Кызьы кысэ оскон?

Ангелина Снигирева
By Ангелина Снигирева Ноябрь 13, 2019 09:18

Кызьы кысэ оскон?

Балезино ёросысь Миктапи (Нововолково) гуртын улӥсьёс 1970-тӥ аръёсысен утьыны выризы черксылэсь юртсэ. Табере сое пытсаны медо.

Миктапи гуртысь черк
Туспуктӥз Е. Сараматова

Кеп шурлэн ярдураз интыяськем Миктапи гуртын черк кылдӥз 1863-тӥ арын. В. Старостинлэн «Книга вятских родов» ужаз пусъемын: татчы сое коръёслэсь ӝутӥзы гуртоос куремъя. Калык ачиз ик материал вайиз, липыны юрттӥз. Вӧсязы сое 1864-тӥ арын. Приходын 22 гуртъёсысь 913 пиосмурт но 977 нылкышно лыдъяськиз. 4 ар ортчыса, черк бордын школа усьтӥськиз. Гуртын со дыре ик светской школа но ужалляз.

— Пу ӝог сисьме. Соин гуртоос огкылэ вуизы: кулэ кирпичлэсь зӧк (бадӟым) черк. Сое 1911-тӥ арын ӝутыны калыклэсь курегпуз бичазы, соин борддоръёссэ юнматӥзы. Али ке но юн сылэ, — вера 90 аресъем Тамара Чиркова.

Удмуртиысь архивъёсын туннэ нокыӵе документ ӧвӧл, черк пытсамын шуыса. Но службаос отын уг нуисько ни. 1937-тӥ арын колхоз сое ю тысь возён склад кариз. Одӥг борддорзэ грузовой машина тэрымон бадӟыматӥз.

— Лёгаса, тӥяса быдтозы шуыса, кыӵе соку куректӥз калык, — тодаз вае Тамара Фёдоровна. — Ми вӧзтӥз кошкеммылы быдэ кирос понӥськомы, нош мукетъёсыз сое зӧк погылянъёсын саптало.

Склад чот возьылӥзы сое Быдӟым ож ортчем бере но. 1970-тӥ аръёсы гуртын клуб ӝуаз. Калыклы люкаськон инты кулэ шуыса, черклэсь юртсэ миськизы, буязы, пушказ сцена шуккизы но клуб каризы. Туннэ ке но черклэн юртэз миктапиослэн шулдыръяськон, люкаськон интызы луэ. 106 коркась ог 300 улӥсьёс понна со шутэтскон инты. Куд-огезлэн сюлэмыз вӧсь луылэ ик, черк пушкын дискотека но репетициос ортчыло шуыса. Но тросэз юртлэн тазьы коть утиськемзылы туж шумпото вал ай. Табере сое пытсаны медо. Шунтыны немаин, пе. Котельнойлэсь шунтӥськись нылпи садзэс угось пытсаны медо, пиналъёс ичи шуыса, нош огназэ со быдӟа клубез шунтон туж дуно усёз, пе. Азьвыл контора юртэз тупатъяло, выльдо ни, клубез отчы поттыны медо.

— Татын вӧл-вӧл вал ай, — шуэ клубен кивалтӥсь Надежда Князева. — Одӥг палаз библиотека интыяськылӥз, мукет палаз ужаллязы нылпиослы кружокъёс. Черк угось кирос кадь лэсьтэмын бере, гуртмылэн музеезлы гинэ но места сюрылӥз. Милям гуртамы Совето Союзысь Герой Артемий Демидович Торопов вордӥськемын. 1941-тӥ арысен война йылпумъяськытозь, фашистъёс вылэ самолётысен бомбаос куялляз. 231 боевой вылет лэсьтӥз, тушмонэз пуштытъяз. Таӵе дано пимылы сӥзьыса, школамы борды мемориал пул шуккимы вал, быдэс деревняен люкаськыса. Но школамес аварийной лыдъязы но, 2013-тӥ арын пытсазы. Мемориал пулэз, куашкатэм борддоръёс улэ уд пачкаты шуыса, ми асьме доры, клубе, пыртӥмы но утимы. Зэм, музейлэн сэргаз сылэ. Черк борды, татын Торопов дышетскиз шуыса, пулэз ошыны умой ӧвӧл. Но табере солы сӥзем сэрег лэсьтыны но места ӧвӧл. Азьвыл колхоз конторалэн юртэз пичи. Отчы библиотекамес но тэрытыны шуг. Нылпиос но олокытчы гинэ люкаськылозы ни. «Купанча» ансамбленымы но олокызьы репетициос ортчытъяломы. Контораын сценаез ӧвӧл.

— Черк жаль. Плиткаосыз Елабугаысь валэн вайылэмын ай. Проектэз но туж умой: огпалаз маке шыпыртыса вераськод ке, мукет палаз ваньмыз кылӥське. Ачиз Иван Чарушин архитектор проектсэ лэсьтэм, шуо, — вера Надежда Азарьевна.

Борддоръёсыз юнэсь. Липетэз гинэ кытӥ-отӥ вия. Туннэ татын ӟырт кезьыт. Озьы ке но «Купанча» ансамбле ветлӥсьёс арняяз 2 пол репетицие люкаллясько. Шокаса ке но, черкез шунтом, шуо. Зэм, одӥг час сяна репетиция ортчытыны уг чидало — кынмо но берто. Кошкемзылы быдэ юртлэсь ӧсъёссэ синвуаськыса пытсало, оло, та берпум пыремзы но кырӟамзы шуыса.

— Школамес куашкатӥзы, нылпи садмес, клубмес пытсаны медо, — ӝожтӥсько миктапиос. — Гуртамы номыр но уг кыльы ни. Тазьы ик умоезлы оскон но кысэ. Черкмес коть утьысалзы ке, со милемлы шумпотон луысал. Куке-соку 500 котыр кузя улӥмы. Ваньмыз вал…

Елена Сараматова

Ангелина Снигирева
By Ангелина Снигирева Ноябрь 13, 2019 09:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<