Кунлык кутскиз Глазовын

Ангелина Снигирева
By Ангелина Снигирева Ноябрь 12, 2019 14:05

Глазов 1921-тӥ арын январьысен июнёзь Удмурт автономилэн шоркарез вал. Кызьы кылдӥз кунлыкмы, кин со понна трос сюлмаськиз, кыӵе мылкыдын улӥз со вакытэ калык?

Та юртын ревком интыяськиз

Сарапул яке Ижкар?

1920-тӥ арын 4-тӥ шуркынмонэ Удмурт автономия сярысь декрет потэм бере Сарапулысь Удмурт комиссариатлэн ужез эшшо но тросгес луиз. Нырысь ик кылдытоно вал кивалтон ёзъёс, собере, бускель улосъёсын огкыл шедьтыса, юнматоно элькунмылэсь границазэ. Туж сюлэмшугъяськытӥз экономика. Угось Граждан ож бере заводъёс уг ужало, трос калык быремын яке пегӟемын тӧдьыосын. Кылемез жадемын, сютэм улэ, висе. Куд-огезлэн совето властьлы осконэз кысэмын вал ини. Юнме-а удмуртъёс таӵе гожтэтъёс ог-огзылы ыстылӥзы: «улон ӧраз уг пыры — люкето коммунистъёс»; «тӧро юыса улэ, лушкемен нянь вуза, аслыз басьтэ тарантас, сапег но сӥль»; «милицаос юыса уло…, партиысь улляно». Соин нырысь ик кулэ вал калыкен огкыл шедьтыны. Валэктоно, марлы кулэ кунлык, кызьы со удмуртъёслэсь асваланзэс ӝутоз, эрик но шудо улон сётоз.

Огшоры калык гинэ ӧвӧл, улонэз ӧз валаллялэ коммунистъёс но. Юан потӥз шоркарлы кыӵе городэз быръён ласянь но. Ижкарез яке Сарапулэз карыны луысал. Но Сарапулысь ӟуч коммунистъёс-кивалтӥсьёс тае кулэен ӧз лыдъялэ. Удмуртъёс, пе, пазяськемын пӧртэм улосъёсы, огинын уг уло, кунлыкез валанзы ӧвӧл, дышетскем калыксы ичи. Соин ик Сарапул уездлэн кӧня ке люкетэныз автономиысь потӥз, куриськиз Пермь губерние. Ижкарысь коммунистъёслы но Удмурт комиссариат ӧз оскы. Удмурт автономиез кылдытӥсьёс Иосиф Наговицын но Трофим Борисов та пумысен трос гожъяллязы. Т. Борисов «ижевцы — самостийники» шуылӥз (1918-тӥ арын Ижын калыклэсь бугыръяськемзэ тодэ вайыса, калыклэсь Горд армилы лек пумитъяськемзэ но тӧдьыосын кошкемзэ малпаса, вылды). Нош Иосиф Наговицын таӵе кылъёсын валэктӥз, малы Иж посёлок шоркар ӧз луы: «Ижын асьмеос ӧтьымтэ куноос луысалмы». Соин шоркарез Глазове выжтӥзы.

91,6 процентэз — гуртоос, 8,4 процентэз — городъёс

Кин но со, оло, малпалоз, комиссар вордскем палъёсаз матэгес кариськиз шуыса. Угось ачиз И. Наговицын потэмын Глазов уездысь Туктым гуртысь. Дано революционер, большевик 14 ар ӵоже ӵыжы-выжыосыз доры ӧз бертылы. Нырысь Вятка губерниын (Вятка, Уржум), собере Уралын (Екатеринбург, Кыштым, Уфалей) большевистской подпольной ужен выриз, тюрьмаысь тюрьмае но ссылкаысь ссылкае Красноярск, Енисейск, Иркутск губерниос пыр ортчиз. Собере кунгож сьӧры пегӟиз. Неугомонный Пётр (И. Наговицынлэн партийной кушем нимыз) улӥз Бельгиын, Франциын, Англиын, Швейцариын. 1917-тӥ арын революция бере со анай-атаезлы ӝожомыса гожтӥз вал тазьы: «Россия сярысь малпанэ Швейцариен берытскиз». Угось пытсэт сьӧрын кырмиськем ты висёнэз нош ик усьтӥськиз, соин эшъёсыз сое санаторие йӧнатскыны келязы. 1919-тӥ арын толсуре гинэ коммунист И. Наговицын вуиз Россие — Москвае.

Нош 1921-тӥ арын 5-тӥ толшоре ВЦИК гожтэ автономия кылдытон сярысь декрет, юнматэ огдырлы гинэ кылдытэм кивалтон ёзэт — Ревком. Ревкомлэн тӧроез луэ И. Наговицын. Юрттӥсьёсыныз — Т. Борисовен, С. Барышниковен, Н. Шутовен, П. Стрелковен, И. Плотниковен — со лыктэ пичи гинэ каре.

Глазов калык митинге потӥз удмурт автономилэн кылдэмезлы шумпотыса

Кыӵе нош вылэм соку Глазов? Ог 6 сюрс адями пӧлысь 1 сюрс 500-эз гинэ ужа. Кар шымырскемын сютэм улонлэсь, курадӟонлэсь, кезьытлэсь. Угось толъёс со вакытэ туж кезьытэсь вылӥллям. Коркаос пурысьтамын, кырыжскылэмын, гонтэм атасъёс музэн сыло шер-вай кылем кенеръёс сьӧрын — город сярысь тазьы шуылӥз чекист Даниил Глазов «Записки чекиста» тодэ ваёнъёсаз. Ревком интыяськиз М. Столбов купецлэн 2 этажъем чебер кирпич коркаяз (нялтас вераса, Сарапулын Комиссариатлы висъямын вал лапег гинэ пу корка).

9-тӥ тулыспалэ Ревком поттӥз нырысетӥ постановление. Соя Удмурт автономной областьлэн быдӟалаез луиз 30,3 сюрс квадрат иськем, отын вал Глазов, Ижевск но Можга уездъёс. Берлогес кылдӥзы на Дэбес но Сьӧлта уездъёс. Малпамын вал, та черкогуртъёс но городъёслы пӧрмозы шуыса. Областе пыризы: Вятка губерниысь Глазов уездлэн 27 волостез, 14-ез — Елабуга, 12-ез — Малмыж но 18-эз — Сарапул уездъёсысь. Улӥз 691 сюрс адями (91,6 процентэз — гуртын улӥсьёс, 8,4 процентэз — карын улӥсьёс). Национальной составезъя 54 процентэз вал удмуртъёс, 42,2 процентэз — ӟучъёс, 3,8 процентэз — бигер, бесерман, пор калыкъёс.

Выль улонэ вамыш

Туж тунсыко луизы автономиез кылдытонлы сӥзем сӥё-дано ужрадъёс. 27-тӥ тулыспалэ Глазовын ортчизы манифестациос, митингъёс. 10 часын адямиос «Уж — калыклэн шудэз», «Дышетон югдытоз калыклэсь улонзэ» гожтэм транспарантъёсын, горд флагъёсын ульчаосы потӥзы. Колонна ортчиз Преображенской собор вӧзтӥ, мынӥз Граждан ожын бырем гордармеецъёслэн шайвылазы. Отын митинг ортчем бере калык понна дунтэк возьматӥзы спектакльёс но кинофильмъёс. Нош 7 часын ӝытазе партийной но советской кивалтӥсьёс Народный домын кылзӥзы Ленинлы но национальной политикалы сӥзем докладъёсты. Туж бадӟым саклык висъямын вал нылпиослы, коммунизме вамыштӥсь егитъёслы. Ревкомлэн косэмезъя роно соослы нимысьтыз висъяз сиён-юонэн паёк, мед гинэ манифестацие потозы шуыса.

Ревком 15-тӥ тулыспалэ кылдытӥз кивалтон ёзъёссэ. Отчы, Сарапулысь лыктэм муртъёс сяна, пыризы на Вятка губерниысь ужасьёс (РКП(б)-лэн нырысетӥ секретарез С. Барышников, ОБЧК-лэн кивалтӥсез Н. Шутов), Ижысь «Удмуртская правда» газетлэн редакторез В. Матвеев, Глазовысь уездной исполкомысь адямиос (Антонов, Братчиков, Бабинцев, Кендзовский, Куликов).

Дышетскисъёс удмурт автономилы сӥзем манифестациын. 1921-тӥ ар, 27-тӥ толсур

Нялтас вераса, тӧролэн ӝӧказ кыллё вал ини областе лыктыны мылкыд карисьёслэсь 160 пала куриськонъёс. Удмурт специалистъёс но мылкыдзэс вераллязы гуртъёсы мыныны но выль улон лэсьтыны. Уг тырмо вал кивалтӥсьёс. Ӝӧк-пукон, карандаш-чернила, бумага гинэ но шуг вал шедьтыны. Выль вуэм адямиослы кулэ вал юртъер но. Тани, шуом, Кузебай Герд, Глазове лыктыкуз, сьӧраз, семьязэ сяна, ваем скалзэ но. Лыктэмъёслы квартираос шедьтэмын вал. Ачиз И. Наговицын Каменских кузёлэн Георгиевской ульчае интыяськем коркаяз улӥз.

Оглом вераса, июнь толэзёзь Ревком быдэстӥз вань бадӟым ужпумъёсты. Кылдытӥз партийной но советской кадръёсты дасянъя школа. Ортчытӥз нырысетӥ партийной конференция. Озьы ик Глазовын ортчиз комсомолецъёслэн нырысетӥ съездзы.

1921-тӥ-1922-тӥ аръёсы Удмуртиысь калык, мукет калыкъёс музэн ик, чидаз сютэм улонэз. Гуртъёсын крестьянъёс ӝутскылӥзы властьлы пумит. Лек мылкыдын сутылӥзы-таркаллязы нянен кеносъёсты, чугун сюресэз. Апрель но май толэзьёсы Ревком быгатӥз буйгатыны ӟырдам калыкез, зӥбломытӥз бугыръяськонэз. Дунтэк ужаны мобилизовать карем воргоронъёсты Ревкомлэн тӧроезлэн куремезъя гуртъёсазы лэзизы. Озьы калык огдырлы буйгаз. Соку 
И. Наговицын вазиськиз Россиысь кивалтӥсьёслы, юрттэт курыса. Но юрттэт беромыса вуиз. Трос калык быриз, сютэм улыса. Ачиз Наговицын ужаз, жадёнэз но висёнэз валатэк, уйёссэ кӧлатэк, ваньзэ чидаз, оскиз: удмурт калык понна тазьы тыршемез юнме уз луы.

Июнь толэзе ужпум ӝутскиз огдырлы кылдытэм Ревкомез пыраклы воштыны Калык депутатъёслэн съездэнызы но шоркарез Ижевске выжтыны. Таяз учыре Ижкарлы нокин пумит ӧз луы ини. Калыклы валэктэмын вал тазьы: Ижкар областьлэн шораз интыяськемын, отын трос заводын ужасьёс, коммунистъёс, ӟечгес но тросгес кивалтон юртъеръёс. Озьы шоркар Ижкаре выжтэмын вал.

Люция ВОЛКОВА, Глазовысь шаертодонъя музейысь тодосчи

Туспуктэмъёсты сётӥз Глазовысь шаертодонъя музей

Ангелина Снигирева
By Ангелина Снигирева Ноябрь 12, 2019 14:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<