Кызьы Кедра Митрей улонзэ «гожтӥз»?

Ангелина Снигирева
By Ангелина Снигирева 20 ноября, 2019 17:10

Историяя, кылъя но литературая Удмурт институтысь тодосчилэн Лариса Дмитриевалэн Кедра Митрейлы сӥзем монографиез потӥз.

«Творчество Кедра Митрея: литературные модели и жизненные стратегии» книгаын возьматэмын писательлэн кыдамез, улон шоры учкемезлэн воштӥськемез. 
Л. Дмитриева эскере К. Митрейлэсь революцилэсь азьвыл гожъямъёссэ, автобиографиезлэсь рукописьсэ (сое асьмеос «Дитя больного века» нимын тодӥськом), «эгодокументъёссэ» (гожтэтъёссэ, тетрадьёсысь заметкаоссэ). Тодосчи понна вань та гожъямъёс одӥг бадӟым текстлы пӧрмо. Со сяна, Л. Дмитриева К. Митрейлэн лыдӟиськон сюрестӥз «кошке», солэсь яратоно произведениоссэ бугыръя. 19-тӥ даурлэн пумыз но 20-тӥ даурлэн кутсконэз, та вакытысь адямиос, учыръёс возьматэмын. Ваньзэ тае лыдэ басьтыса, Л. Дмитриева возьматэ, кызьы К. Митрей улонзэ «гожтӥз». К. Митрей творчествоен вазь вырыны кутскиз, егит дыръяз ик писатель луыны малпаз. Соин улонэзлы сценарий гожтэ кадь бӧрысь сое произведениосаз возьматон понна.

К. Митрей та вакытысь пӧртэм рольёсты мерта но воштэ. Аслэсьтыз зэмос ымнырзэ, пуштроссэ усьтыны выремъяз пушказ эчешон кылдэ. Но шуг-секытъёссэ писатель юнме шорысь уг малпа, улонэн уг шуды. Ваче вуо солэн удмурт крестьян семьяысь потэмез но тодон-валан пала кыстӥськемез, осконлэсь куштӥськемез но улыны мугъёс утчамез. К. Митрейлэн аслыз пумит ожмаськемез гань-гань улыны ӧз сёты: семинариысь улляса кошкемезлэсь азьвыл врачъёс солы депрессия диагноз но пуктӥллям.

К. Митрейлэн сюресэз — утчаськон. Осконлэсь палэнскыса, со зэмлык утча. Дуннеын зэмлык ӧвӧл шуыса вала но ассэ быдтон калэ вуэ. Бӧрысь вала: улоно, матысь адямиез яратыса, мукетъёсызлы юрттыса. Озьы солэн удмурт калыкез югдытыны мылкыдыз ӝутске. Л. Дмитриева пусъе: К. Митрейлэсь дуннеез шӧдонзэ литература но юн воштӥз. Классикъёсты лыдӟеменыз, воштӥсько солэн учконъёсыз, идеалъёсыз. Та вакытэ Россиысь тросэз национальной писательёс таӵе ик малпанъёсын, утчаськонъёсын улӥллям: мордва Александр Завалишин, чуваш Мишши Сеспель, коми Каллистрат Жаков…

Л. Дмитриевалэсь тодослыко ужзэ романэз кадь лыдӟоно. К. Митрейлэн улонэныз но творчествоеныз тодматэмез сяна, монография удмуртъёслэсь улон-вылонзэс, бугырес вакытэз умой возьматэ. Нимысьтыз пусъем потэ на книгалэсь чебер вылбамзэ — сое суредаз Удмуртиысь тодмо дизайнер Азат Романов.

Анастасия Шумилова

Ангелина Снигирева
By Ангелина Снигирева 20 ноября, 2019 17:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<