2020 вамыш Олимпиада пумитэ

Удмурт Дунне
By Удмурт Дунне Октябрь 16, 2019 14:16

6-тӥ октябре Россиысь 50 улосын пыдын ветлонлы сӥзем нунал ортчиз. Бордаз итӥськизы шаерамы улӥсьёс но. «Вамышъя, Ижкар!» ужрадэ 10 сюрс пала адями пыриськиз. Ваньзы соос, Шор площадьысен кутскыса, Киров нимо паркозь пыдын ортчизы.

10 сюрс адями огъя мылкыдын Ижысь ульчаостӥ ортчиз.
Туспуктӥз Эдуард Карипов.

М. Калашниковлы 100 ар тырмонэн валче Россиын радъяськись ужрадлэн валтӥсь городэз луиз Ижевск. Пыдын дэмен вамышъян радъяськиз «Демография» нацпроект чотын. Вань мылкыд карисьёс 2020 метрез ортчизы, 2020-тӥ арын Токиоын ортчоно Олимпийской шудонъёсы мыныны дасяськись Россилэн командаезлы дурбасьтыса.

Иже ёросъёсысь но трос калык лыктэмын вал. Удмуртиысь скандинав амалэн ветлӥсьёслэн огазеяськонзылы 4 ар гинэ ай, нош пыдын ветлонэн шаерамы улӥсьёс пӧлысь ог 6 процентэз эшъяське ни. Скандинав амалъя вамышъянэз удмурт сямен ветлон шуоно ини, дэмлаз Тӧро А. Бречалов.

«Вамышъя, Ижкар!» ужрад кемалы вунонтэм кылёз. Шаерысьтымы спортэз яратӥсьёс та нуналэ, мугорзэс кыдатэм сяна, Россиысь дано спортсменъёсын пумиськылӥзы.

Йӧспӧртэм шоркар

Ижысь Шор площаде лыктӥзы Россиысь Олимпийской комитетлэн президентэз Станислав Поздняков, тодмо телеведущий Дмитрий Губерниев, олимпийской чемпионъёс: синхронной амалъя уясь, Токиоын ортчоно Олимпиадае мыныны кандидат Алла Шишкина, фигурист Дмитрий Соловьёв, Удмурт Республикалэн Тӧроез Александр Бречалов но шаерысьтымы олимпиецъёс но паралимпиецъёс: Галина Кулакова, Тамара Тихонова, Наталья Сныкина, Наталья Падерина, Мария Феклистова, Иван Черезов, Дмитрий Япаров, Владислав Лекомцев, Владимир Кононов.

— Россиысь Олимпийской комитетлы, Спортъя министерстволы тау карисько Ижез пыдын ветлӥсьёслэн шоркаренызы быръемзы понна, — вань калык азьын тау кариз А. Бречалов. — Скандинав амалъя ветлонэз дыр вуэмын ни удмурт вамышъян шуыны. Шаерамы ортчытоно ужрадъёс трос на. Декабрь толэзе «Ижысь винтовка» ӵошатсконлы 50 ар тырмоз, нош вуоно арын февраль толэзе асьме дорын радъяны чакламын Россиысь спортэз яратӥсьёслэсь 1-тӥ тол шудонъёссэс.

Олимпийской комитетлэн президентэз С. Поздняков ватсаз на: Удмурт шаер пичи ке но, нимо-дано спортсменъёсын тодмо луэ, татын физкультураез калыке вӧлмытон умой мынэ. А. Шишкина Ижевске нырысьсэ вуэм, паймем калыклэн капчи мылкыдызлы, спорт понна висисьёслэсь кужымзэс, пе, Олимпиадаын юн шӧдоно.

Шор площадьысен кутскыса, Киров нимо паркозь вамышъян капчи мылкыдын ортчиз. Кин ке паркозь бызьыса кадь мынӥз нырысетӥ вуон понна, кин ке дано адямиосын туспуктэме пуксьыны выриз.

Эшсы — Губерниев

Ижын улӥсьёс сяна, «Вамышъя, Ижевск!» ужрадэ пӧртэм ёросъёсысь спортэз яратӥсьёс но пыриськизы. Соос Шор площаде 8 часын ӵукна ик вуыны кутскизы. Угось тодо ни: бадӟым ужрадэ макем вазьгес вуод, сокем капчиенгес нуналыд радъяськоз. Балезиноысь, кылсярысь, 2 автобусэн ветлӥзы. Спортысь ветеран Галина Наговицына пусйиз, берло аръёсы, пе, калыкез кужмысь ӧтёно ӧвӧл ни, асьсэос ӵошатсконъёсы курисько. Вавож ёросысь 18 мурт вуылӥз, спортсмен нылпиос сяна, скандинав амалэз гажасьёс вал. 2020 метрез соос бодыосын вамышъяса ортчизы.

Д. Губерниевез Удмуртиын ярато.
Туспуктэм udmurt.ru бамысь.

Дэри ёросысь Италмас каргуртын улӥсьёс Анна Каракулова но Надежда Бочкарёва, Шор площаде вуыса гинэ, тодӥллям, Дмитрий Губерниевлэн вордскем нуналэз шуыса. Буш киын шат ӟечкылалод, пичи удмурт мунё басьтӥллям.

— Спортэн юн эшъяськиськомы бере, Д. Губерниев асьмелэн эшмы кадь потэ, соин ик пичильтык кузьым сётыны малпамы, — шуэ Надежда Бочкарёва. — Одӥгзэ но ӵошатсконэз уг кельтӥськы, эшъёсы но сьӧрам кыстӥсько, ёрос ӵошатсконъёсын вормисьёс луыса, шаерамы ортчылӥсь Гурт шудонъёсы пыриськиськомы, нош алигес Россиысь ветеранъёслэн спартакиадаязы вуылӥмы. Пӧртэм амалъёсъя ӵошатскимы, вормыны ӧз удалты ке но, 6 кужмоез пӧлы шедьылӥ. 76 улос пӧлын Удмуртилэн командаез 12-тӥ инты басьтӥз. Спортэн эшъяськон бугыртэ мылкыдмес, юрттэ висёнъёсты улляны.

Киров нимо паркозь вуэмъёслы кузьмазы шоколад медаль но диплом сётӥзы, нимысьтыз кузьымен пусйизы тужгес пинал но арлыдо вамышъясьёсты, парке нырысетӥ вуисьёсты.

Ужрад таин гинэ ӧз йылпумъяськы: олимпиецъёслэн но Удмуртиысь Правительстволэн командаоссы футбол бусыын пумиськылӥзы, шудонлэсь мынэмзэ Д. Губерниев комментировать кариз. Вормон понна ӟырдыт нюръяськизы, шудон 3:4 лыдын йылпумъяськиз, Удмурт Республикалэн командаез вормиз.

Россиысь дано спортсменъёс Алла Шишкина но Дмитрий Соловьёв та нуналэ Ижысь спортъя школаосын дышетскисьёслы уянъя но фигурной катаниея мастер-классъёс возьматӥзы на.

Валентина Емельянова

Удмурт Дунне
By Удмурт Дунне Октябрь 16, 2019 14:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<