Кызьы ортчиз Удмуртилэн кунлыкезлы 100 ар тырмонлы сӥзем ужрадэз усьтон

Ангелина Снигирева
By Ангелина Снигирева Ноябрь 8, 2019 11:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Йӧ дворецысь арена огдырлы сценалы пӧрмиз. Вылаз удмурт пужыосын выж лёгет кылдӥз, сое воштӥз гуждор, со вылтӥ анай-атаенызы тэтчаса нылпиос бызьылӥзы, эктӥзы, огдырлы быдэс зал бус пӧлы выйылӥз, экранъёс вылын пӧртэм яркыт суредъёс ворекъязы.

Вал удмурт эктонъёс но кырӟанъёс
Фото: udmurt.ru

Шоуэз нуизы удмурт пиос — егит кылбурчи, кырӟась Богдан Анфиногенов но «Мынам Удмуртие» телеканалысь журналист Пётр Пушкин. Ужрад кӧня ке люкетъёслэсь пӧрмемын вал, соос пыр шаермылэн историез, чеберлыкез, аспӧртэмлыкез, Удмуртиез азинтӥсь адямиос син азе пуксизы. «Удмуртлык» люкетаз ненег, сюлэмез небӟытӥсь суредъёс кылдӥзы, гань-гань крезьгур быдэс аренаез шобыртӥз. Эктонъёс но этнофутуристъёслэн суредъёссы пыр возьматэмын вал удмурт воршудъёслэн кылдэмзы, сям-йылолъёсты даурысь дауре утён но азинтон.

«Даурен вордэмын» люкет вераз кунлыкез кылдытӥсь адямиос сярысь. Со вакытысь мылкыдъёсты чуръёсаз возьматӥз Богдан Анфиногенов. Нялтас вераса, ужрад дыръя вань чузъяськем кылбуръёс — солэн.

Нош автономия -со ӵукна пал ӟардон,

Декрет, лозунгъёс но ӧтчам-съезд,

Выль усьтӥськиз дунне,

пӧзиз ӵыж-выль улон,

Удмурт Элькунлэн ӝутскон вакытэз!

Татын ик тодматэмын вал «Родники Удмуртии» проектэн. Кызьы ошмесъёс бадӟым шуръёслы пӧрмо, озьы ик адямиос но огъя историез кылдыто. Соин ик ваньместы ӧтё вӧзамы улӥсь адӟем карымон адямиос сярысь вераны. Со понна Удмуртия 100.РФ сайтлэн «Род­ники Удмуртии» люкетаз гожъямъёсты, туспуктэмъёсты поттоно.

«Глазов — нырысетӥ шоркар!» люкетын син азе пуксиз туала Глазов. Городын хоккеен шудыны яратӥсьёс уно, вань «Прогресс» командазы но. Татысь «Парафраз» театр но быдэс Россилы тодмо луиз ни. Адямиос яратӥзы «Горсад» интыез но — Чупчи шур дурзэс чебер шутэтскон интылы пӧрмытӥз ачиз глазов калык.

«Удмуртия — суперреспублика» — котькуд ёросын вань адӟымонэз, данъямонэз. Та сярысь котькудӥз ёрос ачиз вераз азьлапал гожтэм видео пыр. Татын ик тодматӥзы «Да!УР!» проектэн. 100 ар тырмон улсын шаерамы улӥсьёс эшшо выль 100 интыос сярысь тодозы. Яратоно интыоссы сярысь вераны дэмламын аслыз калыклы. Со понна Удмуртия100.РФ сайтлэн «Даур» люкетаз яратоно интыез туспуктыса поттоно. Ужрадлы кутскон сётэмын луоз Ашальчи Окилэн вордӥськем нуналаз но Интернетлэн калыккуспо нуналаз — 4-тӥ апреле.

Возьматэмын шаермылэн историез но туала улонэз
Фото: udmurt.ru

Ужрадлэсь «Элькунлэн лулыз» люкетсэ нуисьёс вань залэз султытӥзы, киоссэс сюлэмъёссы вӧзы поныны куризы.

«Сюлэмъёсмы — элькунлэн лулпушкыз быдӟа, соос йыгасько ке — лулыз но кырӟа», — шуиз ужрадэз нуись Б. Анфиногенов.

Та бӧрсьы быдэс зал горд тылъёсын югдытӥськиз — ӝуась сюлэмъёс ворек­тӥзы (озьы браслетъёс ӝуатскизы, соосты юромо азьлапал котькудӥзлы сётэмын вал). Нош пинал кырӟась Арина Петрова Удмуртилэсь гимнзэ быдэстӥз.

Озьы ик шоу дыръя Удмуртиысь валтӥсь ужрадъёсын парад ортчиз. Отын шаермылэн пусъёсыз люкылэмын вал. Озьы 100 ар тырмонэз пусъён улсын ортчоно ужрадъёс сярысь верамын вал. «Югыт» пусэз басьтӥзы шарканъёс. Отын декабре Тол бабайлэн усадьбаяз Выль ар кыз котыре элькунысьтымы нылпиос люкаськозы. «Малпан» пусэз кутӥзы ижъёс. Январе Шор площадьын ӟеч малпанъёслы сӥзем фестиваль радъяськоз. Озьы ик вуоно арын асьмеды витё тол но гужем Гурт шудонъёс, цирк искусствоя но П. Чайковскийлы 180 ар тырмонлы сӥзем фестивальёс, Быдӟым Вормонлы 75 ар тырмон, Гербер но трос мукетыз.

Ужрадэз йылпумъяса, чузъяськиз Б. Анфиногеновлэн кылбурез:

Ми гинэ одно кыл кутӥськом,

Вуоно даурмы кыӵеен адӟиськоз.

Данъяськыны кулэ выжыосын.

Удмуртия кыл пушкын — котькудӥз ним.

Супергерой — со ук песятаед.

Котькудӥз ульча — тынад коркаед,

Кытын кар ӵашетон но лысву нюлэскын,

Котькытын но асьме сюлэм-куараосмы.

Дауръёс пыр али мед луоз кылымон:

«Удмуртия — со тон но мон!»

Озьыен, арез усьтонлы кутскон яркыт сётэмын, оскиськом, ар но сыӵе ик вунонтэм, вормонъёсын, ӟеч мылкыдын ортчоз. Азьлань! Выль даурлэсь туссэ дуромы тон но мон!

Ангелина Снигирёва

Ангелина Снигирева
By Ангелина Снигирева Ноябрь 8, 2019 11:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<