Школа борды нылпи сад

Удмурт Дунне
By Удмурт Дунне Октябрь 8, 2019 12:05

Дэри ёросысь Шор Постол поселение пырись гуртъёслэн туссы воштӥське: выль объектъёс кылдо, нош вужмемъёсыз выльдӥсько-тупатъясько.

Тужгес но куанэмын Постол черкогуртысь нылпиос: «Улыны ярась город» программа чотын гуртазы радъямын рос-прос нылпи площадка. Табере черкогуртысь пиналъёс отын шудыны но, тренажёръёсын мугорзэс кыдатыны но быгатозы. Но отын соос кӧттырмоназы шудыны-бызьылыны ӧз вуттэ на: отчы пуктылэм корт конструкциос куронъёслы уг тупало вылэм, соосты утялтоно луиз.

Дэри ёросысь Постолын нылпиослы шудон площадка ӝутӥськиз.
Туспуктэм Дэри ёросысь Шор Постол муниципал кылдытэтлэн «ВКонтакте» бамысьтыз.

— Но площадка лэсьтэмын ни, тани-тани вуттозы куронъёслы тупасьёссэ лэйканъёсты но тубатъёсты, соосты ӝегатскытэк пуктылом, — шуиз Шор Постол поселенилэн йырыз Андрей Степанов.

Та сяна но постолъёслэн бадӟым шумпотонзы: Нылга трактысен гуртазы нуись сюресэз лэсьтыны кутскизы. Лэсьтӥськисьёс из вӧлдӥзы ни: туэ сюреслэн ӝыныез асфальтэн шобырскиз ни, вуоно арын — кылем люкетэз. Со сяна, тани-тани кисьмалоз выль школазы. Озьы ик дасяло нылпи садлэсь проектсэ.

— Школаез но нылпи садэз калык чидатэк вите: анай-атайёс угось пиналъёссэс Шор Постолэ но Подшивалэ нуллоно луо. Вань та объектъёс ӝутскизы ке, сюрес быдэсак асфальтэн шобырскиз ке, Постолын улон шулдыр луоз. Нырысь ик, гуртэ кыстӥськозы инвесторъёс, усьтӥськозы выль огазеяськонъёс-предприятиос, озьы калыклы выль ужан интыос кылдозы, — мылкыдзэ вера поселенилэн йырыз А. Степанов.

Нош Шор Постол гуртын улӥсьёслэн лэчыт ужпумзы быдэстэмын: ву башнязы тупатъямын. Вужезлэн ву кыскыны кужмыз ӧй вал ни, сое выльдыны ёрос бюджетысь коньдон висъяськиз. Со сяна, Шор Постолысь пиналъёс чидатэк витё хоккеен шудон коробкалэсь вуэмзэ.

— Хоккеен шудон коробкаез пуктыны мылкыд кариз быдэс гурт. Озьы та кичӧлтонэнымы пыриськимы «Милям кичӧл-тонмы» кун программае. Коробкалэн быдӟалаез пичи ӧвӧл: 56 метр кузьдалаез, 26 метр пасьталаез, эшшо ке корт сеткаен котыртэмын луоз. Бадӟымъёс но, пиналъёс но хоккеен шудыны быгатозы. Та кичӧлтонэз пыӵатыны уксё бичам калыклэсь — 210 сюрс манет люкаськиз, ёрослэн бюджетысьтыз висъяськиз 105 сюрс манет, кун бюджетысь — 700 сюрс манет. Коробкаез вуттозы ни октябрь пумын — быдэс гуртлы шумпотон луоз, — пусйиз А. Степанов.

Елена Тугашова

Удмурт Дунне
By Удмурт Дунне Октябрь 8, 2019 12:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<