Гидэ выжыясько роботъёс

Ангелина Снигирева
By Ангелина Снигирева Ноябрь 28, 2019 12:14

Алнаш ёросысь «Родина» хозяйствоын усьтӥськиз роботъёсын скал кыскись ферма. Таӵеез ёросын ӧй вал на. Но гидэ пудо пыртэмзы уг луы — роботъёсын ужаны быгатӥсь специалистъёссы ӧвӧл.

«Родина» хозяйстволэн кивалтӥсез В. Максимов
Туспуктэм: Гурт удысъя но сиён-юонъя министерстволэн пресс-службаез

Ёрмон вуттэ кунгож сьӧры

1990-тӥ аръёс хозяйство понна секытэн сётскизы. Выль кивалтӥсь Вячеслав Максимов быгатӥз предприятиез шуг югдурысь поттыны. Туннэ «Родина» ёросын огез адӟем карымонэз луэ. 2016-тӥ арын гинэ Кузили гуртын пуктыны быгатӥзы 200 йырлы туала ферма. Молокопрорводэз, пастеризаторез но йӧлэз сӥятӥсь танкез адӟыса, гуртысь нылкышноослэн синъёссы ӝуатскизы: таӵе капчи ужын кызьы уд ужа, пе. Но ужасьёслы ёрмонэ вуылӥзы ик — калыкез выль ферма но уг гочаты ни.

Выльдӥськон, предприятиез эшшо но юнматон сярысь сюлмаськыса, Вячеслав Максимов выль гид вӧзы эшшо огзэ пуктон сярысь вераськон ӝутӥз. Гуртоос талы пумозяз ӧз оске: таиз но ферма хозяйство понна секытэн сётӥськиз но, вис карытэк кызьы эшшо пуктӥськод на меда, шуизы. Ужась но шедьтыны кулэ ук. Егитъёслэн табере дояркае мынэмзы уг поты ни.

Озьы ке но предприятиын 2017-тӥ арын выль лэсьтӥськон мытэмын вал. 300 йырлы чаклам фермаез 2 ар ӝутыны выризы. Объект 84 миллион манет тыр усиз. Англиын поттэм скал кысконъя Merlin роботъёс ик макем дуно усизы. Роботъёслэн ужаменызы тодматскыны Вячеслав Михайлович кӧня ке пол кунгож сьӧры вуылӥз. Адямиосты гинэ соос уг вошто — йӧллэсь ӟечлыксэ, пудолэсь тазалыксэ но чакланы быгато. Со сяна, учко, пудолэн йӧлаз маиз тырме, маиз уг, верало маин сюдоно. Соин но кивалтӥсь сокем синмаськиз техникалы.

Ферма усьтон нуналэ роботъёсты ас синмынызы адӟыны, вӧл-вӧл гидэтӥ ортчыны гуртоос дэмен люкаськизы. Празднике вуизы артысь ёросъёсысь хозяйствоосын кивалтӥсьёс но.

— Туннэ фермаез усьтон ортчытӥськомы ке но, скалъёсты пыртэммы уг луы на, — ужрадысен вераз Вячеслав Максимов. — Гидэз рос-прос ужатэммы нокызьы но уг луы: роботъёсын вырыны быгатӥсь специалист нокытысь ум шедьтӥське. Сыӵе роботъёсын ужась специалистъёсты туннэ шаерамы уг дышето. Дояркае лыктӥсь но ӧвӧл. Гуртмы пичи, специалистъёс уг тырмо. Туннэ милемлы кулэ зоотехник-селекционер, инженер-электрик.

Роботъёсты адӟыса, куалекъяны кутско скал кыскисьёс но. Олокытӥзэ тӥяд ке, аслыд улон инты уд шедьты ни, шуо. «Родинаысь» валтӥсь зоотехник Любовь Макеева шуэ: выль технологиослы огдыре ик шумпотӥськомы но, куректӥськомы но.

— Роботъёсын ужаны быгатыны кулэ ук. Ужез яратӥд ке, уж дышетоз, малпаськомы. Нош ужез ми яратӥськомы, — вера нылкышно.

«Родинаын» туннэ 1 сюрс 16 сюро таза пудозы. Та пӧлысь 323-ез кысконо скалъёс. Туэ 3 квартал ӵоже татын 19,1 сюрс тонна йӧл кыскемын. Котькуд скаллэсь шорлыдын 6 сюрс 300 килограмм йӧл люкамын. Алнаш ёросын шоро-куспо лыдпус 5 сюрс 700 килограмм. Ужасьёссы кошкизы ке, соосты воштӥсь ӧз сюры ке, «Родинаын» лыдпусъёссы шуак усьыны быгатозы. Куддыр угось больничное потыкузы но, ог-огзэс воштӥсь уг сюры. Таӵе югдурлы паймыса но, хозяйствоын робот басьтӥзы вал.

Дышетон бере кыле улонлэсь

Робот-дояр
Туспуктэм: Гурт удысъя но сиён-юонъя министерстволэн пресс-службаез

Гурт удысъя но сиён-юонъя министр Ольга Абрамова пусъемъя, вуоно арысен чакламын дышетонъя учреждениосты выльдон вылысь грантъёс люкылыны. Егитъёс, фермае лыктыкузы, медаз пайме туала технологиослы. Соосты огдышем сямъя дышетэмысь дугдоно ни. Соин ик вуно арысен производственной базаез воштон борды кутскыны медо.

— Дышетон система уг вуттӥськы хозяйствоослэн куронъёссы но выльдӥськонъёс сьӧры, — шуэ Ольга Викторовна. — Туннэ вузъёсын уг дышето гурт удыслы тужгес кулэ луись специалистъёслы. Соин ик «Родина» предприятие но шуге-леке вуэмын. Солы али аслыз утчано-дышетоно специалист. Кӧня-кӧня сюлмаськон со! Соин ик, Дышетонъя но наукая министерствоен кенешыса, малпаськомы училищеослэн но Ижысь гурт удысъя академилэн дышетон программаосазы воштонъёс пыртыны. Вуоно арысен, оскисько, со ужез вырӟыны луоз. Академия дася зоотехникъёсты, пудо эмъясьёсты. Но туннэ зоотехник ачиз коже предприятиослы кулэ ӧвӧл. Туннэ зоотехник пудо эмъяны но, туала технологиосты ужаз кутыны но быгатыны кулэ. Али Гурт удысъя но сиён-юонъя министерство бордысь компетенциосъя центрын кылдытыны выриськом нимысьтыз бригада. Агроном, пудо эмъясь, тула технологиосъя оператор но зоотехник одӥг кыткетын ужалозы. Соос шуге-леке вуэм хозяйствоослы юрттозы.

Гид пуш ласянь
Туспуктэм: Гурт удысъя но сиён-юонъя министертсволэн пресс-службаез

Алнаш ёросысь ик мукетыз кужмоез предприятие «Молодая гвардия», скал кыскисьёслы паймыса, 400 йырлы выль гид ӝутэ, отчы «Карусель» установка пуктыны малпа. Татчы скал кыскись трос кулэ уз луы ни. Установка час куспын 100-120 йыр скалэз кыскыны быгатэ. Ӵошатон вылысь: робот огкутскемен 1-зэ гинэ кыске. «Молодая гвардиысь» выль фермаын оглом 800 йыр скалзы луоз. Озьыен, робот солы дуно усе, «Каруселен» ӵошатыса. Хозяйствое ужаны лыктӥсь луысал ке, «Карусель» но, робот но ӧм пуктысалмы — ненег кышномурт киослэсь скалэз умойгес кыскись но учкись ӧвӧл, шуэ «Молодая гвардилэн» кивалтӥсез Михаил Крылов.

Ольга Абрамова верамъя, роботъёсын ужась ферма шаерамы эшшо 4 гуртын вань. Хозяйствоос ӟеч улон сьӧры гинэ уйиськыса уг выльдӥсько — ужасьлы ёрмыса но. Туэ ар куспын 12 ферма пуктэмын ни. Гуртоослэн дӥсьтэмзылы, пуктӥськемзылы, улонэз воштэмзылы тау кароно, шуэ министр. Алнаш ёросын ик туэ 5-тӥ ферма усьтӥськиз ни. Соин валче 882 скаллы выль инты кылдӥз. Ар пумозь эшшо 110 йырлы выль объект усьтӥськоз. Туэ 10 толэзь ӵоже ёросын 43,1 сюрс тонна йӧл кыскемын ни. Кылем арын сярысь, со 2,4 сюрс тонналы уногес. Ёросысь гурт удысъя управлениен кивалтӥсь Владимир Медведев пусъемъя, ар пумозь 50 сюрс тонна йӧл кыскыны малпало. Алнаш ёросын табыдӟа лыдпусозь ноку ӧз вуылэ на вал, шуэ со.

Елена Сараматова

Ангелина Снигирева
By Ангелина Снигирева Ноябрь 28, 2019 12:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<