Проектъёс азинто но огазеяло

Ангелина Снигирева
By Ангелина Снигирева Ноябрь 19, 2019 10:55

Вавож ёросысь Выль Бия школа 3-тӥ арзэ ёросын устоез дышетскон учреждение луэ. Вормонъёс доры дышетӥсьёсты но пиналъёсты валтэ директор, адӟем карымон кышномурт Елена Морозова. Сое ӵектэммы потэ «Гурт адями» конкурслэн «Устоез кивалтӥсь» номинацияз.

Е. Морозова нырысетӥ рядын паллянысен куинетӥез

Школалэн вормон шыкысэз узыр: берло 2 ар куспын егитъёслы сӥзем проектъёс пӧлын Россиысь конкурсын вормиз, спортивной площадка лэсьтонлы 450 сюрс манет грант утӥз. Бӧрысь православной кичӧлтонъя проектсы но грант басьтӥз на.

Елена Морозова Выль Бия гуртын ик вордскемын. Выль Бия школаез медален йылпумъяз. Со вакытэ устоосыз дышетскисьёс экономика удысэ вамыштылӥзы, нош Елена бырйиз дышетӥсьлэсь ужзэ. Тодон-валан люказ Удмурт кун университетын, луиз удмурт но немец кылъёсъя дышетӥсь. Немец кыллы дышетыны кутскиз вордскем гуртысьтыз школаяз. Бӧрысьгес дышетскиз на англи кылъя дышетӥсе. 2012-тӥ арын сое школаенызы кивалтыны куризы.

Елена Морозова огшоры семьяысь потэмын, анаез кема аръёс ӵоже фермаен кивалтӥз. Со бордысь ик нылызлы ужась калыкез гажан, калыкез огазеяны быгатон пыӵаз.

Елена Вячеславовна азяз ужпумъёс пуктыны но соосты быдэстыны быгатэ, тыршись луэмез котькыӵе ужез берыктыны юрттэ. Та сямъёсыз понна ик сое гажало ӵош ужась эшъёсыз, тодмоосыз.

Елена Вячеславовна 7-тӥ арзэ валтэ ини школаез. 2017-тӥ арын Выль Бияысь школа ёросын устоез дышетон учреждение луиз. Тани 3-тӥ арзэ ини уте дано нимзэ. Аслаз но Елена Морозовалэн вормонъёсыз ичи ӧвӧл. Кылсярысь, туэ Дышетонэз азинтонъя институтлэн проектъёслы сӥзем конкурсаз 2-тӥ инты утӥз. Гуртысьтызы «Колос» хозяйстволэн кивалтӥсез Владимир Красильников Елена Вячеславовнаез директор луэмез бере нодъяз вал, колхозлэсь бере эн кыле шуыса. Та кылъёсты директор тодаз возе, школазэс адӟем карымон радэ поттыны тырше.

Данъян ужрад дыръя (паллянысез)

Елена Вячеславовна бадӟым саклык висъя проектъёс гожтонлы. Школа ужез котыр ласянь азинтыны уксё басьтыны сяна, проектъёс дышетӥсьёсты огазеяны, оскымон адямиосты шараяны юртто. Зэм, та уж капчиен уг сётӥськы. Зол проект гожтон понна трос кужым кулэ. Но Елена Морозовалы котьмае вормыны юртто школалэн азьвыл директорезлэн Галина Зайцевалэн верам кылъёсыз: «Уй котькыӵе пеймыт мед луоз но, нунал вордске». Секыт ужпумъёс султо ке но, быдэс коллективен ӵош соосты вормыны быгато, выль проектъёс малпало, нылпиослы ӟеч тодон-валан сётон сярысь сюлмасько.

Школаен кивалтыны капчи ӧвӧл ке но, Елена Вячеславовна дыр но, мылкыд но шедьтэ спортэн но эшъяськыны. Школалэсь но муниципал кылдэтлэсь гинэ уг, ёрослэсь но данзэ уте полиатлонын. Озьы ик пичи дырысеныз эшъяське шахматэн. Азьвыл шудыло вылэм агаеныз. Нош школаязы шахматъя кружок усьтӥськем бере, Елена Вячеславовна Вика нылыныз дуско сьӧры пуксьылӥз. Но али нылыз анайзэ ворме ни.

Школаын но, улонын но азьпалан луыны Елена Вячеславовналэсь мылкыдзэ бурдъяло кузпалыз но 3 нылъёсыз.

Валентина Богатырёва. Вавож черкогурт

Ангелина Снигирева
By Ангелина Снигирева Ноябрь 19, 2019 10:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<