Йырси пужъятӥсь

Ангелина Снигирева
By Ангелина Снигирева Ноябрь 22, 2019 12:56

Кияса ёросысь Уддяди гуртысь удмурт нылмурт Екатерина Тукаева йырси ӵышконъя Белоруссиын ортчем калыккуспо вожвылъяськонын 1-тӥ инты басьтӥз.

T. Тукаева

Тус кылдытыны — быдэс толэзь

— Пичи дыръям атае шоры паймыса учкисько вал, кызьы меда эшъёсыз солы йырзэс ӵышкыны оско шуыса, — вера 24 аресъем Екатерина Тукаева. — Кычым-куачым кароз но — юлтошъёсыз пиналмо, выльмо. Ачим нырысьсэ ӵышкиськи 8-тӥ классын гинэ. Отчыозь йырсиме кызьы но ӧй пунылы.

Но парикмахер луон сярысь Екатерина ноку ӧз малпалля. Кыкетӥ пиналыныз декретын пукон сяменыз шуак валаз: выльысь магазинэ ужаны берытскемез уг поты ни. Озьы йырси ӵышкисе дышетскемез потыны кутскиз. Туэ ар кутсконын Ижысь курсъёсты ортчиз.

— Дышетӥсьмы ӵектӥз Россиысь парикмахеръёс пӧлын Пермьын радъям вожвылъяськонэ пыриськыны. Йырсиез тусъя чебер пуктыны быгатӥськод, пе. Киы мынэ шуыса тодӥсько вал, но вормисе пото шуыса осконэ ӧй вал. Пермьын нырысетӥ инты басьтӥ бере, мыным шуизы: табере Россилэсь данзэ Белоруссиын утёд.

Нош отчы мынон понна сьӧрад модель кутоно. Гуртысьтыз нылъёслы вазиськиз — одӥгез но Минске мыныны ӧз дӥсьты, кепыраськомы, пе. Ижысь Ксения Малышева тодмозэ куриз. Конкурс понна солэсь чиль-сьӧд йырсизэ тӧдьы буяз. Кӧня пол кыӵе но образ ӧз кылдыты солы Екатерина. Быдэс толэзь ӵоже мае но ӧз эскере соос!

— Спортэн вырисьёс ялан тренировкаосы ветло. Мон но ӵошатскон азьын аслым ачим спортсмен кадь потӥ. Огзэ тодӥсько вал: гань-гань кариськыны уг яра, мон сямен ик, мукетъёсыз но тазьы ик дасясько, тазьы ик образ быръё но кизэс волято. Конкурсысен малпаськыны дыр уз луы — причёска лэсьтыны ӝыны час сётӥськоз.

7-тӥ-9-тӥ ноябре Минске «Роза ветров HAIR-2019» вожвылъяськонэ быдэс дуннеысь 400-лэсь ятыр усточиос люкаськизы. Таосты интыязы футболэн шудонъя манеже. Выль причёска, выль образ кылдытӥзы, йырси ӵышкизы, укладка лэсьтӥзы. Екатерина Тукаева сюанлы тупамон укладка лэсьтоно кариськиз, угось йырсиез пужыятэм кадь пуныны быгатэ.

Вормон вуттӥз ужбергатонэ

— Конкурс кутскиз но, мон но, моделе но куалекъяськомы. Ӝыны час куспын вуттӥськоно. Ксения ӝот-ӝот шуиз: эн жаля монэ, эн сюлмаськы, лэсьты озьы, кызьы кулэ, кулэ ке, йырсиме но кыска, — тодаз вае нылмурт. — Котыр уӵертӥ — ваньмыз сямен вожвылъяськонэ пыриськисьёс модельёссылэсь йырсизэс ымныр вылазыгес каро. Малпай: выль кенлэн ымнырыз сайкыт, усьтэмын луыны кулэ. Пунӥсько но малпасько: ӧй вормы ке, картэлэн син шораз кызьы учком? Нош гурт калык мар шуоз? Монэ быдэс гуртэн келязы ук.

Е. Тукаевалэн моделез.

Конкурслы йылпумъянъёс лэсьтӥзы ӵуказе улысаяз гинэ. Со дыр куспын Минскен тодматскы кадь. Но соин йырин ӧй вал. Аслаз но, Ксения Малышевалэн но сюлэмзы путэ ни вал возьмаськыса. 3-тӥ но, 2-тӥ но интыосты веразы ни. Неужто ӧз ворме? Малы Екатериналэн нимтулыз уг чузъяськы? 1-тӥ инты басьтӥмы шуыса веразы но, шумпотэменымы кеськеммес но ӟыгыртӥськеммес ӧм ик валалэ, шуэ.

— Картэ шуиз: вормод шуыса, тодӥсько вал, соин ик лэзи. Со мынам спонсоре вал. Атае шуиз: мон выжые мынэмед. Анае синвуаськиз. Нырысь ик солы тау шуоно — со 2 пичи нылъёсыным кылиз. Со ке ӧй луысал, кузь сюрес вылэ ӧй потысал. Табере мукетыз этап вань на. Соиз вуоно арын Япониын я Франциын ортчоз. Отчы мыныны дасяськоно, — вера нылкышно.

Екатерина Тукаевалы вормемез понна йырси ӵышкыны быдэс набор сётӥзы. Со шоры учкыса, йыраз нырысь ик малпан чилектӥз: табере кемалась кылдэм льӧль малпанме быдэстоно — парикмахерской усьтоно. Озьы бертэмез бере ик Киясаысь огзэ юртэз арендае кутӥз, отчы тӥрлык басьтӥз. Нырысетӥ клиентъёссэ паймытыса вуттӥз ни.

— Киясаын сотэк но 3 парикмахерской ни. Эшшо огзэ кулэ карозы на меда шуыса, йырме ӧй тӥя. Уддядиысь калык коркаям но ӵышкиськыны лыктэ ук. Адямиосын капчи мылкыдо кариськид ке, чылкыт ужад ке, мылкыдъёссэс санэ басьтӥд ке, соосты гажад ке, дорад котьку лыктозы, котькыӵе ужын мед ужалод. Та улонын адямия кариськоно, соку тонэн но капчи луозы, — шуэ Екатерина.

Елена Сараматова

Ангелина Снигирева
By Ангелина Снигирева Ноябрь 22, 2019 12:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<