Интернетын «Куара» юнма

Ангелина Снигирева
By Ангелина Снигирева Ноябрь 28, 2019 13:26

Таяз толэзе Интернет вотэс узырмиз удмурт кылын видеоблогъёсын. Соос нылпиослы сӥземын. Таӵе емышсэ сётӥз мумы-бубыослы чаклам «Аныкай» медиашкола 2 толэзь ужамез бере.

Ижысь Шулаковъёслэн семьязы мыло-кыдо пыриське «Аныкай» проектэ
Туспуктӥз: М. Агафонов

«Аныкай» медиашколаез радъяз азинлыко удмурт егитъёслэн «Куара» огазеяськонзы. Татын дышетскыны мылкыд карисьёс гужем ик ог 60 куриськон келязы. Соос пӧлысь 15-ез кутскизы очно амалэн дышетскыны, мукетъёсыз заочно тодон-валан люкало.

Удмурт анайёслы выль тодон-валан сётыны басьтӥськизы тодмо но адӟем карымон егитъёс. Кылсярысь, «Куара» огазеяськонлэн кивалтӥсез Влад Степанов видеокамераен ужаны, гожтэм записьлы монтаж лэсьтыны визьнодаз. Владислав кема аръёс ӵоже видеоудыслы дышетылӥз «Шундыкар» лагерьын. Бӧрысь та искусство удысын ужанзэ кунгож сьӧрын муромытӥз — пыриськиз фин-угор кинофондлэн кинематографияя калыккуспо школаяз.
Туэ Влад «Диво России» видеопрезентациосъя ӵошатсконын финалэ потӥз. Али со «Куара» огазеяськонлэн проектъёсызлы уен-нуналэн монтаж лэсьтэ, видеоклипъёс кылдытъя.

Удмурт туспуктӥсь Максим Егоров фотокамераен ужанъя мастер-класс радъяз. Фотограф валэктӥз, кызьы туспуктэмез чеберматыны луэ, огшоры стакан яке телефон кутыса, кызьы кадрез туала кароно, кызьы моделен ужано. Вань та тодон-валанэз кутыса, дышетскисьёс ульчаын фотосъёмка ортчытӥзы.

Мукетыз дышетӥсь — элькунысьтымы тодмо блогер, «Инстаудмуртточки» марафонэз ортчытӥсь Вера Wonderbera (Трефилова). Со вераськиз блог нуон сярысь, валэктӥз, кызьы сое тунсыко но туала карыны, тросгес учкисьёсты люканы.

Анай-атайёс, лекциосы ветлэм сяна, дорысь уж но быдэсто. Нырысь ик дышетскисьёс видеосъёмкаос радъязы — бырйизы Лего конструкторен ужанэз. Ижын улӥсь 12 аресъем Степан Скворцов видеокамера азьын Леголэсь машина бичаз, вань ужамзэ удмурт кылын лад-лад мадиз. Пияшез 2 камераен снимать каризы, нимаз гожтӥзы куаразэ. Вань та уж 2 час пала кыстӥськиз. Собере анайёс басьтӥськизы монтаж борды — 50 минутъем съёмкалэсь пӧрмиз 7 минутъем видеоролик. Кылем арняе Степанлэн YouTube видео сайтын аслаз «ЮберПи» каналэз усьтӥськиз. Интернетын та роликез 4 сюрслэсь трос пол учкизы ни.

«Аныкайын» дышетскыса, озьы ик YouTube видео сайтын аслэсьтыз «АзбарТV» каналзэ усьтӥз Лилия Широбокова. Егит анай Варя нылыныз ӵош мадё я бакча сиёнъёс, я арлэн вакытъёсыз сярысь. Широбоковъёс таӵе иворъёсын 2 выпуск лэсьтӥзы ни. Варялэсь мунёен шудэмзэ Интернетын 3 сюрс 900-лэсь трос пол учкизы. Пусъёно созэ но: Широбоков кузпалъёс уло Якшур-Бӧдья ёросысь Кекоран черкогуртын, будэто 2 пиналъёссэс, пукто корка. Гуртын уж быронтэм ке но, егитъёс быгато улонзэс тунсыко карыны, выль тодон-валан люканы.

Егит анайёс видео лэсьтыны дышетско
туспуктэм басьтэмын «Аныкай» проектлэн «ВКонтакте» бамысьтыз

Та дыре «Аныкай» проектлэн командаез эшшо одӥг ролик бордын ужа. Ижын улӥсь 6 аресъем Вера Шулакова Наталья анаеныз ӵош дасясько учкисьёсты паймытыны удмурт ӝӧк выл шудонъёсын.

Медиашколае ветлӥсьёслэн дышетсконзы ӧз на йылпумъяськы. Матысь дыре соос смартфонэн съёмка лэсьтыны визь-нод люкалозы. Собере радъяськоз нимысьтыз марафон: отын анайёс куспазы вожвылъяськозы, фото но видеоужъёс лэсьтыса, текст гожъяса. Вормисьёсты кузьымъёсын пусъёзы.

«Аныкай» проектэз кылдытӥсь Ольга Степанова верамъя, та ужлэсь быдэсмемзэ чаклало шаерамы улӥсьёс но, кунгож сьӧрысь анайёс но:

— Дуннелэн пӧртэм сэрегъёсаз улӥсь удмурт анайёс тау каро, мылкыдзэс верало. Шумпотымон, ужмылэн емышъёсыз вань, удмурт блогъёс кылдо шуыса. Озьы ке но адӟиськом шугъяськонъёсты. Тани заочно амалэн дышетскисьёслы тодон-валан люканы секытгес. Синмысь синме луэ тросгес визь-нод сётыны, интыын ик юанъёсты сэрттыны-пертчыны, валантэм югдур пумысен кенешыны. Соин ик азьланяз малпаськомы ёросъёсы потаны.

Мумы-бубыосты визьнодамзы бере «Куара» группаысь егитъёс дышетозы пиналъёсты. Та дыре удмурт видеоблогер луонъя школае люкало 5-тӥ-9-тӥ классъёсын дышетскисьёсты, отчы гожтӥськыны луэ vk.com/udmurtblogsschool бамын. Кин тодэ, оло ЮберПи Степан но ачиз удмурт кылын выль роликъёс кылдытъялоз, учкисьёссэ паймытъялоз.

Алёна Ионина

Ангелина Снигирева
By Ангелина Снигирева Ноябрь 28, 2019 13:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<