Антология — литературалэн бусыез

Ангелина Снигирева
By Ангелина Снигирева Ноябрь 19, 2019 16:30

Удмуртиысь 3 писательёс шедизы Россиысь калыкъёслэн туала прозазылы сӥзем антологие. Озьы Вячеслав Ар-Серги, Лидия Нянькина но Елена Миннигараева писательёслэн чуръёсынызы быдэс Россиысь лыдӟисьёс тодматскыны быгатозы.

Ӵыж выль потэм антологиез Е. Миннигараевалы кузьма Печатья но ивор вӧлмытонъя агентстволэн кивалтӥсез А. Власов

Та нуналъёсы шаерысьтымы Печатья но иворъёсты вӧлмытонъя агентствоын антологилы сӥзем пумиськон ортчиз. Котрес ӝӧк сьӧрын пусъемын вал: антология потӥз кунысьтымы калыкъёслэн литератураоссылы юрттонъя программа чотын. Сое дасян понна быдэс Россиысь тодосчиосты, литературоведъёсты, тодмо писательёсты огазеясь кенеш кылдытэмын вал. Нош котькуд улосын (котькуд калыклэн) кылдытэмын на вал эшшо нимаз кенешез. Отчы пырисьёс бырйизы, кыӵе авторъёслэсь ужъёссэс антологие пыртоно, дэмлано произведениоссэс чаклаз на Москваысь кенеш но. Озьы антология зэмзэ но лыдӟымон пӧрмиз. Отчы 115 прозаикъёслэн 50 пӧртэм кылын гожтэм произведениоссы пыризы. Асьмелы матын бигер, башкир, пор, коми калыкъёслэн сяна, абазин, авар, бакар, калмык, ингуш, осетин, цахур, чечен, эскимос но трос мукет кылъёсын вераськись калыкъёслэн ужъёссы. Вань произведениос 1991-тӥ ар бере кылдэмын ни.

Антологиысь произведенис ӟуч кылэ берыктэмын ке но, котькудаз шӧдӥське калыклэн аспӧртэмлыкез: геройёслэн нимъёссы, мадёсъёс, калык веранъёс, корка котырын кутӥськись арбериос пыр.

Котькуд калыклэн литератураез нимаз висъямын, солэн литератураезлы сӥзем статья пыртэмын. Кылсярысь, удмурт литература сярысь статьяез гожтӥз литературовед Александр Шкляев. Котрес ӝӧк сьӧрын пумиськон дыръя Александр Григорьевич вылӥ дунъяз таӵе антологилэсь кулэлыксэ.

— Улосъёсысь писательёсты огазеясь антологиос кемалась ӧз поталэ, — пусйиз тодосчи, — Нош таӵе зэмос калык шӧмо, бадӟым антологиос кунамы, оло нош, ноку ӧз на поталэ на. Россиысь туала литератураез эсерисьёслы со туж тунсыко но туж кулэ луоз.

Антологиез дасясьёс но пусъё: «Литератураысь одӥг жанр но проза кадь уг шӧдыты зэмос улонэз, лыдӟись проза пушкы зыме, со улонэн улыны кутске. Прозая антология — со тунсыко литература гинэ ӧвӧл, со пӧртэм калыкъёслэн сям-йылолъёсынызы зэмос энциклопедия. Со филологъёслы, этнологъёслы, социологъёслы, ма, политикъёслы но эскерыны паськыт бусы».

Прозая антологиез Удмуртысь авторъёслы сӥё-дано кузьмаз Печатья но ивор вӧлмытонъя агентстволэн кивалтӥсез Александр Валов. Но асьсэос авторъёс шумпотонэн ӵош сюлмаськонзэс веразы: таӵе бадӟым, синмаськымон антология калык доры уз вуы, ёрос библиотекаосысь но сое уд шедьты. Москваысь лавкаосын со вузаське, но туж дуноен.

— Мон трос ветлӥсько пӧртэм улосъёстӥ, кунъёстӥ, — пусйиз писатель Вячеслав Ар-Серги, — котькытын мынэсьтым юало ӟуч кылэ берыктэм удмурт книга. Удмуртиын но туж кулэ вылэм удмурт литературез ӟуч кылэ берыктыса рос-прос дасям издание. Озьы пӧртэм выжы калыкъёс удмурт литература сярысь тросгес тодысалзы.

Та малпанэн соглаш луизы мукет гожъяськисьёс но.

— Куддыръя шаерысьтымы но удмурт кылэз тодӥсьтэмъёс вазисько: кытысь произведениостэс ӟуч кылын лыдӟыны луоз? Кылысь кылэ берыктонэн али вырись ик ӧвӧл, ачиз автор уг ке сюлмаськы, — пусйиз писатель Елена Миннигараева. — Туала удмурт литератураез ӟуч кылэ берыкъян палэнъёслы гинэ кулэ ӧвӧл — шаерамы улӥсьёслы но, ӟучомем удмуртъёслы но. Совето вакытъёсы кылысь кылэ берыктон школа зол ужаз. Ӟеч опытэз кутыса, туала проект лэсьтыны луысал…

Ватсалом на, Россиысь калык литератураослы юрттэт сётонъя программая азьвылгес ини потӥзы туала прозалы но нылпи литературалы сӥзем антологиос. Отчы озьы ик Удмуртиысь кӧня ке авторъёс пыризы. Нош табере вераськон мынэ туала пьесаослы сӥзем антология кылдытон сярысь.

Сергей Захаров

Ангелина Снигирева
By Ангелина Снигирева Ноябрь 19, 2019 16:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<