Шыпыт, чылкыт но таза улон понна

Ангелина Снигирева
By Ангелина Снигирева 31 октября, 2019 15:20

29-тӥ октябре Кун Кенешысь депутатъёс 17-тӥ сессиязы люкаськылӥзы. Эскеризы 19 ужпумъёсты, пӧлысьтызы 7-ез герӟаськемын элькун законъёсын.

Культурая министр В. Соловьёв тодматӥз музейёс сярысь элькун законлэн проектэныз
Фото: О. Ларин

Музейёслы инъет

Элькунысьтымы музейёслэсь ужзэс радъянэн герӟаськем закон шаерамы ноку ӧй вал на — музейчиос али Россиын 1996-тӥ арын юнматэм законъя ужало.

Выль законлэсь проектсэ дасян бордын ужазы асьсэос культура удысын ужасьёс. Культурая министр Владимир Соловьёв, Кун Кенешысь депутатъёсты соин тодматыкуз, пусйиз: шаерамы туннэ 32 кун но муниципал, 140 частной музейёс. Отын 730 сюрслэсь ятыр экспонатъёс возисько. Арлы быдэ шаерысьтымы музейёсы 1 миллионлэсь ятыр адями вуылэ, со пӧлысь ӝыныез — егитъёс. Со дыре ик министр ватсаз: элькунамы туж ӧжыт на нимаз адямиослэн музейёссы, 5-яз ёросъёсын муниципал музейёс но ӧвӧл.

Элькун законлы проект дасямын, «Россиысь музей фондъёс но музейёс сярысь» федерал закон вылэ пыкиськыса. Но асьмелэназ пусъемын ни, кылсярысь, кытын но кызьы возьыны луоно элькун музейысь экспонатъёсты, кызьы соосты реставрировать кароно но мукет.

В. Соловьёв борды итӥсь­кыса, Кун Кенешысь Наукая, дышетонъя, культурая, йӧскалык но егитъёсын ужан политикая, спортъя ялан ужась комиссилэн кивалтӥсез Татьяна Ишматова пусйиз: элькун закон кутыса, элькун коллекциосын ужаны, соосты утьыны капчигес луоз. Таин ӵош музейчиос капчиенгес пыриськыны быгатозы грантъёс басьтонъя вожвылъяськонъёсы, нацпроектъёсты пыӵатонэ но мукет.

Чакламъя музейёслэсь ужзэс радъянэн герӟаськем законлэсь проектсэ депутатъёс юнматозы ни 18-тӥ сессиязы, со ортчыны кулэ ноябре.

Тыриськонъёс

Туэ сентябре ортчем 16-тӥ сессиязы депутатъёс юнматӥзы шыпыт вакытэз чакланэн герӟаськем законэз, соя ужан нуналъёсы 22 часысен 8 часозь, шутэтскон нуналъёсы 23 часысен 9 часозь ӵашетыны уг яра. Нош таяз сессиын тодмо луиз, кӧня тыриськонъёс тупатӥськозы та законэз тӥям понна.

Кызьы вераз Кышкытлыклэсь утиськонъя, регламентъя но Кун Кенешлэсь ужзэ радъянъя ялан ужась комиссилэн кивалтӥсезлэн воштӥсез Сергей Лукьянчиков, штрафъёслэсь быд­ӟалазэс будэтонэн герӟаськем ужпумез кема сэрттӥзы-пертчизы. Но комиссилэн ёзчиосыз огкылэ вуизы: огшоры адямиослы кӧня вал сомында ик кельтоно — 1 сюрс манетысен 2 но ӝыны сюрс манетозь. Нош кивалтӥсьёслы йылэтоно 10 сюрс манетысен 15 сюрс манетозь, огазеяськонъёслы, предприятиослы — 25 сюрс манетысен 50 сюрс манетозь. Кун Кенешысь депутатъёс комиссилэн ӵектонэныз соглаш кариськизы.

Со сяна, тыриськонъёс табере бадӟымазы предприятиос, улон коркаос азьысь, транспорт дугдылон интыосысь урнаосты утялтытэк возем понна — кивалтӥсьёслы 5 сюрс манетысен 10 сюрс манетозь, предприятиослы, огазеяськонъёслы — 15 сюрс манетысен 80 сюрс манетозь. Штрафъёс озьы ик тупатэмын лымыез нылпи площадкаосы люкам но тулыс поттымтэ понна: огшоры адямиослы — 1-3 сюрс манет, кивалтӥсьёслы — 5-10 сюрс манет, огазеяськонъёслы — 15-50 сюрс манет.

— Иж город администрация комиссиямы озьы ик ӵектонэн вазиськиз, юнме азе — борддоръёс, писпуос, кенеръёс, транспорт дугдылонниос вылэ — ялонъёс, афишаос ошылӥсьёслы тыриськонъёсты будэтыны курыса, — вераз Сергей Лукьянчиков. — Зэмзэ но, таӵеос ӧжыт ӧвӧл. Ижын кылем ар ӵоже гинэ 469 мурт кыл кутон улэ кыскемын, 510 протоколъёс гожтэмын. Милям комиссимы дэмла: нимаз адямиослы 3-5 сюрс манет тыриськонъёс луыны кулэ, кивалтӥсьёслы — 10-25 сюрс манет но предприятиослы, огазеяськонъёслы — 25-50 сюрс манет.

Сессие люкаськем депутатъёс вань та дэмланъёсын одӥгтэмак сямен соглаш кариськизы но законэн юнматӥзы.

Нылпиос понна

Депутатъёс Кун Думае кичӧлтонъёс келян сярысь решение кутӥзы. Одӥгез соос пӧлысь — юыса, шузимытӥсь суретъёсын кушласькыса но тамак кыскыса сюрем 16 аресозь нылпиоссы понна анай-атайёсты, опекунъёсты кыл кутон улэ кыскон сярысь — 2 сюрс манетысен 3 сюрс манетозь штраф тупатоно.

Та кичӧлтонэз Кун Кенеш Россиысь Законодательёслэн кенешазы экспертизае келяз ни вал, отын солы дурбасьтӥзы но шузимытӥсь суретъёсын списокез йылтыны куризы на. Та ӵектонъёсты асьме депутатъёс лыдэ басьтӥзы. Кызьы пусйиз Кун Кенешлэн Тӧроезлэн воштӥсез, тазалыкез утён понна кыл кутӥсь ялан ужась комиссилэн кивалтӥсез Надежда Михайлова, Россия та ужпум борды али гижысь-пиньысь басьтӥське. Правительстволэн Тӧроез Дмитрий Медведев куремъя КоАП (Административной правонарушениосъя кодекс) 2021-тӥ арозь выльдӥськыны кулэ.

— Штрафъёс луизы ке, анай-атайёс, оло, тросгес саклык висъяны кутскозы пиналъёссылы, — шуиз Надежда Михайлова. — Зэм, ваньзэ тае анай-атайёс вылэ гинэ погыльтыны уг яра, нылпиосмес урод сямъёслэсь утён сярысь ваньмы уртче сюлмаськыны кулэ — кивалтӥсьёс но, дышетӥсьёс но.

Кун Кенешлэн Тӧроез Алексей Прасолов верамъя, анай-атайёсты, опекунъёсты кыл кутон улэ кыскон ужпумез сэрттыны-пертчыны та нырысетӥ вамыш гинэ луэ. Асьмелы тросгес верано таза улонэн эшъяськонлэн кулэлыкез сярысь.

Депутатъёс нылпиослэсь тазалыксэс утёнэн герӟаськем законъёс бордын азьланяз но ужалозы. Кылсярысь, вуоно арын эскерыны быгатозы ни кыскон суретъёсты алонлы сӥзем законлэсь проектсэ. 

Элина Кумачёва

Ангелина Снигирева
By Ангелина Снигирева 31 октября, 2019 15:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<