Кыл кылёз… музее?

Ангелина Снигирева
By Ангелина Снигирева Ноябрь 14, 2019 16:24

Пичи Пурга ёросысь Яган-Докья — бадӟым, йӧно гурт. Но сюлмаськонъёстэк татын но уг луы.

Пичи Пурга ёросысь Яган-Докьяысь музейлэн кивалтӥсез А. Вологжанина.
Туспуктӥз М. Егоров

Шаерысьтымы пӧртэм гуртъ­ёсы вуылыны дышем жур­налистъёсты нырысь ик паймытӥз Яган-Докьялэн туж чылкыт но чебер луэмез. Но тужгес паймытӥз культура юрт: бадӟым укноос выж дорысен ик кутско, соин залъёсын югыт.

Культура юртлэн кивал­тӥсез Галина Сайфутдинова милемыз музее нырысь пыртӥз. Малпамы, ӝог гинэ учкомы. Но пыримы но… потыны ум быгатӥське ни.

— 40 арлэсь кема Яган-Докьяын улыса, мон адӟи, макем быгатӥсь адямиос татын, — шуэ музеез кылдытӥсь но экспонатъёсты люкась Анна Вологжанина. — Озьы малпай, вань та чеберлыкез утёно, калык доры вуттоно. Та музеймес ми 2 ар ӵоже лэсьтыны выримы. Со кӧня ке висъетъёслы люкылэмын. Нырысетӥ висъет быдэсак сӥземын гуртмылэн 150 аръем историезлы: корка котырын кутӥськись вашкала арбериос, ӝӧк-пуконъёс, куиськон станок, посуда, гур, дӥсь…

Нош тани татын — пӧртэм аръёсы совхозэн кивалтэм адямиос, ӟеч ужамзы понна орденъёсын пусъемъёс (совхозамы соос 23 кузя вал!). Нош татын — война вылтӥ киязы 7 пиналэн огназы кылем нылкышноос…

Музеетӥ ортчыса, ми тодӥм, Яган-Докьяын вор­дӥсь­­киллям нылпи писатель, журналист В. Ивашкин, экономика наукаосъя кандидат Ю. Емельянова, Кун Кенешысь депутат, ужбергатӥсь П. Чушъялов, та гуртын практиказэ ортчем кылбурчи Э. Батуев…

Паймымон, музейлэн котькуд сантиметрез, дыр, кыӵе ке экспонатэн тырмытэмын.

— Экспонатъёсмы туж трос шуыса, ваньзы паймо, — шуэ Анна Ивановна. — Тросэз соос туж уродэсь вал ини. Юрттӥз сузэре Татьяна Воронина. Со, зэмос реставратор сямен, котькуд арбериез учкымон карыны тыршиз. Тани та 130 аръем ӝӧккышетэз выльдон бордын, кылсярысь, ӝыны ар ӵоже ужаз.

Музейын шӧдӥське гуртын пӧртэм калыкъёслэн ог-огенызы тупаса улэмзы но. А. Вологжанина та сярысь пӧртэм учыръёсты мадьыны дась, но милемлы дыртоно — калык возьма.

Калыкен пумиськон культура юртын ик ортчиз. (Татын одӥг вӧл-вӧл юртлэн липет улаз клуб но, библиотека но, музей но, сельсовет но.) Культура юртлэн кивалтӥсеныз Галина Сайфутдиноваен ми кемалась тодмо. Ачиз ӟуч ке но, удмурт культураез вала но гажа, кема аръёс ӵоже «Буртчин» удмурт коллективез валтӥз, баянэн шудӥз, коллектив «Удмурт дуннелэн» 100 аръем юбилеяз но вуылӥз.

Галина Сайфутдинова пусйиз, али, пе, ужаськом Яган-Докьяын удмурт культурая центр кылдытон бордын, угось туж юн шӧдӥськом, калыкмы ӟучоме. Нош центр луысал ке, мае ке утьыны быгатысалмы на, шуэ.

Гуртлэн ӟучомемез пумиськон дыръя шӧдӥськиз. Та пумысен ачиз но калык ӝожтӥськиз: нылпи садын удмурт кылэз уг дышето ни, пиналъёсмы, внукъёсмы анай кылзэс уг тодо…

Али школаын удмурт кылэз нуэ Людмила Посадова. Со пенсие потэмын ни, но ужезлэсь люкиськыны уг дырты. Ас вакытаз Людмила Михайловналэн дышетэм пиналъёсыз Удмуртиын но Москваын пӧртэм ӵошатсконъёсы пыриськылӥзы, вормылӥзы. Нош али дышетӥсь куректэ:

— Покчи классъёсын удмурт кыл уг нуиськы. 5-тӥ классысен соос мон доры воксё ӟучомыса вуо. Арняяз 1 час ӵоже «Ӟеч-а, бур-а, удмурт кыл!» книгая дышетӥсько. Трос-а вуттод со дыр куспын?

Покчиос ӟучомо, нош асьсэос арлыдоос удмурт газет-журналъёсты лыдӟо-а?

Пумиськонэ лыктэмын вал гуртысь почтальон Яна Ступак. Мыло-кыдо егит кышномурт пусйиз: туэ гуртын «Удмурт дуннеез» 18 адями басьтэ, ваньзы — арлыдоос. Кылем арын 20 вал. Малы кулэсмизы? Кыкез пересьёс синмазы операция лэсьтӥзы, газет лыдӟемзы уг луы ни… Нош гуртын 1 сюрс 200 пала улӥсез.

Зэм, газет басьтӥсьёс пумиськонын вал ик. Газетъя мылкыдъёссэс но ӧжыт ӧз вералэ. Туж, пе, тунсыко, туж, пе, кельше. Пумиськонэ куд-ог ӟуч нылкышноос но вуиллям, ми, пе, удмурт сямен валаськом ук. Озьыен, соослы но тунсыко.

…Яган-Докьяысь ми валантэм мылкыдын бертӥм. Вашкала бадӟым удмурт гурт, сыӵе синмаськымон музей, нош удмурт кыл татын музее яке «Буртчин» коллективлэн репертуараз гинэ кыльыны быгатоз. Малы асьсэос удмуртъёс кылзылэсь но газетсылэсь палэнско? Та юанлы валэктон таки ӧз шедьы.

Елена Миннигараева

Ангелина Снигирева
By Ангелина Снигирева Ноябрь 14, 2019 16:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<