Вырӟон сюрес вылын

Ангелина Снигирева
By Ангелина Снигирева Ноябрь 6, 2019 11:01

Удмуртлы туж кулэ аслэсьтыз историзэ тодыны, уката ик аслаз кунлыкезлэн кылдэмез сярысь. Сотэк со шӧдэмысь дугдэ данлыксэ. Удмурт малпа ке, ми куанересь, дӥсьтӥсьтэмесь, куа­таськисесь шуыса, озьы со тӥя аслэсьтыз пуш кужымзэ.

Гудырес кылъёс

19-тӥ-20-тӥ дауръёслэн вожазы этнографъёс озьы ик гожъязы: кӧня ке ар ортчыса, удмуртъёс сылмозы. Эксэйлэн политикаез «самодержавие, народность, православие» вал бере, вань покчи калыкъёсты «инородецъёс» шуизы. Удмуртъёс но, асьсэлы асьсэос оскемысь дугдыса, аналскизы кадь. Но соосты сайкатӥз революция.

Эксэез куштэмзы бере, 1917-тӥ арлэн нырысь палараз ик, кылӥськиз ӧтён: «Волга котырын улӥсь покчи калыкъёс, огазеяське!» Соку гинэ ӝужась интеллигенция Казаньын кылдытэ Поволжьеысь пичи калыкъёслэсь огазеяськонзэс. 17-тӥ-22-тӥ куартолэзе со люка аслэсьтыз ӧтчамзэ. Со съездын И. Михеев но, И. Яковлев но, Т. Борисов но, В. Крылов но вал. Удмурт шаере бертыса, соос кутско калыкез югдытон уж борды.

Нырысь ик Глазкарын кылдэ культурно-просветительской общество. Со 13-тӥ-14-тӥ инвожое люка нырысетӥ ӧтчамзэ. Отчы вуэ 100 адями. Одӥг нунал кенешыса, делегатъёс пӧлысь ог куиньмосэз кошке, турнаны потоно ни шуыса. Собере Глазов палась удмуртъёс 2-тӥ но, 3-тӥ но ӧтчамазы люкаськозы на. Ӵапак 3-тӥ съездын решение кутэмын вал, Россиысь вань удмуртъёслэсь съездзэс люкано шуыса.

Озьы кутске Россиысь вань удмуртъёслэн 3 съездъёссылэн историзы. Нырысетӥез соос пӧлысь ортче Елабугаын (кылем арын пусйимы ӧтчамлы 100 ар тырмонэз). Кыкетӥез радъяськыны кулэ вал Сарапулын, но Колчаклэнлыктэменыз сэрен сое выжтоно луиз туала Кукмор ёросысь Ныръяла — М. Прокопьевлэн вордӥськем гуртаз. Отын кворум ӧз люкаськы, соин нокыӵе решениос ӧз кутэ. Статусэзъя со съезд луиз совещательной. Нош 3-тӥез ортчиз ни Сарапулын. Ӵапак та ӧтчамын ик ӝутэмын вал Наркомнацын Удмурт комиссариат кылдытон сярысь ужпум. Со луиз удмурт автономиез кылдытонэ нырысь лэсьтэм ӝот-ӝот вамыш. Та ласянь Максим Прокопьев, Трокай Борисов, Иосиф Наговицын луо асьмелэн батыръёсмы. (Соос сярысь туэ «Куинь комиссаръёс» документъёсын книга поттӥз Валентина Хазиахметова. Мон уг вераськы ни Н. Павловлэсь но К. Куликовлэсь азьло потэм книгаоссэс.)

Югдытӥсьёслэн ужзы пыкъяськиз Россиысь калыкъёслэн правооссыя декларация вылэ. Учке, кыӵе гудырес кылъёс татын: «…Недостойной политике лжи и недоверия, придирок и провокаций должен быть положен конец. Отныне она должна быть заменена открытой и честной политикой, ведущей к полному взаимному доверию народов России…»

Тани таӵе декларация бордысен кутскиз Россиысь покчи калыкъёслэн сайкан сюрессы. Политика азинскиз, калыкъёслэн ог-огзылы осконзы, ог-огенызы эшъяськонзы вылэ пыкъяськыса. Кылдӥз Удмурт автономной область. Со аръёсы туж трос уж лэсьтэмын вал удмуртлыкез азинтон ласянь.

Шуккетъёс

Трофим Борисов тыршиз огазеяны вань удмуртъёсты, соос мед сайкалозы но ӝутскозы шуыса. Но калык ужпумъёсты радъянын ӝоген шӧдӥськыны кутскизы мукет тенденциос но. Тани Глазкарын 1-тӥ но 2-тӥ съездъёсы делегатлуыса ветлӥзы священникъёс но, купецъёс но. Нош 3-тӥ съездэ соосты ӧз ни лэзе. Выль власть соосты пумен-пумен палэнтӥз но национальной движениез киултӥз, сюбегатыны кутскиз.

Бен, покчи калыкъёс шоры учкон ласянь Россиын котьку но 2 кужымъёс вожвылъяськизы. Одӥгъёсыз тыршизы калык кусыпъёсыз но кунлыклэсь (государственностьлэсь) кужымзэ утьыны таӵе амалэн: вань калыкъёсыз ӟуче но православие выжтоно, ӟуч калык пушкы сылмытоно. Кыкетӥосызлэн учконзы мукет вал: ойдолэ вань покчи калыкъёсты асьме дорозь ӝутом, юрттом, будэтом соосты, тросгес эрик сётом, мед ас сямынызы, ас валамзыя улозы. Сыӵе учконъёс Россиын котьку но лэйкаса-вошъяськыса улӥзы: я огез, я мукетыз азьпала потылӥзы.

Ленин кулэм бере пумен покчи калыкъёс пӧлысь кыӵе ке сепаратизмез утчаны кутскизы, соослы пумит провокациос лэсьтылӥзы но соосты янгыше уськытыны выризы. Ӵапак озьы пӧрамын СОФИН шуон уж. СОФИН бере демократической национальной движениез куашкато, солы «нацдемовщина» ним поныса. Национальной ужпумъёсты быдэсъя ачиз государство аслаз законъёсызъя. Озьы 1934-тӥ арын Удмурт автономной область луэ автономной республика. Кылдо вань государственной институтъёс. Но 1920-тӥ аръёслэн кутсконазы кадь уг ни быгато ас кожазы конференциосы но кенешъёсы люкаськылыны удмурт дышетӥсьёс, удмурт красноармеецъёс, удмурт эмъясьёс, удмурт егитъёс. Котькытчы выжыяське классовой принцип. Озьы луоз 20-тӥ даур пумозь.

1950-тӥ-1960-тӥ аръёс вожын удмуртъёсты вырӟытон ужлы воксё бадӟым шуккет вуиз. Н. Хрущёв кивалтон вакытэ школаын предметъёсты удмурт кылын нуэмысь дугдӥзы. 1-тӥ классысен ик дышетон радъяськиз ӟуч кылын. Сыӵе сюресэ выжонэз мон ачим но пырпотӥ. Начальной школаын вань предметъёсты удмурт кылын нуизы. Мыным вань улытозямлы инъет луиз удмурт кылэз тодон но, удмурт кылын гожъяськон но. Со дырысен ӝыны даурлэсь трос ортчиз ни, будӥзы ни удмурт кылзэс тодӥсьтэм поколениос. Ӝож: югдурез валаны тыршисьтэм адямиос синмамы ик вераны дӥсьто: удмуртъёслэн асьсэлэн кылзэс дышетэмзы уг пот, соос асьсэос анай кылзэс уг тодо. Сыӵеослэсь асьмеос но юаны кулэ: нош мар муген дышетэмзы уг поты? Озьыен, татын трос пумо мугъёс вань. Одӥг калык но огшоры гинэ анай кылзэ уг кушты. 

Александр ШКЛЯЕВ, кылосбур наукаосъя кандидат

Ангелина Снигирева
By Ангелина Снигирева Ноябрь 6, 2019 11:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<