоотехниклы дышетскыны пырем. Но соку ик огазе кариськыны соослы кылдымтэ. Мамае понна салам но сииллям ни вылэм — ми палан озьы ныл куран сярысь верало — сюанзы гинэ луыны кулэ на вылэм. Но вуоно кузпалызлэн анай-атаеныз тупатэк, мамае дораз берытсконо кариськем. Нимаз кариськыса но, 4 ар ӵоже пумиськылӥллям, мамае нылпи ваёно луэм.

Вордэм со монэ 8 толэзьын, Иже производственной практикае мыныкуз — поездын, Агрызысь чугун сюрес станциын. Катьяськемез бере папаелы телеграмма ыстэм, нылыд вордскиз шуыса. Но соиз анае доры вуымтэ. Берлогес анае тодэм ни, кышнояськем шуыса. Соку со распределениея келямын вал Вавож ёросысь одӥгаз хозяйствое.

Одӥг кылын вераса, ми солы нырысь кулэ ӧй вал. Мамае берытсконэзлы оскыса улӥз, кӧня курась вал, одӥгез сьӧры но ӧз мыны. Мыным папалэсь туспуктэмъёссэ возьматъяз, медам вунэты шуыса. Нош мынам адӟеме но уг поты вал — синъёсме кыньылӥ. Уг вунэтӥськы ни 9 арес дыръям суредэз: шудэмысь вуисько но, капка азямы вож «Москвич» сылэ. Соку ик валатски, со папалэн, дыр, шуыса. Пыри но, мамае шуэ: пӧрмытскы, нылы, папаед дорын табере улом. Озьы ми выжимы Калмиярлэсь 7 иськемлы палэнысь Улысь Балтач гуртэ. Отын улон ческыт ӧй вал. Папаелэн сямыз йӧнтэм вылэм, мамаме ултӥяса возиз. Мамае пала кариськисько вал но, мыным но йӧтылӥз. Нимы но мынам Кионпи гинэ вал. Вайизы на Роберт вынме, со мынэсьтым 10 ареслы пичигес. Папае мамаме кышкатылоз вал: кошкид ке, пидэ уд адӟы ни. Озьы ик кошкыны ӧз ӝуткаськы, чидаса улӥз.

Огпол мынам чиданэ пумаз вуиз: кутӥ но ӵужае доры, Калмияре, пегӟи. Уг мыны ни, шуисько, папа доры: отын улыны кужыме ӧз кыльы ни. Кӧня ке дыр ортчиз но, мамае сьӧрам лыктӥз, лӥятыса выльысь Улысь Балтаче берыктӥз. Пичи дырысьтым учыръёсты тодам вайисько ке, али ке но киосы куалекъяны кутско, нылъёсме нонтыкум, йӧлы ыше вал…

Улысь Балтач школаын мон «5»-лы гинэ дышетски. Но удмурт кылъя но литературая дышетӥсьмылэн куронъёсыз чурытэсьгес вал: та предметэн гинэ «4» потылӥз. Тодӥсько-кышкасько вал: папалэсь йӧтоз, ӵужаеным адӟиськыны уз лэзьы. Соин но, лэся, школаын удмурт кылэз сюлмам ӧй басьты. Ма, возьмаса гинэ улӥ: ку меда школаез йылпумъяло но Иже дышетскыны кошко. Всё, малпасько, городын ӟуч сямен гинэ верасько, вань уродзэ вунэто. Нош улон, кызьы шуо, монэ серекъяз гинэ. Дышетски журналистикая факультетлэн удмурт люкетаз, бызи удмурт пилы, матысь эшъёсы — удмуртъёс. Мон пӧзисько удмурт дуннеын. Аслам кылыным малпаськыны, кинэн ке огъя кыл шедьтыны, гожъяськыны — со бадӟым шумпотон.

«Инстачеберайын» вормиз

…Нош папае янгышсэ валаз, трос пол вераз ни, солы вожме медам потты шуыса. Покчи дыры ортчиз, улон шоры учконъёсы паськытазы, вожпотонэ но тӧлӟиз.

— Пичи дыръяд кин мылкыддэ лӧпкытъяз? Кин азьланезлы сюрес возьматӥз? Быдэ вуымтэ нылпилы, тазьы курадӟыса, умойтэм сюрес вылэ но султыны кема ӧвӧл…

— Мыным котьку но удалтылӥз — ма, али но озьы ик — ӟеч сюлмо адямиосын. Школаысь дышетӥсьёсмы семья кусыпъёсмы сярысь тодытэк ӧз улэ, но мылкыдме бурдъяса возизы, кин маин быгатэ — юрттылӥзы. Та ласянь висъясал Улысь Балтач школамылэсь директорзэ Виктор Шарифуллинович Гильфановез. Жаляса верано, со улонысь кошкемын ни, но пиналъёслэсь пуш дуннезэс со кадь валась дышетӥсез шедьтыны туала вакытэ туж секыт. Нош Иже вуыса, выль эшъёс шедьтӥ. Огезлэсь пӧртэм мукетыз тунсыкоесь, адӟем карымонэсь, етӥзэсь.

Но котьма ке но, улон, семья шоры учконме чутрак воштӥз Рома. Мон дышемын вал ук кузпалъёс куспын керетонъёслы, ултӥянъёслы. Малпасько вал, мукет сямен луыны но уг быгаты. Озьы быдэс дуннелэсь кышкаса, усьтӥськыны дӥсьтытэк кадь, улӥ. Нош тыныд одӥг пол, кык пол лякытэн вазё ке, ултӥям интые, яратэмзэс, дунъямзэс верало ке, сюлэм из ӧвӧл ук, со небӟе. Вань уродэз вунэ-тӧлӟе. Озьы со мынэсьтым асваланме ӝутыны юрттӥз, аслым ачим оскон пыӵатӥз. Мон но солэсь мылкыдзэ бурдъяса возьыны тыршисько. Семьяын озьы ик луыны кулэ, малпасько.

Нылпиосты вордон-будэтон — капчи уж ӧвӧл, но Рома уксё поттыны сюлмаське, мыным юрттӥське. Куд-огез шуэ: дасез вылэ, пе, лыктӥд-бызид. Но кузпалъяськыкумы, милям номырмы ӧй вал на. Кыкнамы ик куанер студентъёс, улӥмы патерын, кӧня ке ке но уксё поттон понна Ижысь Йӧ дворецын выж миськылӥ… Но котьку ог-огмес бурдъяса возим выль усьтонъёслы, вормонъёслы. Тау карисько Ромалэн анаезлы Нина Трофимовналы, мыным сыӵе ӟеч карт будэтӥз шуыса.

Камсьӧр чеберай

— Тон — камсьӧр нылаш, вераськонэд но тынад, тапал удмуртъёслэн сярысь, мукет. Алнаш палъёсы быземед бере тонэ отын шуак гинэ ӧз валалэ, дыр…

— Башкириысь гуртам бертӥсько ке, эптэшъёс (эшъёс) зынккыто (ёрто): «Мар бон сопал удмуртъёс кадь тукылдась (вераськись) луид эй (ай) тон бутынзэ (быдэсак). Картэд барбыр (сё равно) тӥни асьме кадь айбет (ӟеч) вераське. Нош Алнаш палъёсы бертӥськомы ке, мыным шуо: «Ма, Наталля кен казакгуртъёс кадь вераське ни. Ваньмыз валамон. Асьмелэн ини та, асьмелэн. Воксё».

Сочиын дыръя

Алнаше бызи но алнаш диалектлы синмаськи. Пӧртэм ёросъёсысь эшъёс шедьтӥ но соослэн вераськонысьтызы кылъёсты аслым асэстӥ. Камсьӧр диалектэлэсь, мар ватонэз, ӧвӧл дуноез. Пичи дырысь шудон чечаме (чача, шудон) кадь сюлмысь поттаса вераськисько. Сомында удмурт диалектъёсты тодыса, ӧвӧл мынэсьтым узырез.

— Туэ тон вормисе потӥд «Инстачеберай» марафонын: капчиен ортчид вань вожвылъяськонъёс пыр, тужгес трос куара люкад.

— Айно, телефонэн пукемме адӟыса, огпол шуэ: «Мама, мон уг валаськы, маин ас бордаз кыске Инстаграм. Мыным потэ, быдэс дунне отын ни». Мыным но куддыр озьы потэ. Но, мукет ласянь, мон кадь пиналъёсын пукись анайёслы социальной сетьёс астэ эскерыны, аслад быгатонлыкъёсыдлы выльысь оскыны луонлык сёто. Тазьы луиз «Инстачеберай» марафонэн. Котькуд сётэм ужез огшокчемен быдэсъяй: гожъяй удмурт выжыосы, гуртэ, башкир удмуртъёслэн сям-йылолъёссы сярысь. Ачим ӧй ик малпа, вормисе пото шуыса. Мон малпасько, туала амалъёсты кутытэк, удмурт кылмес утьыны-азинтыны секыт луоз. Нош таӵе выллем вожвылъяськонъёс удмурт кыллэсь данзэ ӝуто, егитъёслэсь удмуртлыкен тунсыкъяськонзэс бугырто.

Елена Тугашова

Ангелина Снигирева
By Ангелина Снигирева Ноябрь 22, 2019 14:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<