Мон колхозын усто ужась…

Ангелина Снигирева
By Ангелина Снигирева Ноябрь 1, 2019 11:20

Дэри ёросысь Венья гуртын улӥсь Николай ФИЛИППОВ вань улонзэ «Совхоз-Правда» хозяйствоын тракторист-машинист луыса тырше. Сюлмо ужамез Удмурт Республикалэн Данъян грамотаеныз, «Удмуртиысь гурт удысысь дано ужась» нимын пусъемын, нош та нуналъёсы солэсь тусбуйзэ пыртӥзы шаерысьтымы Данъян пул вылэ.

Н. Филлипов
Туспуктӥз В. Емельянова

Татын вордски, татын улӥсько

— Веньяын ик мынам мамае но тятяе — Нина Филипповна но Василий Аркадьевич — вордскемын, вань улонзэс колхозын ужамын кунян сюдӥсь но механизатор луыса, — веранзэ мытӥз Николай Васильевич. — Соос 3 пинал будэтӥзы, мон бадӟымез. Пичи дыръямы мамаен тятялы юрттӥськыны ветлылӥмы. Фермаын сокем трос ужез ӧй вал: пудоослы турын тыримы, пыд улысьтызы кыедзэс утялтӥмы. Пиос понна техника тунсыкогес потылӥз. Соин ик ӵемгес тятя сьӧры быж кадь ветлӥсько вал. Ӧз тышкаськылы, пичи чиньыосмы котькытчы чуртнаськыло вал ке но. Шуылоз вал: сотэк ужаны уд дышы. Гужемъёссэ тятямы комбайнэн араз, нырысь сьӧраз ворттылӥ гинэ, бадӟымгес будыса, вӧзаз помощник луыса ужай.

Гуртамы начальной школа гинэ вал. Сое йылпумъяса, Лудорвайын тодон-валан люкамы. Классъёс бадӟымесь, 3-4 параллель. Удмурт гуртысь вал бере, удмурт классын дышетскимы. Пичи дыры сярысь трос вераны уг тодӥськы, котькыӵе вакытъёс вал, дыр. Йӧнтэмъяськыса трос ӧм ветлэ кадь, нош кепыран сямы туннэ но бордам.

Венья гурт вӧзын бадӟым колхоз садмы чебер пушйиз, улмо, слива, груша но трос пӧртэм емышъёс кисьмазы, узыез но тачак вал. Соку колхозмы Мичурин нимо лыдъяськылӥз, ас вакытаз шаерысьтымы тужгес кужмоез гурт хозяйство вал, нош табере «миллионниклэн» бервылыз гинэ но ӧвӧл ни.

Сад пыр школае мынон сюресмы ортчиз. Пичи дыръямы ми со садэ ужаны ветлылӥмы, бичаськылӥмы я писпу котыръёсты утялтылӥмы. Чебер улмоослы гочаллямы ке но, лушкаськылэммы ӧй вал. Отын ужасьёс сое милемлы асьсэос сётылӥзы. Сӥзьыл школае мыныкумы, со улмоосыз вань кисыосамы тыриськомы но Лудорвайысен бадӟым классъёсын дышетскись пиослы вузаськомы вал. Озьы кӧтмес тырылӥмы, эшъёсмылы но ӟеч лэсьтӥськом кадь потылӥз. Одӥгез жаль — пичиысен вузаськыны выримы ке но, милесьтым ужбергатӥсь ӧз пӧрмы.

Пинал вакыт

Покчи классъёсын книга-тетрадьёс сьӧрын тросгес пукылӥ ке, бадӟым классъёсын мукет малпанъёс йырез поромытӥзы. Ӝыт шудонэ мотоен поталлямы, нылъёс доры ветлылӥмы. Пумен азьтэмъяськон аслэсьтыз басьтӥз, школаын «3» отметкаосы йылӥзы. Со вакытэ кужмысь дышетскыны косӥсь ӧй вал, тулыс бадӟымгес классэ выжто ке, ярам.

Тятяе гурт техникаен ужаны шаплы вал бере, мынам но со сямен колхозын ужаме потӥз. Школаез йылпумъяса, Ижысь СПТУ-э вамыштӥ. Нош ар ортчыса, 1980-тӥ арын май толэзе, вордскем гуртам ужаны кутски. Мон понна со вераны луонтэм шумпотон вал: аслым трактор сётӥзы! Ужа но ужа вылэм, но 3 толэзь но ӧз ортчы, монэ армие басьтӥзы.

Даур кузьда

— Со вал июль толэзь, мон кадь егит пиосты спецнаборен Ижевске люказы но вагонэ пуктыса келязы, — тодаз вае Николай Филиппов. — Кудпала нуонзэс ӧз вералэ. Озьы вагон тыр пиос арня ӵоже мынӥмы. Таджикистанэ вуэммы бере гинэ валатскимы ни, «пӧсь» интые келяло шуыса. Вагонысь васькытыса, строе султытӥзы, 1-лы но 2-лы лыдъяськытӥзы. 1 номере шедемъёсты, пе, Афганистанэ келялозы, нош кылемъёссэ Таджикистанэ ик кельтозы. Кунгож сьӧры поттэмзылэсь азьло егит боецлэсь курссэ ортчимы, механике но пушка нуллӥсе нимысьтыз дышетӥзы. Афганистанын соку арлэсь тросгес ни ожмаськон мынэ вал. Улыны интыязы бусыысь бадӟым палаткае. Озьы 2 арзэ ожын ортчытӥ.

Мугоры пичи, дышетскемея тракторист-машинист вал бере, танке пуктӥзы. Т-62 танкын ми 4 кузя ветлӥмы. Колхозын гусеничной тракторен ужаса вуттӥ вал, танк трослы кужмогес но ваменэсгес вылэм. Дышымтэ сярысь сое кулэ интые валтыны нырысь туж секыт вал. Танк пушкын асьмеос ик механик но, наводчик но вал. Тужгес секытэн сётскиз заряжающийлэн ужез. Мынӥсь танкын 28 килограммъем снарядъёсты ӝутоно но соосты кулэ интые пононо вал, туж чакласькемез кулэ кариз.

Тросгес йӧтӥз десантникъёслы, нош ми, соослэсь улонзэс утем сяна, сюресъёсты минаослэсь сузяны кулэ вал. Но улонын ваньмыз вӧй вылтӥ кадь гинэ уг ортчы вылэм. Нуналлы быдэ пуштылэм куараос кылӥськылӥзы, одӥг полаз асьмеос но ӧжытак гинэ ӧм быре. Нырысетӥ радын мынӥсь танкъёс, мон но пӧлазы вал, ортчизы гинэ, пуштэм куара кылӥськиз. Соку ми выльысь вордскем адямиос кадь асьмелы потӥмы. Туж жаль, ожмаськонысь тросэз солдатъёс доразы ӧз ни берытске.

Мукетыз учыр но син азьын на. Узбекистанысь эшмы дембель вал ни, танк вылын пукыкуз, снайперъёс шораз мертаськиллям вылэм. Нош со, шӧдэм кадь, йырзэ берыктэм. Тушмон пуля солэсь пельзэ кесиз. Ярано коть, ачиз улэп кылиз.

Афганистатын

Алӥзы вал: командиръёслэсь кылзӥське, нокыӵе фотоос дорады эн ыстэ. Куд-ог эшъёсмы верам кылэз валаллямтэ, фотоосты гуртазы келяны малпаллям. Со понна ваньмыз тыш сиизы.

Служба быдэс даур кузьда кыстӥськиз. Гуртэ бертон дырлэсь вуэмзэ витьыса, чидан быремын ни вал. Сюлэм доре кыстӥське, ваньзэ ӝоггес вунэтэм потэ. Асьмелэсь автоматъёсмес егит пиослы сётыса кельтӥмы, тупаны но кулэ, мон сётӥ Дэри ёросысь ик Лудӟыл гуртысь удмурт пияшлы. Удмурт сямен чик вераськытэк, лэся, 2 ар куспын ӟучомыны кутски. Комиысь пиос асьсэ сямен вераськылӥзы ик, нош монэ ӧз валаллялэ. Чебер чилясь йырсие пужмераны кутскиз. Армия бере нырысь аръёсаз кӧшкемыт уйвӧтъёс адӟылӥ. Ӵемысь зуркак луыса сайкалляй: я телефон куара жингыртэ, я сирена чузъяське, я кытын ке пуштэ. Со дырысен табере уно аръёс ортчизы ни ке но, шимес учыръёсты сюлэмысь ӵушыны уг луы вылэм.

Афганистанын ожмаськемъёс бырем эшъёссэс ноку уз вунэтэ, дыр. Арлы быдэ 15-тӥ феврале я Ижевске, я Совхозной каргуртэ люкаськылӥськомы. Та дыре гуртамы афганецъёс 5 кузя кылемын, вазенгес тачак вал. Тросэз юон вылэ чӧлскизы.

Узыр воргорон

— Армиысь май толэзе вуи, одӥг малпанэн гуртэ бертӥ: кӧттырымон юо, вань адӟемме шаплыгес вунэто, — вера Николай Филиппов. — Уг ваты, котькыӵе дыръёс вал, дугдылытэк юи но. Одӥгезлы шумпотӥсько: вӧзысьтым адямиос дыраз визьманы быгатӥзы. Тодмоос пыр ик кышнояськи. Ёросысьтымы ик Женвай гуртысь нылашен семья кылдытӥмы.

Пусъемын трос медальёсын
Туспуктӥз В. Емельянова

Армиысь бертыса, 1982-тӥ арысен весяк одӥг интыям — колхозын — ужасько. Соку мыным выль МТЗ трактор сётӥзы. Совхозлэн Венья гуртын нимысьтыз бригадаез вал, тросэз нылкышноос пудо вордон удысын ужазы, воргоронъёс нянь будэтӥзы. Бадӟым гаражамы вань колёсной техникалы инты ӧз тырмылы, гусеничной тракторъёсты кырын возизы. Тулысысен сӥзьылозь бусыын тыршимы, механизаторъёсмы гинэ 40-лэсь трос вал. Толалтэзэ тракторен ужай, пудо сиён нуллӥ, нош гырон-кизён вакытысен бусыысь ик ӧй бертылы ни. Уборка вакытэ комбайнэ пуксьылӥ. Техника ласянь шуг-секытъёс ӧз кылдылэ. Нырысь ик «Нива» комбайнэн ужай. Со вакытэ 8 ар ужам техникаез вылезлы воштылӥзы. «Дон» комбайнэн 6 арзэ тыршеме бере мукет механизаторлы сётӥзы, берло 11 арзэ «Полесье» комбайнэн ужай.

Гурт улонмы 1990-тӥ арозь шулдыр вал. Хозяйствоын ик бакча емыш будэтылӥзы, сое киськаны ву шурысь кыскыса. Отӥяз улон воштӥськиз, трос шуг-секытъёс кылдылӥзы, выльдӥськон мур пытьы кельтӥз. Выль техника, укыр дуно шуыса, басьтэмысь дугдӥзы, нош шальтрам техникаен калыкез кема уд возьы. Тросэз воргоронъёс городэ кошкизы. Табере милям бригадаямы 2 гид кылемын, отын ветылъёсты будэто. Кӧня ке ар талэсь азьло гинэ ошпиосты куайыто вал. Соосты будэтон дуно усемысь, пичиысен ик вузало.

Табере мон асме узыр адямиен лыдъясько, Веньяысь гаражлэн кузёез луисько (серекъя). Мынам 3 техникае вань. МТЗ-82 но Т-16 тракторъёсын ачим ужасько, пудоослы сиён пыртасько. Озьы тӥни, шутэтскон нуналъёсыз тодытэк, ялан гуртэз ӝутыны вырисько. Нош тулыс ке вуэ, бусые потӥсько. 3-тӥез транспортэ — «Дон» комбайн, Совхозной каргуртысь гаражын сылэ, гужемзэ соин ужасько. Нош гидэ сиён пыртало валэн.

Техникалэн кузяз ӧд ветлы ке, ужамез уз луы. Соин ик кулэ дыръяз вӧяно, тупатъяно — бусые мыныса, медад шальтра. Эстӥськонэз но шыръян сярысь малпаськоно на. Соин ик куд-ог дыръя уй-нунал гаражын луисько. Кылем арын уборка вакытэ 1 сюрс 600 тонна ю тысь кутсай. Валля аръёсын ӵошатыса, та лыдпус тросгес, эстӥськонэз но 5,2 процентлы шыръяны быгатӥськем.

Милям горд сэрегмы вань на. Бригадир но осеменатор татын пуко. Вордскем нуналъёсмес дэмен ортчытъяськомы. Озьы 15 кузя люкаськылӥськомы ик ай. Колхоз уж сюлмаськытэ. Егит дыръям гаражмы выль вал, нош табере ваньмыз шальтрамын, липетэз ланьырскемын ни, пенсие потытозям коть мед чидасал на.

Трактор — улонэз

— Надежда Николаевна кузпалэным 3 пинал, 1 ныл но 2 пи, будэтӥм, табере 7 внукъёсмы шумпотто, — шуэ воргорон. — Мон но тятяе сьӧры ветлӥсько вал бере, Сашик но Андрей пиосы но сьӧрам ворттылӥзы. Трактор куара соосты ӝог кӧлтэ вал, бусыын кӧня ке круг лэсьтыса ик, умме усьылӥзы. Озьы нуналлы быдэ ӵошен ужаны ветлӥмы.

Трактор руль сьӧрын 37 ар
Туспуктӥз В. Емельянова

— Ой, со милям колхоз адями, тулыс-сӥзьыл бакчаын ужано ке, со колхозын ышемын, — вераськонамы итӥське Надежда Николаевна. — Пиналъёс пичигес дыръя Колялэн мумиз-бубиз юрттӥськизы, нош отӥяз нылпиосмы будӥзы. Ас вакытаз мон столовойын ужай. Бусыын ужасьёслы нуназе но ӝытазе сиён нуллӥмы, соку ик кузпалэным но пиосыным часта адскиськомы вал. Доре ужаны сюрымтэысьтыз, вож но потылӥз, нош мар карод, чидаськод ни. Тракторез ке сӧриськиз, тод ни: корт валзэ тупатытэк, доре уз берты. Со понна колхоз уж дуногес. Механизаторъёсмы сюрес вылэ ӵемысь поталлязы. Колхоз машинаос трос ӧй вал бере, тракторен Ижевске ветлӥзы. Пила пызь, кирпич я блокъёс нуллӥзы. Али со улон капчигес луиз. Трактористъёсты мукет уже мултэссэ уг кыскало. Ма, юрт котырын но берганы лякытгес ни. Нылпиосмы будӥзы, живот но утялто, бакча котырын но ужало. Нош егит дыръя семья куспын котькыӵе вакытъёс вал… Одӥгез умой — картэлэн сюлмыз сэрыт берытске. Кулэ дыръяз шуныт кыл но вералоз, ческыт пӧраськоз но. Туж быгатыса дася борщ но плов. Нош шулдыръяськонъёсты уг яраты, мынам куд-ог дыръя кырӟам но потэ, но дунъясь ӧвӧл, Коля телевизоре долкалоз но мынэсьтым кырӟамме кылымтэ улэ аналскоз.

— Мон шудо воргорон, кузпалэлы тау карисько, кулэ дыръяз тышкаськоз но, шуныт кылзэ но вералоз, — шуэ Николай Васильевич. — Ӟеч семьяе бордам, корка пуктӥмы, пи будэтӥмы, писпу мерттӥмы — со сяна ма кулэ на. Вазенгес толлы пу дасяно вал, табере газ кыскемын. Бен, юрт котырын уж тырме, одӥгзэ лэсьтӥськод кадь, мукет палыз куашканы кутске. Бадӟымез пимы, мон сямен, колхозын ужаны кутскиз вал, колхоз куашкамъя со но городэ кошкиз. Сюлмыз гуртэ ик кыске, та вакытэ гуртамы юрт пуктэ. Нылмы вӧзамы ик улэ. Пичиезлэсь пимылэсь армиысь бертэмзэ витиськомы, толэзь ортчыса, вуыны кулэ. Сомы милям десантник, институтэз йылпумъяса, 22 аресаз армие мынӥз. Туж потэ вал спецротае шедемез, но ӧзгес удалты.

Ортчем аръёсыз учконо ке, ӝыны улонэлэсь тросгес колхозлы сӥземын. Табере пенсие потон сярысь малпаськыны кутскисько ни, но выль техника сётысалзы ке, эшшо дасо арзэ ужасал на. Ӟигар вань дыръя мар тыршонтэм. Та арняме но огшоры ужан бордысен мытӥ вал, но малпанъёсме куспетӥ каризы: Ижевске, пе, мыноно. Озьы мон бадӟым адямиосын ӵош резиденциын пуки, монэ шаерысьтымы Данъян пул вылэ пыртэмзы сярысь свидетельство сётӥзы.

Сӥлы карон ужрадъёсы ветлыны дышемын ӧвӧл, сыӵе интыосын пукыны кепырасько. Шумпотӥ, колхозын ужасьёсты но данъяло шуыса. Залэ люкамъёс пӧлысь кӧня ке мурт гинэ тракторист-машинистъёс вал. Одӥгеныз тодматски. Вавож ёросысь «Колос» хозяйствоысь Вячеслав Шубин вылэм. Артэ пукимы, уж сярысь вераськимы, ӝожоми но ӧжытак. Валамон, гурт удысын вавожъёс кужмоосыз луо. МТЗ тракторъёсты, пе, отын кемалась вал интыын гинэ возё, нош асьсэос иномаркаосын ужало.

Внукенызы

Иномарка шуэмысь, кӧня ке ар талэсь азьло Юськие вайизы «Вальтер» трактор. Удмуртиын соосты соку гинэ эскерыны кутскизы вал, тулыс бусы ужъёс дыръя, пе, ӧз тӥяськы ке, шаерысьтымы гурт хозяйствоосы тросэн ваёзы. Юськие ваем тракторен ужаны мыным оскизы. Одӥг сезонзэ ужай но техникалы синмаськи. Жаль, сыӵе ӟеч тракторъёс милям хозяйствоямы таки ӧз вуэ. Выль комбайнлы но пумит ӧй луысал. Шаплыгес воргоронъёс асьсэ сюлмаськонъёссэс резиденциын ик шараясалзы ни, дыр, нош мон кепырай, сыӵе интыын вераськыны кыл могӟе.

Вавож ёросысь ӟеч хозяйствоослэсь тыршемзэс учкыны коть ветлоно вылэм. Машинае пуксьыса, ширты вал… 40 ар пала тракторен ужасько, нош машина нуллыны, оскоды коть уд, правое ӧвӧл. Егит дыръя мотоен ворттылӥ, нош отӥяз выльысь парта сьӧры пуксеме ӧз поты ни. Пенсие потэмелэсь азьло мынам но калык рад выль тракторен ужаме потэ на вал… 

Валентина Емельянова

Ангелина Снигирева
By Ангелина Снигирева Ноябрь 1, 2019 11:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<