История кыле тетраде…

Ангелина Снигирева
By Ангелина Снигирева Ноябрь 6, 2019 09:57

Глазов ёросысь Понино муниципал кылдытэтэ трос пичи гуртъёс пыро. Митькапиын (Митино) та вие 74 адями улэ. «Понинский» совхоззы вань дыръя гуртын улонзы шулдыр вылэм…

Гуртоослэн юрттӥсьссы — мотоблок

Агафоновской

Митькапи гурт Понино черкогурт вӧзын интыяськемын. Соосты Омуть шур гинэ висъя. Гуртэ вуыса, ӟезьы азязы ӟус вылын пукись кышномуртъёс азе дугдӥмы. Кытысь кин луэммес тодэмзы бере пӧлысьтызы одӥгез ури-бери пегӟиз, Лёняез, пе, татчы ӧтё. 10 минут но ӧз ортчы, дӥнямы воргорон вуиз.

— Та гуртын вордскемын, палэнэ ӧй кошкылы, — веранзэ мытӥз 71 аресъем Леонид Кунаев. — Коренной улӥсьёс пӧлысь тужгес арлыдоез лыдъяськисько. Адӟисько, деревня быре, мӧйыос улонысь кошко. Арлыд будэмъя улон сярысь малпаськыны кутсконо вылэм. Вашкалаез сярысь тодэме потӥз, нош юалляськыны нокинлэсь. Озьы мон гурт сярысь вань тодэмме тетраде гожъясько но ёрос библиотекае нуисько. Оло, аръёс ортчыса, гуртмылэн историеныз тунсыкъяськисьёс кылдозы. Пӧртэм документъёсын бугыръяськыса, тодмо луиз: валлё (азьло), пе, та гуртмы ӟуч вылэм — Агафоновской починка. Мемей мачкемъя, Агафоновъёс сое кылдытӥллям. Соос улӥллям уллапалан пичигес коркан. Бӧрысьгес 2-тӥ корка кылдэм, отчы Присмотровъёс интыяськиллям. Вочаксы соос Киров улосысь лыктэмын. Кӧня ке ар ортчыса, татчы улыны выжиллям артэ гуртъёсысь удмуртъёс. Удмуртъёс вуэмен, гуртлэн нимыз воштӥськем. Агафоновской шуыны кузь потэмен, лэся, гуртэз Агафонов Митялэн нимызъя Митино шуиллям.

Л. Кунаев гуртлэсь историзэ ӟеч тодэ

Вазен татын вылэм магазинзы, 4 классъем школазы, колхоз гидъёссы, гурт вӧзысь шур дурын — электростанцизы. Гуртлэн тужгес бадӟым дыръяз 11 корка лыдъяськылэм. Ӵапак сомында ик колхоз валъёссы вылэм. Гуртсы пичи вал ке но, пиналъёссы котькуд юртын 5-6 кузя будӥллям. Леонид Кунаевъёслэн но семьяязы 7 тэшкылиоссы вылэм.

Гуртазы ик улэм фронтовик, радист Николай Андреевич Агафонов. Солэн, пе, треногаен фотоаппаратэз вылэм. Лудъёстӥ поръям, чебер интыосты патретэ пуктылэм.

Леонид Кунаевлэн тодэ ваёнъёсыз туж тунсыкоесь, ыммес усьтыса кылзӥмы.

— 3-тӥ классын дышетскыкум вал кадь со, гуртамы нырысьсэ электро тыл вуиз, — веранзэ азинтэ воргорон. — Солэсь азьвыл начальной школаямы керосин лампаосын дышетскимы. Тыл ӝуатӥзы но, школа борддоръёсмы сьӧд-сьӧд вылӥллям. Чылкыт мед луоз шуыса, соосты пенен зыраса миськимы.

«Работник»

Коллективизация ортчытон вакытэ гуртоослэсь ваньбурзэс огазеяллям но «Работник» колхоз кылдытӥллям. Соку ик троссэ гуртоосты кулаке поттӥллям. Омуть шур вылын Володя вуко сылэм. Со 2 люкетлэсь вылэм, огаз пызь изӥллям, мукетаз палэнысь лыктэмъёс кӧлаллям. Нырысетӥ колхозэн Л. Кунаевлэн айиз кивалтэм. Пересьёссы верамъя, одӥг тулысэ, пе, колхоз лудъёсты быдэсак киын кизиллям. Тысьсы окмымтэен, ог 20 сотка музъем вылэ сяртчы мерттӥллям.

— Отӥяз колхозмы йӧнгес ужаны кутскиз, нырысетӥ трактор кылдӥз, соин Александр Агафонов ужаз, — вера Леонид Кунаев. — Нош гуртысьтымы ик Николай Присмотров автомеханик луыса ужаз. Одӥг полаз газогенераторной машинаеныз гуртэ бертылӥз, вань тэшкылиосты, кузоваз пуктыса, ӝыны иськем кузьда сюресэз нуиз. Ой, кыӵе шумпотӥмы! Туннэ но уг вунэтӥськы нырысьсэ машинаен ворттылэмме. Колхозын трактор-машинаос ичиен троссэ ужъёсты валъёсын быдэсъязы. Мон но пичи дыръям валэн ужай.

Бусельёс

1950-тӥ аръёсы та гурт котырысь пичи колхозъёсты Сталин нимо колхозэ огазеяллям, отӥяз «Луч» вал, нош 1960-тӥ арын кылдӥз «Понинский» совхоз.

4-тӥ классэз йылпумъяса, пиналъёс Понино школаын дышетскылӥзы. Тулыс вулэсь ӝутскемзэ, пе, витьылӥмы. Соку каникул сётылӥллям.

— Егит дырез вунэтод шат, уллапалан поскотнямы (пудо возьыны кенерам инты) вал, отын ми волейболэн, футболэн шудылӥмы, — шуэ Л. Кунаев. — Нош зӧк (бадӟым) пиосмы ӝытъёсы Пониноысь клубе потазы, нӧд куазен соос ботинкаоссэс пельпум вылазы нуллӥзы. Бӧрысь асьмеос но озьы ик карылӥмы.

«Понинский»

«Понинский» совхоз шаерысьтымы одӥгез кужмоез хозяйство вал. Совхозэ ужаны лыктӥсьёслы соку ик улон инты висъяллязы. Митькагуртэ вуэмын Кляпагуртысь Валентина Николаевна Кунаева, Чультяпиысь Антонида Константиновна Васильева но мукетъёсыз. Нылкышноос фермаын ужамын. Оло, туннэ но ужасалзы, но кужмо хозяйство куашказ.

— Татчы бызьыкум, гуртын 11 корка вал, — шуэ Валентина Николаевна. — Бӧ-рысь ини артысь Чультяпи гуртын улӥсьёс трос вуизы, бакча берамы выль ульча кылдӥз. Юртъёсты совхоз лэсьтылӥз, ваньмыз сямен 2 квартираем коркаос. Табере гуртамы 28 коркан 74 улӥсез. Совхоз быриз но, колхоз гидъёс, итымъёс куашкан калэ вуизы. Ярам коть, гуртамы фермер улэ, гурт котырысь бусыосты утялтэ на.

Гурт ульча

Леонид Кунаев но 42 арзэ совхозын ужамын: тракторист, слесарь, комбайнёр, дурись. Кебитын ужакуз, киыз вандӥськыны шедем. 53 аресаз пал суй кылемын ке но, ужлы уг ёрмы.

— Аналсконо ке, гуртысь калыклы ма кыле на — юон, — шуэ Леонид Константинович. — Нош мынам улэм потэ ай. Каль (али) корка пуктӥ, ваньмон дыръям Интернетын бугыръяськисько, кылбур чуръёс гожъясько. Август толэзе Оренбурге вуылӥ, отын инвалидъёс понна «Стихия Пегаса» литературной конкурс ортчиз. Лушкем малпанэ но вань, быдэстыны кылдоз меда. Туж потэ вал Балезино ёросысь Митино гуртын улӥсьёсын пумиськеме. Кыӵеесь меда?

Гурт ульчаетӥ вамышъякум, син шорам йӧтӥз таксофон. Малпай вал, со уг ужа яке ӝог юрттэт сётонъя службаосы гинэ жингыртыны луэ шуыса. Нош со ужа, отысен Удмуртилэн пӧртэм сэрегаз жингыртыны луэ вылэм.

Валентина Емельянова

Туспуктэмъёсыз В. Емельяновалэн

Ангелина Снигирева
By Ангелина Снигирева Ноябрь 6, 2019 09:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<