Лыдӟисьёс сьӧры — вотэсэ

Ангелина Снигирева
By Ангелина Снигирева Ноябрь 8, 2019 15:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Литературалы, фольклорлы, кыллы, искусстволы, историлы но мукет удысъёслы сӥзем книгаос, удмурт кылын художественной литература — ваньзэ тае лыдӟыны луэ, дорысь потатэк, Национальной электронной библиотекаын.

Национальной библиотекаысь ужасьёс пусъемын Удмуртилэн Кун Премиеныз электронной библиотекаез кылдытэмзы понна
Фото: udmurt.ru

Татын ог 40 сюрс пӧртэм книгаос, документъёс, аудиоматериалъёс люкамын ни. Та проект бордын ужамзы понна 5 мурт: Светлана Потешкина, Светлана Батаногова, Константин Калабин, Надежда Лимонова но Светлана Русских — туэ пусъемын Удмуртилэн Кун премиеныз но «Сообщество» фондлэн премиеныз.

Электронной библиотекаез кылдытыны кутскизы ог 15 ар талэсь азьло. «Книжная палата» отделлэн кивалтӥсез Надежда Лимонова верамъя, ӵапак соку библиотекаосы ветлӥсьёслэн лыдзы кулэсмиз. Со вакытэ Москваысь Россилэн кун библиотекаез но Санкт-Петербургысь Национальной библиотека ӧдъязы книгаосты цифрае выжтыны, соос тэк медаз кылле шуыса. Соослэсь адӟем каризы улосъёсысь библиотекаос но. Удмуртиысь Национальной библиотека нырысетӥосыз пӧлын та ужлэсь пайдазэ валаз. Соку Галина Шантурова (со вакытэ библиотекалэн кивалтӥсезлэн воштӥсез) электронной библиотекаез кылдытонлы сӥзем проект дасяз, сое юнматӥз директорзы Галина Калинина. Проектэз дунъяз Нациосын ужан политикая министерство, со ик юрттӥз компьютеръёс басьтыны.

Нырысь-валысь цифрае выжтӥзы шер пумиськись, вуж книгаосты. Удмурт кылын, удмуртъёслы сӥзем вуж книгаосты утчаса, библиотекарьёс Москвае, Санкт-Петербурге но вазиськылӥзы. Та дыре ик вуж газет-журналъёсты но утчаны ӧдъязы. Кылсярысь, «Гудыри» газетлэсь троссэ номеръёссэ Ижысь кун архивысь, УдНИИ-ысь шедьтӥллям.

Пумен электронной библиотекаез кылдытон борды мукет учреждениос но басьтӥськизы. Ижысь Некрасов нимо библиотека Ижкарлы сӥзем изданиосты цифрае выжтӥз. Аслэсьтыз фондъёссэ ватсаз УдНИИ. Мукет интыосысь архивъёс, библиотекаос но шер пумиськись изданиосты оцифровать карылӥзы.

Та вакытэ вотэсысь библиотека котькуд ар ог 500 книгалы узырме. Но туала изданиосты, цифрае выжтыса, вотэсэ озьы гинэ интыяны уг луы: нырысь авторъёсын, издательствоосын огкыл гожтоно. Та ужен выре «Книжная палата» отделлэн кивалтӥсез Н. Лимонова. Надежда Петровна верамъя, ужез секыт но, тунсыко но — со сярысь фильм лэсьтыны луысал. Но юрттӥськисьёс трос.

— Али администрацимы воштӥськиз, но туала кивалтӥсьёсмы но та проектэз дунъяло, — шуэ Н. Лимонова. — Татьяна Тенсина директормылы тау, со та проектэз калык азьын ушъяз. Нош солэн воштӥсез Анна Семёнова ачиз но электронной библиотекаез кылдытон бордын мылысь-кыдысь тыршиз.

Бадӟым ужез лэсьтэ информационной технологиосъя отдел. Кылсярысь, татысь ужась Светлана Батаногова электронной библиотекаысь коллекциосты чакласа возе, книгаосын списокъёс дася, цифрае выжтэм книгаосты DSpace платформае пуктэ. Нош информационной технологиосъя отделысь программистъёс DSpace платформалэсь ужамзэ чаклало, книгаослы QR-кодъёс дасяло. Со сяна, библиотекаез вотэсын вӧлмыто. Кыӵе ке книгаез утчась луиз ке, со Национальной библиотекалэн бамаз капчиен мед сюроз.

Книгаосты цифровой форматэ пӧртэм сканеръёсын выжто. Кылсярысь, отделын «ЭЛАРобот» тырше. Таиз сканер час куспын ог 1 сюрс 200 бамез «лыдӟе»! 5 минутскын зӧк книгаез цифровой форматэ выжтэ. Отделын со ог 4 ар сылэ ини. Огпол тӥяськиз но, тупатыны Москваысь адями вуылӥз — Ижкарын таӵе техникаез тупатъясьёс ӧвӧл.

Робот ӝог ужа ке но, ужезлэн ӟечлыкез, планетарной сканерен лэсьтэм документъёсын ӵошатыса, лябгес луэ. Электронной библиотекае интыяно книгаосты ваньзэ сямен библиотекарьёс оцифровать каро, асьсэос книга бамъёсты берыкъяса, дась документъёсты тупатъяса — адями дӥне лыдӟымон книга мед вуоз. Нош «ЭЛАРоботэн» оцифровать карем книгаос «Книжной палата» проектлы лэсьтӥсько — татчы пырто библиотекаысь вань книгаосты. Но «Книжной палатаысь» книгаосын тодматскыны библиотекае ик лыктоно луоз.

— Национальной библиотекалэн кадь фондэз нокинлэн но ӧвӧл ини, — шуэ Н. Лимонова. — Соин милям ужмы — сое утьыны, узырмытыны, лыдӟисьёс доры вуттыны. Милемлы, 5 адямилы, таӵе шуд усиз, премиен пусйизы. Со дыре ик вотэсысь библиотекаез узырмыто Национальной библиотекаысь вань отделъёс. Али Россиысь фин-угор калыкъёслэн электронной библиотекаоссы пӧлын Удмуртиысез — тужгес золэз. Со понна тыршиз туж трос адями. 

Анастасия Шумилова

Ангелина Снигирева
By Ангелина Снигирева Ноябрь 8, 2019 15:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<