«Юмок» театрысь егитъёс улӟытӥзы Сальвадор Далиез но Галаез

Ангелина Снигирева
By Ангелина Снигирева Октябрь 1, 2019 13:43

Сальвадор Дали художниклэн Гала кышноез удмурт вал! Таӵе миф кылдытэ Москваысь Василий Логинов драматург «Голубятня» пьесаяз.

Спектальысь суред
Туспуктӥз Руслан Хисамутдинов

Галалэн дневниказ — удмурт кыл

Пьесаез 24-тӥ куарусёнэ лыдӟизы «Арт-резиденциын» «Юмок» театрысь егитъёс. Сое кылзыны трос удмуртъёс но, ӟучъёс но вуизы. Театрлэн кивалтӥсез Дарали Лели верамъя, та ужрад ӵапак чакламын вал егит удмурт театрлэн уженыз удмурт кылын вераськисьтэмъёсты тодматыны.

Малы В. Логинов драматурглэн медицина наукаосъя докторлэн Елена Дьяконоваез (та Галалэн зэмос нимыз) удмурт каремез потӥз? В. Логиновлэн пересь песятаез Василий Парин вордскем Удмуртиысь Сюмси ёросын. Семьяязы выжыысь выжые ваньзы наукаен выро, пе. Нош В. Логинов, Литературной институтэз йылпумъяса, писатель луэм на. Пьесалэн кылдэмез сярысь мадиз Москваын улӥсь Ольга Александрова, Удмуртиысь тодмо режиссёр но артистка.

— Огпол В. Логинов Испание, Далилэн дор палъёсаз, вуылӥз, соин герӟаськем интыосын тодматскиз: Пуболь замокен (али татын Далилы но Галалы сӥзем музей интыяське), Порт-Лигат гуртысь суредасьлэн коркаеныз (татын Далилэн но Гагалэн яратонзы пурӟем), Кадакес карен, — маде О. Александрова.

Далилэн Порт-Лигатысь корка вӧзаз лэсьтэмын дыдык возён кар. Пичи тӧдьы юрт аспӧртэм арбериосын чеберматэмын, пӧлазы — валлэн йыркобыез, бадӟым пузъёс… Отысь писатель адӟем удмурт мифологиысь образъёсты. Озьы ик В. Логинов тодматскем Галалэн дневникъёсыныз — отын, пе, удмурт кылын вӧсяськон кылъёс гожтыса кельтэмын. Кытысь-марысь — валантэм. Гала Казаньын вордскемын, нош со палъёсын удмуртъёс ӧжыт ӧвӧл…

Удмурт шӧмо Испания

Бен, кориньо (дуное) — мусояськыса шуэ Гала Далилы. Пьесаын геройёс куд-ог дыръя удмурт кылъёсты потталяло, но оглом ӟуч кылын верасько. Гала Далиез удмурт кылъёслы дышетэ, удмурт выжыкылъёс лыдӟе, туно-пеллё песятаезлэсь лушкем кылъёссэ художниклы усьтэ. Галалэн йӧспӧртэм кылын нукыртэмез Далилэсь йырзэ берыктэ. Удмурт мадёсъёс сое дартэн пылато. Куке Гала зарезез ӵошатэ утялтэм бусыосын, тодэ соку ик лыктэ Кузебай Гердлэн «Я ни разу не видел море…» кылбурез.

Спектальысь суред
Туспуктӥз Руслан Хисамутдинов

Кылдысин пыжиз асьмемыз, шуэ Гала, асьмеос одӥг сукыри вал, нош бӧрысь милемыз шоризы но — ми ыштӥм ог-огмес… Далилэсь пилиськем дуннезэ огазеяны тыршыса, Гала малпа пиосмуртэз кышномуртлы пӧрмытон йылол лэсьтыны, сое «выльысен пыжыны» (пьесаын со «перепечение» нимаське). Кышномуртлы пӧрмыны мылкыд карись пиосмуртэз, Аланэз, со шедьтэ Тригент докторлэн клиникаяз. «Удмурт ведӥнлэн», Галалэн, малпанэз шӧдтэк шорысь быдэсме. Алан Алиндалы пӧрме. Озьы В. Логинов Далилэн улонысьтыз мифез кутэ. Алинда ныллэн прототипез — Аманда Лир тодмо кырӟась, пересьмись Далилэн музаез. А. Лир сярысь супыльто: со, пе, азьло воргорон вал. Быдэс пьесаын пазямын Далиен герӟаськем кыӵе ке мифъёс, солэн улонысьтыз аспӧртэм учыръёс.

Пьесаын удмурт мифология, сямъёс, кыл возьматэмын шудыса, серекъяса кадь. Далилэн суредъёсаз туж пӧртэм арбериос аспӧртэм герӟетъёсын огазеямын, нош та пьесаын ӟуч писатель огазея солы мурт, экзотика луись дуннеосты: удмурт но испан. Пӧрме гольтырес но кудӟытӥсь сурет.

Пӧсекъясь но шукырес художникез быгатыса шудӥз Вадим Крестьянинов — со Далилы вылтусыныз туж тупа вылэм! Галалэсь рользэ лыдӟиз Дарья Никитина. Солэн аслаз но пушкысьтыз потӥсь кужымез Галалэн кынарыныз ӵошатымон, шуыны луоз. Мукет артистъёс но рольёсазы выйизы. Малпай: макем удмуртъёс чебересь, пӧсесь, кӧня дартсы пушказы!

Пьесаез лыдӟон 3 но ӝыны час кыстӥськиз. Актёръёс но жадизы, кадь, — шӧдскымон удмурт акцентсы пумаз эшшо но золгес кылӥськыны кутскиз. Со пьесаез эшшо но аспӧртэмлыкогес кариз, кылзыны ӧз люкеты. Огдырлы пӧсь Испание вуылӥмы, Далилэн суредъёсаз выйимы… Гала удмурт вал-а? Кин тодэ, но та бурдъясь малпанлы оскем потэ. Удмурт кышномурт дуннеысь одӥгзэ тодмо художникез вылӥе ӝутыны быгатӥз ке — озьыен, асьмеос но ваньзэ быгатом.

Анастасия Шумилова

Ангелина Снигирева
By Ангелина Снигирева Октябрь 1, 2019 13:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<