Изэн уд узырмы?

Ангелина Снигирева
By Ангелина Снигирева Ноябрь 14, 2019 12:36

Куддыръя шаеретӥмы лобасько но ӟудӥсько. Кыӵе ке ёросын улӥсьёс дась лэсьтэмзэ но лушкало. Нош мукет гуртысь калык берпуметӥ копейказэ поттэ улон-вылонэз ӟечомытон понна.

Ижысь Жечев пролкаын улӥсьёс сюлмасько капка азьзэс волятыны.
Туспуктэм: izh.ru

Тани Ижысь Первомай ёросысь Жечев пролкае из кисьтазы. Та ульчаын улӥсьёс трос ӝожтӥськизы, урамазы кык бадӟым гопъёсын ву пуке шуыса. Югдурез тупатон вылысь сюрес лэсьтӥсьёс татчы 50 тонна щебень вайизы. Но волятэм сюрес, сутка ортчыса, тодмантэм луиз. Жечев пролкаын улӥсьёс изэз кин кызьы быгатэм нуллӥзы капка, гараж азязы, канава котыре.

Нош куазь зоремысь уг дугдылы. Вуж гопъёс интые нош ик ву люкаськыны ӧдъяз. Озьыен, пролкаын улӥсьёслэн сюрессы кемалы уз чида. Кӧня ке улыса, городысь кивалтӥсьёс доры нош ик ӝожтӥськыса ветлозы. Нош туэ шоркарысь частной секторысь пичи ульчаосты изэн шобыртыны нырысь 8,5 миллион манет висъямын вал. Урамъёсты нормалы тупась карон вылысь эшшо 3,4 миллион манет тыр ватсаса контракт радъязы на.

Табере, пролкаын улӥсь­ёслэсь «тыршемзэс» дунъяны курыса, шоркарлэн администрациез вазиськиз полицие. Уго кыӵе валэктон уж нуоно калыкен — уг тодо. Малы ке шуоно кыӵе ульчае гинэ из уг кисьтало, котькытын но соин кузёяськись муртъёс шедё.

Ӟудыса лобанъям ик мукет суредэз синйылтӥ Пичи Пурга ёросысь Гожня гуртысь. Татысь Библиотечной урамысь пролкаын 5 корка гинэ. Соос дорозь уд вуы, нюк вамен выж ке ӧз луы. Сое возён понна сюлмасько та коркаосын улӥсьёс.

Пичи Пурга ёросысь Гожня гуртын улӥсьёс асьсэ уксёен выж лэсьто.
Туспуктӥз: Е. Скворцова

Нырысьсэ выж лэсьтэмын вал ог 40 ар талэсь азьло. Сое ас кужыменызы татысь ик пиосъёс ӝутӥзы. Нюк вамен рельсаос понӥзы, улаз юбоос пуктӥзы. Нош вылаз вамен тыризы коръёс. Соос ог 5-7 арлы тырмо. Малы ке шуоно котькуд юрт кузёлэн табере машинаез вань. Солань-талань ветлыса, выж быре. Нош кылем арын та пичи выжез сузмытыны «юрттӥзы» чугун сюрес вылын ужасьёс. Уго Гожня гурт пыртӥ чугун сюрес ортче. Татысь рельса улысь изъёссэ вошъязы, нош вуж материалэз — 20-лэсь трос трактор уробо — палэнэ поттазы, дунын вузазы. Выж вылтӥ ворттылӥзы трос тоннаем погрузчик но, мукет техника но. Озьы выж коръёс пыргыны кутскизы.

5 коркан улӥсьёс нокытӥ чагиськыса но кураськыса ӧз ветлэ. «Инициативной бюджетирование» выллем веранъёсты но тодыса ӧз вуттэ. Оло, гурт поселениен кивалтӥсьёс но валэктыны ӧз тодэ. Соин туэ сӥзьыл 5 коркан улӥсьёс котькуд юртысь быдэн 1 сюрс 600 манет уксё бичазы, кор басьтӥзы. Собере пиосъёс лумбыт выж вошъязы. Табере быдэстэм ужзылы шумпото, оско: рос-прос выжзы кема сылоз. Адӟем каре, ижъёс!

Шӧкыч Уром

Ангелина Снигирева
By Ангелина Снигирева Ноябрь 14, 2019 12:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<