Узвесь муэз медаз сапта: кызьы Камбаркаын жуг-жагез сутозы

Удмурт Дунне
By Удмурт Дунне Октябрь 21, 2019 15:36

Камбаркае люкаськылӥзы Россиысь тодосчиос, пӧртэм ёзъёслэн кивалтӥсьёссы, экологияя огазеяськонъёсы пырисьёс, кунгож сьӧрысь компаниослэн оскем муртъёссы, Камбаркаын улӥсьёс — кенешизы та городысь заводлэн ӵуказе нуналыз сярысь.

Инкуазен герӟаськем юанъёс трос калыкез сюлмаськыто.
Туспуктэм udmurt.ru сайтысь.

Камбаркаысь завод химия ож тӥрлыкез быдтӥз. Табере кыӵе производство усьтэмын луоз отын? Та юан котыр ик кенешизы ужрадэ вуэмъёс. Сое усьтӥз радиоактивной отходъёсын нюръяськонъя «РосРао» федерал компанилэн кивалтӥсезлэн воштӥсез Максим Корольков:

— Кунамы паськыт пыӵаны кутскиз «Экология» нацпроект. Со улсын быдэс Россиын радъямын луоз отходъёсты быдтонъя рос-прос программа. Одӥг кылын вераса, кунамы мытэмын луоз бадӟым выльдӥськон-чылкытатскон. Нимысьтыз саклык висъяськоз кышкыт отходъёсты сутонлы, тужгес но 1-тӥ-2-тӥ классэ пырисьёссэ, кылсярысь, луло узвесез (ртуть), неорганической сылалъёсты, кислотаосты но трос мукетсэ. Ӵапак таосты быдтыны чакламын Камбаркаысь заводын.

Нялтас вераса, Россиын кышкыт отходъёслэн 1,5 процентэз гинэ быдтӥське. Таиз но радъяське азьвыл аръёсы кылдытэм технологиосъя. Со вие ик кунгож сьӧрын та удыссы кемалась азинскемын, тужгес но Германиын. Отын кышкыт отходъёсты быдтонъя заводъёссы пуктэмын бадӟым городъёссылэн шоразы ик. Уже куто азьмынӥсь технологиосты, соин ик калыклэн тазалыкезлы кышкытлык уг кылдыто.

Соослэсь ужамзэc эскерыны ми трос пол вуылӥмы ни. Озьы ик та заводъёсты ас синмынызы адӟизы Удмуртиысь тодосчиос но, Камбаркаысь куд-ог адямиос но, экологияя огазеяськонъёслэн азьветлӥсьёссы но. Огкылэ вуэмын: Камбаркаын уже кутоно Германиысь OSCHATZ компанилэсь амалъёссэ, оборудованизэ. Пусйыны кулэ: та огазеяськонэз тодо быдэс дуннеын, оборудованиез отходъёсты сутэ, Германиын гинэ ӧвӧл, Италиын, Бразилиын, Китайын, Бельгиын. Вуоно арын апрель толэзёзь Камбаркаысь завод пумысен проект дась луыны кулэ. Дырмы трос ӧвӧл, отходъёсты быдтон борды ӝегатскытэк басьтӥськоно, — шуиз М. Корольков.

Камбаркаысь завод выль сямен ужаны дасяське.
Туспуктэм udmurt.ru сайтысь.

Ужрадэ пыриськиз та кунгожсьӧр компанилэн оскем муртэз Мария Ипатова-Арендт но. Со валэктӥз, мар бордын технологиоссылэн аспӧртэмлыксы. Кышкыт отходъёс сутӥськозы, инкуазез кырсёмытытэк: омыре номыр уз поты. Тани одӥг пумозэ отходэз сутыны кутско ке, кылдэ мукетыз кышкыт сурет — таиз быдтэмын луоз цикллэн мукет люкетаз. Тазьы луоз, кышкыт отходэз кулэ луись продукцилы пӧрмытытозь. Ужалозы кужмо гуръёс, фильтръёс. Кылсярысь, луло узвесьлэсь кылдозы алюминий, пияла, андан — таосты уже кутыны быгатозы машина поттӥсь, андан ӵыжатӥсь предприятиос. Нош неорганической сылалъёслэсь, кислотаослэсь пӧрмозы, кылсярысь, гурт хозяйствоын кутӥськись удалтытӥсь сылалъёс. Органической отходъёслэсь кылдоз сюрес лэсьтонын кутӥськись грунт. Нялтас вераса, производствоын кутӥськись фильтръёс но, ужан дырзы йылпумъяськиз ке, огъя циклысь поттэмын уз луэ: омыре поттатэк, сутӥськозы гурын ик. Калыклы кышкытлык кылдытӥсез номыр но уз лу — кӧберанэз ӧвӧл, шуиз кунгож сьӧрысь эксперт.

Максим Корольков ватсаз на: али, пе, бадӟым уж нуиське Челябинск городысь свалкаез быдтон понна. Кунамы со одӥгез бадӟымез но калыклы кышкыт луисез. Отходъёсты утялтэм бервылэз ӵоксало луоен — нош сое уже куто пӧртэм удысъёсын, солы кулэяськон бадӟым. Ӵапак таӵе объектъёсын кутыны луысал Камбаркаын отходъёсты сутыса кылдытэм грунтэз.

Озьы ужалоз рос-прос система: отходъёсты бичанэн но сутонэн гинэ уж уз йылпумъяськы, заводлэн продукциез вуоз кунысьтымы пӧртэм предприятиосы. Та ужез ас вылаз басьтоз нимысьтыз кылдытэм ёз — федерал оператор.

Валамон, калыклэн улэм-вылэмез сярысь но вунэтоно ӧвӧл. Камбаркаын выль ужан интыос кылдозы, социальной объектъёс ӝутскозы. Тужгес но бадӟым саклык висъяськоз омырез чакласа возёнлы, калыклэсь тазалыксэ эскеронлы.

Кышкыт отходъёсты Камбаркаын быдтон бордын та вакытэ тыршо «РосРАО» огазеяськонысь специалистъёс, Россиысь химияя но технологияя Д. Менделеев нимо институтысь нимо-дано тодосчиос, палэнэ уг кылё шаерысьтымы экспертъёс но. Лыдэ басьтӥсько калыклэн, экологияя огазеяськонъёслэн ӵектонъёссы, вазиськонъёссы.

— Кышкыт отходъёсты одно быдтыны кулэ, соос быдэс кунлы изъян вайыны быгатозы. Тае валаны кулэ, Удмуртиын гинэ ӧвӧл, кунамы котькудӥз улӥсь. Ӝеганы дырмы ӧз кыльы ни, — шуиз Экологияя научно-исследовательской институтлэн директорез Ольга Плямина.

Сюлэмшугъяськытӥсь юанъёсынызы тодосчиослы вазиськизы ужрадэ вуэм общественникъёс но. Соос огымысь шуизы: калыклэн та заводлы пумит мылкыдыз потэ югдурез тодымтэез бордысь. Соин ик валэктон уж нуыны кулэ. Максим Корольков пусйиз: вуоно арын февраль толэзе, Камбаркаын гинэ ӧвӧл, шаермылэн пӧртэм интыосаз но усьтӥськозы отход быдтон сярысь ивор сётӥсь центръёс. Отчы вазиськыны быгатоз котькудӥз мылкыд карись. Калыклэн ӵектонъёсыз, ӝожтӥськонъёсыз санэ басьтэмын луозы.

Елена Никитина

Удмурт Дунне
By Удмурт Дунне Октябрь 21, 2019 15:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<