Дасьсэ витьыса уг пуко

Ангелина Снигирева
By Ангелина Снигирева Ноябрь 29, 2019 09:28

Удмуртилэн Гражданской форумаз вылӥ кивалтӥсьёс, ужбергатӥсьёс но общественной огазеяськонъёсысь адямиос ӵош ужазы: тунсыко проектъёс сярысь вераськизы, соосты азинтон пумысен кенешизы.

Кез ёросысь Александрово школаысь дышетскисьёс видеоблог кылдытыны грант утӥзы
Туспуктэм басьтэмын «Гражданский форум» «ВКонтакте» огинлэн бамысьтыз

Ӵош ужано!

Ижкарын 22-тӥ — 23-тӥ шур­­кынмонэ Гражданской фо­рум 7 ӧръя ужаз: ужбергатон, лулчеберет, калык ога­зеяськонъёс, егитъёсын ужан по­литика, инклюзия (инвалидъёслы юрттон), дышетскон, улосэз азинтон.

— Али Удмуртиын 1 сюрс 791 общественной огазеяськонъёс — бадӟым ужрадэз усьтыса, вераз Тӧролэн но Правительстволэн администрациенызы кивалтӥсь Сергей Смирнов. — Арысь аре соослэн ужзы золгес но золгес адӟиське, туэ гинэ Президентлэн грантъёсъя фондэз Удмуртиысь проектъёслы 77 миллион манет висъяз, элькунлэн бюджетысьтыз но огъя 40 миллион сётӥськиз. Гражданской форум — инты, кытын азьмынӥсьёс ог-огенызы тодматско, кивалтӥсьёслы сюл­маськытӥсь юанъёссэс сёто.

Форумез Удмуртилэн Об­щественной палатаез, Тӧ­ролэн но Правительстволэн администрацизы но «Сообщество» фонд радъязы.

— Тазэ форуммес общественной огазеяськонъёслэн ужзылы сӥзимы, — вераз Общественной палаталэн ки­валтӥсез Рашид Хуснутдинов, — угось ӵапак соос гражданской обществомес кылдыто. Тыршимы огазе люканы сыӵе адямиосты, кудъёсыз асьсэ проектъёсынызы возьмато, мылкыд вань ке, улонмес ӟечгес карыны луэ шуыса.

Форумез вылӥ дунъяло асьсэос азьветлӥсьёс но. Александра Семёнова трос аръёс ӵоже ини инвалидъёсын ужа, ляб тазалыкен нылпиослы фестивальёс радъялля, соослэсь улонзэс тунсыкогес но яркытгес карон понна проектъёс гожъя.

— Умой, та быдӟа форумын ми пӧртэм ӧръёсын тодматскимы шуыса, — вера со, — асьме удысмылэсь кӧнялы ке палэнскимы но чакламы, кызьы мукетъёсыз ужало. Выль тодмоосынымы, малпасько, азьланяз ӵош ужаломы. Озьы ик, кивалтӥсьёсын пумиськыса, валамы, соосын одӥг сюрестӥ вамышъяськомы шуыса. Ог-огмес кылӥм ке, ужмы но пайдаёгес пӧрмоз.

Дышетонын грантъёс

Форуме быдэс элькунысь сюрслэсь трос адями пыриськиз. Тунсыко юанъёс ӝутӥськизы дышетон удыслы сӥзем площадкаын.

— Татчы ёросъёсысь азь­ветлӥсьёс мыло-кыдо пыриськизы, — вера солэн кураторез, «Школа-кроха» огазеяськонлэн кивалтӥсез Ольга Зосимова. — Со шумпоттэ, угось ми городын, асьме пуртыямы пӧзьыса, соослэсь сюлмаськонъёссэс шӧдытэк кылиськомы, нош татын огкыл шедьтӥмы, пӧртэм юанъёсты сэрттӥмы-пертчимы.

Гражданской форуме пыриськизы Шаркан ёросысь нылпиос
Туспуктэм басьтэмын «Гражданский форум» «ВКонтакте» огинлэн бамысьтыз

Кылсярысь, нылпиосын ужась огазеяськонъёсты сюлмаськытэ, Удмуртиысь Дышетонъя но наукая министерстволэн грантъёс висъясь программаез ӧвӧл шуыса. Грантъёс понна мукет министерствоосы вазиськоно луэ. Сыӵе программаез кылдытон сярысь Дышетонъя но наукая министерствоын матысь дыре малпаськозы.

Школаослэн туж потэ грантъёсын ужамзы, но грант сётъясь фондъёсы юрттэт понна общественной огазеяськонъёс гинэ вазиськыны быгато, бюджетной учреждениослэн таӵе луонлыксы ӧвӧл. Секциын дэмлазы таӵе учыре анай-атайёслэсь огазеяськонзэс кылдытыны.

— Мыло-кыдо анай-атайёс вань, но кагазъёсын бызьылыса, бухгалтериен вырыса, соослэн мылкыдзы ӝог куашка, — ӧпкелё люкаськемъёс, — соин ик умой луысал, та люкетсэ ас вылаз школа басьтысал ке.

Со сяна, егит дыше­тӥсьёслы дэмлало Егитъёсын ужанъя федерал агентстволэн грант сётъясь конкурсъёсаз пыриськылыны, отын грант огазеяськонъёслы гинэ уг, нимысьтыз адямиослы но висъяло.

Удмурт офис

Ӵапак Егитъёсын ужанъя федерал агентстволэсь гран­тсэ басьтӥз Кузебай Герд нимо гимназиысь дышетӥсь, Удмурт школьникъёслэн про­ектъёсъя офиссылэн кивал­тӥсез Юлия Шахтина. Солэн программаез «Наставники» ни­маське.

Офис Кузебай Герд нимо гимназиын интыяськемын. Со быдэс элькунысь нылпиослы малпанъёссэс проектлы пӧрмытыны но улонэ пыӵатыны юрттэ.

— Туала куронъёсъя школаосын дышетскон ӵапак пӧртэм пумо проектъёс вы­лэ пыкъяськыны кулэ, — вера Юлия, — но таӵе ужез секыт радъяны, асьсэлэн ды­шетӥсьёслэн тодон-валанъёссы уг тырмо ке. Соин ик офислэсь ужзэ ми «Наставники» программа бордысен мытӥмы, дышетӥсьёслы ва­лэктӥмы, кызьы школаын проектъёсын ужано.

Пиналъёслэн трос тунсыко малпанъёссы люкаськемын
Туспуктэм басьтэмын «Гражданский форум» «ВКонтакте» огинлэн бамысьтыз

3 толэзь ӵоже вуоно проектировщикъёс огыр-бугыр тыршизы. Азьло «наставникъёс» аспӧртэм дышетскон пыр ортчизы, нош собере ёросъёсын радъяськем «Вуко» семинаръёсын бордазы пиналъёс но итӥськизы ини. Оглом 12 тунсыко проект гожтӥзы. Нылпиос пӧртэм ужпумъёсты ӝутӥзы. Кин ке саклык висъяз шаертодонлы, кин ке — Быдӟым ожысь ветеранъёслы, уно проектъёс удмурт кылэз но лулчеберетэз утёнлы, азинтонлы сӥземын.

Пӧрмытэм ужъёссэс пиналъёс Гражданской форумын экспертъёслы адӟытӥзы, устоосыз проектъёс грантъёс басьтӥзы. Кылсярысь, жюри вылӥ дунъяз Кез ёросысь Александрово черкогуртысь нылпиосты. Соослэн школа улон сярысь удмурт влогъёс (видео блогъёс) но вайнъёс (вакчи серемес видеоос) кылдытъямзы потэ. Форумын соос 1-тӥ видеоенызы калыкез серекъятӥзы ни. Асьсэос та ужзэс рос-прос пӧрмытыны быгатӥзы ке, ёросысьтызы но элькунысь мукет школаослы эстафетаез сётозы, вожвылъяськонъёс ортчытъялозы.

Кезъёсты сяна, жюри Шаркан ёросысь Сосновка черкогуртысь нылпиосты висъяз. Соос Быдӟым оже ветлэм, ож дыръя гуртын тыршем муртъёсын фото-перепись лэсьтозы, туспуктэмъёсын но интервьюосын адӟытон но видеоролик дасялозы.

Грант басьтӥзы Каракулино школаысь нылпиос но. Соос ляб тазалыкен эшъёссы понна сюлмасько: соосын ӵош дышетсконо, ужано, пӧртэм ужрадъёс ортчытъяно, пе.

Нимысьтыз кузьымъёс экспертъёс но люкылӥзы. Кыл­сярысь, Пичи Пурга ёросысь Улӥ Посьтол школаысь пиналъёслы «Шунды» огазеяськон «Вамыш» лагеряз путёвка кузьмаз, «Удмурт дунне» газет аслэсьтыз юрттэтсэ Можга ёросысь Пычас школалы сётыны дась: проектсы сярысь газет бамъёсамы гожтомы, творческой пумиськонэн доразы поталомы.

Огазеяськонъёслы корка

— Форумын ортчем арлы йылпумъянъёс лэсьтӥмы, пусйимы, мар бордын азьланяз ужаломы, — вераз Общественной палаталэн кивал­тӥсез Рашид Хуснутдинов. — Саклык висъяломы национальной проектъёслэн улонэ пыӵатӥськемзылы. Но тужгес но бадӟым емыш, мон малпамъя, Удмуртилэн Тӧроеныз Александр Бречаловен пумиськонын кисьмаз.

Общественной огазеяськонъёсысь азьветлӥсьёс асьсэ ужазы ӵем пумисько одӥг шугъяськонэн: люкаськылыны, ужрадъёсты радъяны интыос ичи. Ижкарысь проектъёслэн «Лифт» штабзы, Эшъяськон юрт ваньзэс уг тэрыто. Ижкарысь 330 огазеяськонлэн гинэ «улон интыез» вань, нош 900-эз котьку но та пумысен шугъяське.

Пумиськонысен Александр Бречаловлы ӵектӥзы Общественной огазеяськонъёслэсь корказэс кылдытыны. Со, пе, юрттысал огъя кужымен выль проектъёс борды басьтӥськыны, ки­валтӥсьёсын ваче ки мыныны.

— Зэм, милемлы кулэ огазеяськыны: кивалтӥсьёс, уж­бергатӥсьёс, огазеяськонъ­ёс ӵош ужазы ке, элькунмес котыр ласянь азинтыны пӧрмоз, — вераз Александр Бречалов. — Мон но мынам командае котьку дась тӥледын вераськыны, проектъёстэс улонэ пыӵатыны юрттыны.

Кылдоз-а Огазеяськонъёслэн корказы? Кылдӥз ке, ку но кызьы со ужаны кутскоз? Таиз валантэм на. Та ӵектонэз котыр ласянь эскерыны кулэ, угось секыт шедьтыны инты, кытчы сюрс­лэсь трос огазеяськонъёс тэрозы. 

Мария Емельянова

Ангелина Снигирева
By Ангелина Снигирева Ноябрь 29, 2019 09:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<