Книгаос пӧлын шудо «Юлтошъёс»

Ангелина Снигирева
By Ангелина Снигирева 20 ноября, 2019 12:33

Пичи Пурга ёросысь Кечол гуртысь библиотекалы туэ 45 ар тырме. Лыдӟисьёсты котьку пальпотыса пумита библиотекарь Валентина Баушева.

В. Баушева но И. Баранова
Туспуктӥз: М. Егоров

Библиотека клубен одӥг юртын интыяськемын. Нылкышно верамъя, огвакытэ юртсы туж алама, куашкан калэ вуэмын вал ини. 2011-тӥ арын татын ремонт лэсьтӥзы. Табере татчы пиналъёс но кружокъёсы ветло, арлыдоос но ӵем гинэ люкаськыло.

Бускельёсыныз — клубын ужасьёсын ӵош — Валентина Аркадьевна туж тупаса улэ. Ӵошен соос пӧртэм ужрадъёс ортчытъяло, гурт калыклэсь улонзэ яркытгес каро. Кылсярысь, клубын ужасен Ираида Барановаен ӵош нылпиосты «Юлтошъёс» театре люказы. «Юлтошъёс» пичи сценкаос, юморескаос пукто, клубын ортчылӥсь концертъёсы котьку пырисько. Ираида Геннадьевна верамъя, ӟеч пьесаосты, сценкаосты шедьтыны туж ик капчи ӧвӧл. Пиналъёсын ӵош В. Баушева но И. Баранова удмурт газет-журналъёсты бугыръяло.

— «Удмурт дунне» газет туж юрттэ, нылпиослы «Кизили» журналысь трос материал шедьтоно. Бадӟым тау шуэм потэ со понна. Озьы ке но удмурт кылын сценкаос, пичи пьесаос тросгес мед луысалзы. Огшоры улонлы матын, котькуд адямилы валамон гожтэмъёс кулэ. Пичиослы но, бадӟымъёслы но гожтэм пьесаослы ёрмиськомы, — огкылысь верало нылкышноос.

Ог 3 ар талэсь азьло кылдэм коллектив табере элькунысь фестивальёсы но пыриськылэ ини. Кылсярысь, кылем арын вуылӥзы нылпиослэн театральной коллективъёссылэн Брангуртын ортчем «Артэ» элькун фестиваль-конкурсазы. Туэ «Театр и дети» фестивальлэн элькунысь люкетаз пыриськизы, постановказэс, видеое гожтыса, ыстӥзы.

— Дорамы ветлӥсь пиналъёс асьмелэн нылпиосмы кадь пото ини. Туж жаль, будыса кошко ке. Ярам, мукетъёсыз сьӧразы кыстӥсько. Бӧрысь пиналъёсмы сярысь газетъёсысь лыдӟиськом. Тани «Дарт» газетын но Данил Клещёв, Андрей Дядькин пиосмы сярысь лыдӟим, туж шумпотӥм, — вера Валентина Аркадьевна.

Огез алама, шуо ужасьёс: пиналъёсты пӧртэм гуртъёсысь автобусэн нулло, соин урокъёс бере ик соослы доразы бертоно луэ. Озьы тросэз мылкыд карисьёс кружокъёсы, студиосы ветлыны уг вутско.

Библиотекамылы 45 ар тырмемзэ одно ик пусъём, ужрад ортчытом, вера Валентина Аркадьевна. Нош та дыре солэн историеныз тодматӥсь стенд радъямын. Вӧзаз ик Пичи Пурга ёросысь авторъёслэн книгаоссы адӟытонэ люкамын. Татын удмурт литератураез гажало шуыса шӧдӥське. Лыдӟисьёс ветло — туж шумпотыса ужаськом, вера библиотекарь.

Анастасия Шумилова

Ангелина Снигирева
By Ангелина Снигирева 20 ноября, 2019 12:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<