Книга пӧлын улон — бадӟым шуд

Ангелина Снигирева
By Ангелина Снигирева Ноябрь 13, 2019 09:26

Шаркан ёросысь Быгы гуртысь библиотекарь Наталья Коробова ужзэ туж яратэ. Мукет гуртъёсын тросгес ӝожтӥсько ке, калык лыдӟиськемысь дугдэ шуыса, Наталья Александровна озьы уг малпа. Книгаез со лыдӟисьлэн дораз ик вуттыны дась.

Быгы гуртысь библиотекарь Н. Коробова

Библиотекаын Наталья Александровна 23-тӥ арзэ ужа ни. Школаын дышетскыкуз ик, лыдӟиськыны яратэ вылэм, соин ик документъёссэ Удмурт кун университетысь удмурт филологияя факультетэ сётэм. Татчы дышетскыны пырон понна одӥг баллэз тырмымтэ, ӝожомыса нылаш дораз бертэм.

— Но гуртын кема ӧй пукы, дэмлазы: библиотекаын, пе, места вань, ужаны, пе, уд кутскы-а… Озьы библиотекарь луыса ужаны кутски, туж яраз. Вуоно араз культурая колледжысь библиотекарьёсты дасясь ёзэ дышетскыны пыри. Озьы университетэ пырымтэе шудэн берытскиз. Библиотекарь луэмме ноку ӧй жалялля. Татын мон ялан выль книгаос пӧлын. Калык но юалляське: Наташа, кыӵе выль книгаед вань ни? Ачид лыдӟид-а, яраз-а?

Наталья Александровналэн верамезъя, библиотекаын ӵем гинэ шара лыдӟонъёс ортчытъяло, отчы школаысь нылпиос ветло. Кылсярысь, котькуд вторнике — 1-тӥ классэ ветлӥсьёс, котькуд средае — 2-тӥе. Лыдӟонъёс дыръя нылпиос асьсэос но гуртазы лыдӟем книгаоссы сярысь мадё.

— Лыдӟиськись адямиос котьку вал, азьвыл но, али но, — шуэ библиотекарь. — Бен, шуо: компьютер книгаез воштэ ни. Но мон малпасько, озьы уз луы. Книга — со книга. Сое нокыӵе компьютерен уд ӵошаты, сое кие кутыны, соин ӵош гинэ улыны луэ. Зэм, совето вакытъёсы газет-журналъёс тросгес басьто вал, али ичигес ни, туж дуно усе. Но республикаямы потӥсь вань удмурт изданиосты ми басьтӥськомы — «Удмурт дунне», «Ӟечбур!», ёросамы потӥсь «Вестник» газет.

Нош мае меда гурт калык али тросгес лыдӟе?

— Кӧня адямиос, сомында ик куронъёс. Шумпотӥсько, калык али нош ик классикаез лыдӟыны кутскиз. Тани Л. Толстойлэсь «Война и мир» книгазэ ог 40 аресъемъёс но лыдӟыны басьяло. Куд-огез жингыртэ: умой ӧвӧл, тазьы куриськом шуыса, но гуртамы ик уд-а, пе, вайы кыӵе ке книга. Шуисько: мон шумпотӥсько гинэ, книга куриськоды шуыса, кыӵезэ ваём? Ма, тон, пе, ачид тодскод, кудӥз аслыд яраз, сое ик вай…

Ачим мон удмурт гожъямъёс пӧлысь И. Гавриловлэсь «Вордӥськем палъёсын», Г. Красильниковлэсь «Арлэн кутсконэз» произведениоссэс яратӥсько. «Вор­дӥськем палъёсын» романэз 3 пол лыдӟыса потӥ ни: школаын дышетскыкум, школаме йылпумъяса, берлозэ — кылем арын. Весь маке вылез шеде на. Нош ӟуч книгаос пӧлысь Л. Толстойлэсь «Война и мир», кунсьӧр литература пӧлысь — Э. Ремарклэсь «Время жить и время умирать».

Доразы газет басьтӥсь­тэмъёс лыдӟиськы­ны татчы ветло. «Удмурт дуннеез» яратыса лыдӟо, тужгес но отын веросъёс, романъёс печатласько ке. Ой, ку мукетыз номер вуоз ни шуыса возьмало, тодэм, пе, потэ ни мар луоз. Книгаен потымтэ произведениосты печатласькоды ке, лыдӟисьёс газетэз туж возьманы кутско, озьы ик «Кенеш» журналэз но витё.

Наталья Александровналэн 2 нылпиосыз. Бадӟымез Ижысь педколледжын дышетске, пичиез — школаын 4-тӥ классын. Удмурт но, ӟуч но сямен лыдӟисько, книгаез яратон анайзылэсь паласькем.

— Гуртмы бадӟым. Тросэз адямиос асьсэ книгаоссэс но библиотекае ваё. Ми, пе, лыдӟим ни, токма кыллё, нош тӥ дорысь эшшо кин ке басьтоз… Трос лыдӟиськисьёсмы пӧлын Ермолаева Людмила Никитична. Вань улонзэ со школаын метематикалы дышетӥз, али пенсиын пуке ни. Одӥг нуналыз но книгатэк уг ортчы, дыр. Библиотекае вуэ ке, ӵем гинэ пукиськом, книгаос сярысь вераськыса.

18-тӥ дауре ай Франциысь тодмо философ но писатель Д. Дидро шуиз: лыдӟиськемысь дугдэм адями малпаськемысь но дугдэ. Соин ик ас азям ужпум пуктӥсько: нуналлы быдэ 5-6 страница ке но лыдӟиськоно. Кыӵе ке муген лыдӟиськыны уг ке ваньмиськы, маке уг тырмы, сютэм кылисько кадь. Огнуналэ ик мон кӧня ке книга лыдӟисько. Уж дорын одӥг лыдӟоно книгае, дорам — мукетыз. Книга пӧлын улон — бадӟым шуд, — шуэ Наталья Коробова.

Елена Миннигараева

Ангелина Снигирева
By Ангелина Снигирева Ноябрь 13, 2019 09:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<