Фельдшертэк улон ӧвӧл

Удмурт Дунне
By Удмурт Дунне Октябрь 16, 2019 14:33

Пичи Пурга ёросын вуоно арын 7 ФАП усьтӥськыны кулэ

«Тазалыкез утён» нацпроект чотын эмъян удысын бадӟымесь воштӥськонъёс луыны кулэ. 2024-тӥ арозь уно ужпумъёсты быдэстоно, валтӥсь интыын — поликлиникаосын, амбулаториосын эмъян, висёнъёсты алон.

Пичи Пургалан висёнъёсты алон вылысь пӧртэм ужрадъёс ортчыло, соос пӧлысь огез — тазалыклы сӥзем форум.
Туспуктэм сrbmpurga.ru бамысь.

Пыд вылэ султон

Пичи Пурга ёрос больницаысь валтӥсь врачлэн воштӥсез Михаил Санников тодаз вае на, кыӵе калэ вуизы вал эмъян учреждениос кылем даурысь 90-тӥ аръёсы. Шуэ: «Тазалыкез утён» нацпроект ӧй луысал ке, ёрос больницаос пыд вылазы султыны ӧй быгатысалзы ни, дыр.

— Нырысетӥез нацпроект улонэ пыӵатӥськыны кутскиз вал 2006-тӥ арын, — вераз со. — Соку нимысьтыз саклык висъяськиз эмъян тӥрлыкез выльдонлы. Кыӵе но оборудование ӧз вуы милям ёрос больницаямы но: пӧртэм анализъёс лэсьтонъя лабораториос гинэ пӧртэм пумо вал, шоканы юрттӥсь тӥрлык уно вуиз. Дунзы — трос миллион манет тыр. Соосын ик али ужаськом. Табере кыкетӥез нацпроект улонэ пыӵатӥське, со 2019-тӥ-2024-тӥ аръёслы чакламын. Та рад уката бадӟым саклык висъяськоз эмъян учреждениосты выльдонлы.

Пичи Пурга ёрос тазэ но нацпроектэз кемалась вите ни вал, шуыны луоз. Угось ёросысь ваньмыз сямен фельдшер-акушер пунктъёс совето вакытъёсы пуктэмын ай — соос вужмо. Табере бадӟым оскон кылдӥз, соос выльдӥськозы шуыса.

— Ёросамы 3 ФАП выльдэмын ни: 2011-тӥ арын — Покчи Бӧдьялан, 2016-тӥын — Пуро-Можгалан но 2018-тӥын — Эгралан, — азинтӥз веранзэ валтӥсь врачлэн воштӥсез. — 2020-тӥ ар пумозь эшшо 7-ез усьтӥськыны кулэ: Курчум-Норьялан, Бӧдья-Пуроын, Ыбдэсын, Карашурын, Арланын, Итэшын но Кабыстаын. Со сяна, «Тазалыкез утён» нацпроект чотын 2 амбулатория витиськом — Норьяла но Брангуртэ.

Выль юртын

Фельдшер-акушер пунктъёс гуртоослы дыраз эмъюрттэт сёто.

— Ӧйтӧд, мар меда карысалмы, гуртамы ФАП-мы ӧй луысал ке, — верало Пуро-Можгалан улӥсьёс. — Фельдшермы отпуске кошке ке, ми соку ик сое ыштӥськом. Кулэ луэ ке, отпускын-а, уйин-а — дораз вазиськиськом. Ноку лекъяськемез ӧвӧл. Гуртамы тросгес ни арлыдоос — соослы палэнэ потыны секыт. Ёрос центрозь но матын ӧвӧл — ог 30 иськем.

Гуртын та вакытэ 370 пала улӥсез. Тросгес мӧйыос ке но, пӧлазы вань нылпиос но. Фельдшер Елизавета Чушъялова котькудзэс туж умой тодэ — 35 ар пала ужа ни.

— Та дыр ӵоже олокыӵе но интыын ФАП-мы интыяськемын вал ни, — шуэ со. — 2 квартираем коркалэн оглюкетаз но, контораен, вуриськон сэреген одӥг липет улын но. Собере «УАССР-лы 10 ар» совхозмы нимаз инты висъяз вал — отын ог 20 ар ужаса вуттӥ но, липетэз куашказ. Берлозэ, ог 2 толэзьлы шуыса, выжтӥзы вал клубмылэн туж пичи гинэ сэрегаз — 2 толэзь интые, 5 арлы отчы кылёно луиз.

Мае чидаз гуртысь фельдшер но кыӵе интыын табере ужа — ӵошатыны луонтэм, пе. ФАП-ын ваньмыз выль: ӝӧк-пуконъёс но, эмъян тӥрлык но. Пуктэмын со гурт шорынгес ик — клублы, лавкаослы матэ. Озьы калык нялтас я эмъюм басьтыны пыре, я прививка пуктыны. Давленизэс, вирысьтызы сакырзэс ӵемысь мертано луэ. Фельдшер ик педиатр но, нылкышно эмъясь но.

— ФАП-амы шуныт, югыт, — азинтэ веранзэ Елизавета Николаевна. — Интыез бадӟым ик ӧвӧл ке но,
тырмыт. Нылпиосты дэмен прививка пуктыны ӧтьыкум, кынман висёнъёс аляны кутскыку гинэ, калык трос люкаськылэ. Мукет дыръя одӥгез пыре, мукетыз потэ.

Прививка пуктонъя планэз фельдшер быдэстэм ни. Сюлмаськытэ, пе, соиз: калык диспансеризацие туж ик мыло-кыдо уг пыриськы — сьӧразы ветлоно луэ. Угось тросэз ёрос центре потыны я дыр уг шедьто, я кынарзы уг тырмы. Нош потытэк уг луы, кылсярысь, флюорография отын лэсьтоно.

— Вазен умой вал: кин транспорт уг шедьты, школа автобусэн больницаозь ветлӥзы, — пусъе Елизавета Николаевна. — Нош табере со автобусэн нылпиос гинэ ворттылыны кулэ, шуо, мукет азе кутыны уг яра, пе. Ярано, ёросамы «Демография» нацпроект чотын арлыдоосты больницае нуыны-вайыны машина туэ вуиз — ми дорозь но солэн черодэз вуоз, вылды.

Со сяна, секыт учыръёс дыръя табере гуртоос ёрос центрысь ӝог юрттэт сётӥсьёсты асьсэос ӧтё. Вазен соос лыкто вал гуртысь фельдшер жингыртэм бере гинэ. Озьы дыр юнме бырылӥз — нырысь шуге-леке вуэм мурт фельдшерлэсь вуэмзэ возьма, собере витёно на «скороез»…

Огъя герӟетын

Пичи Пурга ёрос больницаысь валтӥсь врачлэн воштӥсез Михаил Санников верамъя, районын али ӝог юрттэт сётонъя 2 бригада ужа. Со сяна, Ижысь, Можгалась «скоройёсын» кусып возё: ёросын машинаос уг ваньмо ке, соку ик юрттӥськыны итӥсько палэнысьёсыз.

— Ёросысьтымы пери шуккемъёсты, сюлмынызы шугектэмъёсты, паласькись висёнъёсын черламъёсты но нылпи вайыны дасяськисьёсты меӵак Иже нуиськом, — пусйиз Михаил Анатольевич. — Соин ик «скоройёсмы» тэк воксё уг сыло, шуыны луоз. Туж потэ на 3-тӥ бригада кылдытэммы…

Машинаен шугъяськонъёс кылдыны кулэ ӧвӧл, пе, — Тазалыкез утёнъя министерствое вазиськы гинэ. Но шугъяськонъёс кылдо, фельдшеръёс тырмымтэен: егит специалистъёс уг лыкто, лыктэмъёсыз но та удысысь кошко.

Специалистъёсты эмъян удысэ кыскон — «Тазалыкез утён» нацпроектэн чаклам эшшо одӥгез ужпум: ужан условиоссэс умоятоно, тодон-валанзэс будэтыны луонлыкъёс кылдытоно но мукет.

Элина Кумачёва

Удмурт Дунне
By Удмурт Дунне Октябрь 16, 2019 14:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<