Кезын пуктӥсько нылпи сад, школа, выльдӥсько сюресъёс

Ангелина Снигирева
By Ангелина Снигирева Ноябрь 13, 2019 16:47

Кезын бадӟым лэсьтӥськон мынэ — ӝутӥсько нылпи сад но школа, выльдӥсько сюресъёс. Таӵе зол воштӥськонэз черкогурт ӧз на адӟылы вал. Кызьы чеберске Кез эскериз Правительстволэн Тӧроез Ярослав Семёнов.

Ӝутӥське нылпи сад

Выль ӝутӥськись нылпи сад вӧзтӥ кезъёс дугдылыса-дугдылыса ик ортчо. Угось со выль проектъя лэсьтӥське, али ик чебер но аспӧртэм адӟиське ни. Ясли-сад 80 нылпилы чакламын, лэсьтӥське «Демография» нацпроект улсын 93 миллион манет тыр.

Юртэз туэ июнь толэзе ӝутыны кутскизы, но гужем зоремен лэсьтӥськон секытэн мынӥз. Садэз туэ ноябрь пумозь вуттыны кулэ ни. Нош ужез йылтэм-пумтэм на. Кезэ ветлон нуналэ липетэз но ӧй на вал. Куазь жаль-жаль зориз, борддоръёс кузя ик ву васькиз. Но лэсьтӥськисьёс оскытӥзы, матысь дыре юрт липемын луоз, бӧрысь пушсэ куасьтозы но выжъёссэ лэсьтон борды басьтӥськозы.

Каргуртысь егит семьяос та нылпи садлэсь усьтӥськемзэ чидатэк витё ини. Алёна Лекомцева — трос нылпиё анай, покчиезлы пиналызлы 3 арес но 2 толэзь тырмем бере гинэ садике шедьыны быгатӥзы. Та дырозь быдэс ар черодын сылӥзы.

— Та вакытэ Кезын 2 но ӝыны аресозь 200-лэсь трос пиналъёс. Та нылпи садэз пуктыса но, черодъёс уз луэ ни шуыны ум быгатэ на. Соин 2020-тӥ-2021-тӥ аръёсы эшшо одӥг ясли-сад пуктон сярысь ужпум ӝутӥськом, — вераз ёрослэн йырыз Иван Богданов.

Каргуртын бадӟым шугъяськон кылдэмын школаос ласянь но. Та вакытэ отын 2 шор ёзо школаосын тодон-валан люкало 1 сюрс 700-лэсь ятыр пиналъёс. Трос аръёс ӵоже нылпиос 2 сменаен дышетско ни. Но вуоно арын югдур ӟеч пала воштӥськыны кулэ — нылпиос выль школае вамыштозы.

500 интылы школаез 2018-тӥ арын ӝутыны кутскизы, но ужъёсты огдырлы дугдытъязы — документъёсы куд-ог воштонъёс пыртоно луиз. Таиз лэсьтӥськон «Дышетон» программа улсын быдэстӥське, талы 342 миллион манет висъямын.

— Выль школаез кез калык 20 арлэсь кема витиз, шуыны луоз, угось сомында аръёс ӵоже школа пуктон сярысь ялан ужпум ӝутылӥм, — вераз И. Богданов. — Нырысь-валысь гуртоос уг ик оско вал, та югдур ӟеч пала воштӥськоз шуыса. Но али адӟо ни: школа ӝутӥське, лэсьтӥськон ужъёс ӝегаса ке но, мыно. Со калыкмылы бадӟым шумпотон.

Но школаез но дырыз дыръя вуттон ласянь сюлмаськон кылдэмын. Ваньмыз тырмыт: ужась киос но, лэсьтӥськон материал но, но куазь уг сёты. Озьы ке но, «Артель» компаниысь валтӥсь инженер Иван Терганов оскытӥз, ӝоген юртэз липозы, бӧрысь пуш ужъёс борды басьтӥськозы.

Вуоно школа

Лэсьтӥськон ужез туэ йылпумъяно, сотэк кун ласянь пуктэм куронъёсты тӥяломы. Озьы федерациысь сётӥськись юрттэттэк но кыльыны быгатом, пусйиз Я. Семёнов. Но ӝог ужаса, ӟечлык сярысь вунэтыны уг яра, ватсаз кивалтӥсь.

Ноку адӟылымтэ выльдӥськон мытэмын Кез сюресъёс вылын но. Ёросын 480 иськем сюресъёс, 4 процентэз гинэ асфальтэн шобыртэмын.

Туэ элькун бюджет чотын каргуртысь 2 но ӝыны иськем тупатэмын. Кез-Кулига-Карсовай сюресын лэсьтӥськон ужъёс мыно на, но бадӟым люкетэз йылпумъямын ни, оглом 12 иськем выльдӥськоз. Зор-кот дыръя азьло татӥ ортчыны ик уг луы вал.

«Гурт сюресъёс» программа улсын выльдэмын Вортча-Гуркошур сюрес вылысь 4 иськемез. Кез-Пужмесь-Чупчи (3,46 иськем) но Дэбес-Кез (3,6) сюресъёс «Кышкыт луисьтэм но ӟеч сюресъёс» проектлы луыса выльдӥськизы.

— Сюресъёс — ёросын одӥгез сюлмаськытӥсь ужпум, — вераз ёрослэн йырыз. — Каргуртысь 2 но ӝыны иськемез тупатон со одӥг шапык гинэ. Но арысь аре пичиен-пичиен та ужез лэсьтӥмы ке, югдурмы шӧдскымон воштӥськоз. Тани нылпи сад но школа пуктӥськизы ке, соос доры нуись сюресъёс но выльдэмын луозы.

Ангелина Снигирёва

Туспуктэмъёс басьтэмын udmurt.ru сайтысь

Ангелина Снигирева
By Ангелина Снигирева Ноябрь 13, 2019 16:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<