Пичи гуртысь бадӟым революционер

Ангелина Снигирева
By Ангелина Снигирева Ноябрь 21, 2019 14:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртиысь уйпал ёросын вордӥськем большевикез, революционерез Иван Волковез Татарстанын туж дунъяло. Казаньын солэн нимыныз ульча вань, алигес буре ваён пул усьтӥзы. Нош Удмуртиын улӥсьёс аспал адямизэс чик уг тодо, пе. Оло, газетады со сярысь гожтоды.

Риф Насибуллин, филология наукаосъя доктор. Иж

И. Волков
Туспуктэм басьтэмын Глазовысь шаертодонъя музейысь

Большевикъёсын ӵош

Зэм, Иван Николаевич Волков сярысь трос уд кылы, солэн нимыз К. Герд, И. Наговицын, Т. Борисов но мукет удмурт югдытӥсьёс пӧлын уг ворекъя. Но со но трос лэсьтыса вуттӥз куанер улӥсь калыклэсь, удмуртъёслэсь асваланзэс ӝутон понна. Революционерлэн улэм-вылэмез, ужась калыклэн правоосыз понна нюръяськемез книгаосы гожтыса кельтэмын. Озьы Йӧскалык библиотекаын тодматскыны луэ Никифор Павлов историклэн «Иван Волков» документальной очеркъёсын книгаеныз, солэн биографиез пыртэмын «Борцы за советскую власть в Удмуртии» (авторъёсыз С. Зубарев но Е. Никитин) бичетэ. Нош история наукаосъя кандидат Михаил Садаков «Они сражались за счастье народа» книгаяз Иван Николаевичез одӥг радэ пуктэ Владимир Азин, Иван Пастухов, Степан Барышников революционеръёсын. Соос книгаын калык геройёс нимамын.

Кин со Иван Николаевич Волков? Вордскиз со туала Балезино ёросысь Миктапи (Нововолково) гуртын удмурт крестьян семьяын. Волковъёс тыршизы нылпиоссэс грамоталы дышетыны. Школаын мыло-кыдо но ушъямон дышетскиз пичи Иван но. Школа бере со тодон-валан люказ Глазовысь гимназиын. Ӵапак татын нырысьсэ тодматскиз эксэйлы, узыръёслы пумит луись адямиосын, ветлыны кутскиз лушкем ужась марксистской кружоке. Политической литератураен егит муртэз тодматылӥз ӵужмуртэз, дышетӥсьын ужась Фёдор Волков но — Фёдор Ивановичез лэзьымтэ литератураез вӧлмытэмез понна кӧня ке пол пытсэт сьӧры келяллязы.

Глазовысь гимназия. Татын дышетскиз И. Волков
Туспуктэм басьтэмын Глазовысь шаертодонъя музейысь

1913-тӥ арын Иван Волков дышетскыны пыриз Казаньысь университетэ, тодон-валан люказ физикая но математикая факультетын. Татчы шедиз муресь тодон-валанъёсызлы луыса, угось семьяезлэн сое дышетыны коньдонэз ӧй вал. Со бере Казане вуизы солэн Григорий но Иосиф братъёсыз. 1915-тӥ арын Иван Волков социал-демократической огазеяськонлэн ужаз пыриськиз. Котыраз огазеяз Глазовысь Казане лыктэм егитъёсты, соос «Глазовцы» лушкем кружок кылдытӥзы, большевикъёслэн политиказылы дурбасьтыса, студентъёс пӧлын валэктон уж нуизы. Нялтас вераса, гужемзэ, каникулъёсы бертылыкуз, И. Волков та ужез азинтӥз гуртоосыз пӧлын но. Со вакытэгес ик Казаньысь пӧртэм вузъёсысь студентъёс эксэйлы пумит «Сергей Петрович» нимо лушкем огазеяськон кылдытӥзы, солэн ужаз мыло-кыдо пыриськизы Волков братъёс но. 1916-тӥ арын Глазовысь пиос «Клич» нимаськись революционной журнал поттыны ӧдъязы, сое вӧлмытъязы студентъёс, заводын ужасьёс пӧлын. 1917-тӥ арын Февральской революция бере Глазовысь пиос Казаньысь большевикъёслэн комитетазы пыризы. Иван Волков выль потыны кутскем «Рабочий» газетлэн редколлегиезлэн ёзчиез вал — гожъямъёсыз отын но Удмурт шаерын потӥсь газетъёсын печатласькизы. Соос сӥземын вал калыклэсь асваланзэ ӝутонлы, выль улонэз лэсьтонлы. Материалъёс гожъяса, Иван Николаевич уй-нунал редакциысь ӧз поталля.

Иван Волков валэктон уж нуиз городысь дары (порох) поттонъя заводын — отын со большевикъёслэсь партизэс кылдӥз. Пальпотӥсь, йӧн-йӧн, вераськыны быгатӥсь пиосмурт борды адямиос кыстӥськизы. Казаньысь большевикъёслэн партизылэн нимыныз И. Волков пыриськиз 1917-тӥ арын апреле Петербургын ортчем конференцие. Отын кылэм-тодэмзэ бӧрысь Казаньысь но Глазовысь калык пӧлын вӧлмытъяз.

Та коркан вордӥськиз И. Волков

4-тӥ курсысен удмурт пияшез университетысь уллязы, дышетскемез понна ӧз тыры шуыса (но зэмзэ ке, революционной мылкыдъёсызлы луыса). Большевикъёслэн партизы куремъя Казаньысь заводъёсын ужасьёслэсь боевой дружинаоссэс кылдытӥз, берло соос Горд гвардилэн отрядъёсыз луизы. Нош 1918-тӥ арын И. Волков Горд армилэн полковой комиссарез луиз. Бӧрысь нош ик партилэсь ужзэ азьланьтӥз.

Сютэм, куанер улон Иван Николаевичлэн тазалыкез вылын шӧдӥськытэк ӧз кыльы. Со туберкулёзэн висьыны кутскиз. Эмъяськыны шуыса Уфае кошкиз вал, но отчы белогвардеецъёс вуыса, вордскем гуртаз пегӟоно луиз. Отын кӧня ке ужаса вуттӥз библиотекарьын. 1919-тӥ арын 25 аресъем пияш висьыса улонысь кошкиз, отӥяз бӧрсьысь бӧрсе туберкулёзлэсь ик кулӥзы Ираида Алексеевна мумиз но Анфиса сузэрез. Кылиз Лидия покчи сузэрез гинэ.

Тодэ вайыто ульча но пул

Иван Волков 25 ар гинэ улӥз ке но, трос лэсьтыса вуттӥз Казаньысь калык понна. Отын со, даур ортчыса но, уг вуны. Городын одӥгез ульча солэсь нимзэ нуллэ. Туэ сӥзьыл гинэ И. Волков нимо урамысь 39 номеро юрт бордын усьтӥськиз солы сӥзем буре ваён пул.Татарстанысь удмуртъёслэн автономиенызы азьвыл кивалтӥсь Валентин Романов революционерез тазьы буре вайыны мылкыдзэ трос аръёс сюлмаз нуллӥз.

— Мон удмурт бере, туж потэ ас выжыысьтым дано, калыкмы понна мар ке ӟечсэ лэсьтэм муртэз мед тодозы, данъялозы шуыса. Тани Иван Николаевич Волков сыӵе егит арлыдаз кӧня лэсьтыса вуттӥз. Эшшо кӧня ужез берыктысал на, улонысь сыӵе вазь ӧй кошкысал ке.

Валентин Серапионович дано удмуртэз сӥлы кароно шуыса, кивалтӥсьёс дортӥ 6 ар ӵоже бызьылӥз. Но сюлмаськемзэ кылэм-адӟем ӧз карылэ. Берло ас коньдонэныз буре ваён пул лэсьтӥз, 3 пол сое воштоно луиз — я бигер кылын гожтэмез ӧз кельшылы, я шрифтсэ воштыны курылӥзы. Ачиз ик ортчиз Волков нимо ульчаысь улӥсьёс дортӥ, кин коркаез борды пул шуккыны лэзёз шуыса. Озьы туэ В. Романовлэн малпанэз улонэ пыӵаз Татарстанысь Калыкъёслэн ассамблеязы но Эшъяськон юртсы юрттэмъя.

Глазовысь гимназиез йылпумъямъёс. И. Волков нырысетӥ рядын паллянысен 2-тӥез
Туспуктэм утиське Глазовысь шаертодонъя музейын

— Иван Волков сярысь вераськон потӥз Удмуртилэн кунлыкезлы 100 ар тырмон ар улсын, — шуэ Татарстанысь удмуртъёслэн автономизылэн огез азьветлӥсез Марина Иванова. — Та адями егитъёс понна выль усьтэм ним кадь луиз, но бадӟымъёс пӧлын но сое тодӥсьёс трос ик ӧвӧл. К. Гердлэсь, Т. Борисовлэсь гожъямъёссэс лыдӟиськод но, соос сярысь котькудӥзлэн аслаз малпанэз вордӥське. И. Волковлэн потыса кылем гожъямъёсыз ӧвӧл. Солэсь улэм-вылэмзэ, данзэ калык пӧлын вӧлмытӥсьёс но, И. Наговицынлэн кадь (со сярысь материалъёс бича Казаньысь ӵыжы-выжыез Валентина Хазиахметова — авт.) ӧвӧл. Туннэ И. Волков сярысь калыкмы тодэ Валентин Романов кадь мыло-кыдо адямиослы луыса. Кыӵе Иван Николаевич бадӟым уж лэсьтӥз, туннэ ваньмыз дунъяны уг быгато. Сое ӟечгес валало историез тодӥсьёс, эскерисьёс, общественной ужен вырисьёс

Кедр но шайвыл

Аспал адямизэс тодытэк уг будо миктапиос но. Миктапи но Камъян гуртъёсты огазеям бере кылдытэмын вал выль гурт, революционерез данъяса, сое Нововолково нимазы. Гуртысь валтӥсь ульчалы но И. Волковлэсь нимзэ сётэмын.

— Азьвыл гуртамы школамы вал, отысь музейын аспал адямимы сярысь нимаз сэрег ужаз, — вера та гуртысь нылкышно, клубен но библиотекаен кивалтӥсь Надежда Князева. — Кин ке куноос экскурсиен вуо ке, ӟуч кылъя но литературая дышетӥсьмы монэ музеен тодматыны ыстылӥз. Кыӵе данъяськыса мон вералляй Иван Волков сярысь. Совето власть дыръя «революционер», «большевик» кылъёслэн бадӟым данзы вал. Кыӵе ми, пиналъёс, данъяськылӥм, сыӵе адями гуртысьтымы потӥз шуыса.

И. Волков муминыз но сузэръёсыныз
Туспуктэм: Балезино ёросысь Миктапи музейысь фонд

Школазэс ворсамзы бере музейысь куд-ог арбериос черке выжизы, али отын клуб но библиотека интыяськемын. Татын революционерлэн пичи вакытысьтыз, семьяезлэн, вордскем но будэм коркаезлэн туспуктэмъёссы утисько. Нимысьтыз альбом дасямын. Нялтас вераса, та черкез пуктон понна ас вакытаз И. Волковлэн матысь ӵыжы-выжыосыз ик сюлмаськизы. Эшшо Миктапиын будэ И. Волковен мерттэм кедр. Со ӝужыт, паськыт луиз ни, мульы но сётэ ни.

— Аспал адямимы сярысь вератэк ум кельтӥське нылпиосмылы но, куноослы но, — азинтэ Надежда Азарьевна. — Гурт праздникъёс дыръя данъяськымон муртъёсынымы тодматӥськом. Вазенгес ватэм бервылаз быдэс гуртэн шествиос но радъясько вал. И. Волков Миктапие ватэмын, шайвылмы гуртмы шорын ик. Али отысь синпелет пумысен сюлмаськон кылдэмын — памятникез вужмиз ни. Сое выльдыны мылкыдмы вань. Гуртысь азьвыл библиотекарьмы Фелитта Юферева вазенгес И. Волковлэн покчиез сузэреныз Лидияен гожтэтъёс пыр кусып возьылӥз. Но соку ик со мӧйы вал ини. Бӧрысь соин кусып ышиз.

Дасяз Ангелина Снигирёва

Туспуктэмъёс понна бадӟым тау Глазовысь шаертодонъя музейлы но Балезино ёросысь Миктапиысь музейлы

Ангелина Снигирева
By Ангелина Снигирева Ноябрь 21, 2019 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<