Автономия, элькун, коммуна?

Ангелина Снигирева
By Ангелина Снигирева Ноябрь 6, 2019 09:32

1918-тӥ-1920-тӥ аръёсы Сарапулын ортчылӥзы Удмурт автономиез кылдытонлы но сое радъянлы сӥзем ӧтчамъёс, конференциос, ужаз Удмуртъёслэн ужъёссыя комиссариат.

Сарапулысь Шор При­камье­лэн историезъя но куль­тураезъя музейын тодматскыны луэ удмурт автономиез кылдытонэн.
Туспуктӥз М. Егоров

Кышкатэк вераськизы

1917-тӥ арын 26-тӥ октябре Москваын кылдытэмын Наркомнац — Россиысь калыкъёслэн ужъёссыя комиссариат. Со бордын ужазы пӧртэм калыкъёслэн комиссариатъёссы но отделъёссы. Вотской отделэн кивалтӥз Максим Прокопьев революционер. Со Россиысь удмуртъёслэсь 2-тӥ ӧтчамзэс радъяз, удмурт автономия кылдытон сярысь малпаськиз. Бӧрысь М. Прокопьев Граждан оже кошкиз, отын бырыны шедиз. Солэсь ужзэ азинтӥз Трофим Борисов.

1919-тӥ арын 25-тӥ-29-тӥ куарусёнэ Т. Борисов кивалтэм улсын Сарапулын ортчиз Россиысь удмуртъёслэн 3-тӥ ӧтчамзы. Отчы пыриськизы Вятка, Казань, Пермь, Самара но Уфа губерниосысь делегатъёс. Ачиз Т. Борисов Россиысь но дуннеысь югдурлы сӥзем доклад лыдӟиз, делегатъёслэн юанъёссылы валэктонъёс сётъяз.

Ӧтчамын огкылэ вуизы: Удмуртъёслэн ужъёссыя комиссариат кылдытоно. Комиссаре бырйизы Т. Борисовез. Бӧрысь Трофим Кузьмич та ужез Иосиф Наговицынлы оскиз, нош ачиз солэн воштӥсез луиз. Ӧтчамез ворсаку, Т. Борисов таӵе кылъёсын делегатъёслы вазиськиз:

— Табере асьмеос тодӥсь­ком, кыӵеесь вал удмуртъёс азьло но кыӵеесь соос али. Азьвыл асьмеос семьяосмы сярысь гинэ сюлмаськимы, нош али удмурт калыклэн улонэз понна кыл кутӥськом. Губернской, уездной но волостной ӧтчамъёс ортчылыку, удмуртъёс кытын ке сэргын шып мылкыдзэс усьтытэк пукылӥзы, улонзэс умойгес карон понна номыр ӧз курылэ. Нош та ӧтчамын тӥ ваньды кышкатэк вераськиды. Дорады бертыса, калыклы валэктэ, мар сярысь ми вераським но кызьы ужаны малпам.

«Ӟечезлы оскыса, учкисько азьлане…»

Т. Борисов кивалтэм улсын 1918-тӥ арын 31-тӥ октябре «Гудыри» газетлэн нырысетӥ номерез потӥз. Та вакытэ комиссариат удмурт калыкез югдытыны, солэсь асваланзэ ӝутыны, удмуртъёсты огазеяны тыршиз. Соин газетысь котькуд публикацилэн пумаз таӵе вазиськонъёс вал: «Сайкалэ, куанер удмуртъёс, огазеяськыса ужалэ!», «Куанер удмурт крестьянъёс, ӝутскелэ! Эн кышкалэ!..» «Гудыри» газетын Т. Борисов но Удмурт комиссариатлэн ужез борды итӥськем Кузебай Герд вань удмуртъёслы вазиськылӥзы. Соослэн мылысь-кыдысь ужамзылы калык синмаськиз, соосты гажаз.

Удмурт комиссариат кадръёсты дасялляз, удмурт кылын валэктон уж нуиз. Сарапулын партийной но совето ужъёсъя школа усьтӥзы (али солэн юртаз интыяськемын 4-тӥ школа). Радъямын вал дышетӥсьёсты дасянъя 1 аръем (бӧрысь — 3 аръем) курсъёс. Та курсъёс педагогъёсты дасянъя техникумлы инъет луизы. Со сяна, калыкез гожъяськыны но лыдӟиськыны дышетӥсьёсты дасязы, нылпи садъёсын ужасьёсты будэтӥзы.

Удмурт комиссариат тыр­шемен, театральной но куль­турно-просветительской кру­жокъёс, калык корка усьтэмын вал, митингъёс орт­чы­лӥ­зы, выль удмурт книгаос но брошюраос печат­лась­кы­лӥ­зы. Кылсярысь, 1920-тӥ ар ӵо­же ог 100 пӧр­тэм книга, газет, журнал, плакат поттэмын вал, огъя тиражзы — 1 миллионлэсь ятыр экземпляр. Комиссариат калыклы ва­зись­кы­лӥз «Гудыри» газет пыр — со арняяз 3 поталляз, тиражез 5 сюрс экземпляр вал.

Удмурт комиссариат вала вал: одно ик эскероно, тодоно удмуртъёслэсь историзэс, культуразэс, кылзэс, улон-вылонзэс, экономикаысь но политикаысь югдурез. Та уж борды но басьтӥськизы. К. Герд 1920-тӥ арын апреле (та вакытэ со Удмурт комиссариатлэн издательской отделэныз кивалтӥз) гожтэ: «Шумпотыса но ӟечезлы оскыса, учкисько мон азьлане…»

Вуиз 1920-тӥ ар…

1918-тӥ-1920-тӥ аръёсы по­ли­тикаын югдур секыт вал, пӧр­тэм кужымъёс ваче вуы­лӥ­зы. Сарапулын удмурт автономия кылдытон пумысен эчешонъёс ӝутс­кизы. Огласянь, татын конференциос но ӧт­чамъёс орт­чылӥзы но Удмурт комиссариат ужаз. Мукет ласянь, большевикъёслэн партизылэн уездной комитетэз удмурт автономия кылдытыны пумит вал но талы люкетыны выриз. Уездной комитет Прикамской губерния кылдытон понна дур­бась­ты­лӥз.

Т. Борисовлэн ки­чӧл­тэ­мезъя 1920-тӥ арын 6-тӥ-11-тӥ июне Сарапулын ортчиз Россиысь удмурт коммунистъёслэн конференцизы. Конференция орт­чем юртын али интыяськемын Шор Прикамьелэн ис­ториезлы но культураезлы сӥ­­зем музей.

Россиысь удмурт коммунистъёслэн конференцизы ортчем бере, 15-тӥ-21-тӥ июне, Удмурт комиссариатлэн ӵектэмезъя ортчиз Россиысь дышетон но культура удысын удмурт ужасьёслэн нырысетӥез ӧтчамзы. Татчы вуизы 11 уездысь, Вятка но Казань городъёсысь 245 делегатъёс.

Конференциез но ӧтчамез ортчытыса, И. Наговицын но Т. Борисов Москвае мынӥзы. Татын соос Удмурт комиссариатлэн ужез сярысь доклад лэсьтӥзы. Веразы: удмурт коммунистъёслэн конференциязы ӵектэмын вал удмурт автономиез кылдытыны. Москваын та малпанлы дурбасьтӥзы. Табере удмурт калык сярысь лыдпусъёсты люкано вал, кӧня соос, кытын уло… Но Удмурт комиссариатлэн ёзчиосыз удмуртъёслэн вуоно автономизылэн статусэз пумысен огкылэ вуэмын ӧй вал на. Споръяськизы: кулэ-а удмуртъёслы республика, область яке трудовой коммуна. И. Наговицын ӵектӥз Удмурт автономной область кылдытыны. Москваысь Наркомнац талы дурбасьтӥз.

Озьы 1920-тӥ арын августэ удмурт автономилэн административно-тер­ри­то­ри­аль­ной проектэз дасямын вал. 1920-тӥ арын 2-тӥ ноябре Калык комиссаръёслэн кенешсы огкылэ вуиз: вотякъёслэсь автономной областьсэс кылдытоно. Россиысь Центральной исполнительной комитет (ВЦИК) юнматӥз тае 1920-тӥ арын 4-тӥ ноябре. Та нуналэ Удмуртилэн кунлыкезлэсь нуналзэ пусйиськом.

Автономиез кылдытон сярысь декрет потэм бере Удмурт комиссариат валэктон уж нуисьёсты — Сарапулысь партийной школаысь курсантъёсты — уездъёсы ыстӥз. Соос тыршизы автономилэсь кулэлыксэ удмуртъёслы вуттыны.

Та вакытэ ик волостьёсын но уездъёсын радъямын вал партие пырымтэ удмурт кышномуртъёслэн но ужась удмурт егитъёслэн конференциоссы. Бӧрысь, 1920-тӥ арын декабре, радъяськиз Россиысь удмурт кышномуртъёслэн конференцизы, нош Россиысь удмурт егитъёс конференцие люкаськизы 1921-тӥ арын январе.

Улосысь улосэ кӧчылыса

1921-тӥ арын 5-тӥ январе ВЦИК Вотской автономной областьлэн административной составез сярысь декрет юнматӥз. Выль автономие Глазов уездысь 27 волостьёс пыризы, Сарапул уездысь — 18, Елабуга уездысь — 14 но Малмыж уездысь — 12. Областе пыриз ог 649 сюрс адями, 59 процентэз — удмуртъёс. Палэнэ кылизы ог 100 сюрс удмуртъёс.

Сарапул город автономной областе пыртэмын ӧй вал. 1921-тӥ-1923-тӥ аръёсы со Пермь губерние пыре вал, 1923-тӥ-1934-тӥ аръёсы — Урал областе, 1934-тӥ арын — Свердловск областе, 1934-тӥ-1937-тӥ аръёсы — Киров улосвылэ. 1937-тӥ арын гинэ Сарапул Удмурт автономие пыриз. Та дыре (1934-тӥ арын 28-тӥ декабрьысен) Вотской автономия Удмурт Автономной Совето Социалистической Республика вал ини, 1937-тӥ арын 14-тӥ мартэ Конституциез юнматэмын вал.

Сарапулысь Удмурт комиссариатлэн азьвыл юртэз вылын али историысь туспуктэмъёсын баннер ошемын. Шор Прикамьелэн историезъя но культураезъя музейын ужасьёс Удмурт комиссариатлэсь ужзэ, удмурт автономилэсь историзэ эскеро.

Марина Шитова, Сарапулысь Шор Прикамьелэн историезъя но культураезъя музейысь фондъёсъя отделлэн кивалтӥсез

Ангелина Снигирева
By Ангелина Снигирева Ноябрь 6, 2019 09:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<