Кызьы тӧлӟе коньдон?

Ангелина Снигирева
By Ангелина Снигирева 18 ноября, 2019 15:05

Кызьы тӧлӟе коньдон?

Удмуртиын улӥсьёс ноябре 10 нунал ӵоже юромо пӧяса йыртэмасьёслы 6 миллион 500 сюрс манетсэс «кузьмазы» ни. Оглом туэ 10 толэзь куспын шаерамы улӥсьёс банк счётъёсысьтызы 30 миллион 500 сюрс манетсэс ыштӥзы алдаськисьёсын валче.

МВД-ын пӧяськыса уксё лушкасьёс пумысен пресс-конференциын
Туспуктэм: басьтэмын Удмуртиысь МВД-лэн «ВКонтакте» бамысьтыз

Удмуртиысь МВД-лэн Следствиея управленияз усьтӥзы ни кибермошенничествоен нюръяськонъя выль отдел. Озьы ке но калыкез пӧян, банкысь коньдонзэс качан учыръёс толэзьлы быдэ йыло. Туэ 10 толэзь куспын 3 сюрс заявление вуэмын полицие таӵе лушкаськонъёсын валче. Ваньмызъя уголовной уж но ӝутыны уг пӧрмы — оглом али следовательёс 850 уж бордын ужало.

Пӧяськисьёс выль но выль амалъёс утчало. Али та выллем ивортонъёс уката ӵем пумиськыло. Жингыртӥсь мурт ассэ Москваын яке Санкт-Петербургын МВД-ын ужась нима, юалляське, эмъюмъёс яке БАД-ёс ӧд-а басьялэ шуыса. Собере ивортэ компенсация сётон пумысен. Та коньдонэз басьтон вылысь вераны куре банк карталэсь номерзэ но мышказ гожтэм 3 лыдпусэз яке компенсация понна комиссия тырыны ӵектэ.

Мукетаз учырын жингыртӥсь мурт ассэ банк ужась шуэ. Со верамъя, адямилэн банк картаысьтыз та вие кыӵе ке йыртэмасьёс коньдонзэ таланы выро. Со операциосты дугдытон вылысь озьы ик ивортоно, пе, банк карталэсь номерзэ но мышказ гожтэм 3 лыдпусъёссэ.

Таӵе курике берло дыре шедё егитъёс. Соос пӧлын вань огшоры ужасьёс но, кивалтӥсьёс но. 23-35 аресъем пинал муртъёс пуко Интернетын, отысь ик вуз басьто, асьсэос мае ке вузаны выро. Татын ик бергало йыртэмасьёс но. МВД-лэн Следствиея управлениезлэн Следствиея частезлэн кивалтӥсезлэн воштӥсез Елена Петрушина пусъе:

— Пӧяськисьёс — со ӟеч психологъёс. Кылсярысь, Удмуртиысь 46 адямиез пӧяз Челябинск палась чиган нылкышно. Солэн нокыӵе вылӥ дышетскемез ӧвӧл, компьютерез но уг вала. Озьы ке но, банкын ужась кариськыса, сыӵе быгатэ телефон пыр вераськыны — адямиос солы 650 сюрс манетсэс келязы. Секыт югдуре шедемъёс бӧрысь асьсэос но паймемзэс веразы: ма, кызьы чиган луоз? Со банкын ужась сямен рос-прос вераськиз ук!

Туала чиганъёс базарын тунаськыса уг ни сыло. Валамон, огназы но соос уг «ужало». Огез телефон пыр жингыртэ, ивор тодэ. Мукетыз банк счётысь уксёез син куспын кӧня ке картаос вискын люке, собере эшшо мукет Интернет кошелёкъёсы ыстэ. Бӧрысь шуг луэ шедьтыны, кытчы кошкиз уксё. Челябинскысь чиганлэн но юрттӥсьёсыз вал — банкоматъёсысь видеокамераос «адӟизы», кызьы коньдон басьязы кышномуртлэн сузэрез, апаез. Но соосты кыл кутытыны туж шуг.

Елена Петрушина верамъя, 800-лэсь трос уголовной ужъёс пӧлысь йылаз-пумаз вуттэмын ог 200-эз гинэ. Нош коньдонзэ берыктыны быгатоз ог 80 мурт. Уго кошкем уксёлэн пытьыез син куспын ыше.

Россиысь Банклэн Удмурт отделениезлэн кивалтӥсез Татьяна Жиганшина шаерамы улӥсьёсты сак кариськыны куре:

— Эн дыртэ оскыны асьсэды «банкын ужась» шуисьёслы. Банкын ужасьёс уг жингыръяло, тӥляд счётады кин ке пырем но коньдонзэ лушка шуыса. Осконтэм операциос дыръя банк картаез «кысэ» гинэ. Талэсь кышкано ӧвӧл, картаез котьку выльысь «улӟытыны» луэ.

Банкын но полициын ужасьёс пусъё: телефон пыр жингыртӥсьлы соку ик эн оске. Куре сое вераны нимзэ но фамилизэ, кытын интыяськемын солэн банкез, кызьы ужан интыезлэн нимыз гожтӥське, куре телефонзэ вераны, «ачим жингырто» шуэлэ. Эн дыртэ, малпаське. Валантэм учыръёс дыръя жингыртоно банк карталэн мышказ гожтэм телефон номер пыр яке Россиысь Банке 8 800 300 3000 номеръя. Уте асьтэды но, уксё пуйыдэс но.

Еленам Скворцова

Ангелина Снигирева
By Ангелина Снигирева 18 ноября, 2019 15:05