«Италмас» — мынам сюресэ

Ангелина Снигирева
By Ангелина Снигирева Ноябрь 14, 2019 12:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Туэ Удмуртиысь калык артистка Людмила Ахтариева юбилейзэ пусйиз. Со сяна, таяз арын 30 ар тырме А. Мамонтов нимо «Италмас» кун академической ансамбльын кырӟаны кутскемез дырысен. Талы сӥзьыса, 29-тӥ ноябре Ижысь «Аксион» культурая дворецын «Италмас» ансамблен ӵош бадӟым концерт ортчытыны дасяське.

Л. Ахтариева
Туспуктэм: Людмила АХТАРИЕВАЛЭН архивысьтыз

Нырысетӥ сценаез — укно

— Мон пичи дыръям ик кырӟаны яратӥ, — тодаз вае Людмила Менлатшиновна. — Тодӥсько на: укно дуре султӥсько, форточкаез усьтӥсько но Людмила Сенчиналэсь «А по камушкам…» кырӟанзэ весь кырӟасько вал. Малпалляй, монэ нокин уг адӟы, нош адямиос учко вал, конешно. Школаын дышетскыкум но, ёросэтӥ но, Башкириетӥ но трос кырӟаса ветлӥ. Уфае кырӟанъя конкурсэ вуылэме бере отысь сельхозинститутэ дышетскыны чортӥзы, отын ансамбльзы вал. Но мон шӧдӥсько вал, музъем ужен вырыны туж ик уг тупаськы, гуртын ке но будӥ. Нош артисткалы нокытын уг дышето, малпасько вал. Мынам аткае (атае) школаын химиез нуоз вал, мынам но потӥз пиналъёсты дышетэме. Но университетэ пырыны баллэ ӧз тырмы. Соку ӵектӥсьёс луизы: кырӟаны быгатӥськод, мын Ижысь культурая училищее. Дышетскод, гуртад бертыса, коллектив кылдытод. Сыӵе малпанэн училищее мынӥ — бӧрысь мукетъёссэ кырӟаны дышето шуыса.

Училищеын берпуметӥ курсын дышетскыкум, эше чортӥз: ойдо, «Италмас» ансамбль кырӟась-эктӥсьёсты утча. Урокъёсмес кельтыса, филармоние мынӥм — соку юртэз Советской урамын интыяськемын вал. Сомында адями люкаськем, ог 30 мурт! Котькуд сэргын кин ке кырӟаса сылэ. Учкисько — училищеысь эктӥсьёсмы но лушкемен лыктӥллям. Ми, пе, тӥледыз ӧм адӟе, тӥ но милемыз ӧд.

Комиссиын ог 10 адями тодмо артистъёс вал. Ой, мон курдай. Кырӟаны-эктыны куризы. Анатолий Васильевич Мамонтов шуэ: мар ке мугорыз, пе, пичигес. Соку Евгений Серебренников кырӟась шуиз ини: мыным, пе, пар луоз кырӟаны. Со но ӝужыт ик ӧй вал ук.

Кӧня ке дыр ортчыса, Анатолий Васильевич Японие но Ленинградэ гастрольёсы чортӥз, артистъёсмы, пе, уг тырмо. Нош мынам 3-4 толэзь дышетсконэ кылемын. Озьы ик верай: анкае (анае) сомында дышетӥз, кызьы дипломтэк? Али малпасько: вот курдасьтэм, пумитаз вази ук. Со сюлмысьтыз ик шуиз: соку берт гуртад но ул частушка кырӟаса… Озьы ке но кутӥзы «Италмасэ». Анатолий Васильевичлы улытозям тау шуэме потэ. Лыктэме бере ик шӧдӥз, мынэсьтым мар ке но пӧрмоз шуыса. Куд-ог дыръя тышкаське но вал: давай, тон тае быгатӥськод, тыршы. Куд-ог дыръя тышкаськем но умойлы, дыр. Янгышъёстэ валаськод, адӟиськод: адями оске тыныд.

Ужын оломар но луылэ. Куд-ог дыръя кылъёсты но вунэтӥськод, кезьыт вуэн кисьтэм кадь сылӥськод. Огпол рубильникез киыным лэзьыны шедьтӥ но, сцена котыръяськыса кошкиз. Катанчилэн но лэзиськылэмез вань, мае кезӥбыны шедьтыса. Я кырӟаку серем потыны кутске, адӟиськод ке кинлэсь ке янгыш лэсьтэмзэ.

Ансамблен трос интыосы вуылӥм ини, Россиетӥ но трос ветлӥськом, Америкае, Францие вуылэме вань. Одӥг интыын пукыса, улонлэсь пӧртэм луэмзэ уд валаськы. Нош мукет интыосын, адямиосын тодматскемен, улон огыр-бугыргес луэ.

Ӟеч кырӟанэз кема утчано

— Мон малпасько, «Италмас» — мынам сюресэ. Кызьы лыктӥ, соку ик кельшиз, али но кельше. Ноку но йырам ӧз лыктылы, кытчы ке кошко, «Италмасме» кельто шуыса, — шуэ Л. Ахтариева. — Аръёс ортчыса, тросгес малпаськиськод ужед сярысь, валаськод, уж понна макем бадӟым кыл кутӥськод шуыса.

Конешно, улон мынэмъя ми но воштӥськиськом, коллективамы егитъёсмы трос, кырӟанъёсмы но выльдӥсько. Вуж кырӟанъёсты весь кырӟам уг поты — калык выльзэ милесьтым возьма. Кырӟан сьӧры но трос ветлоно куд-ог дыръя — мед со коллективмылы тупалоз, мур пуштросо мед луоз. Композиторъёс но сокем трос ӧвӧл ини. Вань пинал артистъёс асьсэлэсь кырӟанъёссэс быдэсто. Али Ижысь удмурт композиторлэсь Виктор Бочкарёвлэсь «Вордӥськем юртэ» кырӟанзэ яратыса кырӟасько. «Италмасысь» эшмылэсь Михаил Черновлэсь кырӟанъёссэ быдэстӥськом. Азьло трос кырӟанъёс Уваысь композитор Пантелей Кузнецов гожъя вал. Сыӵе гожъясьёс ӧвӧл ини.

Милям гуртамы, Башкортостанысь Янаул ёросысь Будзя-Варяшын, удмурт кылын кырӟанъёсты кырӟалозы вал, но гуръёссы — бигер. Мыным али но куд-ог дыръя шуо: тон, пе, удмурт кырӟан кырӟаськод, бигер сямдэ вунэты, сопал мелизмъёстэ (гурез воштон амалъёсты) трос эн лэсьты. Со мынам пичиысен ик кылемын ини. Котьку яратыса кырӟасько ми палась кырӟанэз — «Кырӟазегъёс лобо», со но бигер гурен.

Мӧзмись сюлэм

— Пиелы концертэ азьын, 28-тӥ ноябре, 19 арес тырмоз, — вера Людмила Менлатшиновна. — Со али Москваысь Кун гуманитарной университетын нырысетӥ курсын дышетске. Москвае ӵошен мынӥм вал, ветлыкумы бӧрдӥсько: ма кызьы, шуисько, мон табере одӥгнам. Али но тани верасько но синкылие потэ. Али дыши кадь ини. Лэземе туж уг поты вал, мон сыӵе адями — вӧзам мед луоз. Ужын но куд-огез серекъяло вал: пидэ, пе, кызьы лэзёд Москвае, тон ведь со понна курдаса гинэ улӥськод. Но малпай: мынэмез потэ ке — мед мыноз. Собере со но, ачим но медам жалялэ. Конешно, нылпиез вӧзысь лэзёно, соослы ас кожазы улоно, дышетсконо. Вылаз ик, али ог-огеныд кусып возён ласянь улон капчигес луиз — котькуд нунал видео пыр адӟиськиськом, жингыртӥськом. Азьло толэзен-толэзен гожтэт возьмано вал.

Мон ачим туж мӧзмись адями. Пичи дыръям куное но уг ветлӥськы вал. Анкае но шуылӥз: тон гуртын улӥсь адями ӧвӧл, тыныд городын улоно, но кызьы кошкод? Мынам сузэр-апайёсы гуртын созэ-тазэ умой пӧрмыто вал, нош мон скал кыскыны но толком ӧй быгатылы.

Дышетскыкум нырысетӥ араз милемыз Вавож ёросэ картошка бичаны лэзизы. Отын ваньмыз гуртме тодам вайытӥз — картошка, музъемлэн зыныз. Адямиос ӝытъёсы пуко, гитараен шудыса, кырӟаса, нош мон, валес вылын бӧрдыса, кыллисько, гуртэ бертэме потэ шуыса. Малпасько али: эх, Люда, студент вакыттэ арам карид, бӧрдыса-мӧзмыса кыллид.

Нырысетӥ толэзьёсы ялан гуртэ бертылӥ. Сыӵе кыдёке — Башкортостанэ, нӧдэтӥ но, лымыетӥ но. Автобусъёс ӧй вал, маин сюрем попуткаен ветлӥм. Берен городэ то йӧлэз фермаысь нуись тракторен, то валэн уробоен мынӥськом вал. Мон гинэ ӧй — соку тросэз студентъёс озьы ветлӥзы.

Берло аръёсы Выль арез пумитаны гуртам бер­тылӥсько, гужем отпуск дыръя но толэзен гуртын улӥсько. Нырысь Балезино ёросэ апае доры мынӥсько, собере сузэре доры ас палъёсам бертӥсько. Собере одно ик анкае доры.

Али тани уйёсты но уг изиськы ини кадь концерт азьын. Туж но туж курдасько. Шуисько аслым: буйгано. Пырак концерт азьын ик Венгрие гастрольёсын мынӥськом на. Малпасько ай: кызьы ваньзэ вуоно?

Анастасия Шумилова

Ангелина Снигирева
By Ангелина Снигирева Ноябрь 14, 2019 12:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<