Пудоез утиз уй-нунал

Ангелина Снигирева
By Ангелина Снигирева Ноябрь 19, 2019 10:38

Пичи Пургаысь Любовь Герасимова трос аръёссэ сӥзиз пудо эмъянлы, калыклэсь кӧня пудозэ утьыны юрттӥз, уй-нуналэз тодытэк, висись скал, кунян, парсь доры мынэ вал. Со кадь сюлмысь тыршись адямиос али чиньыен лыдъямон. Сое ӵектэммы потэ «Гурт адями» конкурслэн «Ӟеч сюлэм» номинацияз.

Л. Герасимова

Любовь Алексеевна вордӥськиз Пичи Пурга ёросысь Шупшади гуртын трос нылпиё семьяын. Тодон-валан люказ Ильинск школаын. 8-тӥ класс бере Можгаысь пудо эмъянъя техникуме пыриз. Отын ансамбле кырӟаны, эктыны ветлӥз, соин ӵош концертъёсын гуртъёсы потаз. Техникумез ӟеч йылпумъяса, направлениен келямын вал «Юж-Пурга» колхозэ. Егит специалист гижысь-пиньысь басьтӥськиз пудо эмъян борды. Нялтас тодон-валан люказ но Ижысь гурт удысъя институтын. Бӧрысь ужзэ азинтӥз Пичи Пургалась пудо эмъян станциын. Тодон-валанзэ будэтылӥз Новосибирскысь научно-исследовательской институтын, Москваысь ветеринарияя но биотехнологиосъя академиын, Ижысь гурт удысъя институтын. Пудо эмъян удысын Любовь Алексеевна 40 арлэсь кема тыршиз: кӧня пудоез утиз, кӧня висёнъёслы аляны ӧз сёты.

Пудоез эмъясь, врач сямен ик, уй-нунал тырше. Угось уйин но вазиськисьёс ӧжыт ӧй ӧвӧл. Тани одӥг пол Л. Герасимовалэн укнояз 5 час ӵукна пал йыгаськизы. Скалмы кулэ ини, юртты вал, ӧтиз воргорон. Любовь Алексеевна усьтыр-табыр дӥсяськиз, эмъюмъёсын сумказэ кутӥз но воргорон доры дыртӥз. Скал шокамысь ик дугдэмын вал ни. Но ужзэ ӟеч валась специалист пудоез улӟытыны быгатӥз. Яке мукетыз учыр: Яганысь уйин жингыртӥзы скалзы кунянам бере уг султы, пе, гаӵоло кылле. Таяз учыре но ветеринар юн сямо луэмзэ возьматӥз.

Пенсие потыса но Любовь Алексеевна пудо эмъян сумказэ дасяса возе. Угось та вакытэ но визь-кенешлы, юрттэтлы вазиськыло. Пурга калыклэсь висьыны усем кечъёссэ, писэйёссэ, пуныоссэ, парсьёссэ учке, визь-нод сётэ. Адямилы ӟеч лэсьтӥськод, маин ке юрттӥськод ке, кыӵе шумпотоно, кыӵе сюлэмын каньыл луэ, шуэ ачиз нылкышно.

Кузпалыныз

Мыло-кыдо тыршемез понна Любовь Алексеевна данъямын Пичи Пурга ёрос администрацилэн, Ветеринарияя валтӥсь управленилэн, Правительстволэн таукаронъёсынызы, луэмын ужысь ветеран.

Мыло-кыдо кышномурт тэк улонэз уг тоды. Киужен выре, муш вордэ, сад-бакча возе, азбараз буй-буй пушйись сяськаосызлы паймисьтэмез ӧвӧл, дыр. Ужан висказ ик тодаз вае азьвыл ужам аръёссэ, тунсыко учыръёсты нимаз гожтыса кельтэ.

Любовь Алексеевна 2 нылпизэ огназ пыд йылазы султытӥз, угось кузпалыз улонысь туж вазь кошкиз. Пиналъёсыз адӟем карымонэсь будӥзы. Нунокъёсыз но Россиысь валтӥсь вузъёсын дышетскизы, ӟеч интыосын ужало. Тыршон сямзы анайзылэсь, песянайзылэсь паласькиз.

Нина Шутова. Пичи Пурга черкогурт

Л. Герасимовалэн улонысьтыз куд-ог учыръёсыз:

«Нелли нылы будэтӥз 5 ӟазег — одӥг мумы но 4 айы. Одӥг нуналэ ми 2 айы ӟазегзэ вандӥмы. Кыӵе та бӧрсьы ӝож куараен кесяськиз мумы ӟазегмы. Ӵуказеяз со чиптэм-чаптэм ышиз, ӧм ни шедьтэ. Ми солэсь яратон айы ӟазегзэ вандыны шедьтӥм, дыр. Мукетъёсыз но лобӟозы шуыса, ӵуказеяз ик кылем ӟазегъёссэ вандӥм. Озьы адямиослэн гинэ ӧвӧл, пудо-животлэн но вань вылэм яратонэз».
***
«Туклячие дорын кунояй. Мумы ӵӧжезлэн 13 ӵӧжпиез потэм, со пиоссэ дышетэ вал ини шуре васьканы.
Ӵӧжлэсь 13 пиоссэ хорёк ваньзэ нуллэм. Кыӵе жаль вал мумы ӵӧж шоры учкыны: кесяськыса шур дуре ваське, нош ик азбаре пыре, нош ик шур дуре ваське, пиоссэ утча…. Мынам синкылие ик потӥз, адями кадь ик. Кызьы анай пиналзэ уте — озьы ик ӵӧжлэн но пиосыз понна сюлмыз висе».

Ангелина Снигирева
By Ангелина Снигирева Ноябрь 19, 2019 10:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<