Мынам дзюдо семьяе!

Ангелина Снигирева
By Ангелина Снигирева Ноябрь 8, 2019 16:00

Чемпионатэ вуылӥзы шаерысьтымы дзюдоен вырись пиналъёс но соослэн анай-атайёссы. Нимо-дано спортсменъёсын пумиськизы 60-лэсь ятыр семьяос.

Ижысь Корепановъёслэн семьязы
Туспуктӥз О. Корепанова

«Дзюдо семья» проект Европаын паськыт вӧлмемын ини. Берло аръёсы со шаерамы но каллен пыӵаны кутскиз. Анай я атай, нылзэ-пизэ тренировкае вайыса, коридорын витьыса уг пукы, пиналыныз ӵош мугорзэ кыдатэ. Пайдаё программа пыртэмын вал Ижын ортчем чемпионатэ но.

Ог 130 пиналъёслы но мумы-бубыослы нюръяськыны вӧл-вӧл мед луоз шуыса, «Олимпиец» йӧ дворец вӧзы шатёръёс пуктылэмын вал. Отын но инты ӧз тырмы, кимоноосын пӧрмытскем батыръёс котькытын вал. Чемпионат йылпумъяськытозь, соослэн лыдзы чик ӧз кулэсмылы, тренировкаос 3 нунал ӵоже ӵукнаысен бер ӝытозь кыстӥськылӥзы ке но.

1-тӥ нуналаз семьяос азьын кескич нюръяськон амалъёссэ возьматӥз Лондонын ортчем Олимпиадалэн азвесь призёрез, дуннелэн 4 полэс, Европалэн 6 полэс чемпионзы, Россиысь спортъя дано мастер Александр Михайлин. Мастер-классын басьтэм тодон-валанъёссэс анай-атайёс, нылпиос муромытӥзы 2-тӥ нуналаз. Ортчизы Капчи стартъёс. Тӥни соку ини мумы-бубыос пӧлысь куд-огез лулӟылӥз ни: быдэс мугормы висе! Ымныр — гордэктэмын, мугор — ӟырдамын.

— Палэнысен учкыса, туж капчи кадь тушмонэз тыбыр вылаз погыртыны, — шуэ егит анай Марина Шестакова. — Нош ачид нюръяськыны кутскиськод но абдраськод: кужым но, чидан но уг тырмы вылэм. Э-э, малпасько, дзюдо макем секытэн сётӥське вылэм. Эсьмаса, асме зэмос спортсменэн шӧдыны кутски, пиосме но ӟечгес валаны ӧдъяй кадь. Пиналъёсы пичи дырысенызы дзюдое ветло. Асьсэос та удысэз ӧз быръе — атайзы огпол тренировкае нуиз но кельтӥз. Озьы быдэс семьямы спортэн эшъяськыны кутскиз.

Тэранэ Волкова чемпионатэ пиеныз пыриське. Таос но дзюдое вазенгес ветлыны кутскемын.

— Милям тренеръёсмы туж умоесь, — мылкыдзэ усьтэ Тэранэ. — Соос сярысь нырысь-валысь тодӥмы эшъёсмы пыр. Соин ик пиме но доразы сётоно кариськи. Адӟем карымон тренер вӧзын пие но адӟем карымон будоз, малпасько.

Шумпотӥсько, дзюдоя чемпионатэ пыриськыны милям семьямылы но шуд усиз шуыса. Туж тунсыко вал грузин, чех, англи но мукет кылъёсын вераськись спортсменъёсты кылзыны. Пусйымон соиз но: 3 нунал куспын сомында выль семьяосын тодматскимы!

Анай-атайёслы мастер-класс возьматӥз на эшшо одӥгез дано спортсмен. Сергей Самойлович — дзюдоя калыккуспо классъем мастер, полицейскойёс пӧлын дуннелэн чемпионэз, дуннелэсь кубоксэ 4 пол утэм мурт. Нимо-дано спортсменъёс котыре нылпиос мушъёс кадь норисько. Озьы, чемпионат йылпумъяськыку, пиослэн тӧдьы футболкаоссы спортсменъёслэн кинюртэмъёсынызы гожмамын вал ини. Пусъёно: тренировкаосын гинэ семьяос ӟырдыт ӧз нюръяське, Удмуртиысь но Россиысь спортсменъёсмы понна но куаж-куаж висизы. Нош ужрад йылпумъяськем бере пичиез но, бадӟымез но дзюдоистъёс зарнивуам медальёсын но таукаронъёсын доразы бертӥзы.

Ангелина Снигирева
By Ангелина Снигирева Ноябрь 8, 2019 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<