Возьмазы быдэс ар

Ангелина Снигирева
By Ангелина Снигирева Ноябрь 8, 2019 12:03

Глазовысь 3 номеро поликлиника ар пала пытсаськыса улӥз. 1-тӥ ноябре со выльысь усьтӥськиз.

Поликлиникалэн выльысь усьтӥськемезлы эмчиос но, калык но шумпотэмын
Туспуктэм: udmurt.ru

Поликлиникалэн ужаменыз тодматскыны вуылӥз Удмуртилэн Тӧроез Александр Бречалов. Кабинетъёстӥ ортчиз, висисьёслэсь мылкыдъёссэс юаз. Калыклэн шумпотонэзлэн пумыз ӧвӧл.

Калинин ульчаысь трос этажъем коркалэн нырысетӥ этажаз поликлиника ужзэ мытӥз вал ай 1984-тӥ арын. Со борды юнматэмын 11 сюрс адями. Юрт вуж, куронъёслы уг тупа, тупатъяны коньдон ӧвӧл шуыса, кылем арын ноябре югдурез утисьёс косэмъя сое ворсазы. Озьы городысь Левобережье микрорайонын улӥсь калык шуге-леке вуиз. Соосты 2 номеро поликлиникае юнматӥзы, та поликлиникае черодъёс эшшо кузесь луизы — отын, городысь калыкез сяна, гуртысь калыкез но эскеро-эмъяло. Таин валче адямиос тазалыксэс эскерыны аналскылӥзы ни вал.

Улон-вылонзэс капчиятон борды глазовъёс басьтӥськизы дэмен. Микрорайонысь ветеранъёслэн огазеяськонзы ӵектэмен, Глазовысь лэсьтӥськонъя «Контур» огазеяськон 3 номеро поликлиникаез тупатъян борды кутскиз. Тупатъям сяна, кабинетъёсты, коридоръёсты паськытатӥз, висисьёслы югытгес но эркытгес мед луоз шуыса. «Глазовские заводы» холдинг поликлиникае пырон интыез, регистратураез быдэсак воштӥз, выль мебель вуттӥз. Спонсоръёслэсь юрттэмзэс лыдэ басьтытэк, вань выльдӥськон ужъёслы ёрос больница 3 номеро поликлиникалы висъяны быгатӥз 
1 миллион манетлэсь ятыр — со асьсэ чотын поттэм уксё.

«Бережливая поликлиника» программая ужзэс радъяло выль сямен, калык черодын пуконо медам луы, врачъёслэн ужзы мед капчиялоз шуыса. Зэм, табере эмъясьёссы уг тырмо. Но висисьёс выльдӥськонъёслы шумпотэмын, таӵе чебер юртын ужаны табере эмъясьёс но сюрозы, шуо. Поликлиникаез усьтон нуналэ, 1-тӥ ноябре, соос трос кузя люкаськизы. Кин ке терапевт доры пыраз, кин ке грипплэсь вакцина пуктӥз.

Праздник нунал шоры учкытэк, поликлиника 4-тӥ ноябре но ужаз. Лыктэмъёс быгатӥзы вирзэс эскерыны, ЭКГ ортчыны, мукет юрттэт басьтыны. Адямиос городысь кивалтӥсьёслы туж тау каро.

— Поликлиникаын быдэстэм ужъёс шоры учкыса, валано, кызьы кутыны кулэ коньдонэз — ремонт рос-прос лэсьтэмын. Со ваньмыз быдэсмиз, спонсоръёс юрттэмен но больница уксёзэ валаса кутэмен. Озьы ке но городлы кулэ выль туала больница, — шуиз Александр Владимирович.

Елена Сараматова

Ангелина Снигирева
By Ангелина Снигирева Ноябрь 8, 2019 12:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<