Ӟеч ивор бурдъя

Ангелина Снигирева
By Ангелина Снигирева Октябрь 30, 2019 14:28

28-тӥ октябре, Калык огазеяськон нунал но Удмуртилэн кунлык басьтэмез дырысен 99 ар тырмон азьын, резиденциын сӥлы каризы шаермес азинтыны трос кужымзэс сётэм адямиосты.

В. Ярыгин, П. Кузнецов, В. Толмачёв
Туспуктэм басьтэмын udmurt.ru сайтысь

— Маке вылез борды кутскыкумы, ми тӥлесьтыд адӟем каромы, тӥляд ужъёсты вылэ пыкиськомы. Удмуртилэн ортчем сюресэз быдӟым, вуоно сюресэз эшшо но паськыт, — тазьы вазиськиз Удмуртилэн Тӧроез Александр Бречалов зал тыр люкаськем калыклы — Удмуртилэн дано адямиосызлы, Данъян пул вылэ пыртэмъёслы, Кун премиен пусъемъёслы. — Мынэсьтым ӵемысь юало, малы сокем оскисько, азьланяз улон-вылон каньылгес луоз, секыт ужпумъёслы пум вуоз шуыса. Удмурт шаер понна нуналмысь ужамды, татын улыны но тыршыны мылкыд каремды шоры учкыса, сыӵе малпанэ вуисько.

Данъяськоно адямиос шаерамы зэмен ик трос. Уноез соос пӧлысь уло гуртъёсын. Ува черкогуртысь Пантелей Николаевич Кузнецов композиторлэсь кырӟанъёссэ гуртъёсысь вань ансамбльёс кырӟало, шаерысьтымы нимо-дано коллективъёс быдэсто. Со сюрслэсь ятыр кырӟанъёслэн авторзы луэ. Ижысь крезьгуръя училищеын дышетскыкуз ик, гожтэм кылбуръёсызлы гуръёс кылдытъяны ӧдъяз. Пантелей Николаевич ас вакытаз 42 ар кивалтӥз но дышетӥз Уваысь крезьгуръя школаын. 1991-тӥ арысен кивалтӥз черкогуртысьтызы «Купанча» ансамблен. Пантелей Кузнецовез Александр Бречалов пусйиз «Удмуртилэн дано адямиез» нимын.

— Висеменым валесысь уггес султылӥськы ни вал. Ӟеч иворез кылӥ но бурми кадь. Шумпотӥсько: та улонын быгатӥ асме, яратоно ужме, семьяме шедьтыны. Семьяелы тау. Дорам монэ котькуд валазы. Мон шудо адями. Уг малпаськы вал, гуртысь потэм пияш та быдӟа адямиозь будоз шуыса, — вера Пантелей Николаевич.

Удмуртилэн дано адямиез озьы ик луиз Алнаш черкогуртын вордскем но будэм Владимир Александрович Ярыгин, Россиысь дано конструктор, 20 пумо пыӵал тӥрлыклэн авторез, Ярыгин пистолетэз кылдытӥсь. Трокай Борисовлэн музъем вылаз вордӥськемелы но татын будэмелы, ужамелы туж шумпотӥсько, шуиз со. Сӥлы каризы Воткаысь машина поттонъя заводлэсь директорзэ Виктор Толмачёвез но. «Удмуртилэн дано адямиез» нимын Александр Бречалов сое пусйиз вал туэ 27-тӥ сентябре заводлэсь 260 аръем юбилейзэ пусъёнэн валче.

Шумпотонэн ӵош залэ люкаськемъёс куалекъязы но. Тужгес но — Удмуртилэн Данъян пул вылаз пыртэмъёс. Нуналлы быдэ тазьы уг дунъяло, нуналлы быдэ Удмуртилэн Тӧроез киез уг кутылы, шуэ Можга ёросысь «Держава» хозяйствоысь валтӥсь агроном Сергей Братухин. Удмурт воргорон кивалтэм улсын туэ ӟеч ӟег быгатӥзы. Сыӵе урожай люканы татчыозь шуныт палъёсын гинэ быгатылӥзы.

Гуртоослэн нуналмысь тыршемзылы луыса йӧл но туэ, кылем арын сярысь, тросгес люкаське. Кылсярысь, Сарапул ёросысь «АгроНива» предприятиысь Надежда Сухих 38 ар скал кыске ни. Котькуд скаллэсь араз 7 сюрс килограммлэсь трос йӧл басьтэ. Школаез йылпумъяме бере ик фермае кутски, вань тазалыке но татчы ик кылиз ни, шуэ нылкышно. Озьы ке но скал кыскисьёс пӧлын ялэм вожвылъяськонъёсы ялан пыриськылэ, вормись луылэ. Россиысь Гурт удысъя министерстволэн Таукаронэныз пусъемын. Гуртаз но сое туж гажало.

Эгралась 4 номеро шор ёзо школа гурт школаос пӧлын устоез луэмын. Отысь ӟуч кылъя но литературая дышетӥсь Елена Толмачева Данъян пул вылэ шедиз. 33 ар ӵоже 3 сюрслэсь ятыр выпускинъёсты улонэ поттӥ, таос пӧлысь 50-лэсь уноез — зарни медален, пусйытэк ӧз кельты дышетӥсь.

Ижысь 9 номеро больницаысь валтӥсь врач, Данъян пул вылэ пыртэм мурт Вадим Коровкин верамъя, выль технологиосты кутэменыз валче берло дыре больницазы шаерамы огез устоез луэ. Татын медакадемиысь студентъёс но тодон-валанзэс будэто.

Данъян пул вылэ пыртэмын 13 ужась коллектив но. Шаерысьтымы военной обороналы ужась заводъёсын артэ татчы сюризы «Удмуртия» издательствоысь но К. Герд нимо йӧскалык музейысь коллективъёс.

— Котькудды адӟем карымон луиськоды. Тӥ кадь адямиос вылын возиське Удмуртия. Тау ужамды понна. Азьланяз трос быдэстоно ужпумъёс, оскисько, соосты дэмен вормомы, — шуиз Александр Бречалов.

Елена Сараматова

Ангелина Снигирева
By Ангелина Снигирева Октябрь 30, 2019 14:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<