Миллион понна луоз-а вожмаськон?

Ангелина Снигирева
By Ангелина Снигирева 28 ноября, 2019 13:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

2020-тӥ арын Россиын быдэсъяськыны кутскоз «Гуртысь дышетӥсь» программа. Соя гуртысь школае лыктӥсь педагоглы 1 миллион манет висъяськоз. Россиысь Правительстволэн пуктэмезъя, коньдонлэсь 81 процентсэ тыроз федерация, кылемзэ утчано улос бюджет. Гуртысь школаос 191 дышетӥсьлы ёрмо, нош 1 миллион манет басьтыны быгатоз 14 педагог гинэ.

Гуртысь школаосы егитъёс мылкытдэк вуо (Глазов ёросысь Золотари гуртысь школа)
Туспуктӥз: М. Егоров

Удмуртиысь дышетонъя но наукая министр Светлана Болотникова верамъя, Россиысь Просвещениея министерство шаермылы 14 муртлы квота висъяз. Удмуртилэн бюджетаз но та юрттэтлы чаклам коньдон чотамын ни.

Та дыре Дышетонъя но наукая министерствоын «Гуртысь дышетӥсь» программалы документъёс дасяло ни. Пумен тодмо луоз, кызьы радъяськоз дышетӥсьёс пӧлын конкурс, кин дунъялоз программае пыриськись педагогъёсты. Озьы ке но вань улосъёс огкадь чакланы кулэ кӧня ке куронъёсты. Нырысь ик, куриськон гожтыны быгатозы 55 аресозь дышетӥсьёс. Кыкетӥез, 1 миллион манет понна гурт школаын 5 ар ужаны кулэ.

— Ми озьы ик асьмелэсь куронъёсмес тупатыны чакласьком. Конкурс дыръя ватсаса балл сётом сыӵе дышетӥсьёслы, кинлэн бадӟым стажез, вылӥгес категориез, кин быгатэ кӧня ке предметъёсты нуыны, — вераз Светлана Болотникова.

Ёросъёсысь школаосын сяна, та программая дышетӥсьёс быгато пичи городъёсын но ужаны (отын улӥсез 50 сюрс адямилэсь трос ӧвӧл ке). Асьме республикаын сыӵе городъёс пӧлы пыре Можга.

Туэ 1-тӥ сентябрьлы ёросъёсысь школаос 191 дышетӥсьлы кулэяськизы. Уката уг тырмо кунсьӧр кылъя педагогъёс но математикъёс. Дышетӥсьёслы ёрмон тужгес зол шӧдӥське Ува, Дэри, Вотка, Балезино, Вавож ёросъёсын.

Программалэн мукетыз сюлмаськытӥсь ужпумез — нылкышноослэн декретэ кошконзы. Таӵе сюлмаськонэз шараяз вал «Гуртысь эмъясь» программа. Ёросэ бертэм куд-ог нылкышно врачъёс, 1 ар ужаса, нылпи вайизы, бӧрысь 2-тӥзэ вордӥзы, озьы ик 5 ар ортчиз. Удмуртиысь Дышетонъя но наукая министерстволэн таӵе шуге-леке вуэмез уг поты.

— Югдур пӧртэм луэ. Школаын дышетӥсез туж возьмало бере, декретэ лэземзы уз поты. Соку уго нош ик педагог утчано луоз. Та ужпумъя туж чакласькыса решение кутоно, — пусйиз министр.

Вераны кулэ: 1 миллион манет юрттэтэз дышетӥсь быгатоз кутыны ас малпамезъя. Та коньдон сётӥськоз, нырысетӥ арзэ ужакуз ик — 2020-тӥ арын 1-тӥ декабрёзь.

«Гуртысь дышетӥсь» программае пыриськон понна заявлениосты кутозы 2020-тӥ арын 10-тӥ январьысен 15-тӥ апрелёзь. Куронъёсын, конкурсэз ортчытон сярысь иворен тодматскыны луоз udmedu.ru сайтын («Проекты и программы» разделысь «Земский учитель» вкладкаын).

Елена Скворцова

Ангелина Снигирева
By Ангелина Снигирева 28 ноября, 2019 13:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<