Малы вордӥське адями?

Ангелина Снигирева
By Ангелина Снигирева 31 октября, 2019 13:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаерысьтымы тодмо профессор, экономика наукаосъя доктор Юрий Перевощиков республикамес азинтон понна туж трос лэсьтӥз. Унозэ асьмеос ноку тодыса-валаса но ум вуттэ, дыр. Та нуналъёсы 91 аресъем профессорлэн нимыз Удмурт Республикаысь Данъян пуд вылэ пыртэмын.

Экономика наукаосъя нырысетӥез удмурт доктор Ю. Перевощиков
Туспуктӥз: Эдуард Карипов

«Оборонка» но «гражданка»

Юрий Перевощиков, аресыз шоры учкытэк, редакцие ачиз вуылэ. Вераськон котьку лад-лад, эсэпсэ валаса, радъяське. Паймымон: 91 аресказ но тодосчи книга поттон сярысь сюлмаське, конференциосты дасянэ пыриське. Али но солэн котькуд ужпумъя аслаз малпанэз, али но со вуылэ студентъёс доры, вутске лекциос лыдӟыны, университетысь кивалтӥсьёслы визь-кенеш сётыны.

— Тани али университетысь вуисько, отын М. Калашниковлы сӥзем конференция дасяло. Нош ми Михаил Тимофеевичен матысь тодмоос вал, — шуэ Юрий Семёнович. — 1966-тӥ арын мон Ижысь научно-исследовательской технологической институтын ужыны кутски. Обороная министерстволы 5 аръем план дасямы, собере 15 аръем планлы программаез кылдытонэн кивалтӥ. Зэм, вань та уже «секретно» пус улын вал. Отын ужакум ик, Михаил Калашниковен тодматским. Бӧрысь одӥг коркан улӥмы, кенешылӥм, куддыръя малпанъёсмы ӧз тупаллялэ.

Огпол шуисько, Михаил Тимофеевич, тӥ шонер вераськоды: «Автоматэз мон адямиез утён понна лэсьтӥ». Но пуляос янгыш луисьтэм адямиос пала но лобо ук, автоматэз куто йыруж лэсьтон понна но. Собере, шуисько, тӥлесьтыд нимдэс Глазовын потӥсь водка борды лякизы. Нош со усыкмытӥсь сурет озьы ик адямиез ыбем луэ. Маке кароно вал та ласянь… 2002-тӥ арын М. Калашниковлэн премиезъя фонд кылдытэмын вал. Мон дэмлай: ойдолэ Калашников фондлэсь кыкетӥ люкетсэ но кылдытом, отчы водка вузамлэсь оглюкетэз коньдон мед мыноз, со гуманитарной ӧръёсъя дышетскись тужгес быгатӥсь студентъёслы мед висъяськоз. Жаль, та уж интыысьтыз ӧз вырӟы… Но мон али но малпасько, озьы кароно вал шуыса, кӧня миллионъёс лэсьтӥсько ук М. Калашниковлэн нимыз вылын…

20 ар талэсь азьвыл республикаямы М. Калашников нимо премия сётъяны кутскизы. Но нокин уг ни тоды, та премиез кылдытон, положенизэ гожтон бордын озьы ик Юрий Семёнович ужаз «Союз научных и инженерных общественных отделений» огазеяськонэн ӵош. Бӧрысь аслэсьтыз но Юрий Семёновичлэсь одӥгзэ научной ужзэ Удмуртиысь Правительство та премиен пусйиз.

«Оборонка» сярысь верано на ке, Юрий Семёнович уно аръёс ӵоже та удысын ужамзэ граждан промышленность вылэ но выжтыны быгатӥз. Эскеронъёссэ уже кутӥзы шаерысьтымы гинэ 20-лэсь трос предприятиос. Со сяна, Москваысь, Ленинградысь, Тулаысь, Ковровысь промышленной предприятиос.

Экономика — со коньдон лыдъян ӧвӧл

Юрий Перевощиковез тросэз тодо Удмурт кун университетысь тодосчиез сямен.

Университетэ со 1974-тӥ арын лыктӥз. Удмуртъёс пӧлын экономика наукаосъя нырысетӥ доктор луиз, УдГУ-ысь нырысетӥ научно-исследовательской лабораториосты радъяз. Наукаосын со кылдытӥз экономикаын метрологияя но ужлэн квалиметриезъя (продукцилэсь ӟечлыксэ эскерон амалъёс) школа. Трос аръёс ӵоже Юрий Семёнович Россиысь наукая пӧртэм центръёслэн (Москваысь, Казаньысь) диссертациосъя кенешъёсазы пыриськиз.

Но туала образование шоры учкыса, Юрий Семёнович ӝожоме. Студентъёслы, пе, тросэз али вылтӥз гинэ сётӥське. Та нуналъёсы университетын М. Калашниковлы сӥзем конференция ортче. Куке-соку УдГУ-ын меӵак соин герӟаськем трос научной ужъёс лэсьтэмын ни вал, но соос вунэтэмын, тузонӟыса кыллё, ӧпкеле тодосчи.

— Али та конференцилы шуыса поттӥсько «Квалиметрические нормы обоснования производственных программ «спортивно-охотничье оружие» книгаме. Та научной ужлы М. Калашников нимо премия сётэмын вал. Но книгаме ас коньдонэным поттӥсько, юрттӥсь ӧй шедьты. Луысал, дыр, поттытэк, но соку таӵе эскерон вань, сое уже куто ни шуыса озьы ик уз тодэ… Чебер конференциос, форумъёс сяна, кулэ луыны зэмос ужъёс.

Туала экономика пумысен но Юрий Семёновичлэн сюлэмыз шуг.

— Али экономика шоры коньдон поттон шоры сямен гинэ учко, — шуэ тодосчи, — Ма, учебникъёсын но экономика валэктӥське коньдон вылын гинэ. Нош зэмзэ ке, солэн пуштросэз паськытгес но мургес. Котькыӵе арбериез басьты, коть та чашаез, пуньыез, канфетэз — ваньмызлэн вань пуштросэз: дунызъя но, лэсьтон амалъёсызъя но, понэм кужымезъя но. Ваньзэ тае огъяса, лыдъя метрология наука (грек кылысь берыктыса, «малпаськыса мертан»). Яке, шуом, «потребительской корзина» шуон. Отын коньдон тыремын ӧвӧл ук. Соку малы асьмеос ваньзэ коньдонэн гинэ лыдъяськом? Студентэз али уг дышето манетэз но килограммез ӵош эскерыны. Нош сыӵе методикаос вань.

Адямилы уждун кызьы сюрем тупатӥське. Лыдэ уг басьтӥськы солэн быдтэм кужымез, кӧня лэсьтэмез, дышетскемез, визьмыз, быгатэмез. Но ваньзэ тае лыдэ басьтыса уждун тупатон кемалась эскеремын но формулаосын поттэмын ни вал. Со разработкаосты Россиысь но кунгож сьӧрысь валтӥсь предприятиос кутылӥзы. Мон ачим со бордын ужай. Кин кызьы тырше, кин кӧня кужымзэ, визьзэ сётэ, озьы ик басьтыны кулэ. Жаль, туала вакытэ банкъёслэн системазылэн зарни ошпиез ваньзэс вормиз. Но, малпасько, вазь-а, бер-а, ваньзэ коньдонэн мертан быроз. Азьпал радъёсы ужлэн зэмос мертэтэз потоз.

Ма мыным кулэ на?

— Данъян пул вылэ шедеме пумысен шумпотӥ-а? Кызьы шуод? Данъямзы понна тау, но эшшо шумпотысал, промышленностез, гурт хозяйствоез азинтонын, вуз поттонын кутӥськысал ке азьвыл люкам опыт. Нош быдэс улонме чакласько ке, мон понна тужгес вылӥ дунъет — Ужысь Горд Знамя орден но ВДНХ-лэн азвесь медалез. Берлозэ мыным сётӥзы вань военной научной разработкаосме гражданской продукция поттонлы тупатыса лэсьтэме понна. Угось пуля лэсьтон-а, машина поттон-а, станокъёс сьӧрын ужан амалъёс огкадесь…

Кыддыръя мылкыд куашка. Аслым шуисько: ма тыныд кулэ на? Но совето вакытъёсы воспитание монэ тэк пукыны уг лэзьы. Нош тон кытын? Нош тон малы шып улӥськод но ваньмыз шоры палэнысен учкиськод? Тон — совето адями, озьыен, киостэ лэзёно ӧвӧл, утчано амалъёс.

Али Юрий Семёнович эшшо одӥг книгаезэ поттыны дася — «Диктатура пролетариата, или Почему не получился социализм в СССР». Тазэ со Ф. Энгельслы 200 ар тырмонлы сӥзе.

— Тросэз ӧвӧл лыдӟемын Ф. Энгельслэсь ужъёссэ. Но Ф. Энгельстэк К. Маркс но ӧй луысал. Вылӥ партийной школаын дышетскыкум, соослэсь ужъёссэс лыдӟылӥ. Соослэсь гожъямъёссэс тросэз уг валало яке туж сюбег учко.

Рос-прос эскереме бере мон валай: совето вакытъёсы асьмелэн идеологимы быдэсак коммунистической ӧй вал. Вылтусыз сыӵе, нош пуштросэзъя — мукет. Соку ик ини та система кемалы ӧвӧл, ӝоген со куашкалоз шуыны кутски, Вылӥ партшколаын дышетсконме куштӥ. Мыным «диссидент» ним лякизы. Партийной ужысь быдэсак наукае кошки.

Но, валамон ини, Ю. Перевощиков наукаен гинэ вырын ӧз чида. Малпаз удмурт калык понна но маке туж кулэзэ лэсьтыны. Озьы 1990-тӥ аръёсы удмурт егитъёсты люканы, соосты экономикалы дышетыны кутскиз. УдГУ-ын юромо кылдытӥз удмурт егитъёс понна филиал. Отын экономикая вылӥ тодон-валан басьтӥзы гуртысь 400 пала егитъёс. Тросэз соос али ёрос администрациосын кивалто, политикаын, журналистикаын, кивалтон ужын валтӥсь радъёсын мыно. Егитъёслы юрттон понна ик тодосчи кылдытӥз вал нимысьтыз фонд. Кинлэн ке кыӵе ке тунсыко разработкаез вань ке, сое татын пусйылӥзы, свидетельство лэсьтылӥзы.

Юрий Семёнович пальпотыса тодаз вае:

— Огпол одӥг нылаш лыктӥз, туж тунсыко бирды лэсьтэм. Отчы-татчы вазиське, нокинлы со тунсыко ӧвӧл, пе. Нош ми солы свидетельство лэсьтӥм но, соку ик шедиз та бирдыез лэсьтыны мылкыд карись ужбергатӥсь. Табере со бирды олокӧня миллион поттэмын ни. Адямилы ассэ возьматыны луонлык сётоно. Нош общество малпаськоз ни, кулэ-а солы со дэмлан, ӧвӧл-а.

Зэм, бӧрысь та фондлы но пыд пуктӥсьёс шедизы, тӥ, пе, рекламаен вырисьёслы люкетӥськоды коньдон лэсьтыны. Но али тодосчи нош ик со фондэз улӟытон сярысь малпаське.

Кошкон азяз ни Юрий Семёнович лулӟиз:

— Мон туж кузь улон сюресэз ортчи, оломае но адӟи ни… Адями дунне вылэ уксё поттон понна уг вордӥськы, со вордӥське аслэсьтыз но вань адямиослэсь музъем вылын улонзэс утён понна. Коньдон сьӧры уиськон быронэ вуттэ. Тае туала адями валасал ке…

Елена Миннигараева

Ангелина Снигирева
By Ангелина Снигирева 31 октября, 2019 13:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<