Калыкез сьӧраз валтэ

Ангелина Снигирева
By Ангелина Снигирева 28 ноября, 2019 10:00

Якшур-Бӧдья ёросысь Мукши поселенилэсь кивалтӥсьсэ Анатолий Брюхачевез дэмламмы потэ «Гурт адями» конкурслэн «Устоез кивалтӥсь» номинацие. Та мыло-кыдо пиосмуртлэн кивалтэмез улсын гуртлэн улонэз арысь аре ӟеч пала воштӥське.

А. Брюхачев

Анатолий Степанович вордӥськиз Ува ёросысь Пытсам гуртын. Дышетскиз Чайковскийысь мугорез кыдатон культурая институтын. Кышнояськемез бере ужаны кутскиз Мукшиысь школаын физкультурая дышетӥсь луыса. Бӧрысь ужбергатӥсь вал, гуртоос сое бырйылӥзы депутатэ но. Нош 2012-тӥ арысен солы оскизы поселениез валтыны. 7 ар ӵоже Анатолий Степанович ассэ ужаны яратӥсь, удыссэ валась, калыкен вераськыны быгатӥсь адями сямен возьматӥз. Со ноку, нокин азьын уг бадӟымъяськы: бордаз ужась-а со, кытысь ке кивалтӥсь-а, огшоры песянай-а, нокинэ уг висъя, ваньмыныз огкадь вераськыны тырше, сюлмаськонзэс-вазиськонзэс кылыны, быгатэмезъя тупатыны тырше. Со понна ик сое гуртоос гажало, таӵе сямыз калыкез котыраз огазеяны, сьӧраз валтыны юрттэ.

Анатолий Степанович ужаны кутскем бере поселениын улон шӧдскымон воштӥськиз. Шумпотоно, кыӵе арысь аре чеберске черкогурт. Та вакытэ Мукшиын 2 нылпи площадкаос лэсьтэмын, отын гужемзэ нылпиос уг бырыло. Калык куремъя Мукшиын кӧня ке ар талэсь азьло кылдӥз хоккеен шудон площадка но. Егит калык гинэ ӧвӧл, ваньмыз гуртоос солы шумпотэмын. Нош кемалась ик ӧвӧл каток югдытӥськиз, табере со буш уг луылы. Ӝыт но, нуназе но бадӟымъёс но, пичиос но конькиен нискыланы пото. Гуртоос асьсэос ик нискылан интызэс ӵошкытато, сузяса-утялтыса возё.

Главамы ачиз но таза улонэз гажа, гуртоосты но сьӧраз валтэ. Анатолий Степанович кивалтӥсьёс пӧлын элькун Гурт шудонъёсы вуылэ, городкиен шудэ, ыбылӥське, куасэн бызьылэ. Солэн кичӧлтэмез улсын гуртамы Вукузёлы резиденция пуктӥськиз. Тымет дуре выж лэсьтэмын, пыласькон-зымылон инты тупатэмын. Йӧвылэсултон дыръя ӟарт кезьыт вуэ зымылыны артысь гуртоос но вуыло.

Кивалтӥсьмылэн саклык висъя инкуазез утёнлы но. Озьы гурт калык ошмесъёсты утялтӥз. Мукшиын 600 пала улӥсез, со арысь аре паськыта. Али йӧноесь коркаос ӝуто гуртысьтымы ик егитъёс. Отчы ву но газ кыскон пумысен главамы кӧня бызьылӥз!

Анатолий Степанович огкадь саклык висъя арлыдоослы но, егитъёслы но. Гуртоос сюлмаськонъёсынызы, дэмланъёсынызы меӵак солы вазиськыны быгато, угось тодо: юанзы кылэмын луоз, Анатолий Степанович соослы быгатэмезъя юрттоз, кулэ дыръяз гурт калыклэсь мылкыдъёссэ, малпанъёссэ ёрос кивалтӥсьёс дорозь вуттоз.

Тани одӥгез учыр: Кутоншур но Гавриловка гуртъёсысь нылпиос Мукши школае маин ветлыны ёрмылӥзы. Но югдурысь потыны юрттӥз Анатолий Степанович, солэн куремезъя пиналъёсты поселенилэн машинаеныз нуллӥзы. Яке мукетыз: Мукшиын черксы ӧвӧл. Но калык куремъя поселенилэн кивалтӥсез сэрег висъяз, гуртысь кенакъёс сое асьсэос утялтӥзы, ужасьёс гур пуктӥзы. Табере Мукшие арнялы 2 пол Иж-Забегаловоысь баӵко вуылэ.

Кивалтӥсьлэн калыкен ужаны быгатэмез сярысь Мукшиысь азьвыл депутат, али арлыдоос пӧлын одӥгез азьветлӥсь Михаил Шкляев тазьы шуиз: «Анатолий Степанович бадӟым саклык висъя гуртысь культуралы но, спортлы но, уг вунэты школа но нылпи сад сярысь. Сюресъёсмес ӟеч возён понна сюлмаське. Удмурт выжыысь луэмысьтыз уг возьдаськы, калыкен удмурт кылын вераськыны тырше, адямиос пӧлын анай кылзэс азинтон сярысь сюлмаське».

Сюлмо луэмез таиз учырын но адӟиське: 2015-тӥ арын Якшур-Бӧдьяысь семья Мушки тэльёсы губияны лыктэм. Соослэн пичи нылзы анай-атаезлэсь кылем, йыромем. А. Брюхачев сюлмаськемъя гуртоос поисковой группа люказы, соос радын Анатолий Степанович ачиз но вал, со ик нылашез шедьтӥз.

Кивалтӥсьмы воргорон ке но, чеберлыкез дунъя. Озьы ёросын арлы быдэ «Сяськаясь черкогурт» вожвылъяськон ортчылэ. Поселенимы ӵемысь гинэ устоосыз пӧлы шедьылэ.

Анатолий Степановичлэн ёрос но элькун вожвылъяськонъёсы пыриськемез понна трос данъетъёсыз вань, пусъемын Удмурт Правительстволэн Данъян грамотаеныз.

Елена Иванова. Мукши гурт

Ангелина Снигирева
By Ангелина Снигирева 28 ноября, 2019 10:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<