«Пенсие потӥ но лыдӟиськыны кутски ук…»

Ангелина Снигирева
By Ангелина Снигирева Ноябрь 12, 2019 09:49

Пичи Пурга ёросысь Яган-Докья гуртын «Удмурт дуннеысь» журналистъёсын пумиськон йылпумъяськиз гинэ, ӝӧкмы доры сьӧд очкиен мӧйыгес воргорон матэктӥз. Монэ, пе, «Удмурт дунне» газетлы но гожтэ, удмурт книга но басьто…

Пичи Пурга ёросысь Яган-Докъя гуртысь лыдӟӥсьёс
Туспуктӥз М. Егоров

Таӵе пумиськонъёс дыръя удмурт воргоронъёс сокем трос уг луо, газет-журналъёслы гожтӥськонэн но кышномуртъёсгес выро. Соин ик Валерий Кузнецов милемыз паймытӥз но шумпоттӥз.

— Азьвыл «Удмурт дунне» газетэз лыдӟиськоды вал-а? — юасько.

— Уг. Но туннэ пумиськонын малпай: басьтыны кутско, лыдӟо. Ачим мон вӧзысь Чутожмон гуртын вордӥськемын. 16 ар шофёрын ужамын, собере совхозын бригадир вал. Школаын ноку книга лыдӟылэме ӧй вал. Со понна урокын «кол» но пуктэмзы вань. Туж яратӥ математика, физика, химия урокъёсты. Директормы дышетӥсе дышетскыны косэ вал. Нош мон сельхозэ мынӥ. Нош отын экзаменъёс — математика, сочинение но физика. Соку ӧй тоды, удмурт пиналъёслы сочинение интые изложение гожтыны луэ шуыса. Математикаме ӟеч сётӥ, нош сочинениын пукси, уг лыдӟиськиськы вал бере, кызьы гожтод? Уг тодӥськы, малы меда ӧй лыдӟиськы? Нош пенсие потӥ но лыдӟиськыны кутски тани…

— Табере библиотекаысь уг поталля, — ватса кузпалыз Юлия Михайловна. — Ваньзэ лыдӟе: А. Пушкинэз, Ф. Достоевскиез, А. Блокез… Берлозэ тодмо ӟуч писательлэсь Фёдор Абрамовлэсь книгазэ лыдӟиз, удмуртъёс пӧлысь — Трофим Архиповлэсь «Лудӟи шур дурын» гожтэмзэ.

— Юлия Михайловна — мынам кыкетӥ кузпалы, со вань улонзэ школаын ӟуч кыллы дышетӥз. Туж ӟеч адями. Нырысетӥ кузпалы но туж ӟеч вал, но 1998-тӥ арын ини, пыктос висёнэн туж секыт висьыса, улонысь кошкиз. Туж жаль потэ… — шуэ Валерий Геннадьевич.

— Нош лыдӟиськыны тӥледыз Юлия Михайловна бурдъяз-а?

— Ӧз, солэсь азьвыл ик лыдӟиськыны кутски ни вал. Юлия Михайловнаен берлогес паръяським ай.

Валерий Кузнецовлэн лыдӟиськонэн висемез соин но паймымон: 1991-тӥ арын пал син кылиз.

— Куазь арня пала зорыса улэ ни вал, ми ю тысь нуллӥськом. Мастерскойын машинаме тупатон вискын пресс улысь подшипник синмам ик пештӥз. Соку ик больницае нуизы. Но врачъёс шуизы, синмыд копак быремын, вирзӥбетэз ик ӧвӧл ни, эмъяны уз луы. Озьы синме ворсаса вурылӥзы но доре келязы. Водитель луыса ужаны ӧй ни быгаты, бригадире пуктӥзы… Ветлӥсько но табере сьӧд очкиен. Но пал син луэме лыдӟиськыны уг люкеты.

Трос лыдӟиськемысьтыз, Валерий Кузнецовез матысь адямиосыз куарето: синмыдлы секыт луоз.

— Ачим но валасько, но лыдӟиськытэк уг ни быгатӥськы. Кӧня ке ар талэсь азьло синмы лябӟыны кутскиз. Больницае мынӥ: пенсиын ке но, мон егит на ук, маке каре, шуисько… Катаракта кутскем, пе, операция лэсьтӥзы. Али умой адӟисько ни, — шуэ воргорон.

Дораз книга-газет лыдӟыса гинэ пукыны Валерий Кузнецов уг чида. Али со Брангурт поселениысь синтэмъёслэн но ляб адӟисьёслэн огазеяськонэнызы кивалтэ. Нош сыӵеос татын 15 пала, пе. Ӵемысь вуылэ Иже, ляб адӟисьёслэн пӧртэм ужрадъёсазы, концертъёсы. Ма, Юлия Михайловнаез но активистка: пенсие потыса, Яган-Докьяысь ветеран огазеяськонэн кивалтыны кутскем.

Юлия Михайловнаен но Валерий Геннадьевичен вераськонмес кылзӥськыса, востэмак гинэ песянай сылӥз. Таиз, пе, Наумова Людмилапай. 87 аресъем кышномуртлэн одӥгез нылыз ӵапак Кузнецовлэн нырысетӥ кузпалыз вылэм. Ачиз Людмилапай 4 пинал будэтӥз, ваньзы удмурт сямен чебер верасько, пе. Али песянай огназ улэ, нимаз хозяйствозэ нуэ на. Арлы быдэ «Удмурт дунне» газетлы гожтӥське.

— «Удмурт дунне» газетэз вордӥськем дырысеным ик лыдӟисько ни кадь потэ. Со мынам матысь эше, — шуэ песянай, — нош туннэ тани журналистъёсты но адӟи. Табере, газетэз лыдӟыкум, син азям тӥ пуксёды ни.

Людмилапай туж лад-лад вераське, пенсие потытозяз, дышетӥсьын ужамын, кожалод. Озьы шуэмысьтым, песянай огдырлы ыштӥськиз, ма, о-о, пе, школаын ужай, вань ултозям, только выж миськись гинэ мон вал…

Котькыӵе ужлэн аслаз данэз, ӟеч выж миськисез но туала вакытэ мын ай, шедьты, шуиськом.

— Людмилапай туж тыршись, туж лякыт кышномурт, — песянаез ушъя Яган-Докьяысь ветеранъёслэн кенешенызы кивалтӥсь Юлия Миронова.

Валерий Кузнецов но итӥське:

— Со туж визьмо кышномурт. Мон азьвыл туж паймисько вал, Москваысь бадӟым кивалтӥсьёсты, Брежнев, Хрущёв вӧзын ужась адямиосты, ваньзэс нимын-тулын тодылӥз: Косыгин, Андропов но мукетъёс. Дорын ми сое «политик» гинэ шуиськом вал.

— «Удмурт дунне» газетэз кутсконысеныз пумозяз лыдӟисько но тодэме сярысь семьяелы верасько, озьы, тазьы шуисько, — ватса Людмилапай. — Нош соос пумитам, та «политик» бон оломае но тодэ, шуо. Ма, газет лыдӟисько ук, шуисько. Соос верамме кылзо, пелязы поно. «Удмурт дуннелы» тау кареме потэ улонэз верамез, ваньзэ валэктэмез понна.

Елена Миннигараева

Ангелина Снигирева
By Ангелина Снигирева Ноябрь 12, 2019 09:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<